ഉപഭോക്താക്കളെ തെറ്റിദ്ധരിപ്പിക്കുന്നു; മിൽമയുടെ സാദൃശ്യത്തിൽ കവർ പാലുകൾ

പന്തളം: മിൽമയുടെ രൂപസാദൃശ്യത്തോടെ കവർ പാലുകൾ വിപണിയിൽ എത്തുന്നത് ഉപഭോക്താക്കളെ തെറ്റിദ്ധരിപ്പിക്കുന്നു. ഒറ്റനോട്ടത്തിൽ മിൽമയുടെ പാലും തൈരും ആണെന്ന്​ തെറ്റിദ്ധരിപ്പിക്കുന്ന തരത്തിലുള്ള കവറുകളിലാണ് വിപണിയിലുള്ളത്. പന്തളത്തിന്​ സമീപം ഐരാണിക്കുടിയിൽ രജിസ്​റ്റർ ചെയ്ത ഡയറിയുടെ പേരിലാണ് ഇത്തരത്തിൽ ഒരു കവർപാൽ ഇറങ്ങുന്നത്. മറ്റൊന്ന് തിരുവനന്തപുരം ആസ്ഥാനമായ ഡയറിയിൽനിന്നാണ്.

ഐരാണിക്കുടിയിൽ രജിസ്​റ്റർ ചെയ്ത ഡയറിയുടെ പാൽ ഉൽപന്നങ്ങൾ നൂറുശതമാനവും മിൽമക്ക്​ സമാനമാണ്. പല കച്ചവടക്കാരും മിൽമയുടെ പാലും രൂപസാദൃശ്യമുള്ള മറ്റ് പാലും ഇടകലർത്തിയാണ്​ വിൽക്കുന്നത്‌. മിൽമ അരലിറ്ററി​െൻറ കവർപാലാണ്​ വിപണിയിലെത്തിക്കുന്നത്. എന്നാൽ, വ്യാജ​െൻറ അളവ് 450 മില്ലിലിറ്റർ ആണ്. മിൽമയുടെ കച്ചവടക്കാരെ തിരഞ്ഞുപിടിച്ചാണ് അപര​െൻറ കച്ചവടം. മിൽമ നൽകുന്ന കമീഷനെക്കാൾ മൂന്നുരൂപ അധികമാണ് കമീഷൻ.

ഐരാണിക്കുടിയിൽനിന്ന്​ കിലോമീറ്ററുകൾ അകലെ പ്രവർത്തിച്ചിരുന്ന ഒരു ഡയറിയുടെ പാൽ വ്യാപകമായി ഈയിടെ കേടായിരുന്നു. ഇതോടെ ഇവർ പേരുമാറ്റിയാണ് പുതിയ പാൽ വിപണിയിൽ ഇറക്കിയതെന്ന്​ പറയുന്നു. രൂപസാദൃശ്യമുള്ള രണ്ട് കമ്പനികളുടെ ഉൽപന്നങ്ങൾ വിപണിയിൽ ലഭ്യമാണെന്ന വിവരം ലഭിച്ചതായി മിൽമ അധികൃതർ പറയുന്നു. രണ്ട് കമ്പനികൾക്കും നോട്ടീസ് നൽകിയെങ്കിലും തിരുവനന്തപുരം ആസ്ഥാനമായ കമ്പനി മാത്രമാണ്​ വിശദീകരണം നൽകിയത്. ഐരാണിക്കുടി ആസ്ഥാനമായ വിതരണക്കാർ മറുപടിനൽകാൻ തയാറായില്ലെന്നും മിൽമ തിരുവനന്തപുരം യൂനിറ്റ് അധികൃതർ 'മാധ്യമ'ത്തോട് പ്രതികരിച്ചു. കോടതിയെ സമീപിക്കുമെന്നും മിൽമ അധികൃതർ വെളിപ്പെടുത്തി.