ആദ്യമായി മാതാപിതാക്കളെ കണ്ട 17കാരൻ ദിവസങ്ങൾക്കകം ആത്മഹത്യ ചെയ്​തു

ജനിച്ച ശേഷം ആദ്യമായി മാതാപിതാക്കളെ കണ്ടതിന്‍റെ ത്രില്ലിലായിരുന്നു ലിയു ഷുഷൂ എന്ന 17കാരനായ ചൈനീസ്​ ബാലൻ. സോഷ്യൽ മീഡിയയായിരുന്നു അതിന്​ വഴിയൊരുക്കിയത്​. അതുകൊണ്ടുതന്നെ ചൈനയിലും ലോകത്തിന്‍റെ വിവിധ ഭാഗങ്ങളിലുമുള്ള നെറ്റിസൺസ്​ ഈ പുനർസമാഗമത്തെ ഏറെ ആഘോഷിച്ചു. എന്നാൽ, കാര്യങ്ങൾ മാറിമറിഞ്ഞത്​ വളരെ പെ​ട്ടെന്നായിരുന്നു. ഈ കൂടിച്ചേരലിന്‍റെ ചൂടുംചൂരം അവസാനിക്കും​മു​േമ്പ എല്ലാവരെയും കണ്ണീരിലാഴ്​ത്തി ലിയു ഷൂഷു കഴിഞ്ഞ ദിവസം ജീവനൊടുക്കി. 'ലിയൂ! നീ ഞങ്ങളെ തോൽപിച്ചു കളഞ്ഞല്ലോ...!' എന്ന്​ വിലപിക്കുകയാണ്​ ഈ വിയോഗ വാർത്ത അറിഞ്ഞ നെറ്റിസൺസ്​.

ജന്മം നൽകിയ മാതാപിതാക്കളുമായി വീണ്ടും ഒന്നിച്ചതിന് ദിവസങ്ങൾക്ക് ശേഷമാണ്​ ലിയു മരണത്തെ പുൽകിയത്​. തന്‍റെ മാതാപിതാക്കളെ തിരയാൻ സോഷ്യൽ മീഡിയയുടെ സഹായം സ്വീകരിച്ച ലിയു ഷുഷൂ അവരുമായി വീണ്ടും ഒന്നിക്കുന്നത് ഏറെ പൊതുജനശ്രദ്ധ നേടിയിരുന്നുവെന്ന്​ വാഷിംഗ്ടൺ പോസ്റ്റ്​ റിപ്പോർട്ട് ചെയ്യുന്നു.

ലിയുവിന്‍റെ ജനനശേഷം വേർപിരിഞ്ഞ മാതാപിതാക്കൾ വേറെ വിവാഹം കഴിച്ച്​ ജീവിക്കുകയായിരുന്നു. പൊലീസിന്‍റെ കൂടി സഹായത്തോടെയാണ് ഇവരെ​ കണ്ടെത്തി ലിയുവിന്‍റെ അടുത്തെത്തിച്ചത്​. സ്വന്തം മാതാപിതാക്കളുമായി വീണ്ടും ഒന്നിച്ചതിന്‍റെ ഫോട്ടോകൾ ലിയു പങ്കിട്ടത്​ ആഹ്ലാദാരവത്തോടെയാണ്​ സോഷ്യൽമീഡിയ ഏറ്റെടുത്തത്​. എന്നാൽ, ജനിച്ച ഉടൻ മാതാപിതാക്കൾ കുരുന്നിനെ പണംവാങ്ങി വിൽക്കുകയായിരുന്നുവെന്നും ദത്ത്​ നൽകിയതല്ലെന്നും അറിഞ്ഞതോടെ വിഷയം മാറിമറിഞ്ഞു. മാതാപിതാക്കളിൽ നിന്ന് ലിയു ജീവനാംശം ആവശ്യപ്പെട്ടു. ഇതോടെ അതുവരെ ഒപ്പം നിന്ന സോഷ്യൽ മീഡിയയിലെ ഒരുവിഭാഗം ലിയുവി​നെതിരെ തിരിഞ്ഞു. ഇരുപക്ഷത്തുമായി നിലയുറപ്പിച്ച നെറ്റിസൺസ്​ വിഷയം കത്തിച്ചു നിർത്തി. ലിയു സ്വാർത്ഥനാണെന്ന് പലരും ആരോപിച്ചു. ഇത്​ ഈ കൗമാരക്കാരനെ ഏറെ വേദനിപ്പിച്ചിരുന്നുവെന്നാണ്​ 7,000 വാക്കുകളിലെഴുതിയ ആത്മഹത്യാ കുറിപ്പ്​ സൂചിപ്പിക്കുന്നതെന്ന്​ ഇന്ത്യാ ടുഡേ റിപ്പോർട്ട്​ ചെയ്യുന്നു.

