കർഷകരോഷം പിന്നെയും അണപൊട്ടുന്നു

തെരഞ്ഞെടുപ്പ്​ പ്രചാരണമേളത്തിനിടെ പ്രശ്നങ്ങൾക്കു മറയിടാനും പ്രശ്നക്കാരുടെ വായ്​ പൊത്തിപ്പിടിക്കാനുമുള്ള ബി​.ജെ.പിയുടെയും എൻ.ഡി.എ മുന്നണിയുടെയും ശ്രമം അവരെ തുടർച്ചയായ മൂന്നാം വിജയത്തിലെത്തിച്ചു എന്നതു​ നേര്​. എന്നാൽ, പ്രധാനമന്ത്രിയടക്കമുള്ള ഭരണക്കാരുടെ വായ്ത്താരികൊണ്ട്​ മറച്ചുവെക്കാവുന്നതോ, ഔദ്യോഗിക കൃത്രിമത്വങ്ങൾ എമ്പാടും ആരോപിക്കപ്പെടുന്ന തെരഞ്ഞെടുപ്പുകളിലെ ജയപ്രഖ്യാപനം കൊണ്ട്​ മായ്​ച്ചുകളയാവുന്നതോ അല്ല ജനങ്ങളുടെ പ്രശ്നങ്ങൾ. അവക്ക്​ പരിഹാരം കാണാനുള്ള താൽപര്യമൊന്നും ഭരണകൂടത്തിനില്ല. മാത്രമല്ല, അധികാര സംരക്ഷണത്തിന്​ വംശീയ ധ്രുവീകരണരാഷ്ട്രീയം കളിച്ച്​ ഹിന്ദുവോട്ടുകൾ ഏകീകരിച്ചു ചൊൽപടിയിൽ നിർത്തുന്നതിനുള്ള ശ്രമങ്ങളിലാണ്​ അവർ. മസ്​ജിദുകൾക്കടിയിൽ ക്ഷേത്രാവശിഷ്ടങ്ങൾ പരതാനുള്ള സർവേ വംശീയതയുടെ ഒരു ദേശീയ നയപരിപാടിയായി മാറുന്നതുപോലെയാണ്​ ഏറ്റവുമൊടുവിലെ സംഭവവികാസങ്ങൾ.

സുപ്രീം കോടതി മുൻ ജഡ്ജി ജസ്റ്റിസ് മാർക്കണ്​ഡേയ കട്​ജു ഈയിടെ പ്രധാനമന്ത്രിയെ ഇരട്ടമുഖമുള്ള റോമൻ ദേവനായ ജാനസിനോട്​ ഉപമിക്കുകയുണ്ടായി. അദ്ദേഹത്തിന്‍റെ മുൻമുഖം സബ്കാ സാത്ത്​ സബ്കാ വികാസ്​, ഡിജിറ്റൽ ഇന്ത്യ, ഫൈവ്​ ട്രില്യൺ ഇക്കോണമി, ബുള്ളറ്റ്​ ട്രെയിൻ എന്നീ വാഗ്ദാനങ്ങളുടേതാണ്​. എന്നാൽ പിൻമുഖമാകട്ടെ, ഇതിനൊക്കെ കടകവിരുദ്ധമായ കർമപരിപാടികളുടേതാണ്​. മൂന്നാമൂഴത്തിലെത്തിയ മോദി ഭരണത്തിന്‍റെ ഇന്ത്യൻ അനുഭവം പരിശോധിച്ചാൽ ഇപ്പറഞ്ഞതിൽ അതിശയോക്തി തരിമ്പുമില്ല എന്നു വ്യക്തമാവും. വംശീയ ധ്രുവീകരണരാഷ്ട്രീയം വിജയിപ്പിക്കാനുള്ള നെട്ടോട്ടത്തിൽ തെരഞ്ഞെടുപ്പിൽ മുഖം നന്നാക്കാൻ നൽകിയ വാഗ്ദാനങ്ങളെ പോലും അവർ കൈയൊഴിഞ്ഞ മട്ടാണ്​. അതുകൊണ്ടുതന്നെ ജനകീയ പ്രതിഷേധങ്ങളിൽ പലതും പഴയ മട്ടിൽത്തന്നെ തിരിച്ചുവരുന്നുമുണ്ട്​.ഇന്നലെ മുതൽ കൂടുതൽ സജീവമായ കർഷകസമരം അതിന്‍റെ ഒരു തെളിവ് മാത്രം.

