നടൻ റിസബാവക്ക് ആശ്വാസം; അറസ്​റ്റ്​ വോറന്‍റ് പിൻവലിച്ചു

കൊച്ചി: നടൻ റിസബാവയെ അറസ്​റ്റ്​ ചെയ്​ത്​ ഹാജരാക്കണമെന്ന ഉത്തരവ്​ കോടതി പിൻവലിച്ചു. റിസബാവ നേരിട്ട്​ കോടതിയിൽ ഹാജരായതിനെത്തുടർന്നാണ്​ എറണാകുളം ജുഡീഷ്യൽ ഫസ്​റ്റ്​ ക്ലാസ്​ മജിസ്​ട്രേറ്റ്​ (എൻ.​െഎ ആക്​ട്​) വാറണ്ട്​ തിരിച്ചുവിളിച്ചത്​.

2014 ൽ എളമക്കര സ്വദേശിയിൽനിന്ന്​ 11 ലക്ഷം രൂപ വാങ്ങിയ ശേഷം കബളിപ്പിച്ചെന്നാണ്​ കേസ്​. പരാതിക്കാരനായ സാദിഖിന്റെ മകനും റിസബാവയുടെ മകളുമായി വിവാഹമുറപ്പിച്ചിരുന്നത്രേ. ഈ പരിചയത്തില്‍ റിസബാവ 11 ലക്ഷം രൂപ സാദ്ദിഖില്‍ നിന്ന് കടം വാങ്ങി​െയന്നാണ്​ പരാതിക്കാരൻ പറയുന്നത്​.

പലതവണ തുക ആവശ്യപ്പെട്ട് റിസബാവയെ സമീപിച്ചെങ്കിലും കുറച്ചു സാവകാശം ചോദിക്കുകയാണുണ്ടായത്. അവസസാനം 2015 ജനുവരിയില്‍ സാദിഖിന് ഒരു ചെക്ക് നല്‍കിയിരുന്നു. പറഞ്ഞ കാലാവധി കഴിഞ്ഞതോടെ സാദിഖ് ചെക്ക് ബാങ്കില്‍ കളക്ഷനയച്ചു. എന്നാല്‍ അത് മടങ്ങി. ഇതോടെയാണ്​ സാദിഖ്​ കേസ്​ നൽകിയത്​.

പലതവണ നോട്ടീസ്​ അയച്ചിട്ടും ഹാജരാക്കാത്തതിനെത്തുടർന്ന്​ റിസബാവയെ അറസ്​റ്റ്​ ചെയ്​ത്​ ഹാജരാക്കാൻ വാറണ്ട്​ പുറപ്പെടുവിച്ചിരുന്നു. ഇതോടെയാണ്​ നേരിട്ട്​ എത്തിയത്​. കേസ്​ ഇൗമാസം 26 ന്​ വീണ്ടും വാദം കേൾക്കും.