കുടുംബം സഞ്ചരിച്ച കാർ നിർത്തിയിട്ട ലോറിയിലിടിച്ച് ഒരാൾ മരിച്ചു; ഏഴു പേർക്ക് പരിക്ക്

വാളയാർ: കനത്തമഴയിൽ കാർ നിയന്ത്രണംവിട്ട്​ ദേശീയപാതയോരത്ത് നിർത്തിയിട്ട ലോറിക്കുപിന്നിലേക്ക്​ ഇടിച്ചുകയറി കോഴിക്കോട് ഉള്ള്യേരി സ്വദേശി മരിച്ചു. മൂന്നുകുട്ടികളും സ്ത്രീകളും ഉൾപ്പെടെ ഏഴുപേർക്ക്​ പരിക്കേറ്റു.

വ്യവസായിയായ ഉള്ള്യേരി തെരുവത്ത് കടവ് ആയിരോളി വീട്ടിൽ ഇബ്രാഹിമാണ്​ (58) മരിച്ചത്. ഇദ്ദേഹത്തിന്‍റെ ഭാര്യ റാബിയ (54), മക്കളായ സബീന (34), മുബീന (32), മരുമകൻ ജുനൈദ് (40), മുബീനയുടെ മകൻ റിസ്‌വാൻ (12), ജുനൈദിന്‍റെയും സബീനയുടെയും മക്കളായ മുഹമ്മദ് ഷഹ്‌ബാൻ (11), മുഹമ്മദ് ജിയാദ് (ആറ്​) എന്നിവർക്കാണ്​ പരിക്ക്​. പരിക്കേറ്റ റിസ്‌വാനെ തൃശൂർ ഗവ. മെഡിക്കൽ കോളജ്​ ആശുപത്രിയിലും മറ്റുള്ളവരെ ജില്ല ആശുപത്രിയിലും പ്രവേശിപ്പിച്ചു. റിസ്‌വാൻ തീവ്രപരിചരണ വിഭാഗത്തിൽ ചികിത്സയിലാണ്.

ചൊവ്വാഴ്ച പുലർച്ച അഞ്ചിന്​ ദേശീയപാതയിൽ അട്ടപ്പള്ളത്താണ് അപകടം. ഡ്രില്ലിങ് മെഷീൻ, കട്ടർ തുടങ്ങിയവ വാടകക്ക്​ നൽകുന്ന ഇബ്രാഹിം ഇത്തരം മെഷീനുകൾ വാങ്ങാനായി കോഴിക്കോട്ടുനിന്ന്​ കോയമ്പത്തൂരിലേക്ക് പോവുമ്പോഴായിരുന്നു അപകടം. ജുനൈദാണ് കാർ ഓടിച്ചിരുന്നത്. ഇബ്രാഹിം മുൻ സീറ്റിലാണ് ഇരുന്നത്. പരിക്കേറ്റവരെ പൊലീസും ദേശീയപാത അതോറിറ്റിയുടെ സുരക്ഷാവിഭാഗവും ചേർന്ന്​ ജില്ല ആശുപത്രിയിലെത്തിച്ചെങ്കിലും ഇബ്രാഹിം മരിച്ചു.

ഇബ്രാഹിമിന്‍റെ മൃതദേഹം ജില്ല ആശുപത്രിയിൽ പോസ്റ്റ്മോ‍ർട്ടത്തിനുശേഷം കോഴിക്കോട്ടേക്ക്​ കൊണ്ടുപോയി. മുഹ്‌സിനയാണ് ഇബ്രാഹിമിന്‍റെ മറ്റൊരു മകൾ. മറ്റു മരുമക്കൾ: ഷമീം, ഷംസീർ.