ഉന്നത വിദ്യാഭ്യാസത്തിന്‍റെ കേരള മാതൃക

വെറുമൊരു വിവാദമായി കാണുകയും കൈകാര്യം ചെയ്യുകയും ചെയ്യേണ്ട ഒന്നല്ല ഗവർണർ ആരിഫ്​ മുഹമ്മദ്​ഖാൻ കേരളത്തിലെ സർവകലാശാലകളുടെ നടത്തിപ്പിനെപ്പറ്റി പരസ്യമായി ഉയർത്തിയ വിമർശനങ്ങൾ. രാഷ്​ട്രീയ ഇടപെടലുകളെപ്പറ്റിയുള്ള ആരോപണങ്ങളും ഉദാഹരണങ്ങളെന്ന നിലക്ക്​ ഏതാനും സംഭവങ്ങളും എടുത്തുപറയുക മാത്രമല്ല അദ്ദേഹം ചെയ്​തത്​. ഇങ്ങനെയൊക്കെയാണ്​ കാര്യങ്ങളുടെ പോക്കെങ്കിൽ സർവകലാശാലകളുടെ ചാൻസലർ പദവിയിൽ തുടരില്ലെന്നും മുഖ്യമന്ത്രിക്ക്​ വേണമെങ്കിൽ ആ പദവി ഏറ്റെടുക്കാമെന്നും പറഞ്ഞ്​ ത​െൻറ ഉറച്ച നിലപാട്​ വ്യക്​തമാക്കുക കൂടി ചെയ്​തിരിക്കുന്നു. ഏതെങ്കിലും ആകസ്​മിക പ്രകോപനത്തോടുള്ള ക്ഷോഭപ്രകടനമായല്ല മറിച്ച്​, സുചിന്തിതമായ തീരുമാനമെന്ന നിലക്കാണ്​ രാഷ്​ട്രീയ ഇടപെടലുകളോടുള്ള വിയോജിപ്പ്​ അദ്ദേഹം ഒന്നിലേറെ തവണ പ്രകടിപ്പിച്ചിരിക്കുന്നത്​. ഗൗരവത്തോടെ അഭിമുഖീകരിക്കേണ്ട വിഷയം തന്നെയാണിത്​. വൈസ്​ ചാൻസലർ നിയമനമടക്കം വിവിധ സർവകലാശാലകളിലെ ഭരണപരമായ തീരുമാനങ്ങളിൽ ചട്ടവും നിയമവും ലംഘിച്ചുള്ള രാഷ്​ട്രീയ ഇടപെടലുകളെ എതിർത്തിട്ടും ഫലം കാണാത്ത നിസ്സഹായതകൂടി ചാൻസലർ എന്ന നിലക്കുള്ള ഗവർണറുടെ വാക്കുകളിലുണ്ട്​. സർക്കാർ തന്നെ ചട്ടലംഘനത്തിന്​ കൂട്ടുനിൽക്കുന്നു; തനിക്ക്​ അതിന്​ വഴങ്ങേണ്ടിവന്നു എന്നെല്ലാം അദ്ദേഹം തുറന്നടിക്കു​േമ്പാൾ അനുരഞ്​ജനത്തിലൂടെ ഒത്തുതീർക്കേണ്ട കാര്യമല്ല അത്​. മറിച്ച്​, സുതാര്യമായ പരിശോധനകളും നടപടിക്രമങ്ങളു​ം വഴി തിരുത്തുകയും തെറ്റുവരുത്തിയവർ ശിക്ഷിക്കപ്പെടുകയും ചെയ്യേണ്ട വിഷയം തന്നെയാണ്​.

