ചമയങ്ങളുടെ സുൽത്താൻ; മമ്മൂട്ടിയെ കുറിച്ചുള്ള ഡോക്യുമെൻററി റിലീസ്​ ചെയ്​തു

മലയാളത്തി​​െൻറ മഹാനടൻ മമ്മൂട്ടിയുടെ ജീവിതം പറയുന്ന ഡോക്യുമെന്‍ററി 'ചമയങ്ങളുടെ സുല്‍ത്താന്‍' പുറത്തിറങ്ങി. പബ്ലിസിറ്റി ഡിസൈനര്‍ ആയ സാനി യാസ് എഴുതി, സംവിധാനം ചെയ്ത ഡോക്യുമെന്‍ററി മലയാള സിനിമയിലെ ഒട്ടുമിക്ക താരങ്ങളും സംവിധായകരും അണിയറപ്രവർത്തകരും അവരുടെ സമൂഹ മാധ്യമ പേജുകളിലൂടെയാണ്​ റിലീസ്​ ചെയ്​തത്​. നടി അനു സിത്താരയാണ് മമ്മൂട്ടിയുടെ ജീവിതത്തിലെ സംഭവബഹുലമായ അനുഭവങ്ങള്‍ പ്രേക്ഷകരിലേക്കെത്തിക്കുന്നത്. മമ്മൂട്ടിയുടെ സിനിമയിലേക്കുള്ള ആദ്യ ചുവടുവെപ്പും അതിന് വേണ്ടിയുള്ള ശ്രമങ്ങളും ഡോക്യുമെന്‍ററി മികച്ച രീതിയില്‍ തന്നെ ആവിഷ്ക്കരിക്കുന്നു.

സമീപകാലത്ത്​ മമ്മൂട്ടിയുടേതായി വൈറലായ ചില പോസ്റ്ററുകൾക്ക്​ പിന്നിൽ സാനി യാസ്​ ആയിരുന്നു. മമ്മൂട്ടിയെ ഫിദല്‍ കാസ്ട്രോയായും ജോസഫ് സ്റ്റാലിനായും പിണറായി വിജയനായും മാറ്റി ഫേസ്​ബുക്കിൽ പങ്കുവെച്ചതോടെ അവരുടെ ജീവിതം അഭ്രപാളിയിലാക്കുകയാണെങ്കിൽ കഥാപാത്രമാവാൻ മമ്മൂട്ടിയല്ലാതെ മറ്റൊരു താരമില്ലെന്ന്​ വരെ ആളുകൾ പറഞ്ഞിരുന്നു. 

വൈശാഖ് സി. വടക്കേവീട്, സഫ സാനി എന്നിവര്‍ ചേർന്ന് നിർമിച്ചിരിക്കുന്ന ഡോക്യുമെന്‍ററിയുടെ സംഗീതം സുമേഷ് സോമസുന്ദർ ആണ്. വരികള്‍ എഴുതിയിരിക്കുന്നത് സരയു മോഹന്‍. ലി​േൻറാ കുര്യനും സാനിയാസും ഒരുമിച്ചാണ് എഡിറ്റിംഗ് നിര്‍വ്വഹിച്ചിരിക്കുന്നത്. ഛായാഗ്രഹണം സിനാന്‍ ചത്തോലി, വിഷ്ണു പ്രസാദ്. അസോസിയേറ്റ് ഡയറക്ടര്‍ തേജസ് കെ ദാസ്. വിവരണം ഷഹനീര്‍ ബാബു.