'പിണറായി സർക്കാർ മുസ്​ലിംകളുടെ അവകാശം മുന്നാക്ക ക്രൈസ്തവർക്ക് നൽകുന്നു'

ഉമ്മൻചാണ്ടി സർക്കാർ പിന്നോക്ക സമുദായങ്ങളുടെ അവകാശം മുന്നോക്കക്കാർക്ക് എടുത്ത് നൽകിയെങ്കിൽ പിണറായി സർക്കാർ മുസ്​ലിം സമുദായങ്ങളുടെ അവകാശം എടുത്ത് മുന്നാക്ക ക്രൈസ്തവർക്ക് നൽകുന്നു. ഇവിടെ സി.പി.എം ക്രൈസ്തവരെ ഭയപ്പെടുന്നു. രണ്ടു സന്ദർഭത്തിലും നഷ്ടം പിന്നോക്ക സമുദായങ്ങൾക്ക്......പിന്നോക്ക വിഭാഗ വികസന വകുപ്പ് മുൻ ഡയറക്ടർ വി.ആർ. ജോഷി എഴുതുന്നു

ഇന്ത്യയിലെ മുസ്​ലിം സമുദായത്തിന്‍റെ സാമൂഹിക പിന്നാക്കാവസ്​ഥ പരിഹരിക്കുന്നതിനാണ്​ സച്ചാർ കമീഷനെ നിയോഗിച്ചത്​. ഈ കമീഷന്‍റെ ശിപാർശയനുസരിച്ചുള്ള പദ്ധതികളാണ് രാജ്യത്ത്​​ നടപ്പാക്കിയത്​.അത്​ കേരളത്തിൽ നടപ്പാക്കാൻ തീരുമാനിച്ച വി.എസ്​.അച്യുതാനന്ദന്‍റെ നേതൃത്വത്തിലുള്ള ഇടത്​ സർക്കാർ പാലൊളി മുഹമ്മദ്​ കുട്ടിയെ ചെയർമാനാക്കി ഒരു കമ്മിറ്റിയെ നിയമിച്ചു. ആ കമ്മിറ്റിയുടെ ശിപാർശ പ്രകാരം മുസ്​ലിം വിഭാഗത്തിന്​ മാത്രമുള്ള ഈ ക്ഷേമപരിപാടികളെ എല്ലാ ന്യൂനപക്ഷങ്ങൾക്കും അവകാശപ്പെട്ട​ എന്ന രീതിയിലാണ്​ നടപ്പാക്കിയത്​. അത്​ ​ ശരിയായ രീതിയായിരുന്നില്ല. മുസ്​ലിം സമുദായത്തിന്​ വേണ്ടിയുള്ള പദ്ധതി അവർക്കു മാത്രമായാണ്​ നടപ്പാക്കേണ്ടിയിരുന്നത്​. ചില പ്രത്യേക സാഹചര്യങ്ങൾ കണക്കിലെടുത്ത്​ ന്യൂനപക്ഷ വിഭാഗങ്ങളിലെ അർഹരായ ഇതര വിഭാഗങ്ങൾക്ക്​ കൂടി അതിൽ നിന്ന്​ അനുവദിക്കാൻ തീരുമാനിച്ചു. ന്യൂനപക്ഷ വിഭാഗങ്ങളിലെ അർഹരായ ഇതര വിഭാഗം എന്നത്​ പട്ടികജാതിയിൽനിന്ന്​ ക്രിസ്​തുമതം സ്വീകരിച്ച വിഭാഗങ്ങളും ലത്തീൻ കത്തോലിക്ക വിഭാഗവുമാണെന്ന​ ഉത്തരവും ഇറക്കി​. അപ്രകാരം ആനുകൂല്യങ്ങൾ അനുവദിക്കു​േമ്പാൾ അത്​ 80 ശതമാനം മുസ്​ലിം വിഭാഗങ്ങൾക്കും 20 ശതമാനം ഈ ഇതര വിഭാഗങ്ങൾക്കും അനുവദിച്ചുകൊണ്ടാണ്​ ഉത്തരവായത്​.