കാർഷിക വിളകൾക്ക് മിനിമം താങ്ങുവില ആവശ്യപ്പെട്ട്​, അത്​ നിരാകരിക്കുന്ന പുതിയ കാർഷിക നിയമത്തിനെതിരെ കർഷകർ നടത്തിയിരുന്ന സമരം അധികൃതരുടെ കടുത്ത അവഗണനയെത്തുടർന്ന് ഏറക്കുറെ വിസ്​മൃതിയിലായിരുന്നു. പിന്മാറാൻ കൂട്ടാക്കാതിരുന്ന പഞ്ചാബിൽ നിന്നുള്ള കർഷകരെ കടത്തിവിടാതിരിക്കാൻ ഹരിയാനയിലെ ബി.ജെ.പി ഗവൺമെന്‍റ്​ കടുത്ത ജനവിരുദ്ധ നടപടികളാണ്​ സ്വീകരിച്ചത്​. കഴിഞ്ഞ ഫെബ്രുവരി 13ന് കർഷകർ ഡൽഹി മാർച്ച്​ പ്രഖ്യാപിക്കുകയും അതു തടയാൻ കേന്ദ്ര-സംസ്ഥാന ബി.ജെ.പി ഗവൺമെന്‍റുകൾ പലയിന പരിപാടികൾ ആവിഷ്കരിക്കുകയും ചെയ്തു. അതിന്‍റെ ഭാഗമായി സമരം തണുപ്പിക്കാൻ കേന്ദ്രമന്ത്രിമാരായ പിയൂഷ്​ ഗോയൽ, അർജുൻ മുണ്ട, നിത്യാനന്ദ്​ റായ്​ എന്നിവരുടെ നേതൃത്വത്തിൽ സർക്കാർ ചർച്ചക്കും തയാറായി.

എന്നാൽ, അഞ്ചു വർഷത്തേക്ക്​ ഏതാനും ഇനങ്ങൾക്ക്​ താങ്ങുവില നൽകി ഗവ.ഏജൻസികൾ വാങ്ങാം എന്ന പരിഹാരനിർദേശം കർഷകർ തള്ളി. 22 ഇനങ്ങൾക്ക്​ നിയമപരിരക്ഷയോടെ താങ്ങുവില അനുവദിക്കണമെന്നായിരുന്നു അവരുടെ ആവശ്യം. ഇതനുവദിക്കാതെ വന്നപ്പോൾ ഫെബ്രുവരി 21ന്​ അവർ വീണ്ടും ഡൽഹി മാർച്ചിന്​ ഒരുങ്ങി, സർക്കാർ ബലം പ്രയോഗിച്ചു തടയുകയും ചെയ്തു. അതോടെ അതിർത്തിയായ ശംഭുവിലും ഖനോരിയിലും തമ്പടിച്ചുകൂടി കർഷകർ. മാസം പത്തു തികയുമ്പോൾ അവർ വീണ്ടും ഡൽഹിയെ സമരമുഖരിതമാക്കാൻ തീരുമാനിച്ചിരിക്കുകയാണ്​. ഭാരതീയ കിസാൻ പരിഷത്തിന്‍റെ മാർച്ചിനാണ്​ തിങ്കളാഴ്ച തുടക്കമായത്​. കിസാൻ മസ്​ദൂർ സഭ, സംയുക്ത്​ കിസാൻ മോർച്ച എന്നീ സംഘടനകൾ ഡിസംബർ ആറിന്​ മാർച്ച്​ പ്രഖൃാപിച്ചിട്ടുണ്ട്​. സമാന്തരമായി ഉത്തരാഖണ്ഡ്​, കേരള, തമിഴ്​നാട്​ സംസ്ഥാനങ്ങളിലെ സംഘടനകൾ അതത്​ നിയമസഭകളിലേക്ക്​ മാർച്ച്​ നടത്തും.

