ആശങ്കയേറ്റുന്ന ഇസ്രായേൽ-ലബനാൻ സംഘർഷം

ഗസ്സയിൽ​ യുദ്ധവിരാമത്തിന്​ അമേരിക്കൻ നേതൃത്വത്തിൽ നടന്നുവരുന്ന ശ്രമങ്ങൾ അനിശ്ചിതത്വത്തിൽ നിൽക്കെ തന്നെ യുദ്ധം കൂടുതൽ വിപുലപ്പെടുത്താനുള്ള ഇസ്രായേൽ ദുർമോഹത്തിന്‍റെ സൂചനകൾ നേ​രത്തേ പ്രകടമായതാണ്​. മേഖലയിൽ തീയാളിയാൽ അത്​ ഇസ്രായേലിനെ മാത്രമല്ല, അമേരിക്കയടക്കമുള്ള പശ്ചാത്തല ശക്തികളെകൂടി ബാധിക്കുമെന്ന തിരിച്ചറിവും യുദ്ധവിരാമ ചർച്ചകൾ തകൃതിയായതിന് പിന്നിലുണ്ട്.

എന്നാൽ, മുമ്പെന്നത്തെയുംപോലെ തന്നെ മനുഷ്യത്വത്തിന്‍റെയും ധാർമികതയുടെയും അടിത്തറയിലുള്ള രാഷ്ട്രാന്തരീയ മര്യാദകളൊന്നും തങ്ങൾക്കു ബാധകമ​ല്ലെന്നു തീരുമാനിച്ചുറച്ച സയണിസ്റ്റ്​ രാഷ്ട്രം പുതിയ ആക്രമണമുഖങ്ങൾ തുറക്കുകയാണ്​. അതിന്‍റെ ഒടുവിലെ ഉദാഹരണമാണ് ഞായറാഴ്ച പുലർച്ച ദക്ഷിണ ലബനാനിൽ ഇസ്രായേൽ നടത്തിയ ശക്തമായ ബോംബിങ്​. ഹിസ്​ബുല്ല കമാൻഡർ ഫുആദ്​ ശുക്​റിനെ വധിച്ചതിന്​ പ്രതികാരം ചോദിക്കുമെന്ന്​ വ്യക്തമാക്കിയിരിക്കെ, ലബനാനിൽനിന്ന്​ ഇസ്രായേലിനെ ലക്ഷ്യമിട്ട ആക്രമണത്തെ മുൻകൂർ ചെറുക്കുകയായിരുന്നു എന്നാണ്​ കടന്നാക്രമണത്തിന്​ തെൽഅവീവ്​ പറഞ്ഞ ന്യായം. ഞായറാഴ്ച വെളുപ്പിന്​ അഞ്ചിന്​ ഹിസ്​ബുല്ല ആക്രമണം നടത്തുമെന്ന്​ ഇസ്രായേൽ-യു.എസ്​ ഇൻലിജൻസിന്​ കിട്ടിയ വിവരത്തിന്‍റെ അടിസ്ഥാനത്തിൽ​ അതിനു മുമ്പേ നൂറു ഫൈറ്റർ ജറ്റുകൾ തെക്കൻ ലബനാനിലെ 40 ലോഞ്ചിങ്​ കോമ്പൗണ്ടുകളിൽ മുൻകൂർ ആക്രമണങ്ങൾ നടത്തുകയായിരുന്നുവത്രെ.

ആക്രമണം നടന്നയുടൻതന്നെ കമാൻഡറുടെ കൊലക്ക്​ തിരിച്ചടിക്കുകയാണെന്ന്​ അറിയിച്ച ഹിസ്​ബുല്ല, ഡസൻകണക്കിന്​ ഡ്രോണുകളും 320 കത്​യൂഷ റോക്കറ്റുകളും ഇസ്രായേലിന്‍റെ സൈനിക ലക്ഷ്യങ്ങളിലേക്ക്​ തൊടുത്തു. തിരിച്ചടി വഴിതിരിച്ചുവിട്ടു​ എന്ന്​ സയണിസ്റ്റ്​ സേന അവകാശപ്പെട്ടെങ്കിലും ഓപറേഷൻ വിജയമാണെന്നാണ്​ ഹിസ്​​ബുല്ല ചീഫ്​ ഹസൻ നസ്​റുല്ലയുടെ മറുപടി. ആക്രമണം മതിയാക്കുകയില്ലെന്നും ഹിസ്​ബുല്ല കമാൻഡറെ ജൂലൈ 30ന്​ ബെയ്​റൂത്തിൽ കൊലപ്പെടുത്തിയതിന്​ മതിയായ പ്രതികാരമായില്ലെന്ന് തോന്നിയാൽ ഇനിയും ശക്തമായ തിരിച്ചടിയുണ്ടാകുമെന്നും നസ്​റുല്ല മുന്നറിയിപ്പ് നൽകിയിട്ടുണ്ട്​.

