ഫെമിനിസം എന്ന വാക്ക്​ എന്താണെന്നറിയാമോ? മമ്മുട്ടി ആരാധികക്ക്​ മറുപടി

മമ്മുട്ടി ചിത്രം കസബയെ വിമർശിച്ച പാർവതിക്കെതിരെ കടുത്ത വിമർശനങ്ങളാണ്​ സാമൂഹിക മാധ്യമങ്ങളിൽ നടക്കുന്നത്​. ഇതിൽ സാമൂഹിക മാധ്യമങ്ങളിൽ ചർച്ചയായതായിരുന്നു സുജ എന്ന മമ്മുട്ടി ആരാധികയുടെ കുറിപ്പ്​. പാർവതിയെ മാത്രമല്ല മറ്റ്​ താരങ്ങളായ റിമ കല്ലിങ്കൽ, ഗീതു മോഹൻദാസ്​ എന്നിവ​രെയും സുജ വിമർശിച്ചിരുന്നു. 

സുജയുടെ ഫേസ്​ബുക്ക്​​പോസ്​റ്റിനെതിരെ പാർവതി മറുപടിയൊന്നും പറഞ്ഞിരുന്നില്ല. എന്നാൽ സുജയുടെ പോസ്​റ്റിനെ വിമർശിക്കുന്ന തോമസ്​ എന്നയാളുടെ പോസ്​റ്റ്​ ട്വിറ്ററിലൂടെ പങ്കുവെച്ചിരിക്കുകയാണ്​ പാർവതി. പോസ്​റ്റ്​ പങ്കുവെക്കുന്നതിനോടൊപ്പം തോമസിന്​ നന്ദിയും രേഖപ്പെടുത്തിയിട്ടുണ്ട്​.

സുജ താങ്കളുടെ പോസ്​റ്റ്​ എന്നെ ഭയപ്പെടുത്തുന്നു. ഒരു നടിക്കു നേരെ നടക്കുന്ന സ്​ത്രീവിരുദ്ധമായ ആക്രമണങ്ങളെ അവർ ഹുക്ക വലിച്ചു ചെറിയ വസ്​ത്രം ധരിച്ചു എന്നീ കാരണങ്ങളാൽ ന്യായീകരിക്കാൻ കഴിയുന്നതെങ്ങനെയെന്ന്​ തോമസ്​ ട്വീറ്റിലൂടെ ചോദിക്കുന്നു. എന്നെ അതിലേറെ ഭയപ്പെടുത്തുന്നത്​ ഇൗ സ്​ത്രീവിരുദ്ധതതയ്​ക്ക്​ കിട്ടുന്ന അഭിനന്ദനങ്ങളും കൈയ്യടികളുമാണ്​. 

നിങ്ങൾക്ക്​ ഫെമിനിസം എന്താണെന്ന്​ അറിയുമോ​?. ഫെമിനിസം എന്നാൽ തുല്യതയാണ്​. ഒരു പുരുഷൻ നഗ്​നായി നടക്കുകയും പുകവലിക്കുകയും മദ്യപിക്കുകയും ചെയ്യുന്നു. ഇതേ കാര്യങ്ങൾ സ്​ത്രീ ചെയ്യു​േമ്പാഴാണ്​ അത്​ പ്രകോപനപരമാവുന്നതെന്നും തോമസ്​ ട്വീറ്റിൽ ചൂണ്ടിക്കാട്ടുന്നു.

പാർവതി അഭിപ്രായം ഒരു പുരുഷനാണ്​ പറഞ്ഞിരുന്നതെങ്കിൽ എത്രമാത്രം അഭിനന്ദനങ്ങൾ അയാൾക്ക്​ ലഭിച്ചേനെ. സിനിമയിലെ ചുംബന രംഗങ്ങൾ അവരെ വിമർശിക്കുന്നതിനുള്ള ഒരു കാരണമാകുന്നതെങ്ങനെ? സിനിമയിൽ ചുംബിക്കുന്നത്​ കുറ്റം, പക്ഷേ സ്​ത്രീവിരുദ്ധ സംഭാഷണങ്ങൾ ഉള്ളത്​ മഹത്തരം ആണെന്നും അല്ലേ. വിദ്യാ സമ്പന്നരായ ഇൗ സമൂഹത്തിന്​ ഇത്​ യോജിക്കുന്നത്​ തന്നെയെന്നും തോമസ്​ പരിഹസിച്ചു.