ഉത്തരാഖണ്ഡിൽ ബസ് മറിഞ്ഞ് 25മരണം; 21 പേർക്ക് പരിക്ക്

ഉത്തരാഖണ്ഡ്: ഉത്തരാഖണ്ഡിൽ നിറ​യെ യാത്രക്കാരുമായി പോയ ബസ് താഴ്ചയിലേക്ക് മറിഞ്ഞ് 25 പേർ മരിച്ചു. 21 പേർക്ക് പരിക്കേറ്റു. ധൂമാക്കോട്ടിലെ ബിരോഖൽ മേഖലയിൽ ഇന്നലെ രാത്രിയായിരുന്നു അപകടം.

21 പേരെ രാത്രി തന്നെ പൊലീസും എസ്.ഡി.ആർ.എഫും രക്ഷപ്പെടുത്തി സമീപത്തെ ആശുപത്രികളിൽ പ്രവേശിപ്പിച്ചതായി ഡിജിപി അശോക് കുമാർ അറിയിച്ചു.

പൗരി ഗർവാൾ ജില്ലയിൽ റിഖ്‌നിഖൽ- ബൈറോഖൽ റോഡിൽ സിംദി ഗ്രാമത്തിന് സമീപമായിരുന്നു അപകടം. ബസ് 500 മീറ്റർ ആഴത്തിലേക്കാണ് പതിച്ചത്. സംസ്ഥാന ദുരന്ത നിവാരണ സേനയും നാട്ടുകാരും രക്ഷാപ്രവർത്തനത്തിൽ പങ്കാളികളായതായി മുഖ്യമന്ത്രി പുഷ്‌കർ സിങ് ധാമി പറഞ്ഞു.

ഇന്നലെ രണ്ട് ദുരന്തങ്ങൾക്കാണ് ഉത്തരാഖണ്ഡ് സാക്ഷിയായത്. രാവിലെ ഗഢ്‌വാളിലുണ്ടായ ഹിമപാതത്തിൽ പത്ത് പേർ കൊല്ലപ്പെട്ടിരുന്നു. 11 പേരെ ഇനിയും കണ്ടെത്താനുണ്ട്. സംഭവത്തിൽ ഉത്തരകാശിയിലെ നെഹ്‌റു മൗണ്ടനിയറിംഗ് ഇൻസ്റ്റിറ്റ്യൂട്ടിലെ ട്രെയിനികളാണ് കൊല്ലപ്പെട്ടത്. ദ്രൗപതി ദണ്ഡ 2 കൊടുമുടിയിലുണ്ടായ ഹിമാപാതത്തിൽ ആകെ 28 പർവതാരോഹകരാണ് കുടുങ്ങിയത്.

രാവിലെ ഒമ്പത് മണിയോടെയാണ് സംഘത്തിന് മേൽ ഹിമപാതമുണ്ടായത്. 16,000 അടി ഉയരത്തിൽ വെച്ചാണ് സംഭവം നടന്നത്. ഹിമാലയത്തിലെ ഗംഗോത്രി ശ്രേണിയിലാണ് ദ്രൗപതി ദണ്ഡ കൊടുമുടി സ്ഥിതി ചെയ്യുന്നത്.