റോക്കറ്റ്​, ​​ഡ്രോൺ ആക്രമണങ്ങളുടെ പ്രത്യാഘാതം വിലയിരുത്തി വരികയാണ്​. ഇസ്രായേലിന്‍റെ കുടില രാഷ്ട്രീയ കൊലപാതകങ്ങൾക്ക്​ കരുനീക്കുന്ന സൈനിക ഇന്‍റലിജൻസിനെ തകർക്കുകയാണ്​ ലക്ഷ്യമെന്നും ലബനാൻ പറയുന്നു. ഇസ്രായേൽ അതിർത്തി കടന്ന്​ 110 കിലോമീറ്റർ അകത്തുള്ള സൈനിക ഇന്‍റലിജൻസ്​ സംവിധാനങ്ങളെയാണ്​ തങ്ങൾ ഉന്നമിട്ടതെന്നും ജനങ്ങളെയോ അവരുടെ അടിസ്ഥാന സൗകര്യ ഉപാധികളെയോ ലക്ഷ്യമിട്ടിട്ടില്ലെന്നും അതുകൊണ്ടാണ്​ തെൽഅവീവിലെ ബെൻഗൂറിയൻ വിമാനത്താവളത്തെ ഒഴിവാക്കിയതെന്നും പ്രസ്താവന വിശദമാക്കുന്നു. ആൾനാശം നന്നേ കുറവാണെങ്കിലും ഇരുഭാഗത്തും വൻ സ്വത്തുനാശമുണ്ടാകുകയും ഭീതിയിലായ ജനത്തിന്‍റെ കുടിയൊഴിഞ്ഞുപോക്കിന്​ ഇത്​ ഇടയാക്കുകയും ചെയ്തതായാണ്​ റിപ്പോർട്ട്​. ആക്രമണത്തിൽ ഇസ്രായേലിന്​ വൻനാശനഷ്ടമുണ്ടായതായി മേഖലയി​ലെ നിരീക്ഷകരെ ഉദ്ധരിച്ച്​ വാർത്ത ഏജൻസികൾ റിപ്പോർട്ട്​ ചെയ്യുന്നു.

വിജയമവകാശപ്പെട്ട തെൽഅവീവ്​ കഥ അവസാനിക്കുന്നില്ല എന്നു വ്യക്തമാക്കിയത്​ നഷ്ടം പുറത്തുവിടാതെയുള്ള ജാഗ്രതയുടെ സൂചനയായി കാണുന്നവരുണ്ട്​. അമേരിക്കയുടെ പൂർണ അറിവോടെ, എന്നാൽ തനിച്ചാണ്​ തങ്ങളുടെ തിരിച്ചടി എന്നാണ്​ ഇസ്രായേൽ വാദം. അതേസമയം, ഏതു നേരവും ഹിസ്​ബുല്ലയുടെയും ഇറാന്‍റെയും ആക്രമണം നേരിടേണ്ടിവരുമെന്ന ഭീതി ജനത്തെ ആശങ്കയിലാഴ്ത്തിയത്​ ​ബിന്യമിൻ നെതന്യാഹു സർക്കാറിനെ കുഴക്കുന്നുണ്ട്​. അതു കണക്കിലെടുത്താവണം ഞായറാഴ്ച ആക്രമണം കഴിഞ്ഞ്​ മണിക്കൂറുകൾക്കുള്ളിൽ ഗസ്സ യുദ്ധവിരാമചർച്ച തുടരാനുള്ള നീക്കങ്ങൾ തെൽഅവീവിന്‍റെ ഭാഗത്തുനിന്ന് സജീവമായത്​. മാധ്യസ്ഥ്യ ചർച്ചയിൽ പ​ങ്കെടുക്കുന്ന ഇസ്രാ​യേൽ പ്രതിനിധികൾ ഞായറാഴ്ചതന്നെ സി.ഐ.എ ഡയറക്​ടർ ബിൽ ബേൺസ്​, ഖത്തർ പ്രധാനമന്ത്രി, ഈജിപ്ത്​ ഇന്‍റലിജൻസ്​ ചീഫ്​ എന്നിവരുമായുള്ള ചർച്ചക്കായി കെയ്​റോയിലെത്തി. ദക്ഷിണ ലബനാൻ ആക്രമണം ​പൊടുന്നനെയുണ്ടായ ഒരു പ്രകോപനത്തിനുള്ള തിരിച്ചടിയായി മാത്രം കണ്ടാൽ മതിയെന്ന സന്ദേശം കൂടിയാണ്​ ഇതുവഴി തെൽഅവീവ്​ നൽകുന്നത്​.

