ഭരണഘടനയെ ഭരണകൂടം തോൽപിക്കുകയാണോ​?

കർണാടകയിലെ ഉഡുപ്പി ഗവ. വനിത പ്രീ യൂനിവേഴ്​സിറ്റി കോളജിലെ 11, 12 ക്ലാസുകളിലെ എട്ടു മുസ്​ലിം വിദ്യാർഥിനികളെ ശിരോവസ്ത്രം ധരിച്ചതിന്‍റെ പേരിൽ പുറത്താക്കിയ സംഭവം രാജ്യത്തെ ജനാധിപത്യവും മതനിരപേക്ഷതയും നേരിടുന്ന ഗുരുതരമായ പ്രതിസന്ധി​യാണ്​ വെളിപ്പെടുത്തുന്നത്​. കഴിഞ്ഞ ഡിസംബർ 27ന്​ വിദ്യാർഥികളുടെ യൂനിഫോമി​ന്‍റെ പേരുപറഞ്ഞ്​, യൂനിഫോമിൽതന്നെ ശിരോവസ്ത്രം ധരിച്ചെത്തിയ പെൺകുട്ടികൾക്കുനേരെ വിദ്യാലയം വാതിൽ കൊട്ടിയടച്ചു​. പഠനം മുടക്കാൻ തയാറല്ലാതിരുന്ന വിദ്യാർഥിനികൾ പടിക്കു പുറത്തിരുന്നു പഠിക്കാൻ തീരുമാനിച്ചതോടെ വിഷയം ഹിന്ദുത്വ വർഗീയസംഘടനകൾ ഏറ്റെടുത്തു.

അധികൃതരും അതിനു വഴങ്ങി കോളജ്​ അടച്ചിട്ടായാലും വിട്ടുവീഴ്​ചക്കില്ലെന്ന നിലപാട്​ സ്വീകരിച്ച്​ ഉള്ളിലിരിപ്പ്​ വെളിപ്പെടുത്തി. ശിരോവസ്ത്രം ധരിച്ചതിന്‍റെ പേരിൽ വിദ്യാർഥിനികളെ പുറന്തള്ളിയ നടപടിയെ അംഗീകരിക്കാനാവില്ലെന്നും ഇതിനു വിദ്യാഭ്യാസവകുപ്പുമായി ബന്ധ​മില്ലെന്നും കർണാടക പ്രൈമറി ആൻഡ്​ സെക്കൻഡറി എജുക്കേഷൻ പ്രിൻസിപ്പൽ സെക്രട്ടറി കോളജ്​​ പ്രിൻസിപ്പലിനെ അറിയിച്ചിരുന്നു.

സംസ്ഥാനത്ത്​ കോളജുകളിൽ യൂനിഫോം നിലവിലില്ലെന്നും അത്​ ഏർപ്പെടുത്തുന്ന വിഷയം പഠിച്ച്​ റിപ്പോർട്ട്​ സമർപ്പിക്കാൻ വിദഗ്​ധസമിതിയെ നിയോഗിക്കു​മെന്നുമാണ്​ വിദ്യാഭ്യാസവകുപ്പ്​ സെക്രട്ടറി അറിയിച്ചത്​. വിഷയത്തിൽ ഇടപെട്ട ദേശീയ മനുഷ്യാവകാശ കമീഷനും വിശദീകരണം തേടിയിരുന്നു. കോളജിലെ വസ്ത്രനിയന്ത്രണത്തിനെതിരെ വിദ്യാർഥിനികൾ സമർപ്പിച്ച ഹരജി ഇന്ന്​, ചൊവ്വാഴ്ച കർണാടക ഹൈകോടതി പരിഗണിക്കാനിരിക്കുകയാണ്​. എന്നാൽ, ഇതെല്ലാം തകിടംമറിച്ച്​ സംസ്ഥാനത്തെ മുഴുവൻ വിദ്യാഭ്യാസ സ്ഥാപനങ്ങളിലും ഏകീകൃത വസ്ത്രധാരണം നിർബന്ധമാക്കി കർണാടക സർക്കാർ കഴിഞ്ഞ ശനിയാഴ്ച ഉത്തരവിറക്കിയിരിക്കുന്നു​.