കണ്ണൂർ യൂനിവേഴ്​സിറ്റി വി.സി വിരമിച്ചപ്പോൾ അദ്ദേഹത്തെതന്നെ അവിടെ വീണ്ടും നിയമിച്ചതാണ്​, ചട്ടലംഘനമെന്ന്​ അറിഞ്ഞിട്ടും തനിക്ക്​ ചെയ്യേണ്ടിവന്ന ഒരു കാര്യമായി ഗവർണർ ചൂണ്ടിക്കാട്ടുന്നത്​. ഡോ. ഗോപിനാഥ്​ രവീന്ദ്ര​െൻറ കാലാവധി അവസാനിക്കുന്ന അന്നുതന്നെ വി.സി സ്​ഥാനത്ത്​ പുനർനിയമനം നൽകി. ചട്ടമനുസരിച്ച്​ പുതിയ വി.സിയെ കണ്ടെത്താൻ മൂന്നംഗ സേർച്ച്​ സമിതിയെ നിയോഗിച്ചിരുന്നു; ആ കമ്മിറ്റി തന്നെ പിരിച്ചുവിട്ട്​ പുനർനിയമനം നടത്തിയത്​ ഉന്നത വിദ്യാഭ്യാസ മന്ത്രി ആർ. ബിന്ദുവി​െൻറ ശിപാർശ പ്രകാരമാണത്രെ. നടപടിക്രമം ലംഘിച്ചെന്നു മാത്രമല്ല, 60 വയസ്സ്​ കഴിഞ്ഞയാളെ നിയമിക്കരുതെന്ന ചട്ടവും തെറ്റിച്ചു. സി.പി.എം നേതാവി​െൻറ ഭാര്യക്ക്​ വഴിവിട്ട്​ നിയമനം നൽകിയെന്ന ആരോപണം നേരിടുന്നയാൾ തന്നെ അസാധാരണമായ തരത്തിൽ പുനർനിയമനത്തിന്​ പതിവിൽ കവിഞ്ഞ സമ്മർദങ്ങളോടെ ശിപാർശ ചെയ്യപ്പെടുകയായിരുന്നു. കണ്ണൂർ സർവകലാശാലയിൽ മാത്രമല്ല ഇത്തരം സ്വജന നിയമനങ്ങൾ നടന്നത്​. അഞ്ച്​ സി.പി.എം നേതാക്കളുടെ അടുത്ത ബന്ധുക്കൾക്ക്​ നൽകിയ നിയമനങ്ങൾ വിവാദമായിട്ടുണ്ട്​; അവയിൽ ഒന്ന്​ കോടതി ഇടപെടലിൽ മുടങ്ങി. ഇതിനെല്ലാം പാകത്തിൽ വി.സിമാരും സിൻഡി​േക്കറ്റുമെല്ലാം വാർത്തെടുക്കപ്പെടുന്നു. ഇങ്ങനെ സർക്കാർ ഉന്നത വിദ്യാഭ്യാസരംഗം നശിപ്പിച്ചുകൊണ്ടിരിക്കുന്നു. ഈ ആരോപണം വെറും രാഷ്​ട്രീയമെന്നു പറഞ്ഞ്​ തള്ളാവുന്നതല്ല. കണ്ണൂരിൽ 60 വയസ്സ്​ കഴിഞ്ഞയാളെ നിയമിക്കാൻ പറഞ്ഞ ന്യായം, സംസ്​ഥാനത്തെ സർവകലാശാല നിയമത്തിൽ അത്​ പറ്റില്ലെങ്കിലും യു.ജി.സി നിയമപ്രകാരം പറ്റും എന്നായിരുന്നു. എന്നാൽ, കാലടി സംസ്​കൃത സർവകലാശാലയിൽ വി.സി നിയമനത്തിന്​ മൂന്നുപേരുടെ പാനൽ സമർപ്പിക്കുന്നതിനുപകരം ഒരേയൊരാളുടെ പേര്​ നിർദേശിച്ചത്​ യു.ജി.സി ചട്ടത്തിനെതിരാണ്​. അതിനുപറഞ്ഞ ന്യായം, സർവകലാശാലാചട്ടമനുസരിച്ച്​ ഒറ്റയാളുടെ പേരും മതി എന്നത്രെ. അപ്പപ്പോൾ സൗകര്യം തോന്നുന്നതനുസരിച്ചാണ്​ മാനദണ്ഡങ്ങൾ സ്വീകരിക്കുന്നത്​. കേരള കലാമണ്ഡലം വി.