സ്​കൂട്ടർ ബസ്സിലിടിച്ച്​ അച്ഛനും അഞ്ചുവയസ്സുള്ള മകനും മരിച്ചു; ഭാര്യക്ക്​ ഗുരുതരം

കഴക്കൂട്ടം: സ്​കൂട്ടർ ബസ്സിലിടിച്ച്​ അച്ഛനും അഞ്ചുവയസ്സുകാരനായ മകനും മരിച്ചു. സ്​കൂട്ടർ യാത്രക്കാരായ രാജേഷ്​ (36), മകൻ ഋത്വിക്​ (5) ആണ്​ മരിച്ചത്​​. രാജേഷിന്‍റെ ഭാര്യ സുജിതയെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു.

കഴക്കൂട്ടം ഇൻഫോസിസ്​ പാർക്കിന്​ സമീപം ഇവർ സഞ്ചരിച്ച ബൈക്ക്​ കെ.എസ്​.ആർ.ടി.സി ബസിന്​ പിന്നിൽ ഇടിക്കുകയായിരുന്നു. ചൊവ്വാഴ്ച ഉച്ചയ്ക്ക് ഒരു മണിയോടെയായിരുന്നു അപകടം.

തൃശൂർ പാഴായി നെന്മകരി സ്വദേശിയാണ് രാജേഷ്. ബാലരാമപുരം മുടവൂർ പാറയിൽ താമസിച്ചു വരികയാണ്. അലുമിനിയം ഫാബ്രിക്കേഷൻ കമ്പനിയിലെ സെയിൽസ് എക്സിക്യൂട്ടിവാണ്.

കിളിമാനൂരിലുള്ള സുഹൃത്തിന്‍റെ വീട്ടിലേക്ക് പോകുന്നതിനിടെയാണ്​ അപകടം. ബൈപാസിൽ ഇൻഫോസിസിന് സമീപം ചിത്തിര നഗർ ബസ്​സ്റ്റോപ്പിൽ യാത്രക്കാരെ കയറ്റാൻ നിർത്തിയിരുന്ന ബസിന്‍റെ പിറകിൽ കുടുംബം സഞ്ചരിച്ചിരുന്ന സ്കൂട്ടർ ഇടിച്ചുകയറുകയായിരുന്നു. ഗുരുതര പരിക്കേറ്റ അച്ഛനും മകനും ആശുപത്രിയിൽ എത്തിക്കുന്നതിനിടെ മരണപ്പെട്ടു.

ഇവനറിയില്ലല്ലോ, ഭക്ഷണം തരാൻ ഇനി രാജേഷും മോനും വരില്ലെന്ന്​...

ബാലരാമപുരം: വീട്ടുവരാന്തയിലെ ചാരുപടിയിൽ അവൻ പരിഭ്രാന്തനായി ഇരിപ്പുണ്ട്​... പതിവില്ലാതെ ആളുകൾ വന്നതും കൂട്ടം കൂടുന്നതും കണ്ട്​ കണ്ണ്​ മിഴിച്ചിരിക്കുകയാണ്​ വെളുത്ത രോമം നിറഞ്ഞ ആ കുഞ്ഞു വളർത്തുനായ്​. ആൾക്കൂട്ടത്തിൽ ത​െന്‍റ പ്രിയപ്പെട്ട യജമാനൻ രാജേഷും തന്‍റെ കളിക്കൂട്ടുകാരൻ കൂടിയായ മകൻ ഋത്വിക്കിനെയുമായിരിക്കും അവൻ ആകാംക്ഷയോടെ തിരയുന്നത്​. അവനറിയില്ലല്ലോ, ഉച്ചയ്​ക്ക്​ വിഭവ സമൃദ്ധമായി ഭക്ഷണം നല്‍കിയ തന്‍റെ പ്രിയപ്പെട്ടവർ ഒരിക്കലും തിരിച്ചുവരാത്ത ലോകത്തേക്ക്​ യാത്ര പോയ വേദനാജനകമായ കാര്യം.

