തന്ത്രപരം, സി.പി.എം നീക്കം

ലൈംഗികപീഡന ആരോപണത്തിൽ പി.കെ. ശശി എം.എൽ.എയെ ആറു മാസത്തേക്ക്​ പാർട്ടി അംഗത്വത്തിൽനിന്ന്​ സസ്​​െപൻഡ്​ ചെയ്യാനുള്ള തീരുമാനം തന്ത്രപരം. ഒറ്റ നടപടിയിലൂടെ പാർട്ടിക്ക്​ ഒന്നിലേറെ ലക്ഷ്യമുണ്ട്​. ഒരു നേതാവിനെ, അതും നിയമസഭാസാമാജികനെ അംഗത്വത്തിൽനിന്ന്​ സസ്​​െപൻഡ്​ ചെയ്യുക എന്നതിലൂടെ വലിയൊരു നടപടിയാണ്​ നേതൃത്വം കൈക്കൊണ്ടതെന്ന്​ പ്രത്യക്ഷത്തിൽ തോന്നിപ്പിക്കുകയാണ്​ സി.പി.എം ചെയ്യുന്നത്​.

സംഘടനാ നടപടിയിൽ പരാതിക്കാരി​ തൃപ്​തി രേഖപ്പെടുത്തിയതുവഴി എം.എൽ.എക്കെതിരായ നിയമനടപടിയിൽനിന്നും അതിലൂടെ പാർട്ടി വീണുപോയേക്കാവുന്ന വിവാദങ്ങളിലുംനിന്നും തലയൂരാനായി. നിയമസഭയിൽ പ്രതിപക്ഷം വിഷയം ഉന്നയിക്കുമെങ്കിലും, ആക്രമണത്തിന്​ അധികദിവസം ആയുസ്സുണ്ടാവില്ലെന്നാണ്​ സി.പി.എം കണക്കുകൂട്ടൽ. പൊതുസമൂഹത്തിനുമുന്നിൽ ഒൗദ്യോഗിക പക്ഷക്കാരെ സംരക്ഷിക്കുന്ന നേതൃത്വം എന്ന പ്രതിപക്ഷ- ‘ബൂർഷ്വാ മാധ്യമ’ ആരോപണത്തി​​​െൻറ മുനയൊടിക്കാൻ കഴി​െഞ്ഞന്ന ആശ്വാസവും നേതൃത്വത്തിനുണ്ട്​. ഒരുതരത്തിൽ നേതൃത്വം ശശിയെ രക്ഷിക്കുകയായിരു​െന്നന്ന്​ വിശ്വസിക്കുന്നവർ സംസ്ഥാന സമിതിയിൽതന്നെയുണ്ട്​.

ശശിയെ പുറത്താക്കുകയോ തരംതാഴ്​ത്തുകയോ ചെയ്​തിരു​െന്നങ്കിൽ തിരിച്ചുവരവ്​ എളുപ്പമാവില്ലായിരുന്നു. പുറത്താക്കിയിരു​െന്നങ്കിൽ കീഴ്​ഘടകമായ ബ്രാഞ്ച്​ എന്ന കടമ്പ മുതൽ കടന്നുവരേണ്ട വെല്ലുവിളി ഉണ്ടാവുമായിരുന്നു. തരംതാഴ്​ത്തിയിരു​െന്നങ്കിൽ കീഴ്​ഘടകത്തിൽ പ്രവർത്തിക്കേണ്ടി വന്നേനേ. എന്നാൽ, സസ്​പെൻഷൻ കാലാവധി പൂർത്തീകരിച്ചാൽ, സംസ്ഥാന സമിതി തീരുമാനിച്ചാൽ ജില്ല സെക്ര​േട്ടറിയറ്റിലേക്ക്​ തിരിച്ചുവരാൻ ശശിക്ക്​ വഴിതുറക്കും.

ശബരിമല അടക്കമുള്ള വിഷയങ്ങളിൽ കോൺഗ്രസിനെയും ബി.ജെ.പിയെയും സംഘ്​പരിവാറിനെയും നേരിടുക എന്ന ലക്ഷ്യം മുന്നിലുള്ള സി.പി.എമ്മിന്​ ശശി വിഷയം ഉൾപ്പെ​െട മറ്റെല്ലാ പ്രശ്​നങ്ങളും തൽക്കാലത്തേക്കെങ്കിലും പരിഹരിക്കേണ്ടത്​ അനിവാര്യമായ രാഷ്​ട്രീയ നടപടി കൂടിയാണ്. പുനർനിർമാണവുമായി ബന്ധപ്പെട്ടും ഭരണത്തിലും വെല്ലുവിളി നേരിടുന്ന സർക്കാറിന്​ വീണുകിട്ടിയ രാഷ്​ട്രീയ വാതിലാണ്​ ശബരിമല. സി.പി.എമ്മും സർക്കാറും നിശ്ചയിച്ച അജണ്ടയിൽ യു.ഡി.എഫും ബി.ജെ.പിയും വീണതോടെ ഭരണത്തെക്കുറിച്ചുള്ള എല്ലാ ചോദ്യങ്ങളും അപ്രസക്തമാക്കാൻ കഴിഞ്ഞു.

