ഇന്ദിര ഗാന്ധിയില്ലാത്ത 38 വർഷങ്ങൾ

ജവഹർലാൽ നെഹ്​റുവിന് ശേഷം ഇന്ത്യാചരിത്രത്തിൽ ഏറ്റവും കൂടുതൽ കാലം പ്രധാനമന്ത്രിയായിരുന്ന ഏഷ്യയിലെ ഉരുക്കുവനിത ഇന്ദിര ഗാന്ധി സുരക്ഷാഭടന്മാരുടെ വെടിയേറ്റ് രക്​തസാക്ഷിത്വം വരിച്ചിട്ട്​ ഇന്നേക്ക് 38 വർഷമാവുന്നു.

1967ൽ ലാൽബഹദൂർ ശാസ്​ത്രിയുടെ മരണശേഷം കാമരാജിനെപ്പോലുള്ളവരുടെ ശക്​തമായ പിന്തുണയോടെയാണ് കോൺഗ്രസിലെ സിൻഡിക്കേറ്റ് വിഭാഗമായി അറിയപ്പെട്ടിരുന്ന നിജലിംഗപ്പ, മൊറാർജി ദേശായി, അതുല്യഘോഷ്, എസ്​.കെ. പാട്ടീൽ തുടങ്ങിയവരുടെ എതിർപ്പിനെ തൃണവത്ഗണിച്ച് മുന്നേറാൻ ഇന്ദിര ഗാന്ധിക്ക് സാധിച്ചത്. ഡോ.സാക്കിർ ഹുസൈന്റെ നിര്യാണത്തെത്തുടർന്ന് ഒഴിവു വന്ന രാഷ്​ട്രപതി സ്​ഥാനത്തേക്ക്​ പാർട്ടിയുടെ ഔദ്യോഗിക സ്​ഥാനാർഥിയായിരുന്ന നീലം സഞ്ജീവ റെഡ്ഢിക്കെതിരെ ഉപരാഷ്ട്രപതി വി.വി. ഗിരിയെ മത്സരിപ്പിച്ച് ജയിപ്പിച്ചതോടെ കോൺഗ്രസ്​ അവരെ പ്രാഥമികാംഗത്വത്തിൽ നിന്ന്​ പുറത്താക്കി. 705 എ.ഐ.സി.സി അംഗങ്ങളിൽ 446 അംഗങ്ങളുടെ പിന്തുണയുമായി ഇന്ദിര ഗാന്ധി ജഗ്ജീവൻറാമിനെ അധ്യക്ഷനാക്കി പുതിയ പാർട്ടിക്ക് രൂപം നൽകി. 1971ലെ ലോക്സഭ തെരഞ്ഞെടുപ്പിൽ മൂന്നിൽ രണ്ട്​ ഭൂരിപക്ഷവും നേടി. ഈ വിജയത്തിന്​ പ്രധാന കാരണം '69ലെ പിളർപ്പിനുശേഷം ഇന്ദിര കൈക്കൊണ്ട ബാങ്ക്​ ദേശസാത്​കരണം, പ്രിവിപെഴ്സ്​ എന്ന പേരിൽ 560 ഓളം നാട്ടുരാജാക്കന്മാർക്ക് നൽകി വന്നിരുന്ന രാജകീയ ആനുകൂല്യങ്ങൾ നിർത്തലാക്കൽ തുടങ്ങിയ സുപ്രധാന സാമ്പത്തിക പരിഷ്കരണങ്ങളായിരുന്നു.

ചരിത്രം ജ്വലിക്കുന്ന ബംഗ്ലാദേശ് യുദ്ധം

കിഴക്കൻ പാകിസ്​താനിൽ നടന്ന പൊതു തെരഞ്ഞെടുപ്പിൽ മുജീബുറഹ്മാന്റെ നേതൃത്വത്തിലെ അവാമിലീഗ് വമ്പിച്ച വിജയം കൈവരിച്ചെങ്കിലും അധികാരം കൈമാറാൻ തയാറാവാത്ത പാകിസ്​താൻ പ്രസിഡന്റ് യഹ്യാഖാ​ന്റെ തീരുമാനത്തിനെതിരെ ബംഗ്ലാദേശ്​ രാഷ്​ട്രം എന്ന ആവശ്യമുന്നയിച്ച്​ കിഴക്കൻ പാകിസ്​താനിൽ പൊട്ടിപ്പുറപ്പെട്ട പ്രക്ഷോഭത്തിന് ഇന്ത്യ പരിപൂർണ പിന്തുണ പ്രഖ്യാപിച്ചു. ബംഗ്ലാദേശ് വിമോചന പോരാളികളായ മുക്തി ഭാഹിനിക്കനുകൂലമായി ഇന്ത്യ പരസ്യപിന്തുണ പ്രഖ്യാപിച്ചതോടെ പാകിസ്​താൻ ഇന്ത്യക്കെതിരെ യുദ്ധപ്രഖ്യാപനം നടത്തി. 14 ദിവസം നീണ്ട യുദ്ധത്തിൽ പാക് സൈന്യം കീഴടങ്ങി. ബംഗ്ലാദേശ് എന്ന ഒരു രാജ്യത്തി​ന്റെ ജന്മത്തിന്​ ഇന്ത്യ കാർമികത്വം വഹിച്ചുവെന്നുതന്നെ പറയാം.