കഴക്കൂട്ടം ഇൻഫോസിസ്​ പാർക്കിന്​ സമീപം സ്​കൂട്ടർ കെ.എസ്​.ആർ.ടി.സി ബസിന്​ പിന്നിൽ ഇടിച്ചാണ്​ രാജേഷും (36) അഞ്ചുവയസ്സുള്ള മകനും മരിച്ചത്​. കൂടെയുണ്ടായിരുന്ന ഭാര്യ സുജിത ഗുരുതര പരിക്കുകളോടെ ആശുപത്രിയിലാണ്​.

തൃശൂർ പാഴായി നെന്മകരി സ്വദേശിയായ രാജേഷ്​ രണ്ട് വര്‍ഷം മുമ്പാണ് ബാലരാമപുരം താന്നിവിളയില്‍ കുടുംബസമേതം താമസമാക്കിയത്. അലുമിനിയം ഫാബ്രിക്കേഷൻ കമ്പനിയിലെ സെയിൽസ് എക്സിക്യൂട്ടിവായ രാജേഷ്​ ദൂരെ സ്ഥലങ്ങളില്‍ ജോലിക്ക് പോകുമ്പോള്‍ വീട്ടുകാരെ സുഹൃത്തായ ചിറയിന്‍കീഴ് സ്വദേശിയുടെ വീട്ടില്‍ നിര്‍ത്തലാണ്​ പതിവ്​.

വാടക വീട്ടില്‍ നിന്നും ചിറയിന്‍കീഴിലേക്കുള്ള യാത്രക്കിടെയാണ് ചൊവ്വാഴ്ച ഉച്ചക്ക്​ അപകടം രാജേഷിന്‍റെയും മകന്‍ ഋത്വിക്കിന്‍റെയും ജീവൻ കവര്‍ന്നെടുത്തത്. ബൈപാസിൽ ഇൻഫോസിസിന് സമീപം ചിത്തിര നഗർ ബസ്​സ്റ്റോപ്പിൽ യാത്രക്കാരെ കയറ്റാൻ നിർത്തിയിരുന്ന ബസിന്‍റെ പിറകിൽ കുടുംബം സഞ്ചരിച്ചിരുന്ന സ്കൂട്ടർ ഇടിച്ചുകയറുകയായിരുന്നു.

ജോലി കഴിഞ്ഞെത്തിയാല്‍ വീട്ടിനുള്ളില്‍ തന്നെ ചിലവഴിക്കുന്നതാണ്​ രാജേഷിന്‍റെ പ്രകൃതം. വളരെ ശാന്തനായ അദ്ദേഹത്തെ കുറിച്ച് അയല്‍വാസികൾക്ക്​ പറയുവാനുള്ളതും നല്ലത് മാത്രം.

രാജേഷിനും മകനും ഏറെ പ്രിയപ്പെട്ട വളര്‍ത്തുന്ന നായക്ക് ഭക്ഷണം നല്‍കി ശേഷമായിരുന്നു ഇന്നത്തെ യാത്ര. നായെ വീടിന്‍റെ സിറ്റൗട്ടില്‍ കെട്ടിയിട്ട ശേഷം ഭക്ഷണം നല്‍കി വീടിന് പുറത്തെ ലൈറ്റിട്ടാണ്​ പോയത്. വീട്ടിലെ അംഗത്തെ പോലെയാണ് രാജേഷും കുടുംബവും നായയെ വളര്‍ത്തിയിരുന്നത്. സാധാരണ അപരിചിതരെ കാണുമ്പോള്‍ കുരച്ച് ശബ്ദമുണ്ടാക്കുന്ന നായ ഇന്ന്​ മൗനം പാലിച്ചാണിരിക്കുന്നത്. അയല്‍വാസികൾ ചിലര്‍ നായക്ക് ഭക്ഷണം നല്‍കിയെങ്കിലും കഴിക്കാന്‍ കൂട്ടാക്കിയിട്ടില്ല.