സുപ്രീംകോടതി വിധിയും ഭരണഘടനാ ബാധ്യതയും മുൻനിർത്തി സർക്കാർ യു.ഡി.എഫിനെയും സംഘ്​പരിവാറിനെയും എതിരിട്ടതോടെ ആദ്യം വിശ്വാസമെന്ന വികാരത്തിലേറി മുന്നേറിയവർക്ക്​ അടിതെറ്റി. അയോധ്യയിലെ രാമക്ഷേത്ര നിർമാണത്തെ സംഘ്​പരിവാറും ബി.ജെ.പി അഖിലേന്ത്യ നേതൃത്വവും ന്യായീകരിച്ചതോടെ ശബരിമലയിലെ കോൺഗ്രസ്​-യു.ഡി.എഫ്​ നിലപാട്​ കേരളത്തിലെ ന്യൂനപക്ഷത്തിനും മതേതര വിഭാഗത്തിനും ഇടയിൽ സി.പി.എമ്മിന്​ ചർച്ചയാക്കാൻ കഴിഞ്ഞു. ഇതോടെ ശബരിമലയിൽ നേരത്തേതന്നെ സംഘ്​പരിവാർ രാഷ്​ട്രീയത്തിനുമുന്നിൽ അടിതെറ്റിയ കോൺഗ്രസിന്​ തങ്ങളുടെ ​മതേതര മുഖം തിരിച്ചു​പി​ടിക്കേണ്ട ബാധ്യതയായി. ബിജെ.പിയാവ​െട്ട, നേതാക്കളുടെ അറസ്​റ്റിന്​ മുന്നിൽ പതറി നിൽക്കുകയാണ്​. ശബരിമലയിൽ ലഭിച്ച മേൽക്കോയ്​മ നിലനിർത്തുകയും മതേതരത്വം, ഭരണഘടന സംരക്ഷണം എന്നീ അജണ്ടകളിൽ കോൺഗ്രസിനെയും സംഘ്​പരിവാറിനെയും തളച്ചിടുകയും ചെയ്യുക എന്ന ലക്ഷ്യം മുന്നിലുള്ള സി.പി.എമ്മിന്​ ശശി വിഷയം നീട്ടിക്കൊണ്ടുപോകാൻ കഴിയുമായിരുന്നില്ല.

പാർട്ടിയിൽ അവകാശമുണ്ടാവില്ല; ബാധ്യതയുണ്ടാവും
അംഗങ്ങൾക്കെതിരെ സി.പി.എം സ്വീകരിക്കുന്ന അച്ചടക്ക നടപടികളിൽ രണ്ടാമത്തെ ഉയർന്നതാണ്​ സസ്​പെൻഷൻ. ആറ്​ തരത്തിലുള്ള അച്ചടക്ക നടപടികളാണ്​ പാർട്ടി​ ഭരണഘടന നിർദേശിക്കുന്നത്​: 1. താക്കീത് 2. ശാസന (സെൻഷർ) 3. പരസ്യ ശാസന 4. പാർട്ടിയിൽ വഹിക്കുന്ന സ്ഥാനത്തുനിന്ന്​ നീക്കൽ 5. ഒരു കൊല്ലത്തിൽ കവിയാത്ത ഏതെങ്കിലും കാലയളവിലേക്ക്​ പൂർണ അംഗത്വം സസ്​പെൻഡ്​ ചെയ്യൽ 6. പാർട്ടിയിൽ നിന്ന്​ പുറന്തള്ളൽ. ഇതിൽ രണ്ടാമത്തെ ഉയർന്ന ശിക്ഷയായ സസ്​പെൻഷനാണ്​ സംസ്ഥാനനേതൃത്വം ശശിക്ക്​ വിധിച്ചത്​. പൂർണ അംഗത്വത്തിൽ നിന്ന്​ സസ്​പെൻഡ്​ ​െചയ്​തതോടെ ശശിക്ക്​ പാർട്ടിയിൽ അവകാശങ്ങളൊന്നും ഉണ്ടാവില്ല. പക്ഷേ, പാർട്ടിയോട്​ ബാധ്യത പുലർത്തേണ്ടതുണ്ട്​. പാർട്ടി കമ്മിറ്റികളിൽ പ​െങ്കടുക്കാനാകില്ല. എം.എൽ.എ എന്ന നിലയിൽ നിയമസഭ നടപടികളിൽ പ​​െങ്കടുക്കാമെങ്കിലും പാർലമ​​െൻററി പാർട്ടി യോഗത്തിൽ നിന്ന്​ വിട്ടുനിൽക്കേണ്ടിവരും.

അതേസമയം, പാർട്ടി ഏതെങ്കിലും ഉത്തരവാദിത്തമോ ജോലിയോ ചുമതലപ്പെടുത്തിയാൽ അത്​ നിർവഹിക്കണം. സസ്​പെൻഷൻ കാലാവധി പൂർത്തീകരിച്ചാൽ ഏത്​ കമ്മിറ്റിയാണോ നടപടി എടുത്തത്​, ആ കമ്മിറ്റിക്ക്​ അംഗം ഏത്​ കമ്മിറ്റിയിൽ പ്രവർത്തിക്കണമെന്ന്​ തീരുമാനിക്കാം. ഇതോടെ ആറുമാസത്തിന്​ ശേഷം സംസ്ഥാനസമിതി തീരുമാനിച്ചാൽ ജില്ല സെക്ര​േട്ടറിയറ്റിലേക്ക്​ തിരിച്ചുവരാൻ ശശിക്ക്​ വഴിതുറക്കും. ആ തരത്തിൽ സസ്​പെൻഷൻ ശശിക്ക്​ ഗുണകരമാണെന്ന്​ വിലയിരുത്തുന്നവർ പാർട്ടിയിലുണ്ട്​. ശശിയെ നേതൃത്വം പുറത്താക്കുകയോ തരംതാഴ്​ത്തുകയോ ചെയ്​തിരു​െന്നങ്കിൽ തിരിച്ചുവരവ്​ എളുപ്പമാവില്ലായിരുന്നു.