രക്ഷകരായി നെറ്റ്​ഫ്ലിക്​സ്​; ‘കപ്പേള’ ഇനി ഓൺലൈനായി കാണാം

തിരുവനന്തപുരം: കോവിഡ്​ 19 മൂലം ഏറെ നഷ്​ടം സംഭവിച്ച മേഖലയാണ്​ സിനിമരംഗം. ലോക്​ഡൗണിന്​ തൊട്ടുമുമ്പ്​ റിലീസ്​ ചെയ്​ത പടങ്ങളെയാണ്​ മഹാമാരി ഏറ്റവും കൂടുതൽ ബാധിച്ചത്​. ദേശീയ പുരസ്​കാര ജേതാവായ നടൻ മുസ്​തഫയുടെ ആദ്യ സംവിധാന സംരംഭമായ ‘കപ്പേള’ കഴിഞ്ഞ മാർച്ചിലാണ്​ തീയറ്ററിലെത്തിയത്​. മികച്ച പ്രേക്ഷകപ്രീതി സ്വന്തമാക്കാനായെങ്കിലും അഞ്ചുദിവസം മാത്രമാണ് ചിത്രം പ്രദർശിപ്പിക്കാനായത്​​. ​ ലോക്​ഡൗൺ നിയന്ത്രണങ്ങൾ നീക്കുന്ന മുറക്ക്​ വീണ്ടും പ്രദർശനത്തിനെത്തിക്കാൻ അണിയറപ്രവർത്തകർ ഒരുങ്ങുന്നതിനിടെ ചിത്രം ഉടൻ ഒ.ടി.ടി (ഓവർ ദ ടോപ്​) പ്ലാറ്റ്​ഫോമായ നെറ്റ്​ഫ്ലിക്​സിൽ ലഭ്യമാകുമെന്ന്​ സംവിധായകൻ മുസ്​തഫ ഫേസ്​ബുക്ക്​ പോസ്​റ്റിലൂടെ അറിയിച്ചു. 190 രാജ്യങ്ങളിൽ നിന്നും സിനിമ പ്രേമികൾക്ക്​ ചിത്രം ആസ്വദിക്കാനാകും. തീയറ്ററിൽ നൽകിയ പിന്തുണ ഓൺലൈൻ റിലീസിങ്​ സമയത്തും നൽകണമെന്ന്​ മുസ്​തഫ അഭ്യർഥിച്ചു. 

റെക്കോഡ്​ തുകക്കാണ്​ നെറ്റ്​ഫ്ലിക്​സ്​ കപ്പേളയുടെ അവകാശം സ്വന്തമാക്കിയതെന്നാണ്​ റിപ്പോർട്ട്​. ലോക്​ഡൗൺ തീരുന്ന മുറക്ക്​ നിരവധി ചിത്രങ്ങൾ റിലീസ്​ കാത്തുനിൽക്കുന്നത്​ തിരിച്ചടിയാകുമെന്ന കണക്കുകൂട്ടലിലാകും ചിത്രം ഓൺലൈൻ റിലീസ്​ ചെയ്യാൻ അണിയറപ്രവർത്തകർ തീരുമാനിച്ചതെന്നാണ്​ നിഗമനം. പൊതുവേ മലയാള സിനിമകൾ വാങ്ങാൻ താൽപര്യം കാണിക്കാത്ത നെറ്റ്​ഫ്ലിക്​സ്,​ കപ്പേള പോലുള്ള ചെറിയ ചിത്രങ്ങൾ സ്വന്തമാക്കാൻ താൽപര്യം കാണിച്ചതിൽ അതീവ സന്തുഷ്​ടരാണ്​ സിനിമ മേഖലയിലുള്ളവർ.  

റോഷന്‍ മാത്യൂ, ശ്രീനാഥ് ഭാസി, അന്ന ബെന്‍ എന്നിവരാണ് ചിത്രത്തിൽ പ്രധാന വേഷങ്ങള്‍ ​കൈകാര്യംചെയ്​തിരിക്കുന്നത്.സുധി കോപ്പ, തന്‍വി റാം, നീല്‍ജ, നവാസ് വള്ളിക്കുന്ന്, സുധീഷ്, നിഷാ സാരംഗ് എന്നിവരും ചിത്രത്തിൽ വേഷമിട്ടിട്ടുണ്ട്​. 
കഥാസ് അണ്‍ടോള്‍ഡിൻെറ ബാനറില്‍ വിഷ്​ണു വേണുവാണ് നിർമാണം. വിനായക്​ ശശികുമാറിൻെറ വരികൾക്ക്​ സുഷീൻ ശ്യാം സംഗീതം നിർവഹിച്ചിരിക്കുന്നു. ജിംഷി ഖാലിദാണ്​ ഛായാഗ്രഹണം. നൗഫല്‍ അബ്​ദുല്ല എഡിറ്റിങ്​ നിർവഹിച്ചിരിക്കുന്നു.