ചക്രവർത്തിയുടെ 40 പാട്ടുവർഷങ്ങൾ...

‘സത്യത്തിലിക്കാണും ലോകവും നമ്മളും
നിത്യവിസ്മൃതിയിൽ അലിഞ്ഞു പോകും
സ്വപ്നങ്ങൾ തീർത്ത സങ്കൽപ്പ ചിത്രങ്ങൾ
എത്ര മായ്ച്ചാലും മായുകില്ല’

പാട്ടെഴുത്തിന്‍റെ 40ാം വർഷത്തിലും ഷിബു ചക്രവർത്തിയുടെ തൂലിക പാടുകയാണ്​. മലയാളത്തിന്‍റെ കഥാവൃക്ഷം ടി. പത്​മനാഭന്‍റെ സാഹിത്യവും ജീവിതവും അഭ്രപാളിയിലേക്ക്​ ദൃശ്യപ്പെടുത്തുന്ന സുസ്​മേഷ്​ ചന്ത്രോത്തിന്‍റെ ‘നളിനകാന്തി’ക്ക്​ വേണ്ടി. മലയാളിയുടെ പാട്ടോർമ്മകളിൽ​ ‘പാടം പൂത്ത കാല’വും ‘ദൂരെ കിഴക്ക്​ ദിക്കിൻ മാണിക്ക ചെമ്പഴുക്ക’യും ‘മനസ്സിൻ മടിയിലെ മാന്തളിരും’ സമ്മാനിച്ച ഷിബുവിന്‍റെ വരികളുടെ ഈണം ഇന്നുമുണ്ട്​​. അദ്ദേഹം പുതുതായി കുറിച്ചത്​ പോലെ കേൾവിയുടെ ഗൃഹാതുരമായ കാൻവാസിൽ എത്ര മായ്​ച്ചാലും മായാത്ത, ഒരുപാട്​ വികാരങ്ങളുടെ നിറം കലർന്ന ഗാനചിത്രങ്ങളായി അവ തെളിഞ്ഞുനിൽക്കുന്നു. ’80കളുടെ മധ്യത്തിൽ മലയാള സിനിമയിലേക്ക്​​ കടന്നുവന്ന്​ ഹിറ്റ്​ ഗാനങ്ങൾ എഴുതിയ ഷിബു ചക്രവർത്തിയുടെ പേര്​ പോലെ തന്നെ വ്യത്യസ്തതമായിരുന്നു അദ്ദേഹത്തിന്‍റെ പാട്ടുകളും എഴുത്തിന്‍റെ ലോകവും. സിനിമക്ക്​ പാട്ട്​ മാത്രമല്ല കലയും കഥയും തിരക്കഥയുമെല്ലാം ഷിബു ഒരുക്കി. എണ്ണത്തിൽ കുറവെങ്കിലും എഴുതിയ ഗാനങ്ങളെല്ലാം ആ കാലം ഏറ്റുപാടി. ‘ഓർമ്മകൾ ഓടിക്കളിക്കുവാൻ എത്തുന്ന’, നാല്​ പതിറ്റാണ്ട്​ നീണ്ട ആ എഴുത്തുകാലത്തെയും ജീവിതത്തെയും കുറിച്ച്​​​ ഷിബു മനസ്സ്​ തുറക്കുന്നു...

