ഉര്‍ദുവില്‍ മുഹമ്മദ് റിസ്വാന്‍െറ കേരളജയം

കണ്ണൂര്‍: ജീവിതം കരുപ്പിടിപ്പിക്കാനാവാത്ത മാതാപിതാക്കള്‍ അനാഥാലയത്തിന് നല്‍കിയ ബാലന്‍ ഉര്‍ദു പ്രഭാഷണവേദിയില്‍ ഒന്നാമനായി. ഹയര്‍ സെക്കന്‍ഡറി ഉര്‍ദു പ്രസംഗമത്സരത്തിലാണ് കോഴിക്കോട് ജില്ലയിലെ മണാശ്ശേരി എം.കെ.എച്ച്.എം.എം.ഒ ഹയര്‍ സെക്കന്‍ഡറിയില്‍നിന്ന് വന്ന ബിഹാര്‍ ബഗര്‍പുര്‍ സ്വദേശി മുഹമ്മദ് റിസ്വാന്‍ കേരളത്തിലെ ഉര്‍ദു പ്രസംഗമികവിനെ കീഴടക്കിയത്.

മത്സരിച്ചവര്‍ക്കെല്ലാം എ ഗ്രേഡ് കിട്ടിയ പോരാട്ടത്തില്‍ ഉര്‍ദു കവിത ഉദ്ധരിച്ചാണ് മുഹമ്മദ് റിസ്വാന്‍െറ പ്രസംഗം കസറിയത്.  ബഗല്‍പുരിലെ കൂലിത്തൊഴിലാളികളായ മാതാപിതാക്കളാണ് റിസ്വാനെ ആറാം ക്ളാസിലേക്ക് കേരളത്തിലെ അനാഥാലയത്തില്‍ എത്തിച്ചത്. പാലക്കാട് കലോത്സവത്തില്‍ എ ഗ്രേഡ് മാത്രമുണ്ടായിരുന്ന റിസ്വാന് തിരുവനന്തപുരം, കോഴിക്കോട് കലോത്സവങ്ങളില്‍ എ ഗേഡും രണ്ടാം സ്ഥാനവുമുണ്ടായിരുന്നു.  

അപ്പീലുമായി വന്ന പാലക്കാട് ബി.എസ്.എസ് ഗുരുകുലം എച്ച്.എസ്.എസിലെ വിപിന്‍ സുരേഷിന് രണ്ടാം സ്ഥാനവും ശ്രീകൃഷ്ണപുരം എച്ച്.എസ്.എസിലെ എ.എം. സഫക്ക് മൂന്നാം സ്ഥാനവുമാണ്. വെള്ളിയാഴ്ച ഉര്‍ദു കവിതാ മത്സരത്തിലും റിസ്വാന്‍ മത്സരിക്കുന്നുണ്ട്.