സിയുടെ ഒരു ഉ​ദ്യോഗസ്​ഥ നിയമന തീരുമാനത്തിനെതിരെ ഗവർണർ ഉത്തരവിറക്കിയപ്പോൾ ഗവർണർക്കെതിരെ കേസ്​ കൊടുക്കുകയാണ്​ വി.സി ചെയ്​തത്​. ചാൻസലർക്കെതിരെ കോടതിയിൽ പോയ വൈസ്​ ചാൻസലറുടെ നടപടി അച്ചടക്കലംഘനമാണെന്ന്​ ഗവർണർ ചൂണ്ടിക്കാട്ടിയെങ്കിലും കേസ്​ പിൻവലിച്ചിട്ടില്ല. ശ്രീനാരായണഗുരു ഓപൺ സർവകലാശാലയിൽ സ്​ഥിരം അധ്യാപകരെ നിയമിക്കാത്തതിനാൽ യു.ജി.സി അംഗീകാരം കിട്ടിയില്ല. രണ്ടാം വർഷവും കോഴ്​സ്​ നടത്താവുന്ന തരത്തിൽ നടപടിക്രമങ്ങൾ പൂർത്തിയായിട്ടുമില്ല. വി.സിക്കടക്കം ശമ്പളം നൽകുന്നില്ല. ഗവർണർ ഒന്നിലേറെ തവണ ഓർമിപ്പിച്ചിട്ടും ഫലമില്ല. കാര്യങ്ങൾ ഇത്രയേറെ അവഗണിക്കുന്ന സർക്കാറാണ്​ തെരഞ്ഞെടുപ്പിന്​ മുമ്പ്​ തിടുക്കത്തിൽ ഓർഡിനൻസ്​ വഴി സർവകലാശാല സ്​ഥാപിച്ചെന്ന്​ വരുത്തിയത്​. സർവകലാശാല, അപലറ്റ്​ ട്രൈബ്യൂണലിനെ നിയമിക്കുന്നത്​ ഹൈകോടതിയുമായി ആലോചിച്ചുവേണമെന്ന വ്യവസ്​ഥ ഒഴിവാക്കിയതും രാഷ്​ട്രീയ ലാക്കോടെത്തന്നെ.

സാക്ഷരതയിൽ മുന്നിലുള്ള കേരളം ഉന്നത വിദ്യാഭ്യാസ, ഗവേഷണ മേഖലകളിൽ വളരെ പിന്നിലാണ്​. ഇതിന്​ വലിയ അളവിൽ കാരണം വിദ്യാഭ്യാസ രംഗത്ത്​ കക്ഷിരാഷ്​ട്രീയത്തി​െൻറ ഇടപെടലും സ്വാധീനവുമാണ്​. മുമ്പ്​ പുറമേക്കെങ്കിലും ചട്ടം പാലിക്കുന്നതായി തോന്നിച്ചിരുന്നു. ഇന്ന്​ നിയമനങ്ങളിലും നടത്തിപ്പിലും പ്രഥമ പരിഗണന കക്ഷിരാഷ്​ട്രീയ താൽപര്യങ്ങൾക്കാണ്​. ഗവർണർ എന്ന ചാൻസലർ വഴി കേന്ദ്ര സർക്കാറി​െൻറയും സംസ്​ഥാനത്തെതന്നെ മുൻ സർക്കാറുകളുടെയും രാഷ്​ട്രീയ ഇടപെടലുകളും ഗുണമല്ല ചെയ്​തിട്ടുള്ളത്​. അതേസമയം, വളരെ വ്യാപകമായി, മറയില്ലാതെ, ചട്ടങ്ങളെയും മാനദണ്ഡങ്ങളെയും ഇഷ്​ടംപോലെ വ്യാഖ്യാനിച്ച്​ സങ്കുചിത രാഷ്​ട്രീയത്തി​െൻറ വിഹാരഭൂമിയായി സർവകലാശാല ഭരണസംവിധാനങ്ങളെ പരുവപ്പെടുത്തിയതി​െൻറ ബഹുമതി പിണറായി സർക്കാറിനായിരിക്കും. അക്കാദമിക നിലവാരവും ന്യായബോധവുമുള്ളവരെ കണ്ടെത്തി അവർക്ക്​ പ്രവർത്തന സ്വാതന്ത്ര്യം നൽകി നമ്മുടെ ഉന്നത വിദ്യാഭ്യാസ മേഖല ശുദ്ധീകരിച്ചെടുക്കാൻ ഇനിയെത്ര കാത്തിരിക്കേണ്ടിവരും? സ്വന്തം പാർട്ടിക്കപ്പുറം കാണാൻ കഴിയുന്ന മന്ത്രിമാരെ എന്ന്​ ജനങ്ങൾക്ക്​ കിട്ടും?