അതേസമയം ഹമാസ്​ നേതാവ്​ ഇസ്മാഈൽ ഹനിയ്യയെ തെഹ്​റാനിൽ വധിച്ചതിന്​ ഇറാൻ പ്രഖ്യാപിച്ച പ്രതികാരവും ഏതു നിമിഷവും സയണിസ്റ്റ്​ രാഷ്ട്രം പ്രതീക്ഷിക്കുന്നുണ്ട്​. ഹിസ്ബുല്ലയുടെ ആക്രമണത്തിൽ ആവേശം പ്രകടിപ്പിച്ച​ ഇറാൻ ഇസ്രായേലിന്‍റെ കരുത്ത് ചോർന്നിരിക്കുകയാണെന്നും അമേരിക്കയടക്കമുള്ളവരുടെ സമഗ്ര പിന്തുണയുണ്ടായിട്ടും ഇസ്രായേലിന്​ തിരിച്ചടികളുടെ സമയവും സന്ദർഭവും പ്രവചിക്കാനാവു​ന്നില്ലെന്നും പരിഹസിച്ചു. ഇറാന്‍റെ ഭീഷണി കാര്യഗൗരവത്തി​ലെടുത്തു തന്നെ സംയുക്ത സൈനികനീക്കത്തിനുള്ള സംവിധാനങ്ങൾ സജ്ജീകരിക്കുന്ന തിരക്കിലാണ്​ ഇസ്രായേലും അമേരിക്കയും.

അതുകൊണ്ടുതന്നെ ഇരുകൂട്ടരും അവസാനിപ്പിക്കാനല്ല, പുതിയ ആക്രമണത്തിന്​ മൂർച്ച കൂട്ടാനാണിടയെന്നാണ്​ മേഖലയിലെ നിരീക്ഷകർ പറയുന്നത്. സ്വയം രക്ഷക്കുവേണ്ടി ചെയ്ത ആക്രമണമെന്ന്​ ഇസ്രായേൽ പറഞ്ഞതും ഉദ്ദേശ്യം നിറവേറ്റി എന്ന ഹിസ്​ബുല്ലയടെ ആദ്യ പ്രതികരണവും സംഘർഷം വിപുല​മാക്കാൻ ഇരുകൂട്ടർക്കും ഉദ്ദേശ്യമില്ലെന്ന ശുഭാപ്തിയായി കാണുന്നവരുമുണ്ട്​. അതുകൊണ്ട്​ ഗസ്സ യുദ്ധവിരാമ ചർച്ചകൾ ഇനിയും നല്ല നിലയിൽതന്നെ മുന്നോട്ടുപോകുമെന്നാണ്​ അവരുടെ പ്രതീക്ഷ. വെടിനിർത്തലുണ്ടായാൽ അതിർത്തികളിലെ ആക്രമണം അവസാനിപ്പിക്കുമെന്ന്​ ഹിസ്​ബുല്ല ഉറപ്പുപറഞ്ഞിട്ടുണ്ട്​.

എന്നാൽ, ശുക്​റന്‍റെയും ഹനിയ്യയുടെയും കൊലകൾക്കുള്ള പ്രതികാരം എപ്പോൾ, ഏത്​ അളവിൽ എന്നതിൽ അനിശ്ചിതത്വം നിലനിൽക്കുക തന്നെയാണ്​. ഇസ്രായേൽ ആവട്ടെ, ഗസ്സ അധിനിവേശത്തെ തുടർന്ന്​ കൈവശപ്പെടുത്തിയ രണ്ടു ഇടനാഴികളിലും സാന്നിധ്യം തുടരുമെന്ന് വ്യക്തമാക്കിയിരിക്കുന്നു. അതാകട്ടെ, ഈജിപ്തിനും ഹമാസിനും സ്വീകാര്യമല്ലാത്തതിനാൽ സമാധാന ചർച്ചക്ക്​ ഉടക്കായി മാറാനുമിടയുണ്ട്​. അങ്ങനെ ഫലസ്തീൻ യുദ്ധവിരാമം തന്നെ അഴിയാക്കുരുക്കായി തുടരുമ്പോൾ അത്​ കൂടുതൽ സങ്കീർണമാക്കുകയാണ്​ പിന്നെയും രൂക്ഷത പ്രാപിക്കുന്ന ഇസ്രാ​യേൽ-ലബനാൻ സംഘർഷം.