ഡബ്ബിങ് ആർട്ടിസ്​റ്റ്​ അമ്പിളി അന്തരിച്ചു

തിരുവനന്തപുരം: പ്രമുഖ ഡബ്ബിങ് ആർട്ടിസ്​റ്റ്​ അമ്പിളി (51) നിര്യാതയായി. വട്ടിയൂർക്കാവ് സരസ്വതി വിദ്യാലയത്തിന് സമീപമുള്ള സ്വന്തം വസതിയായ പ്രയാഗയിൽ വ്യാഴാഴ്​ച രാത്രി എ​േട്ടാടെയായിരുന്നു അന്ത്യം. ഏറെനാളായി അർബുദരോഗത്തെതുടർന്ന് ചികിത്സയിലായിരുന്നു. നടിയും ഡബ്ബിങ് ആർട്ടിസ്​റ്റുമായ പാല തങ്കത്തി‍​െൻറ മകളാണ്. മോനിഷക്കായി എല്ലാ ചിത്രത്തിലും ശബ്​ദം നൽകിയത് അമ്പിളി ആയിരുന്നു. മലയാളം-തമിഴ് സീരിയൽ ഡബ്ബിങ് രംഗത്തും അന്യഭാഷ മൊഴിമാറ്റ ചിത്രങ്ങളിലും സജീവമായിരുന്നു.

രോഹിണി, അംബിക, റാണിപത്മിനി, പാർവതി, രഞ്‌ജിനി, ലിസി, സിതാര, ശാരി, ശോഭന, ഉർവശി, ചിപ്പി, സിതാര, ജോമോൾ, പ്രിയാരാമൻ, ശാലിനി തുടങ്ങി നിരവധി നടിമാരുടെയും വെള്ളിത്തിരയിലെ ശബ്​ദമായി മാറിയത്​ അമ്പിളിയായിരുന്നു. എട്ടുവയസ്സിൽ ‘ഭക്തകണ്ണപ്പ’ എന്ന കന്നട ചിത്രത്തി​െൻറ മൊഴിമാറ്റത്തിലൂടെയാണ് മലയാള സിനിമ ലോകത്ത് എത്തുന്നത്. ആയിരത്തോളം ചിത്രങ്ങളിൽ ശബ്​ദം നൽകിയിട്ടുണ്ട്. തമിഴിൽ ശിവരഞ്‌ജിനി, ഐശ്വര്യ തുടങ്ങി നിരവധി നടികളുടെ സിനിമാ ശബ്​ദമായി. നിരവധി മൊഴിമാറ്റചിത്രങ്ങളുടെ സ്ക്രിപ്റ്റുകൾ തയാറാക്കുന്നതിലും തിളങ്ങി. ഡബ്ബിങ് ആർട്ടിസ്​റ്റ്​ ചന്ദ്രമോഹനാണ് ഭർത്താവ്. മക്കൾ: വൃന്ദ (എസ്.ബി.ഐ വട്ടിയൂർക്കാവ്), വിദ്യ. ‍മരുമകൻ: അരവിന്ദ് (ടെക്നോപാർക്ക്). സംസ്കാരം വെള്ളിയാഴ്ച ഉച്ചക്ക് രണ്ടിന് ശാന്തികവാടത്തിൽ.