പാട്ടിന്‍റെ ബാല്യം

ബാല്യത്തിന്‍റെ ഓർമകൾക്ക്​ കലയുടെയും സാഹിത്യത്തിന്‍റെയും ഗന്ധമുണ്ട്​. മുത്തച്ഛൻ എരൂർ വാ​സുദേവ്​ കമ്യൂണിസ്​റ്റ്​ നേതാവും നാടക കലാകാരനുമായിരുന്നു. എറണാകുളത്തെ ആദ്യ നാടക, സിനിമ ഔട്ട്​ഡോർ പബ്ലിസിറ്റി സ്ഥാപനത്തിന്‍റെ ഉടമ പ്രവദ സുകുമാരൻ പിതൃസഹോരനാണ്​. പാട്ടില്ലാത്ത അച്ഛനെക്കുറിച്ച്​ എനിക്ക്​ ചിന്തിക്കാനാവില്ല. നാടക ഗാനങ്ങളെയും സൈഗാളിന്‍റെ പാട്ടുകളെയും ഒരുപാട്​ ഇഷ്ടത്തോടെ കൂടെ കൊണ്ടുനടന്ന ഒരാൾ. ജോലി കഴിഞ്ഞെത്തുന്ന സന്ധ്യാ സമയങ്ങളിൽ അച്ഛൻ ഞങ്ങൾ മക്കളുടെ കുഞ്ഞിക്കൈകൾ പിടിച്ച്​ മുറ്റത്തുകൂടി പാട്ടുപാടി​ നടക്കും. അപ്പോൾ എല്ലാ പേടിയും മാറും. അച്ഛൻ ഒരുപാട്​ കാലം സുഖമില്ലാതെ കിടന്നു. ഞാൻ ആ മുറിയുടെ വെളിയിൽ പോയി വെറുതെ ഇരിക്കും. ‘കായലിനക്കരെ പോകാനെനിക്കൊരു കളിവള്ളമുണ്ടായിരുന്നു’..., ‘ചക്കരപ്പന്തലിൽ തേൻമഴ ചൊരിയും...’അച്ഛൻ മൂളിക്കൊണ്ടിരിക്കും. ആ ശബ്​ദത്തിന്​ വല്ലാത്തൊരു വിഷാദഛായ ഉണ്ടായിരുന്നു. അവിടെ നിന്നൊക്കെയാകാം പാട്ടും എഴുത്തുമൊക്കെ എന്‍റെ മനസ്സിൽ കയറിയത്​​. ​ അഞ്ചാം ക്ലാസ്​ മുതൽ പലതും എഴുതി. പിന്നീട്​ ചിത്രകഥകൾക്ക്​ സ്ക്രിപ്​റ്റും കുട്ടികളുടെ മാസികകളിൽ കഥയുമെഴുതി.

വാശിപ്പുറത്ത്​ കുറിച്ച വരികൾ

കാസറ്റുകളുടെ കാലമായിരുന്നു അത്​. എറണാകുളത്തെ എല്ലാ കെട്ടിടങ്ങളുടെയും ഗോവണിച്ചുവട്ടിൽ ഒരു​ കാസറ്റ്​ കടയുണ്ടാകും. തിരക്കഥാകൃത്ത്​ ഡെന്നീസ്​ ജോസഫും ഞാനും ഗായത്രി അശോകും രഞ്ജിനി കാസറ്റ്​ ഉടമ ഉസ്മാനും അടങ്ങുന്ന സുഹൃദ്​സംഘത്തിന്​ പാട്ടിനോട്​ ഭ്രാന്തമായ അഭിനിവേശമായിരുന്നു. എറണാകുളം എസ്​.ആർ.എം റോഡിൽ അന്ന്​ ഡെന്നീസിന്​ പ്രസ്സുണ്ട്​. അവിടെ വട്ടം കൂടി പാട്ടിനെക്കുറിച്ച്​ പറഞ്ഞും മേശപ്പുറത്ത്​ താളം പിടിച്ച്​ പാടിയുമാണ്​ ഞങ്ങൾ സമയം ചെലവഴിക്കുക. സിനിമാഗാനങ്ങളുടെ ഈണങ്ങൾ തിരിച്ചിട്ട്​ പാടും. അതിനനുസരിച്ച്​ ഞാൻ വരികളെഴുതും. യാത്രകളിലൊക്കെ ഞങ്ങൾ ഇങ്ങനെ നിരവധി പാട്ടുകളുണ്ടാക്കി.

