മുട്ടിയിട്ട് തുറന്നില്ലേൽ ചവിട്ടിപ്പൊളിക്കണം; പുണ്യാളന്‍റെ കിടിലൻ ടീസർ 

ജയസൂര്യ-രഞ്ജിത്ത് ശങ്കര്‍ എന്നിവർ ഒന്നിച്ച ഹിറ്റ് ചിത്രമായ പുണ്യാളന്‍ അഗര്‍ബത്തീസിന്‍റെ രണ്ടാം ഭാഗമായ പുണ്യാളൻ പ്രൈവറ്റ് ലിമിറ്റഡിന്‍റെ പുതിയ ടീസർ പുറത്തിറങ്ങി. നിരന്തരം ഹര്‍ത്താലുകള്‍ നടത്തുന്ന രാഷ്ട്രീയപ്പാര്‍ട്ടികളെയും ഇഷ്ടമുള്ള ഭക്ഷണം കഴിക്കാനുള്ള സ്വാതന്ത്ര്യത്തെക്കുറിച്ചും സ്വന്തം മതമേതെന്ന് പരസ്യമായി പറയാന്‍ ആര്‍ക്കൊക്കെ ധൈര്യമുണ്ടെന്നും ജോയ് താക്കോൽക്കാരൻ ടീസറിൽ പറയുന്നു. 

ഒന്നാം ഭാഗത്തിൽ ആനപ്പിണ്ടത്തിൽ നിന്ന് അഗർബത്തിയുണ്ടാക്കാൻ നടന്ന ജോയി ഇപ്രാവശ്യം പുതിയ ഉത്പന്നവുമായാണ് വരുന്നത്. അജു വർഗീസ്, ശ്രീജിത്ത് രവി എന്നിവരോടൊപ്പം ധർമജനും ഇപ്രാവശ്യം ജോയിയോടൊപ്പമുണ്ട്.  

ഡ്രീംസ് ആന്‍ഡ് ബിയോണ്ടിന്‍റെ ബാനറില്‍ ജയസൂര്യയും രഞ്ജിത്ത് ശങ്കറും ചേര്‍ന്നാണ് ചിത്രം നിര്‍മ്മിക്കുന്നത്. ജയസൂര്യയുടെയും രഞ്ജിത്തിന്‍റെയും വിതരണക്കമ്പനിയായ പുണ്യാളൻ സിനിമാസാണ് ചിത്രം വിതരണത്തിനെത്തിക്കുക. 

2013 ലാണ് പുണ്യാളൻ അഗർബത്തീസ് പുറത്തിറങ്ങിയത്. നൈല ഉഷയായിരുന്നു നായിക.