ഇതിനെതിരെ കേരള ഹൈക്കോടതിയിലുണ്ടായ കേസ്​ യഥാർഥത്തിൽ വസ്​തുതകൾ പൂർണമായി ബോധിപ്പിക്കുന്നതിൽ ബന്ധപ്പെട്ട കക്ഷികൾ പരാജയപ്പെട്ടു. അതല്ലെങ്കിൽ ഇത്​ മുസ്​ലിം സമുദായത്തിന്​ മാത്രമുള്ള പദ്ധതിയാണെന്നും അതിൽനിന്ന്​ ഒരു പ്രത്യേക പരിഗണന നൽകി ഇതര വിഭാഗങ്ങൾക്ക്​ നൽകിയതാണെന്നും ബോധിപ്പിക്കുന്നതിന്​ പകരം മുസ്​ലിം സമുദായത്തിന്‍റെയും ഇതര ന്യൂനപക്ഷ വിഭാഗങ്ങളുടെയും ജനസംഖ്യ കണക്ക്​ സൂചിപ്പിച്ചുകൊണ്ട്​ ആ അനീതി മാത്രമാണ്​ കോടതി മുമ്പാകെ ശ്രദ്ധയിൽ വന്നത്​.

ഈ അനീതി നീതീകരിക്കത്തക്കതല്ല എന്ന പരാമർശവും വിധിയും കോടതിയിൽനിന്നുണ്ടാകുകയും ചെയ്​തു. ഈ വിധിയുടെ അടിസ്​ഥാനത്തിൽ സർക്കാർ കോടതിവിധി നടപ്പാക്കുന്നതിന്​ ശ്രമിച്ചത്​ ഉചിതമായ നടപടിയായില്ല. യഥാർഥത്തിൽ കോടതിയെ വസ്​തുതകൾ ബോധിപ്പിച്ച്​ അത്​ പുനഃപരിശോധിക്കുവാനായിരുന്നു ശ്രമിക്കേണ്ടിയിരുന്നത്​.

ന്യൂനപക്ഷ സ്കോളർഷിപ്പ് വിതരണ അനുപാതം അല്ല വിഷയം, സച്ചാർ കമ്മീഷൻ ശുപാർശ നടപ്പാക്കലാണ്. പിന്നോക്ക സമുദായ നേതാക്കളും വിശിഷ്യ മുസ്​ലിം സമുദായ സംഘടനകളും വീണ്ടും വെട്ടിൽ വീഴരുത്. പിന്നോക്ക സമുദായങ്ങളുടെ ഉദ്യോഗ പ്രാതിനിധ്യത്തിന് പരിഹാരം ഉണ്ടാവാൻ വിദ്യാഭ്യാസമേഖലയിൽ സംവരണം വേണമെന്ന് ജസ്റ്റിസ് നരേന്ദ്രൻ ശുപാർശ ചെയ്തതാണ്​.

2006 ൽ ഈ ശുപാർശ നടപ്പാക്കിയ ഉമ്മൻചാണ്ടി സർക്കാർ പിന്നോക്കക്കാരെ പറ്റിച്ച് മുന്നോക്ക സമുദായങ്ങൾക്കു 10% സംവരണം നൽകി. ജനസംഖ്യയിൽ 27 ശതമാനം ഉള്ള മുസ്​ലിംകൾക്ക് ഏഴ്​ ശതമാനം സംവരണവും സമാന ജനസംഖ്യയുള്ള ഈഴവർക്ക് എട്ട്​ ശതമാനവും അനുവദിച്ചപ്പോൾ ജനസംഖ്യയിൽ കഷ്ടിച്ച് 20 ശതമാനം മാത്രമുള്ള മുന്നാക്ക ജാതികൾക്ക് അനർഹമായി 10% കൊടുത്തു. എൻ.എസ്.എസിനെ പേടിച്ച് മുസ്​ലിം സമുദായ നേതാക്കൾ അന്ന് നിശബ്ദത പാലിച്ചു. മറ്റു പിന്നോക്ക സമുദായ നേതാക്കൾ കണ്ടില്ലെന്ന് നടിച്ചു. ഉമ്മൻചാണ്ടി സർക്കാർ പിന്നോക്ക സമുദായങ്ങളുടെ അവകാശം മുന്നോക്കക്കാർക്ക് എടുത്ത് നൽകിയെങ്കിൽ പിണറായി സർക്കാർ മുസ്​ലിം സമുദായങ്ങളുടെ അവകാശം എടുത്ത് മുന്നാക്ക ക്രൈസ്തവർക്ക് നൽകുന്നു. ഇവിടെ സി.പി.എം ക്രൈസ്തവരെ ഭയപ്പെടുന്നു. രണ്ടു സന്ദർഭത്തിലും നഷ്ടം പിന്നോക്ക സമുദായങ്ങൾക്ക്.

