ആശ്രിതക്ക്​ ആശ്രയമായി മമ്മൂട്ടി; വീട്​ നിർമിക്കാൻ ആരാധകർ

പറവൂർ: ജന്മദിനത്തി​​െൻറ ആഘോഷങ്ങളൊക്കെ മാറ്റിവെച്ച്​ നടൻ മമ്മൂട്ടി വെള്ളിയാഴ്​ച രാവിലെ എത്തിയത്​ പറവൂർ പെരുമ്പടന്ന പാലത്തിന്​ സമീപം താമസിക്കുന്ന ആശ്രിതയുടെ കൊച്ചുകൂരയിലേക്കാണ്​. പ്രളയത്തിൽ ഇളകി​പ്പോയ, പ്ലാസ്​റ്റിക്​ ഷീറ്റ്​ വലിച്ചുകെട്ടിയ ആ വീട്ടിലേക്ക്​ ഇങ്ങനെയൊരു അതിഥിയെ ആശ്രിത സ്വപ്​നത്തിൽപോലും പ്രതീക്ഷിച്ചിട്ടില്ല. ആശ്രിതയെ നേരിൽ കാണാനും അവർക്ക്​ നിർമിച്ചുനൽകുന്ന വീടി​​െൻറ മാതൃക കൈമാറാനുമാണ്​ മമ്മൂട്ടി എത്തിയത്​.

പ്രളയക്കെടുതിയിൽനിന്ന്​ ഇനിയും കരകയറാത്ത പറവൂരിൽ രണ്ടാഴ്ചക്കുള്ളിൽ മൂന്നാം തവണയാണ് മമ്മൂട്ടി എത്തുന്നത്. താരത്തി​​െൻറ വരവ്​ നാടും ആഘോഷമാക്കി. വെള്ളിയാഴ്ച രാവിലെ 11ഒാടെ പെരുമ്പടന്ന പാലത്തിന് സമീപം ആശ്രിതയുടെ വീട്ടിൽ മമ്മൂട്ടി എത്തിയതോടെ നാട്ടുകാരും അയൽവാസികളും തടിച്ചുകൂടി. രണ്ടു മക്കള്‍ക്കും ഭർതൃമാതാവിനുമൊപ്പം പെരുമ്പടന്ന പാലത്തി​​െൻറ ഇറക്കിലെ പുറമ്പോക്കിലാണ് ആശ്രിതയുടെ താമസം. ഭർത്താവ് ഉപേക്ഷിച്ചെങ്കിലും ഭർത്താവി​​െൻറ അമ്മയെ സംരക്ഷിക്കുന്നത് ആശ്രിതയാണ്. പ്രളയത്തിൽ വീട്ടിലേക്ക്​ വെള്ളം കയറിയതോടെ കുടുംബം ദുരിതാശ്വാസ ക്യാമ്പിൽ അഭയം തേടി. വെള്ളമിറങ്ങിയപ്പോഴേക്കും വീടുനശിച്ചിരുന്നു. താൽക്കാലിക അറ്റകുറ്റപ്പണി നടത്തിയാണ്​ താമസയോഗ്യമാക്കിയത്.

ആശ്രിതയുടെ ദുരിതമറിഞ്ഞ്​ വൈറ്റില സ്വദേശിയായ പെയിൻറിങ് തൊഴിലാളി എ.കെ. സുനിൽ​ മമ്മൂട്ടിയുടെ നാടായ വൈക്കം ചെമ്പിൽ നാലു സ​െൻറ്​ ഭൂമി സൗജന്യമായി നൽകാൻ തയാറായി. വീട്​ നിർമാണം ഏറ്റെടുക്കാൻ മമ്മൂട്ടി ഫാൻസ് ആൻഡ് വെൽഫെയർ അസോസിയേഷനും രംഗത്തെത്തി. ജന്മദിന ആഘോഷങ്ങൾ ഒഴിവാക്കിയാണ്​ ആ​ശ്രിതക്ക്​ വീടുവെച്ചുകൊടുക്കാൻ മമ്മൂട്ടി തീരുമാനിച്ചത്​.

അസോസിയേഷൻ സംസ്ഥാന പ്രസിഡൻറ്​ എസ്.എസ്. അരുൺ, സെക്രട്ടറി എം.ആർ. ഷാനവാസ്, ട്രഷറർ കെ.വിനോദ്, നിർമാതാവ് ആ​േൻറാ ജോസഫ്, വി.ഡി. സതീശൻ എം.എൽ.എ, പ്രൊഡക്​ഷൻ കൺട്രോളർമാരായ ഡിക്സൺ പൊടുത്താസ്, ബാദുഷ, അലക്സ്, സംവിധായകൻ സോഹൻ സീനുലാൽ, നടൻ വിനോദ് കെടാമംഗലം എന്നിവരും മമ്മൂട്ടിക്കൊപ്പം ഉണ്ടായിരുന്നു.