മദ്യമെന്ന് കരുതി ആസിഡ് കുടിച്ചയാൾ മരിച്ചു

ഖോവൈ: ഉറക്കമുണർന്ന ഉടൻ മദ്യമാണെന്ന്​ കരുതി ആസിഡ്​ എടുത്ത്​ കുടിച്ചയാൾ മരിച്ചു. ത്രിപുരയിലെ ഖോവൈ ജില്ലയിലെ ലങ്കാപുര എഡിസി ഗ്രാമവാസിയായ കാർത്തിക് മോഹൻ ദേബർമ (55)യാണ്​ ആന്തരികാവയവങ്ങൾ തകർന്ന്​ ദാരുണമായി മരിച്ചത്​. മദ്യലഹരിയിലായിരുന്ന ഇയാൾ ഒരു കുപ്പി ആസിഡ് എടുത്ത്​ കുടിക്കുകയും സംഭവസ്ഥലത്ത് വെച്ച് തന്നെ മരണപ്പെടുകയും ചെയ്​തതായി പൊലീസ് പറഞ്ഞു.

സ്ഥിരമായി മദ്യപിക്കുന്ന ദേബർമ, സംഭവദിവസം രാത്രിയും മദ്യലഹരിയിലായിരുന്നു. നാട്ടിലെ മദ്യശാലയിൽ നിന്ന് അമിതമായി മദ്യപിച്ച് വീട്ടിലെത്തിയ ഇയാൾ അർധരാത്രി ഉറക്കമുണർന്നപ്പോൾ മദ്യമാണെന്ന് കരുതി റബർ സംസ്കരണത്തിനായി വീട്ടിൽ സൂക്ഷിച്ചിരുന്ന ആസിഡ് എടുത്ത് കുടിക്കുകയായിരുന്നുവെന്ന്​ പൊലീസ് പറഞ്ഞു.

താമസിയാതെ അബോധാവസ്ഥയിലായ ഇയാളെ കുടുംബാംഗങ്ങൾ പ്രദേശത്തെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.