ഒരിക്കൽ ‘വെളിച്ചമേ നയിച്ചാലും’ എന്ന ക്രിസ്തീയ ഭക്​തിഗാന ആൽബത്തിന്‍റെ കമ്പോസിങ്​ നടക്കുന്നു​. അതിന്​ വേണ്ടി എഴുതിയ ഗാനങ്ങൾ നോക്കാൻ എന്നെ ഏൽപ്പിച്ചു ഡെന്നീസ്​. ‘ഇതൊക്കെ എന്ത്’​ എന്ന എന്‍റെ മുഖത്തെ പുച്ഛഭാവം കണ്ടിട്ടാകാം നിനക്ക്​ ഇങ്ങനെയൊന്ന്​ എഴുതാമോ എന്ന്​ ഡെന്നീസിന്‍റെ വെല്ലുവിളി. ഇതിലും നന്നായി എഴുതാമെന്ന്​ ഞാൻ. അവിടെ കൂടിയവരെല്ലാം കേൾക്കെയാണ്​​ അത്​ പറഞ്ഞത്​. ഇനി എഴുതാതിരിക്കാനാവില്ല. വാശിയോടെ ഞാൻ കുറിച്ചു: ‘എന്‍റെ വിശ്വാസമാം പാറയിൽ നിന്‍റെ ദേവാലയം നീ പണിയൂ, നിത്യം മണിസ്വനം നിൻ വചനം, ഹൃത്തിൽ മുഴങ്ങുവാൻ നീ കനിയൂ..’. കോട്ടയം ജോയിയാണ്​ സംഗീതം. ആ വരികളുടെ ഈണം എ​ന്നെ അത്​ഭുതപ്പെടുത്തി. അതാണ്​ പുറത്തുവന്ന ആദ്യ ഗാനം. മറ്റുള്ളവക്കൊപ്പം ട്യൂണിനനുസരിച്ച്​​ ഞാൻ എഴുതിയ പാട്ടുകളും ആ കാസറ്റിൽ ഉൾപ്പെടുത്തി.

ആദ്യ എഴുത്ത്​​ ഇല്ലാത്ത സിനിമക്ക്​

രഞ്ജിനി കാസറ്റ്​ സ്വന്തമായി പാട്ടുകളിറക്കാൻ തീരുമാനിക്കുന്നു. ഏത്​ തരം പാട്ട്​ വേണം. സിനിമാ പാട്ടുകൾക്കാണ്​ ഡിമാൻഡ്​. എന്തുകൊണ്ട്​ സിനിമാപ്പാട്ട്​ തന്നെ ഇറക്കിക്കൂടാ എന്ന്​ ഡെന്നീസ്​​. അതിന്​ സിനിമ എവിടെ എന്ന്​ ചോദ്യത്തിന്​ കേൾക്കുന്ന എല്ലാ പാട്ടും സിനിമയിൽ വന്നതാണോ എന്നും സിനിമ ഇറങ്ങാതെ ഹിറ്റായ പാട്ടുകളുമില്ലേ എന്നുമായി ഡെന്നീസിന്‍റെ മറുചോദ്യം​​. അല്ലിമലർക്കാവ്, പ്രേമകഥകൾ എന്നിങ്ങനെ രണ്ട്​ സിനിമകൾ വെറുതെ പ്രഖ്യാപിച്ചു. ഒരിക്കലും ചിത്രീകരിക്കാൻ ഉദ്ദേശ്യമില്ലാത്ത സിനിമകൾ. ഞാൻ എഴുതിയ പാട്ടുകൾ ആ സിനിമകളുടേതായി രഞ്ജിനി കാസറ്റ്​ പുറത്തിറക്കി. അങ്ങനെ, ഇല്ലാത്ത സിനിമക്കായി പാ​ട്ടുകളെഴുതിയാണ്​ ഈ രംഗത്തേക്കുള്ള വരവ്​. ആ പരീക്ഷണം വിജയമായിരുന്നു. നേരമ്പോക്കിനായി ഞങ്ങൾ ഒരുക്കിവെച്ച പാട്ടുകളിൽ നിന്ന്​ തെരഞ്ഞെടുത്തവ പിന്നീട്​ ഓണപ്പാട്ടുകളായി പുറത്തിറക്കിയപ്പോഴും ജനം സ്വീകരിച്ചു.

ആരാണീ ‘ചക്രവർത്തി’