ഗവൺ​മെന്‍റ്​ വിദ്യാലയങ്ങളിൽ ​പൊതു യൂനിഫോമും സ്വകാര്യസ്കൂളുകളിലും ബിരുദപൂർവ പി.യു കോളജുകളിലും അധികൃതർ നിശ്ചയിച്ച യൂനി​ഫോമും അണിയണമെന്ന്​ സർക്കാർ ഉത്തരവിൽ നിഷ്കർഷിക്കുന്നു. ഇഷ്ടമുള്ള മതം പ്രചരിപ്പിക്കാനും പഠിപ്പിക്കാനും മതാചാരങ്ങൾ പാലിക്കാനും ഭരണഘടന അനുഛേദം 25 ​പ്രകാരം ഉറപ്പുനൽകുന്ന മൗലികാവകാശത്തിനു വിരുദ്ധമല്ല ഈ യൂനിഫോം അടിച്ചേൽപിക്കൽ എന്നും ഉത്തരവിലുണ്ട്​! 'സമത്വത്തെയും അഖണ്ഡതയെയും ​പൊതുനിയമത്തെയും അസ്വസ്ഥപ്പെടുത്തുന്ന' വസ്ത്രധാരണം അനുവദിക്കുകയില്ലെന്ന്​ ഉത്തരവ്​ തീർത്തുപറയുന്നു. മുസ്​ലിം വിദ്യാർഥികളുടെ ശിരോവസ്ത്രം ധരിക്കാനുള്ള ആവശ്യത്തിനു മറുപടിയെന്നോണം സംസ്ഥാനത്തെ വിവിധ കലാലയങ്ങളിൽ കാവി ഷാൾ അണിഞ്ഞുകൊണ്ടു മറുകാമ്പയിൻ ആരംഭിച്ചിരിക്കുകയാണ്​ സംഘ്​പരിവാർ.

വംശീയവൈരവും വൈകാരികതയും മുറ്റിനിൽക്കുന്ന ദക്ഷിണ കാനറ മേഖലയിൽനിന്ന് ആരംഭിച്ച സ്കാർഫ്​ ​വിരോധം മുസ്​ലിംവിരുദ്ധ വംശവെറിയായി സംസ്ഥാനത്തുടനീളം വ്യാപിപ്പിക്കാനുള്ള പരിപാടിയിലാണ്​ അവർ. ഉത്തരേന്ത്യയിലെ ആസന്നമായ നിയമസഭ തെരഞ്ഞെടുപ്പിലേക്കു കൂടി മുതൽക്കൂട്ടാൻ വിവാദത്തെ പാകപ്പെടുത്തുന്ന ശ്രമത്തിലാണ്​ അവരിപ്പോൾ. മറ്റു ചില സ്ഥാപനങ്ങൾ കൂടി ശിരോവസ്ത്രം ധരിച്ചവരെ ക്ലാസിൽ കയറ്റാതെ തിരിച്ചയച്ചിട്ടുണ്ട്​. മുസ്​ലിംവിദ്യാർഥിനികളുടെ മൗലികാവകാശ സംരക്ഷണത്തിന്​ ഐക്യദാർഢ്യം പ്രകടിപ്പിച്ച്​ ദലിത്​ വിദ്യാർഥിസംഘടനകൾ നീല ഷാളും അണിഞ്ഞു സമരത്തിൽ അണിനിരന്നിരിക്കുന്നു. എല്ലാം കൂടി കർണാടകയിലെ വിദ്യാലയാന്തരീക്ഷം കാലുഷ്യത്തിലേക്കു നീങ്ങിയിരിക്കുകയാണ്​.

'ഒരു മതവുമായി ബന്ധപ്പെട്ട കാര്യങ്ങളിൽ ആ മതത്തിന്‍റെ തന്നെ തത്ത്വങ്ങൾക്ക്​ അനുസൃതമായാണ്​ വിധി പറയേണ്ടതെന്ന്​' സ്വതന്ത്ര ഇന്ത്യയിലെ പരമോന്നത നീതിപീഠത്തിനു മുന്നിൽ ആദ്യമാ​യെത്തിയ അതിപ്രധാനമായ മതസംബന്ധമായ കേസിന്‍റെ തീർപ്പിലെ നിർദേശമായിരുന്നു. ഉഡുപ്പിയിലെ ശ്രീശിരൂർ മഠവുമായി ബന്ധപ്പെട്ട കേസായിരുന്നു അത്​. ഇന്ത്യ പോലൊരു ബഹുസ്വര സമൂഹത്തിൽ മതവിശ്വാസത്തോ​ടും ആചാരങ്ങളോടും അനുഭാവമുണ്ടാ​കണമെന്നും അന്നു കോടതി ഉത്തരവിൽ പറഞ്ഞു. അതേ ഉഡുപ്പിയിൽ തന്നെയാണിപ്പോൾ ഉടുക്കാത്ത മത​ഭ്രാന്ത്​ ഇളകിയാട്ടം തുടങ്ങിയിരിക്കുന്നത് എന്നതാണ്​ വിരോധാഭാസം.