കൃഷിഭൂമി ഏറ്റെടുക്കുന്നതിന്​ കേന്ദ്രം കൊണ്ടുവന്ന പുതിയ ലാൻഡ്​ അക്വിസിഷൻ നിയമമനുസരിച്ച്​ 2014 ജനുവരി ഒന്നു മുതൽ അക്വയർ ചെയ്ത ഭൂമിക്ക്​ നാലു മടങ്ങ്​ നഷ്ടപരിഹാരം, ഗൗതം ബുദ്ധ നഗർ ജില്ലയിൽ കഴിഞ്ഞ പത്തുവർഷമായി അനുവദിച്ചുകിട്ടാത്ത അവകാശങ്ങൾ പുതിയ നിയമമനുസരിച്ച്​ ഉടൻ അനുവദിക്കുക, മിനിമം താങ്ങുവിലക്ക്​ നിയമപ്രാബല്യം നൽകുക, പ്രക്ഷോഭങ്ങളിൽ പ​ങ്കെടുത്ത കർഷകരുടെ കാർഷിക വായ്പകൾ എഴുതിത്തള്ളുക, കാർഷിക, ക്ഷീര, പഴം, പച്ചക്കറി, മാംസ ഉൽപന്നങ്ങളുടെ ഇറക്കുമതി തീരുവ കുറക്കുന്നതിന്​ സബ്​സിഡി വർധിപ്പിക്കുക, 58 വയസ്സിനു മുകളിലുള്ള കർഷകർക്കും കർഷകത്തൊഴിലാളികൾക്കും പതിനായിരം രൂപ പ്രതിമാസ ​പെൻഷൻ അനുവദിക്കുക, പ്രധാനമന്ത്രി ഫസൽ ബീമാ യോജന എന്ന ഇൻഷുറൻസ്​ പദ്ധതിയിൽ എല്ലാ വിളകളെയും ഉൾപ്പെടുത്തുക, ലഖിംപൂർ ഖേരിയിൽ നടന്ന കർഷകവിരുദ്ധ അതിക്രമത്തിലെ ഇരകൾക്ക്​ നീതി ഉറപ്പാക്കുക തുടങ്ങി ഇന്ത്യ ലോകവ്യാപാര കരാറിൽനിന്ന്​ പിന്തിരിയുക വരെയുള്ള നിരവധി ആവശ്യങ്ങളാണ്​ സമരക്കാർ ഉന്നയിക്കുന്നത്​.

കർഷകരുടെ ജീവൽപ്രശ്നങ്ങളുമായി ബന്ധപ്പെട്ട ഈ ആവശ്യങ്ങൾക്കൊന്നും ശരിയായ രീതിയിൽ ചെവികൊടുക്കാൻ കേന്ദ്രസർക്കാർ തയാറായിട്ടില്ല. സർക്കാറിന്‍റെ തെറ്റായ നയങ്ങൾക്കെതിരായ സമരത്തോട്​ ​പൊറുക്കാൻ തയാറല്ലാത്ത ധാർഷ്ട്യമാണ്​ അധികൃതർ പ്രകടിപ്പിക്കുന്നത്. അതുകൊണ്ടുതന്നെ അവരുടെ പരിഹാരം കാണേണ്ട ന്യായമായ ആവശ്യങ്ങളെ പൂർണമായും അവഗണിക്കുകയും ചെയ്യുന്നു.

പ്രക്ഷോഭത്തിനു വട്ടംകൂട്ടുന്ന കർഷകരോട്​ സംവാദത്തിന്‍റെ വഴിയിലേക്ക്​ വരാനും പരസ്പര ചർച്ചയിലൂടെ വിഷയങ്ങൾക്ക്​ പരിഹാരം കാണാനും ഉപരാഷ്ട്രപതി ജഗദീപ്​ ധൻഖർ ഞായറാഴ്ച അഭ്യർഥിക്കുകയുണ്ടായി. സ്വാതന്ത്ര്യത്തിന്‍റെ നൂറാംവാർഷികത്തിൽ വികസിത രാജ്യമായി ഇന്ത്യക്ക്​ നടുനിവർത്തി നിൽക്കാൻ കർഷകസംതൃപ്തി അനിവാര്യമാണെന്നും കർഷകൻ വിഷമത്തിലായാൽ രാജ്യത്തിന്‍റെ അന്തസ്സും അഭിമാനവുമാണ്​ പണയപ്പെടുന്നതെന്നും അദ്ദേഹം ചൂണ്ടിക്കാട്ടി. കർഷകരുടെ മഹത്വം ആവോളം വാഴ്ത്തുന്നുണ്ട്​ രാഷ്ട്രത്തിന്‍റെ രണ്ടാം മുഖ്യപൗരൻ. എന്നാൽ ആ മഹത്വം പക്ഷേ, കേന്ദ്രം തിരിച്ചറിഞ്ഞിട്ടില്ല എന്നാണ്​ പിന്നെയും കാറ്റുപിടിക്കുന്ന കർഷകരോഷം തെളിയിക്കുന്നത്​.