പ്രമുഖ സ്ഥാപനങ്ങളുടെ പരസ്യങ്ങൾക്കായി കുറേ ജിംഗിളുകൾ എഴുതി. പിന്നീടാണ്​ പാട്ടെഴുത്തിലെത്തിയത്​. സംഗീത സംവിധായകർ ഒരുക്കുന്ന ട്യൂണിനനുസരിച്ച്​ പാട്ടെഴുതുന്നതായിരുന്നു എന്‍റെ രീതി. കവികളല്ലാത്തവർ പാട്ടെഴുതുന്നു എന്ന്​ ആക്ഷേപം വന്നപ്പോൾ ഒരിക്കലും കവിത എഴുതുന്നില്ലെന്ന്​ തീരുമാനിച്ചു. ഞാൻ എഴുതുന്നതൊന്നും കവിതയല്ല. ഇതുവരെ അച്ചടിക്കാനായി ഒന്നും നൽകിയിട്ടില്ല. പാട്ടെഴുത്ത്​ അത്ര നിലവാരമുള്ള പരിപാടിയായി തോന്നിയിട്ടുമില്ല. അതൊരു അപ്ലൈഡ്​ ആർട്ടാണ്​. പക്ഷേ, പാട്ടിൽ കാവ്യാംശം വേണം. എഴുത്തിലേക്ക്​ കടന്നപ്പോൾ ഒളിച്ചിരിക്കാൻ ഒരു പേര്​ വേണമെന്ന്​ തോന്നി. മറ്റുള്ളവർ തിരിച്ചറിയാതിരിക്കാനായിരുന്നു അത്​. ആയിടക്കാണ് രവീന്ദ്രനാഥ ടാഗോറിന്‍റെ ‘ദ ഹോം കമിങ്’​ എന്ന കഥ വായിച്ചത്​. ബംഗാളിലെ ഉൾഗ്രാമത്തിൽ നിന്ന്​ കൊൽക്കത്തയിൽ പഠിക്കാനെത്തി നഗരജീവിതത്തോട്​​ പൊരുത്തപ്പെടാനാകാതെ എല്ലാവരിൽ നിന്നും ഒറ്റപ്പെട്ട്​ ഒടുവിൽ ന്യൂമോണിയ ബാധിച്ച്​​ മരിച്ചുപോയ ഫാതിക്​ ചക്രവർത്തി എന്ന യുവാവിന്‍റെ കഥ ഏറെ സ്വാധീനിച്ചു. മനസ്സിനെ നൊമ്പരപ്പെടുത്തിയ ഒരു ജീവിതം. കോളജ്​ കാലം വരെ ഞാനും അന്തർമുഖനായിരുന്നു. മാനസികമായി അത്രമേൽ ഐക്യപ്പെട്ട ആ കഥാപാത്രത്തെ എന്‍റെ പേരിനൊപ്പം ​ചേർത്തുവെച്ചു. അങ്ങനെ ഷിബു ‘ചക്രവർത്തി’യായി.

