ചെന്നൈയിൽ ട്രെയിൻ തട്ടി മലയാളി വിദ്യാർഥിനി മരിച്ചു

ചെന്നൈ: ട്രെയിനിടിച്ച്​ മലയാളി കോളജ്​ വിദ്യാർഥിനിക്ക്​ ദാരുണാന്ത്യം. ചെന്നൈ താമ്പരം എം.സി.സി കോളജ്​ ഒന്നാം വർഷ ബി.എസ് സി സൈക്കോളജി വിദ്യാർഥിനിയും കൊല്ലം പുത്തൂർ സ്വദേശിനിയുമായ നിഖിത കെ. സിബിയാണ് (19) ​ മരിച്ചത്​.

ഇരുമ്പുലിയൂർ പഴയ റെയിൽവേ ഗേറ്റിനു​ സമീപം ട്രെയിൻ വരുന്നത്​ ശ്രദ്ധിക്കാതെ ഹെഡ്​​ഫോണിൽ സംസാരിച്ച്​ ട്രാക്​ മുറിച്ചു കടക്കുന്നതിനിടെയാണ്​ അപകടം. സംഭവസ്ഥലത്തുതന്നെ മരിച്ചു. ചെന്നൈ-ഗുരുവായൂർ എക്സ്​പ്രസ് ഇടിച്ചാണ്​ അപകടം.

ഇരുമ്പുലിയൂരിലെ സ്വകാര്യ ലേഡീസ്​ ഹോസ്റ്റലിലാണ്​ നിഖിത താമസിച്ചിരുന്നത്​. ഈയിടെ സ്ഥലത്തെ സ്വകാര്യ നഴ്​സറി സ്കൂളിൽ പാർട്ട്​ടൈം അധ്യാപികയായി ജോലി കിട്ടിയിരുന്നു. ജോലിക്കു പോകവെയാണ്​ ദുരന്തമുണ്ടായത്​.