മലബാര്‍ സിമന്‍റ്സ്: അഴിമതി സി.ബി.ഐ അന്വേഷിക്കുന്നതിനെതിരെ ആക്ഷന്‍ കൗണ്‍സില്‍ കോടതിയില്‍

പാലക്കാട്: മലബാ൪ സിമൻറ്സ് മുൻ കമ്പനി സെക്രട്ടറി ശശീന്ദ്രൻെറയും മക്കളുടെയും ദുരൂഹമരണത്തിന് കമ്പനിയിലെ അഴിമതിയുമായി ബന്ധമുണ്ടെന്നും മരണത്തെക്കുറിച്ചുള്ള സി.ബി. ഐയുടെ അന്വേഷണപരിധിയിൽ അഴിമതിയും ഉൾപ്പെടുത്തണമെന്നും വിവിധ കേന്ദ്രങ്ങളിൽനിന്ന് ആവശ്യമുയരുമ്പോൾ ആക്ഷൻ കൗൺസിലിൽനിന്ന് ഭിന്നസ്വരം. ശശീന്ദ്രൻെറ നാടായ കൊല്ലങ്കോട് നെന്മേനി കേന്ദ്രീകരിച്ചുള്ള ആക്ഷൻ കൗൺസിലാണ് അന്വേഷണത്തിൻെറ ദിശ തെറ്റിക്കുന്നെന്ന് കാണിച്ച് സി.ബി.ഐക്കെതിരെ ഹൈകോടതിയെ സമീപിച്ചത്. ആക്ഷൻ കൗൺസിൽ ചെയ൪മാൻ ആ൪. അരവിന്ദാക്ഷനാണ് അഡ്വ. ബാബു എസ്. നായ൪ മുഖേന റിട്ട് ഫയൽ ചെയ്തത്. അതേസമയം, പാലക്കാട് കേന്ദ്രീകരിച്ച് പ്രവ൪ത്തിക്കുന്ന മറ്റൊരു ആക്ഷൻ കൗൺസിലും ശശീന്ദ്രൻെറ പിതാവ് വേലായുധൻ മാസ്റ്ററും സഹോദരൻ ഡോ. സനൽകുമാറും ഉൾപ്പെടെയുള്ളവരും അഴിമതിയും സി.ബി.ഐ അന്വേഷിക്കണമെന്ന നിലപാടിലാണ്.
2001 മാ൪ച്ചിൽ കേസ് ഏറ്റെടുത്ത സി. ബി.ഐ രണ്ട് വ൪ഷമാകാറായിട്ടും അന്വേഷണം പൂ൪ത്തിയാക്കി കോടതിയിൽ റിപ്പോ൪ട്ട് സമ൪പ്പിച്ചില്ലെന്ന് ഹ൪ജിയിൽ ചൂണ്ടിക്കാട്ടുന്നു. ദുരൂഹമരണവുമായി ബന്ധമില്ലാത്ത അഴിമതി പോലുള്ള മറ്റ് വിഷയങ്ങൾ അന്വേഷിക്കുന്നത് യഥാ൪ഥവിഷയത്തിൻെറ ദിശ തെറ്റിക്കാനാണ്. ഇത് അന്വേഷണം വൈകാനും യഥാ൪ഥ പ്രതികൾ രക്ഷപ്പെടാനും ഇടയാക്കും. രണ്ട് വ൪ഷമായിട്ടും ദുരൂഹമരണവുമായി ബന്ധപ്പെട്ട് പ്രസക്തമായ ഒരു തെളിവും ശേഖരിക്കാൻ സി.ബി.ഐക്ക് കഴിഞ്ഞിട്ടില്ലെന്ന് ഹ൪ജിയിൽ ആരോപിക്കുന്നു. ഇത് അവശേഷിക്കുന്ന തെളിവുകൾ ഇല്ലാതാക്കാൻ ഇടയാക്കും.
ശശീന്ദ്രൻെറ മരണം സംബന്ധിച്ച ആക്ഷൻ കൗൺസിൽ അഭിപ്രായഭിന്നതയെ തുട൪ന്ന് സമീപകാലത്ത് പിള൪ന്നിരുന്നു. കൗൺസിൽ ജനറൽ കൺവീനറായിരുന്ന എം. ബാലമുരളി സമാന്തര പ്രവ൪ത്തനം നടത്തുന്നെന്ന് ചില ഭാരവാഹികൾ ആരോപിക്കുകയും ബാലമുരളി പുറത്തുവരികയും ചെയ്തു. എന്നാൽ, നെന്മേനിയിലെ ആക്ഷൻ കൗൺസിൽ ചിലരുടെ സ്വാ൪ഥതാൽപര്യം സംരക്ഷിക്കാൻ ശ്രമിക്കുകയാണെന്നാണ് ബാലമുരളിയുടെ ആക്ഷേപം. തുട൪ന്ന് ബാലമുരളി ജനറൽ കൺവീനറായി മറ്റൊരു ആക്ഷൻ കൗൺസിൽ രൂപവത്കരിക്കുകയും ചെയ്തിരുന്നു.