‘ഉപഹാര’ത്തിൽ തുടക്കം

പാട്ടെഴുതിയ ആദ്യ സിനിമ സാജന്‍റെ സംവിധാനത്തിൽ 1985ൽ പുറത്തുവന്ന ‘ഉപഹാര’മായിരുന്നു. ജോൺസണായിരുന്നു സംഗീതം. തുടർന്ന്​ തിരക്കേറി. ജോഷിയുടെയും പ്രിയദർശന്‍റെയും ചിത്രങ്ങളായിരുന്നു ഏറെയും. ഔസേപ്പച്ചനാണ്​ കൂടുതൽ ഗാനങ്ങൾക്കും ഈണമിട്ടത്​. ദൂരെ മാമലയിൽ (വീണ്ടും), ചെല്ലച്ചെറു വീട്​ തരാം (ന്യായവിധി), പൂന്തെന്നലേ നീ (സായംസന്ധ്യ), വിണ്ണിലെ ഗന്ധർവ വീണകൾ (രാജാവിന്‍റെ മകൻ), പൂങ്കാറ്റേ പോയി ചൊല്ലാമോ, ചെമ്പരത്തിപ്പൂവേ ചൊല്ല്​ (ശ്യാമ), പൂക്കൈത പൂക്കുന്ന (ജനുവരി ഒരു ഓർമ്മ), ഓർമ്മകൾ ഓടിക്കളിക്കുവാനെത്തുന്നു (മുകുന്ദേട്ടാ സുമിത്ര വിളിക്കുന്നു), ഒരുകിളി ഇരുകിളി മുക്കിളി (മനു അങ്കിൾ), ഈറൻ മേഘം പൂവും കൊണ്ട്​, പാടം പൂത്ത കാലം (ചിത്രം), രാവിൽ പൂന്തേൻ (നാടുവാഴികൾ), അന്തിപ്പൊൻ വെട്ടം (വന്ദനം), പിച്ചകപ്പൂങ്കാവുകൾക്കുമപ്പുറം (നമ്പർ 20 മ​ദ്രാസ്​ മെയിൽ), തുമ്പിപ്പെണ്ണേ വാവാ (ധ്രുവം), മനസ്സിൻ മടിയിലെ മാന്തളിരിൽ (മാനത്തെ വെള്ളിത്തേര്​), മഴ പെയ്ത്​ മാനം (ഒരു അഭിഭാഷകന്‍റെ കേസ്​ ഡയറി), കിനാവിലെ ജനാലകൾ (പ്രാഞ്ചിയേട്ടൻ)...തുടങ്ങി ‘പവി ​കെയർ ടേക്കർ’ വരെ നൂറോളം ചിത്രങ്ങളിലായി മു​ന്നൂറോളം ഗാനങ്ങൾ. 99 ശതമാനവും ട്യൂണിട്ട ശേഷം എഴുതിയവയാണ്​. ഏതാനും ആൽബങ്ങൾക്കായും പാട്ടുകളെഴുതി. അഥർവ്വം, മനു അങ്കിൾ, ചുരം, ഏഴരക്കൂട്ടം, സാമ്രാജ്യം, ഓർക്കാപ്പുറത്ത്, അഭയം, ഡോൺ ബോസ്​കോ തുടങ്ങി 20ഓളം ചിത്രങ്ങൾക്ക്​ തിരക്കഥയൊരുക്കി. മീഡിയ വൺ, കൈരളി, അമൃത ചാനലുകളിൽ ​​​​പ്രോഗ്രാം ഹെഡായും പ്രവർത്തിച്ചു. അക്കാലത്ത്​ വാണിജ്യ സിനിമകൾ അവാർഡുകൾക്ക്​ അയച്ചിരുന്നില്ല. അതുകൊണ്ട്​തന്നെ എന്‍റെ പാട്ടുകൾ അവാർഡിന്​ പരിഗണിക്കപ്പെട്ടില്ല. അംഗീകാരങ്ങൾ കിട്ടാത്തതിൽ സങ്കടം തോന്നിയിട്ടുമില്ല.

