ബൈക്ക് വൈദ്യുതിത്തൂണിലിടിച്ച് യുവാവ് മരിച്ചു

അഞ്ചൽ: ബൈക്ക് വൈദ്യുതിത്തൂണിലിടിച്ച് യുവാവ് മരിച്ചു. ഏരൂർ അയിലറ വേലൻകുഴി ചരുവിള പുത്തൻവീട്ടിൽ സുബിൻ (21) ആണ് മരിച്ചത്. വെള്ളിയാഴ്ച പുലർച്ചെ അഞ്ചൽ ത്രിവേണി ജങ്ഷന് സമീപമാണ് അപകടം.

സുബിൻ്റെ കുടുംബം അഞ്ചൽ ചീപ്പുവയലിൽ വാടകക്ക് താമസിച്ചുവരികയാണ്. വഴിയാത്രക്കാരാണ് സുബിനെ അപകടത്തിൽപെട്ട നിലയിൽ കണ്ടെത്തിയത്. ഫുട്പാത്തും കൈവരിയും തകർത്ത് പോസ്റ്റിൽ ഇടിച്ച് തകർന്ന നിലയിലായിരുന്നു ബൈക്ക്. തുടർന്ന് അഞ്ചൽ പൊലീസ് സ്ഥലത്തെത്തിയാണ് സുബിനെ അഞ്ചലിലെ സ്വകാര്യ ആശുപത്രിയിലേക്ക് മാറ്റിയത്.

പിതാവ്: ബിജു. മാതാവ്: സിന്ധു. സഹോദരൻ: നിഥിൻ. പാരിപ്പള്ളി മെഡിക്കൽ കോളജ് ആശുപത്രിയിൽ പോസ്റ്റുമോർട്ടം നടത്തിയ ശേഷം മൃതദേഹം വീട്ടുവളപ്പിൽ സംസ്കരിച്ചു.