ഇപ്പോൾ ന്യൂനപക്ഷങ്ങളുടെ ജനസംഖ്യാനുപാതികമായി വിതരണം ചെയ്യുവാനുള്ള നീക്കം സച്ചാർ കമീഷൻ റിപ്പോർട്ടിനോടും മുസ്​ലിം സമുദായത്തോടും ചെയ്യുന്ന ദ്രോഹമാണ്​. എന്നുമാത്രമല്ല, ഗവൺമെന്‍റിന്‍റെ ഈ നിലപാട്​ ദൂരവ്യാപകമായ ഇതര പ്രത്യാഘാതങ്ങൾക്കും ഇടയാക്കും.

ഉദാഹരണമായി, പട്ടിക വിഭാഗങ്ങൾക്കു വേണ്ടി മാതമുള്ള ഒരു മെഡിക്കൽ കോളജാണ്​ ​പാലക്കാടുള്ളത്​. ഒരു പ്രത്യേക സാഹചര്യത്തിലും കേരളത്തിന്‍റെ സവിശേഷ സാമൂഹിക സാഹചര്യങ്ങൾ കണക്കിലെടുത്തും ആകെ ലഭ്യമായ സീറ്റുകളിൽ 13 ശതമാനം പട്ടിക വിഭാഗങ്ങളല്ലാ​ത്ത വിദ്യാർഥികൾക്ക്​ കൂടി അനുവദിച്ചിട്ടുണ്ട്​. നാളെ ഒരു അപേക്ഷകൻ പട്ടിക വിഭാഗങ്ങൾ കേരളത്തിൽ 10 ശതമാനമേ ഉള്ളൂ എന്നും ഇതര സമുദായങ്ങൾ 80 ഉണ്ട്​ എന്നും അതിനാൽ ഈ തോത്​ ശരിയല്ല എന്ന്​ ആവശ്യപ്പെട്ട്​ ഒരു ഹരജി സമർപിക്കുകയും ആ വസ്​തുതകൾ മാത്രം ബോധിപ്പിച്ചാൽ കോടതിയിൽനിന്ന്​ ഒരു വിധിയുമുണ്ടായാൽ ഈ സർക്കാർ ഒരുപക്ഷേ, പട്ടിക വിഭാഗക്കാരായ വിദ്യാർഥികൾക്കുവേണ്ടി മാത്രമുള്ള പാലക്കാട്​ മെഡിക്കൽ കോളജിലും ഇത്തരത്തിൽ ഇതര വിഭാഗങ്ങൾക്ക്​ വർധിച്ച തോതിൽ​ നൽകാനിടയാക്കും. സർക്കാറിന്‍റെ ഈ നീക്കം യഥാർഥത്തിൽ പുനഃപരിശോധനക്ക്​ വിധേയമാക്കേണ്ടതുണ്ട്​. അപ്പം പങ്കിട്ട കുരങ്ങന്‍റെ കഥ ഇനിയെങ്കിലും തിരിച്ചറിയുക പങ്കുവെക്കൽ പരാതിപ്പെട്ടപ്പോൾ എല്ലാം കുരങ്ങൻ കഴിച്ചു. ഇപ്പോൾ കുരങ്ങന്‍റെ സ്ഥാനം സർക്കാരിനാണ്.