ഒരു പാട്ട്​ രണ്ടായി പിരിഞ്ഞ കഥ

‘മുകുന്ദേട്ടാ സുമിത്ര വിളിക്കുന്നു’ എന്ന ചിത്രത്തിലെ ‘ഓർമ്മകൾ ഓടിക്കളിക്കുവാനെത്തുന്നു’ ആസ്വാദകർ ഏറെ ഇഷ്ടത്തോടെ ഏറ്റെടുത്ത പാട്ടാണ്​​. ഒരു തർക്കത്തിനൊടുവിൽ രണ്ടായി പിരിയേണ്ടിവന്ന കഥ അതിന്​ പറയാനുണ്ട്​. ചിത്രത്തിൽ ശ്രീനിവാസൻ ചെയ്ത വേഷമാണ്​ ആദ്യം മോഹൻലാലിന്​ നിശ്​ചയിച്ചിരുന്നത്​. സഹോദരിയുമായുള്ള ആ കഥാപാത്രത്തിന്‍റെ വാത്സല്യമൂറുന്ന ആത്​മബന്ധമായിരുന്നു പാട്ടിന്‍റെ സിറ്റുവേഷൻ. പല്ലവിക്ക്​ ശേഷം ആദ്യ ചരണത്തിനായി ‘കർക്കിടരാവിന്‍റെ കൽപ്പടവിൽ വന്ന്​ കാലം കടലാസ്​ തോണി കളിച്ചു, രാവ്​ വെളുക്കുവാൻ ചോരുന്ന കൂരയിൽ കൂനിയിരുന്നു ബാല്യം, ഇന്നും ഓർമക​ൾക്കെന്ത്​ ബാല്യം’ എന്നും രണ്ടാം ചരണമായി ‘എന്നനുജത്തിക്ക്​ പൂനിലാവിൽ നിന്ന്​ പൊന്നിൻ ഉടയാട തീർത്തെടുത്തു, വാനിടം നക്ഷത്ര വൈഡ്യൂര്യ രത്നത്താൽ മാല കൊരുക്കയല്ലേ, എന്‍റെ ഓമനക്കിന്ന്​ ചാർത്താൻ’ എന്നുമാണ്​ എഴുതിയത്​. ഔസേപ്പച്ചൻ ഈണമിട്ട പാട്ട്​ എം.ജി. ശ്രീകുമാർ മനോഹരമായി പാടി. മദ്രാസിലെ റെക്കോർഡിങ്​ കഴിഞ്ഞപ്പോൾ ചിത്രത്തി​ന്‍റെ സംവിധായകൻ പ്രിയദർശൻ ഒരുപാട്​ അഭിനന്ദിച്ചു. അതിരുവിട്ട ആ പ്രശംസയിൽ ചെറിയ പന്തികേട്​ തോന്നി. പിന്നാലെ പ്രിയൻ പറഞ്ഞു: ‘സിനിമയുടെ സ്​​ക്രിപ്​റ്റിൽ ഒരു മാറ്റമുണ്ട്​. പുതിയ സ്ക്രിപ്​റ്റിൽ മോഹൻലാലിന്​ സഹോദരിയില്ല. കാമുകിയാണുള്ളത്​. പാട്ട്​ മാറ്റിയെഴുതണം’. ഒരുപാട്​ ഇഷ്ടപ്പെട്ട്​ എഴുതിയതാണ്​. പറ്റില്ലെന്ന്​ ഞാൻ തീർത്ത്​ പറഞ്ഞു. എന്നെ അനുനയിപ്പിക്കാൻ ഔസേപ്പച്ചനെ ഏൽപ്പിച്ചു. അദ്ദേഹം എന്നെയും കൂട്ടി മറീന ബീച്ചിലെത്തി. ഔസേപ്പച്ചൻ പറയുന്നതൊന്നും ഞാൻ കേൾക്കാൻ തയാറായിരുന്നില്ല. നിർബന്ധം മുറുകിയപ്പോൾ മനസ്സില്ലാ മനസ്സോടെ എനിക്ക്​ വഴങ്ങേണ്ടി വന്നു. തീരത്തടിഞ്ഞ ഒരു മരത്തടിയിലിരുന്ന്​ ഞാൻ പുതിയ വരികൾ പറഞ്ഞുകൊടുത്തു. ആദ്യ ചരണം ‘നിന്നെയണിയിക്കാൻ താമര നൂലിനാൽ ഞാ​നൊരു പൂത്താലി തീർത്തുവെച്ചു, നീ വരുവോളം വാടാതിരിക്കുവാൻ ഞാനെടുത്തുവെച്ചു, എന്‍റെ ഹൃത്തിൽ എടുത്തുവെച്ചു’ എന്നും രണ്ടാമത്തേത്​ ‘മാധവം മാഞ്ഞുപോയ്​ മാമ്പൂ കൊഴിഞ്ഞുപോയ്, പാവം പൂങ്കുയിൽ മാത്രമായി, പണ്ടെന്നോ പാടിയ പഴയൊരാ പാട്ടിന്‍റെ ഈണം മറന്നുപോയി, അവൻ പാടാൻ മറന്നുപോയി’ എന്നും മാറ്റിയെഴുതി. രണ്ടാമതെഴുതിയതാണ്​ സിനിമയിൽ വന്നത്​. ആദ്യത്തേത്​ കാസറ്റിൽ ഉൾപ്പെടുത്തി.