2016ൽ അംന ബിൻത്​ ബഷീറും സി.ബി.എസ്​.ഇയും തമ്മിലുള്ള കേസിൽ കേരള ഹൈകോടതിയും പിന്നീട്​ യൂസുഫ്​ ഭായ്​ ഉസ്മാൻ ഭായ്​ ശൈഖും ഗുജറാത്ത്​ സർക്കാറും തമ്മിലുള്ള കേസിൽ ഗുജറാത്ത്​ ഹൈകോടതിയും ഭരണഘടന വകവെച്ചു നൽകുന്ന മതാചാരസ്വാതന്ത്ര്യമെന്ന മൗലികാവകാശത്തിന്​​ അനുസൃതമായി മുസ്​ലിം വേഷവിധാനം കാണണമെന്നു വ്യക്തമാക്കിയിരുന്നു. ഈ​ വിധിയുടെ ലംഘനമാണ്​ ഉഡുപ്പിയിലും അതിനു സാധൂകരണം നൽകുന്ന സർക്കാർ ഉത്തരവിലും കാണുന്നത്​. അതിനു ഭരണഘടനയുടെയും ഇന്ത്യൻ നീതിന്യായവ്യവസ്ഥയുടെയും പിന്തുണയുണ്ടാവില്ലെന്ന്​ മുതിർന്ന സുപ്രീംകോടതി അഭിഭാഷകർ അടക്കം വ്യക്തമാക്കുന്നു.

യൂനിഫോമിന്‍റെ കൂടെ മതാചാരപ്രകാരമുള്ള ശിരോവസ്​ത്രം ധരിക്കുന്നത്​ എങ്ങനെ നിയമവിരുദ്ധമാകും, നിലവിൽ സിഖുവിഭാഗം യൂനിഫോമിനൊപ്പം അവരുടെ തലപ്പാവ്​ ധരിക്കുന്നുണ്ടല്ലോ, യൂനിഫോം നിയമം ലംഘിച്ചെന്നതുകൊണ്ടുമാത്രം ​പെൺകുട്ടികളുടെ വിദ്യാഭ്യാസം മുടക്കാമോ, എല്ലാവർക്കും വിദ്യാഭ്യാസം എന്ന തത്ത്വത്തെക്കാൾ വലുത്​ ഏകീകൃത വസ്ത്രനിയമം നടപ്പാക്കുന്നതാണോ തുടങ്ങിയ​ ചോദ്യങ്ങളാണ്​ അവർ ഉന്നയിക്കുന്നത്​. സർവോപരി ഭരണഘടനയുടെ ആർട്ടിക്ക്​ൾ 25ന്‍റെ താൽപര്യങ്ങളെ ഹനിക്കുന്നതാണ്​ സർക്കാർ ഉത്തരവെന്ന കാര്യത്തിൽ അവർക്കു സംശയമില്ല. നേരത്തേ സ്റ്റുഡന്‍റ്​ ​പൊലീസ്​ കാഡറ്റിന്‍റെ ശിരോവസ്ത്ര വിഷയത്തിൽ കേരളസർക്കാർ സ്വീകരിച്ച നിലപാടും ഇതോ​ടു ചേർത്തുവായിക്കണം.

മുസ്​ലിം വിദ്യാർഥിനികളുടെ ഭരണഘടനാവകാശത്തെ ശിരോവസ്ത്രത്തിനുമേൽ ഇസ്​ലാം പേടി വളർത്തി ഹനിക്കാനും ഇന്ത്യയിൽ തങ്ങളുടെ ഏകശില സംസ്കാരമേ വിലപ്പോവൂ എന്ന ഫാഷിസ്​റ്റു സന്ദേശം സ്ഥാപിച്ചെടുക്കാനുമാണ്​ സംഘ്​പരിവാർ ശക്തികൾ ശ്രമിക്കുന്നത്​. അതിൽ അവർ വിജയിക്കുന്നു​വെന്ന്​ തെളിയിക്കുന്നു കർണാടകയിലെ വലതു ബി.ജെ.പി സർക്കാറിന്‍റെയും കേരളത്തിലെ ഇടതുസർക്കാറിന്‍റെയുമൊക്കെ നിലപാടുകൾ. എന്നാൽ, അവിടെ പരാജയപ്പെടുന്നത്​ ഇന്ത്യയുടെ നാനാത്വമെന്ന ആശയവും ജനാധിപത്യ, മതനിരപേക്ഷ സങ്കൽപങ്ങളുമാണ്​.