ലിയുവിന്‍റെ ജനനവും ദത്തെടുക്കലും

ലിയുവിന്‍റെ ജനനവും ദത്തെടുക്കലും സംബന്ധിച്ച്​ കൃത്യമായ വിവരം പുറത്തുവന്നിട്ടില്ല. 2004-നും 2006-നും ഇടയിൽ വടക്കൻ ഹെബെയ് പ്രവിശ്യയിലെ ഗ്രാമപ്രദേശത്തായിരുന്നു ജനനം. 15 വയസ്സാണെന്നാണ് പിതാവ്​ പറയുന്നത്​. എന്നാൽ ഔദ്യോഗിക തിരിച്ചറിയൽ കാർഡ് പ്രകാരം 17 ആണ്​ പ്രായം.

ജനനസമയത്ത്​ മാതാപിതാക്കൾ അവിവാഹിതരായിരുന്നു. അതിനാൽ കുഞ്ഞിനെ വിൽക്കാൻ തീരുമാനിച്ചു. ഏകദേശം 4,200 ഡോളർ നൽകിയാണ്​ വാങ്ങിയതെന്ന്​ ലിയുവിനെ ദത്തെടുത്ത കുടുംബവുമായി ബന്ധപ്പെട്ട വൃത്തങ്ങൾ സൂചിപ്പിച്ചു. എന്നാൽ, 2009ൽ വളർത്തു മാതാപിതാക്കൾ മരിച്ചതോടെ ലിയു തീർത്തും അനാഥനായി. പിന്നീട്​ അവരുടെ കുടുംബമായിരുന്നു ലിയുവിന്‍റെ രക്ഷാകർതൃത്വം ഏറ്റെടുത്തത്​.

മരണകാരണം അമിതമായി വിഷാദ ഗുളിക കഴിച്ചത്​

തിങ്കളാഴ്ച വിഷാദ ഗുളിക അമിതമായി കഴിച്ചതിനെത്തുടർന്നാണ്​ ലിയു മരിച്ചതെന്ന്​ മാധ്യമങ്ങൾ റിപ്പോർട്ട് ചെയ്യുന്നു. അവശനിലയിലായതിനെ തുടർന്ന്​ ലിയുവിനെ ആശുപത്രിയിലെ അത്യാഹിത വിഭാഗത്തിൽ പ്രവേശിപ്പിച്ചെങ്കിലും രക്ഷിക്കാനായില്ല. 'എന്നെ പരിപാലിച്ച എല്ലാവർക്കും നന്ദി, ഞാൻ നിങ്ങളെ പരാജയപ്പെടുത്തിയതിൽ ഖേദിക്കുന്നു' എന്നായിരുന്നു ആത്മഹത്യാകുറിപ്പിലെഴുതിയത്​. 'ഈ ലോകത്ത് ക്ഷുദ്ര ചിന്തയുള്ള ആളുകൾ കുറവായിരുന്നെങ്കിൽ എന്ന് ആഗ്രഹിക്കുന്നു'വെന്നു​ം ഹൃദയവേദനയോടെ അവൻ കുറിച്ചു. കുട്ടിക്കാലത്തെ നഷ്ടം, ഭീഷണിപ്പെടുത്തൽ, പീഡനം, വിഷാദം എന്നിവ സംബന്ധിച്ചും അവസാന എഴുത്തിൽ ലിയു വിവരിക്കുന്നുണ്ട്​.

ലിയുവിന്‍റെ വേദനാജനകമായ വിയോഗത്തെ തുടർന്ന്​ സൈബർ അറ്റാക്കിനെകുറിച്ചും അനാഥരായ കുട്ടികളുടെ വിഷമങ്ങളെ കുറിച്ചും സോഷ്യൽ മീഡിയയിൽ സ്വയംവിമർശനാത്മകമായ വിലയിരുത്തലുകൾ സജീവമായി നടക്കുന്നുണ്ട്​.