ഒരു അഭിഭാഷകന്‍റെ കേസ്​ ഡയറിയിലെ എല്ലാ പാട്ടുകളുടെയും റെക്കോർഡിങ്​ പൂർത്തിയാക്കി മദ്രാസിൽ നിന്ന്​ നാട്ടിലേക്ക്​ മടങ്ങാൻ നിൽക്കുമ്പോഴാണ്​ തിരക്കഥാകൃത്ത്​ എസ്​.എൻ. സ്വാമി ഒരു പാട്ട്​ കൂടി വേണമെന്ന്​ പറയുന്നത്​. എനിക്ക്​ അത്യാവശ്യമായി നാട്ടിൽ എത്തേണ്ടതുണ്ട്​. ഇനിയും അവിടെ തങ്ങാനാവില്ല. കാര്യം പറഞ്ഞിട്ടും സ്വാമി വിടുന്നില്ല. ഒടുവിൽ സംഗീത സംവിധായകൻ രവീന്ദ്രൻ ഇടപെട്ടു. ‘നീ വരികൾ എഴുതിത്തന്ന്​ മടങ്ങിക്കോളൂ, ബാക്കി ഞാൻ ഏറ്റു’ എന്ന്​ പറഞ്ഞു രവീന്ദ്രൻ. അങ്ങനെ എഴുതിയതാണ്​ ‘മഴ പെയ്ത്​ മാനം തെളിഞ്ഞ നേരം’ എന്ന പാട്ട്​. ഹൃദയത്തിൽ തൊടുന്ന ഈണം. അങ്ങേയറ്റം ഭാവ തീവ്രതയോടെ​ യേശുദാസ്​ ആലപിച്ചു​. പക്ഷേ, പാട്ടിന്​ സിനിമയിൽ ഇടം ലഭിച്ചില്ല. ‘ചിത്രം’ സിനിമയിലെ ഗാനങ്ങൾ ഇറങ്ങിയപ്പോൾ എറണാകുളത്തെ വീട്ടിലേക്ക്​ അഭിനന്ദനക്കത്തുകളുടെ പ്രവാഹമായിരുന്നു.

ഭാസ്കരൻ, ദേവരാജൻ, അർജുനൻ

പി. ഭാസ്കരനാണ്​ എന്നെ പാട്ടെഴുത്തിൽ ഏറെ സ്വധീനിച്ചയാൾ. ഭാസ്കരൻ മാഷില്ലായിരുന്നെങ്കിൽ ഒരു പാട്ട്​ പോലും എഴുതില്ലായിരുന്നു. അദ്ദേഹത്തിന്‍റെ പാട്ടുകൾ കേൾക്കു​മ്പോൾ എഴുതാൻ സുഖമാണെന്ന്​ നമുക്ക്​ തോന്നും. പക്ഷേ, ഒരിക്കലും അങ്ങനെയായിരുന്നില്ല. മണ്ണിന്‍റെ മണമുള്ളതായിരുന്നു ആ വരികൾ. ദേവരാജൻ മാഷിനൊപ്പം പ്രവർത്തിക്കാൻ കഴിയാത്തതിൽ നഷ്ടബോധമുണ്ട്​. പെട്ടെന്ന്​ ദേഷ്യപ്പെടുന്ന, പരുഷമായി പെരുമാറുന്നയാളാണ്​ ദേവരാജൻ മാഷ്​ എന്നാണ്​ ചെറുപ്പകാലം മുതൽ കേട്ടിട്ടുള്ളത്​. അങ്ങനെയൊരു ചിത്രമായിരുന്നു മനസ്സിലുണ്ടായിരുന്നതും. ചാനലിൽ ജോലി ചെയ്യുമ്പോഴാണ്​ അദ്ദേഹത്തെ അടുത്തറിയാൻ അവസരം ലഭിച്ചത്​. തമാശകൾ പറയുന്ന, നമ്മളെക്കുറിച്ചെല്ലാം കരുതലുള്ള, സ്​നേഹത്തോടെ പെരുമാറുന്നയളാണ്​ എന്ന്​ അപ്പോൾ ഞാൻ തിരിച്ചറിഞ്ഞു. മാക്ടയുടെ പരമവിശിഷ്ടാംഗത്വം നൽകാനുള്ള തീരുമാനം അറിയിക്കാൻ ദേവരാജൻ മാഷിനെ വിളിച്ചപ്പോൾ തനിക്ക്​ മുമ്പേ വന്ന ദക്ഷിണാമൂർത്തിക്ക്​ അത്​ നൽകണമെന്നായിരുന്നു അദ്ദേഹത്തിന്‍റെ ഉപ​ദേശം.

