സച്ചിൻ പെലറ്റിനെ പിന്തുണക്കാൻ വലിയൊരു ടീമുണ്ട്, അത് അദ്ദേഹത്തിനറിയില്ല-ഗെഹ് ലോട്ട് പക്ഷത്തെ എം.എൽ.എ

ജയ്‌സാല്‍മീര്‍: സച്ചിന്‍ പൈലറ്റിന് അദ്ദേഹം കരുതുന്നതിനേക്കാള്‍ പിന്തുണ കോൺഗ്രസ് പാർട്ടിക്കുള്ളിൽ ഉണ്ടെന്ന് അശോക് ഗെലോട്ടിനൊപ്പമുള്ള എം.എല്‍.എ. ജയ്‌സാല്‍മീര്‍ ഹോട്ടലില്‍ കഴിയുന്ന പ്രശാന്ത് ബൈര എന്ന എം.എല്‍.എയാണ് സച്ചിനെ പരസ്യമായി അനുകൂലിച്ചത്. ആരോഗ്യപരിശോധനക്കായി ഹോട്ടലില്‍ നിന്ന് പുറത്തിറങ്ങിയപ്പോഴാണ് ബൈര ഒരു സ്വകാര്യ വാര്‍ത്താ ചാനലിനോട് പ്രതികരിച്ചത്.

സച്ചിനൊപ്പം വലിയൊരു ടീമുണ്ട്. അത് അദ്ദേഹത്തിനറിയില്ല-ബൈര പറഞ്ഞു. 'ഞങ്ങളെപ്പോലുള്ളവരില്‍ നിന്ന് ഉപദേശം സ്വീകരിക്കാന്‍ അദ്ദേഹം തയ്യാറാകുമായിരുന്നെങ്കില്‍ 19 അല്ല 40-45 എം.എല്‍.എമാരുടെ പിന്തുണ അദ്ദേഹത്തിനുണ്ടാകുമായിരുന്നു. എന്നാല്‍ അദ്ദേഹം ഞങ്ങൾ പറയുന്നത് ശ്രദ്ധിക്കാറില്ല. എനിക്ക് തോന്നുന്നത് മറ്റാരോ ഇതിനിടയില്‍ കളിക്കുന്നുണ്ടെന്നാണ്' ബൈര കൂട്ടിച്ചേര്‍ത്തു.

40-45 എം.എല്‍.എമാരുടെ വരെ പിന്തുണ സച്ചിന് ഉണ്ടെന്നതിനർഥം അവിശ്വാസ പ്രമേയ വോട്ടെടുപ്പില്‍ ഇവർ കോണ്‍ഗ്രസിനെതിരെ വോട്ട് ചെയ്യുമെന്നല്ലെന്നും അദ്ദേഹം പറഞ്ഞു. സംസ്ഥാനത്തെ രാഷ്ട്രീയ പ്രതിസന്ധിയിൽ ബി.ജെ.പിക്ക് മുഖ്യപങ്കുണ്ടെന്നും അദ്ദേഹം പറഞ്ഞു.