ജീവിച്ച് കൊതി തീരും മുൻപായിരുന്നു ആ യാത്ര - സീന ഭാസ്ക്കർ
text_fieldsഇന്ന് ''കയം'' അനാഥമാണ്. കയത്തിൽ താമസിച്ച് കൊതി തീരുംമുമ്പാണ് ബ്രിട്ടോ എന്നന്നേക്കുമായി യാത്രയായത്. അനാഥത്വം പേറുന്ന കയം പോലെയാണിന്നെൻ്റെയും മോളുടേയും ജീവിതം. ഞങ്ങൾ കേരളത്തിലില്ല; ഡൽഹിയിലാണ് താമസിക്കുന്നത്. വർഷാവസാനം നാട്ടിൽ വരും. ബ്രിട്ടോ ദിനം ആചരിക്കുന്നതിനായി പ്രസ്ഥാനത്തേയും ബ്രിട്ടോയേയും സ്നേഹിക്കുന്ന ധാരാളം സഖാക്കളുടെ സ്നേഹനിർഭരമായ ക്ഷണത്തിന് മുന്നിൽ അനുസരണാശീലരായാണ് ഞങ്ങളെത്തുന്നത്.
![](https://www.madhyamam.com/h-upload/2020/12/31/820568-britto-daughter1.webp)
ഇപ്പോഴും ബ്രിട്ടോയില്ല എന്ന് തോന്നുന്നില്ല. എന്നാൽ ചില തീരുമാനങ്ങളെടുക്കുമ്പോൾ, നമ്മുടെ മനസിനെ വായിച്ചെടുക്കുന്നതു പോലെയുള്ള പ്രോത്സാഹനമാണ് ബ്രിട്ടോ തരുന്നത്. ആ ഊർജ്ജം നഷ്ടപ്പെട്ടപ്പോൾ കാറ്റുപോയ ബലൂൺ പോലെയായി ഞങ്ങളുടെ ജീവിതം. ബ്രിട്ടോയുടെ നിഘണ്ടുവിൽ " സാദ്ധ്യമല്ല " എന്ന വാക്കില്ല. മനസിനെ തയ്യാറാക്കിയാൽ എന്തും സാദ്ധ്യമാകും അതായിരുന്നു ആ ജീവിതം. ഇനിയൊരിക്കലും അതിലേക്ക് തിരിച്ചു പോകാനാകില്ലല്ലൊ എന്നാലോചിക്കുമ്പോഴുണ്ടാകുന്ന നീറ്റൽ അസഹനീയമാണ്.
![](https://www.madhyamam.com/h-upload/2020/12/31/820574-britto-seena-3.webp)
ആരോടും വെറുപ്പൊ വിദ്വോഷമൊ വച്ചു പുലർത്താത്ത ജീവിതം. ബ്രിട്ടോയെ കുത്തിയവരിൽ ഒരാൾ നട്ടെല്ലിന് ക്യാൻസർ വന്ന് കിടപ്പുരോഗിയായപ്പോൾ അയാൾക്ക് ബ്രിട്ടോയെ കാണണമെന്നാഗ്രഹം പ്രകടിപ്പിച്ചപ്പോൾ " ഒരു നട്ടെല്ല് രോഗി എങ്ങനെ തന്റെ ശരീരം നോക്കണമെന്നുള്ളതിനെ കുറിച്ച് വ്യക്തമാക്കി കൊടുത്തുകൊണ്ട് " സന്ദേശവാഹകനെ പറഞ്ഞയക്കുകയാണുണ്ടായത്.
![](https://www.madhyamam.com/h-upload/2020/12/31/820576-britto-seena-2.webp)
ഇതു സംബന്ധിച്ച് ഞാൻ പലപ്പോഴും ചോദിച്ചിട്ടുണ്ട്. അപ്പോഴൊക്കെ ബ്രിട്ടോയുടെ മറുപടി സീനേ " Past is past ". എനിക്ക് അവരെയൊന്നും ഒരിക്കൽ പോലും കാണേണ്ടതില്ല, അവരൊക്കെ ആൾക്കൂട്ടത്തിൽ ഒരാൾ മാത്രം; ബ്രിട്ടോയുടെ പക്വമായ മനസിന് മുന്നിൽ നമിച്ചു പോകുന്നു. ഇപ്പോഴും എവിടെ ചെന്നാലും ബ്രിട്ടോയുടെ പേരിൽ കിട്ടുന്ന പരിഗണന, പൊതു സമൂഹം അദ്ദേഹത്തിന് നൽകുന്ന ബഹുമാനമാണ്. ശുഭ്ര പതാക തണലിൽ ഇനിയും കരുത്തുറ്റ ബ്രിട്ടോമാർ ഉണ്ടാകട്ടെ; നാടിൻ്റെ നന്മക്ക് വേണ്ടി നിസ്വാർത്ഥമായ സേവനം ലഭിക്കുന്നതിന് വേണ്ടി കാത്തിരിക്കുന്നു...
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.