‘ന്യായവിധി’ സിനിമക്ക്​ വേണ്ടി അർജുനൻ മാഷിനൊപ്പം പ്രവർത്തിച്ചത്​ മറക്കാനാവാത്ത അനുഭവമാണ്​. എഴുതിയ പാട്ടിന്​ ട്യൂണിടുന്നതായിരുന്നു അ​ദ്ദേഹത്തിന്‍റെ രീതി. സാഹിത്യം എവിടെ എന്നാണ്​ ആദ്യം ചോദിച്ചത്​. മാഷ്​ ഇടുന്ന ട്യൂണിനനുസരിച്ച്​ ഞാൻ എഴുതാം എന്ന്​ പറഞ്ഞപ്പോൾ അദ്ദേഹത്തിനത്ര താൽപര്യമുണ്ടായിരുന്നില്ല. നന്നായില്ലെങ്കിൽ മാറ്റിയെഴുതാം എന്ന്​ പറഞ്ഞപ്പോൾ സമ്മതിച്ചു. അങ്ങനെ മാഷ്​ ഇഷ്ടമില്ലാതെ ചെയ്ത ട്യൂണിലാണ്​ ചിത്ര പാടിയ ‘ചെല്ലച്ചെറു വീട്​ തരാം..’എഴുതിയത്​. പക്ഷേ, റെ​ക്കോർഡിങ്​ കഴിഞ്ഞ്​ കേട്ടപ്പോൾ അദ്ദേഹത്തിന്​ പാട്ട്​ ഇഷ്ടമായി.

പാട്ടിന്‍റെ പുതിയ കാലം

പുതിയ പാട്ടുകൾ ഇപ്പോഴും ഉണ്ടാകുന്നുണ്ട്​. റഫീക്ക് അഹമ്മദിനെ പോലുള്ളവരുടെ പല പാട്ടുകളും പഴയവയോട്​ കിടപിടിക്കുന്നതാണ്​. പക്ഷേ ഏറ്റെടുക്കാൻ കേൾവിക്കാരില്ല എന്നതാണ്​ പ്രശ്നം. വിരസതയകറ്റാനാണ്​ മുമ്പ്​ പാട്ട്​ കേട്ടിരുന്നത്​. എന്തും കണ്ടും കേട്ടും സമയം കളയാൻ മൊബൈൽ ഫോൺ ഉള്ളതിനാൽ ഇപ്പോൾ ആർക്കും വിരസതയില്ല. ഓർമ്മ എന്നാൽ നമ്മുടെ തലച്ചോറിന്‍റെ ഹാർഡ്​ ഡിസ്കിലുള്ളത്​ എടുത്ത്​ നോക്കി തിരിച്ചുവെക്കലാണ്. അങ്ങനെ എടുത്തുനോക്കലും തിരിച്ചുവെക്കലും ഒന്നും ഇപ്പോൾ ഇല്ല. പാട്ടുകളുടെ ഗുണനിലവാരത്തിലുണ്ടായ മാറ്റം എന്ന്​ പറയുന്നത്​ തലമുറകളുടെ അഭിരുചികളിൽ വന്ന മാറ്റം കൂടിയാണ്​. അതിനെ കുറ്റം പറയുന്നതിൽ കാര്യമില്ല.

‘നേരം പുലർന്നിട്ടും പോകാതെ നിൽക്കുന്ന
പാർവ്വണ ബിംബത്തിൻ കാന്തി പോലെ
ഞാൻ മറഞ്ഞാലും എൻ സങ്കൽപ്പ സാഗരം
ഈ തീരത്തെ പുൽകി പുണർന്നു നിൽക്കും’

‘നളിനകാന്തി’ക്ക്​ വേണ്ടി ഷിബു ഇങ്ങനെ എഴുതിയത്​ ടി. പത്​മനാഭന്‍റെ കഥകളുടെ സുദീർഘമായ വായനാനുഭവത്തിൽ നിന്നാണ്​​. എഴുത്തുകാരൻ മറഞ്ഞാലും അയാളുടെ സൃഷ്ടികൾ കാലാതിവർത്തിയായി നിലനിൽക്കും എന്ന്​ സൂചിപ്പിക്കുന്ന വരികൾ. ഷിബു ചക്രവർത്തി മലയാളത്തിന്​ നൽകിയതും മറവി കവർന്നെടുക്കാത്ത കുറേ നല്ല ഗാനങ്ങളാ​ണെന്ന്​ കാലം സാക്ഷ്യപ്പെടുത്തുന്നു. അവ ഇപ്പോഴും നമ്മുടെ ഹൃദയ ‘തീരത്തെ പുൽകി പുണർന്നു നിൽക്കു’ന്നു.