ബലൂൺ വീർപ്പിക്കുന്നതിനിടെ ഗ്യാസ്​ സിലിണ്ടർ പൊട്ടിത്തെറിച്ച്​ രണ്ടു വയസുകാരി മരിച്ചു

നാഗ്പൂർ: മുത്തച്ഛൻ വാങ്ങിയ ബലൂൺ വീർപ്പിക്കുന്നതിനിടെ ഗ്യാസ് സിലിണ്ടർ പൊട്ടിത്തെറിച്ച് രണ്ട് വയസുകാരി മരിച്ചു. മഹാരാഷ്ട്രയിലെ അമരാവതി ജില്ലയിലാണ്​ ദാരുണ സംഭവം. നാഗ്പൂരിൽ നിന്ന് 150 കിലോമീറ്റർ അകലെ അചൽപൂർ താലൂക്കിലെ ഷിന്ദി ഗ്രാമത്തിൽ ശനിയാഴ്ച വൈകുന്നേരം ആണ്​ സംഭവം.

കാർഷിക പ്രാധാണന്യമുള്ള തൻഹ പോള ഉത്സവത്തിന് കുട്ടി മുത്തച്ഛനോടൊപ്പം പോയ സമയത്താണ് സംഭവം. ബലൂൺ വാങ്ങി ഗ്യാസ് സിലിണ്ടർ ഉപയോഗിച്ച്​ വീർപ്പിക്കുന്നതിനിടെയാണ്​ അത്​ പൊട്ടിത്തെറിച്ചത്​. സിലിണ്ടറിന്റെ ഒരു ഭാഗം കാലിൽ തട്ടി കുട്ടിക്ക് ഗുരുതരമായി പരിക്കേറ്റതായി അധികൃതർ അറിയിച്ചു. പരിക്കേറ്റ് ആശുപത്രിയിൽ ചികിത്സയിലിരിക്കെയാണ് കുട്ടി മരിച്ചത്​. അചൽപൂർ പൊലീസ്​ കേസെടുത്ത്​ അന്വേഷണം തുടങ്ങി.