1975 ജൂൺ 12ന്​ അലഹബാദ് ഹൈകോടതി ഇന്ദിര ഗാന്ധിയുടെ തെരഞ്ഞെടുപ്പ് അസാധുവാക്കിയതിന്​ പിറകെ 1975 ജൂൺ 26ന്​ അടിയന്തരാവസ്​ഥ പ്രഖ്യാപിച്ചതും തുടർന്ന് ഭരണഘടനപരമായ മൗലികാവകാശങ്ങൾ മരവിപ്പിച്ച്​ പ്രതിപക്ഷ നേതാക്കളെ കൂട്ടമായി അറസ്​റ്റ്​ ചെയ്​തതുമെല്ലാം രാജ്യചരിത്രത്തിലെ ഇരുണ്ട അധ്യായമാണ്​. അടിയന്തരാവസ്​ഥക്കാലത്ത് സർവ അധികാരങ്ങളും പ്രധാനമന്ത്രിയിൽ കേന്ദ്രീകരിക്കപ്പെട്ടെന്ന് ആരോപിക്കപ്പെട്ടിരുന്നപ്പോഴും സുപ്രീംകോടതിക്ക് സ്വതന്ത്രമായി പ്രവർത്തിക്കാൻ അവസരമുണ്ടായിരുന്നു.

1977ലെ തെരഞ്ഞെടുപ്പ് പരാജയം ഇന്ദിര ഗാന്ധി എന്ന നേതാവിനെ ഗുണകരമായി മാറ്റിപ്പണിതു എന്നുവേണം വിലയിരുത്താൻ. കർണാടകത്തിലെ ചിക്കമംഗളൂരുവിൽ നിന്ന്​ പാർലമെന്റിലേക്ക് തിരഞ്ഞെടുക്കപ്പെട്ടെങ്കിലും പാർലമെന്റ് പ്രിവിലേജ് കമ്മിറ്റിയുടെ തീരുമാനപ്രകാരം തിരഞ്ഞെടുക്കപ്പെട്ട ഇന്ദിര ഗാന്ധിയെ സ്​ഥാനത്തുനിന്ന്​ നീക്കി. ലോക്​സഭ പിരിയും വരെ ഇന്ദിര ഗാന്ധിയെ തടവിൽ പാർപ്പിച്ചെങ്കിലും 1980 ൽ അവർ അധികാരത്തിൽ തിരിച്ചു വന്നു.

ലോകത്തിലെ ശാക്​തികചേരികൾ എന്നും ആദരിച്ച നേതാവായിരുന്നു ഇന്ദിര ഗാന്ധി. ഒരു വ്യക്​തി എന്നതിലുപരി ഇന്ത്യ എന്ന രാജ്യം ഉയർത്തിപ്പിടിച്ച നീതിപൂർവമായ അന്താരാഷ്​ട്ര നിലപാടുകൾക്കുള്ള സ്​നേഹം കൂടിയായിരുന്നു അത്​. 1983 ൽ ഡൽഹിയിൽ നടന്ന ചേരിചേരാ രാജ്യങ്ങളുടെ ഉച്ചകോടിയിൽ തനിക്ക്​ മുമ്പ് ജോർഡൻ ഭരണാധികാരി ഹുസൈൻ രാജാവിനെ ക്ഷണിച്ചതിൽ ക്ഷുഭിതനായി ഉച്ചകോടി ബഹിഷ്കരിക്കാനൊരുങ്ങി ഫലസ്​തീൻ വിമോചന സംഘടന (പി.എൽ.ഒ) നേതാവ്​ യാസിർ അറാഫത്ത്​. ക്യൂബൻ വിപ്ലവ നായകൻ ഫിദ്ൽ കാസ്​ട്രോ മുഖാന്തരം സമ്മേളനസെക്രട്ടറി ജനറൽ നട്​വർ സിങ്​ നടത്തിയ അപേക്ഷകൾക്ക്​ മുന്നിൽ വഴങ്ങാൻ തയാറായിരുന്നില്ല അറാഫത്ത്​. എന്നാൽ, താങ്കൾ ഇന്ദിര ഗാന്ധിയുടെ മിത്രമാണെങ്കിൽ ഈ അപേക്ഷ സ്വീകരിക്കണമെന്ന്​ കാസ്​ട്രോ പറഞ്ഞതോടെ അറാഫത്ത് വഴങ്ങുകയും തിരികെ ഉച്ചകോടിയിൽ വന്ന് പ്രഭാഷണം നടത്തുകയും ചെയ്​തു.

ജാതിയുടെയും മതത്തി​ന്റെയും പേരിൽ ജനങ്ങളെ ധ്രുവീകരിച്ച്​ നേട്ടം കൊയ്യാൻ ശ്രമം നടക്കുന്ന കാലത്ത്​ മതഭാഷാ ആചാര വിചാരങ്ങൾക്കതീതമായി ജനങ്ങളെ ഒന്നിപ്പിക്കാൻ കഴിയുന്ന ഇന്ദിര ഗാന്ധിയെപ്പോലുള്ള നേതാവി​ന്റെ അഭാവം നിഴലിച്ചുനിൽക്കുന്നു. രാജ്യത്തെ തകർച്ചയിൽ നിന്ന്​ കരകയറ്റാൻ ഇന്ദിര ഗാന്ധി ഉയർത്തിപ്പിടിച്ച കലർപ്പില്ലാത്ത മതേതരത്വത്തിനു മാത്രമെ സാധിക്കുകയുള്ളൂവെന്ന യാഥാർഥ്യം ഇന്ത്യയിലെ പ്രതിപക്ഷ കക്ഷികൾ തിരിച്ചറിഞ്ഞേ പറ്റൂ.