ക്ഷേത്ര ജീവനക്കാര​െൻറ മൃതദേഹം വെള്ളക്കെട്ടിൽനിന്നും കണ്ടെത്തി

തിരുവല്ല (പത്തനംതിട്ട): മന്നംകരച്ചിറ സ്വദേശിയായ ക്ഷേത്ര ജീവനക്കാര​െൻറ മൃതദേഹം പുന്നിലത്തെ വെള്ളക്കെട്ടിൽനിന്നും കണ്ടെത്തി. പുതുശ്ശേരി വെട്ടു ഞായത്തിൽ ക്ഷേത്രത്തിലെ കഴകക്കാരനായ കാവുംഭാഗം മന്നംകരച്ചിറ തുക്കേലാട്ട് വീട്ടിൽ രമേശ് കുമാറി​െൻറ (55) മൃതദേഹമാണ് കണ്ടെത്തിയത്​. കവിയൂർ പുന്നിലത്തെ വെണ്ണിയാവിള പുഞ്ചയിലെ വെള്ളക്കെട്ടിൽനിന്നും അഗ്നി ശമന സേന നടത്തിയ തിരച്ചിലിൽ ചൊവ്വാഴ്ച ഉച്ചക്ക്​ രണ്ടോടെയാണ്​ മൃതദേഹം ലഭിച്ചത്​.

കവിയൂരിലെ ഭാര്യ വീട്ടിൽനിന്ന് ചൊവ്വാഴ്ച പുലർച്ചെ അഞ്ചരയോടെ ക്ഷേത്രത്തിലേക്ക് പോയ രമേശ് ഉച്ചയായിട്ടും വീട്ടിൽ മടങ്ങിയെത്താത്തതിനാൽ ബന്ധുക്കൾ പൊലീസിൽ പരാതി നൽകുകയായിരുന്നു. പുലർച്ചെ ആറിന്​ രമേശിനെ പുന്നിലം ഭാഗത്ത് കണ്ടതായി സമീപവാസികളിൽനിന്നും വിവരം ലഭിച്ചു. തുടർന്ന് നടത്തിയ തിരച്ചിലിലാണ് മൃതദേഹം ലഭിച്ചത്.

തിരുവല്ല പൊലീസെത്തി മേൽനടപടി സ്വീകരിച്ച മൃതദേഹം തിരുവല്ലയിലെ സ്വകാര്യ ആശുപത്രി മോർച്ചറിയിലേക്ക് മാറ്റി. ഭാര്യ: ജ്യോതി. മക്കൾ: വിഷ്ണു, വിദ്യ. സംസ്കാരം പിന്നീട്.

റോഡിന് കുറുകെ അഞ്ചടിയോളം ഉയരത്തിലുള്ള വെള്ളക്കെട്ട് മറികടക്കാൻ ശ്രമിക്കുന്നതിനിടെ രമേശൻ ഒഴുക്കിൽപ്പെട്ടതാകാമെന്നാണ് പ്രാഥമിക നിഗമനം.

തിരുവല്ല ഫയർ സ്​റ്റേഷൻ ഓഫിസർ പി.ബി. വേണുകുട്ട​െൻറ നേതൃത്വത്തിൽ ഫയർമാന്മാരയ ഗോപകുമാർ, ജയൻ മാത്യു, പ്രജോഷ്, എൻ.ആർ. ശശികുമാർ, അനിൽകുമാർ എന്നിവരടങ്ങുന്ന സംഘമാണ് തിരച്ചിൽ നടത്തിയത്.