അതിവേഗമാകാം;​ പക്ഷേ അമിതവേഗം വേണ്ട

സിൽവർലൈൻ അതിവേഗ റെയിലിന്‍റെ പരിസ്ഥിതി വിരുദ്ധതയും ജനവിരുദ്ധതയും സജീവമായിത്തന്നെ പൊതുചർച്ചയിലുണ്ട്​. അവക്കപ്പുറം, പദ്ധതിയുടെ ജനാധിപത്യ വിരുദ്ധത കൂടി വെളിപ്പെടുത്തുന്നതാണ്​ ഇപ്പോൾ പുറത്തുവിട്ട വിശദ പദ്ധതിരേഖ (ഡി.പി.ആർ) അടക്കമുള്ള പദ്ധതി നടത്തിപ്പിന്‍റെ വിവിധ വശങ്ങൾ. ജനങ്ങളെയും സംസ്ഥാനത്തെയും, പരിസ്ഥിതിയെയും സാമ്പത്തിക മേഖലയെയുമെല്ലാം ആഴത്തിൽ തൊടുന്ന ഒരു പദ്ധതിയുടെ വിശദരേഖ നിയമസഭ വെബ്​സൈറ്റിൽ ലഭ്യമാകാൻ കടന്നുപോകേണ്ടിവന്ന വഴികൾ, എന്തോ ഒളിച്ചുകളിയുടെ സൂചനയാണ്​ നൽകിയത്​. എന്തുവന്നാലും, ആരെതിർത്താലും പദ്ധതി നടപ്പാക്കുമെന്നത്​ ഒരു ജനാധിപത്യ സർക്കാറിന്‍റെ നയമായിക്കൂടാ. എന്നാൽ, മുഖ്യമന്ത്രി പിണറായി വിജയനും പാർട്ടി നേതൃത്വവും നിരന്തരം ആവർത്തിച്ചുകൊണ്ടിരിക്കുന്നത്​ അതാണ്​. വിദഗ്​ധരും ശാസ്ത്ര പ്രസ്ഥാനങ്ങളും ഭരണകക്ഷികളിൽപെട്ടവരടക്കമുള്ള ജനനേതാക്കളും ഉയർത്തിയ ആശങ്കകൾക്കു മുന്നിൽ ഒടുവിൽ സർക്കാർ പൗരപ്രമുഖരുടെ യോഗങ്ങൾ വിളിച്ചുചേർത്ത്​ വിശദീകരിക്കാൻ തീരുമാനിക്കുന്നു. എല്ലാതരം ആശങ്കകളെയും അഭിമുഖീകരിക്കാനും ചർച്ചചെയ്യാനും പരിഹാരം കാണാനുമുള്ള ജനായത്ത സംവിധാനങ്ങളാണ്​ നിയമസഭയും അതിന്‍റെ ഉപസമിതികളും. എന്നാൽ, അവിടെ ചർച്ച പോയിട്ട്​ ഡി.പി.ആർ പോലും പുറമേക്ക്​ ലഭ്യമാക്കാതെ പൗരപ്രമുഖരോട്​ പദ്ധതി നടപ്പാക്കുന്നതിനെപ്പറ്റി സംസാരിക്കുന്നതിൽ ജനാധിപത്യം ഏതായാലുമില്ല. ഡി.പി.ആർ രഹസ്യരേഖയാണെന്നു പറഞ്ഞാണ്​ ഇതുവരെ പുറത്തുവിടാതിരുന്നത്​. ആകാശ സർവേയുടെ വിവരങ്ങൾ പരസ്യപ്പെടുത്തില്ലെന്ന്​ പ്രതിരോധ, വ്യോമ മന്ത്രാലയങ്ങൾക്ക്​ ഉറപ്പുകൊടുത്തിട്ടുണ്ടെന്നാണത്രെ, 'രഹസ്യരേഖ' വാദത്തിന്​ ന്യായമായി അന്നെല്ലാം പറഞ്ഞത്​. ഡി.പി.ആറിന്‍റെയും പരിസ്ഥിതി ആഘാത പഠനത്തിന്‍റെയും പകർപ്പ്​ നൽകാമെന്ന്​ മുഖ്യമന്ത്രി നിയമസഭക്ക്​ ഉറപ്പുനൽകിയിട്ടും അത്​ പിടിച്ചുവെക്കുകയായിരുന്നു. ഒടുവിൽ അവകാശലംഘനത്തിന്​ സ്പീക്കർക്ക്​ പരാതി ചെന്നപ്പോഴാണ്​ സഭാ വെബ്​സൈറ്റിൽ ഡി.പി.ആർ പരസ്യപ്പെടുത്തുന്നത്​.

ഒറ്റനോട്ടത്തിൽ ഈ ഡി.പി.ആർ നമ്മോടു പറയുന്നത്​, ഇത്രനാളും സർക്കാർ ഉന്നയിച്ചുവന്ന 'രഹസ്യരേഖ' വാദം വ്യാജമായിരുന്നു എന്നാണ്​. സർക്കാറും പദ്ധതി നിർമാതാക്കളായ കെ- റെയിലും ഇത്രയും കാലം നേരല്ല പറഞ്ഞത്​. തങ്ങളുടെ മണ്ണും പരിസ്ഥിതിയും പണവും അവിഹിതമായി ചൂഷണം ചെയ്യപ്പെടുന്നുണ്ടോ എന്നറിയാൻ ജനങ്ങളെ സഹായിക്കുന്നതിനാണ്​ വിവരാവകാശ കമീഷൻ രൂപവത്​കരിച്ചത്​. രഹസ്യാത്​മകത പറഞ്ഞ്​ സർക്കാർ പിടിച്ചുവെക്കുന്ന വിവരങ്ങൾ ജനങ്ങൾക്ക്​ ലഭ്യമാക്കുകയെന്ന ധർമം കമീഷനുണ്ട്​. എന്നാൽ, സിൽവർ ലൈനിന്‍റെ കാര്യത്തിൽ സർക്കാറിന്‍റെ വാദം ഏകപക്ഷീയമായി അംഗീകരിച്ചുകൊടുക്കുന്ന നിലപാട്​ സംസ്ഥാന വിവരാവകാശ കമീഷൻ കൈക്കൊണ്ടു. സർക്കാർ പറയുന്നതിന്​ കീഴൊപ്പ്​ ചാർത്തുക മാത്രമാണ്​ കമീഷന്‍റെ ജോലിയെങ്കിൽ അങ്ങനെയൊന്നിന്‍റെ ആവശ്യമില്ലല്ലോ. ഒടുവിൽ നിയമസഭ വെബ്​സൈറ്റിലൂടെ ഡി.പി.ആർ പൊതുമണ്ഡലത്തിലെത്തുമ്പോൾ സർക്കാറിന്‍റെ നിലപാടിനൊപ്പം വിവരാവകാശ കമീഷന്‍റെ നിലപാടും പൊള്ളയായിരുന്നു എന്നാണ്​ വ്യക്​തമാകുന്നത്​. ജനപക്ഷത്തുനിൽക്കാൻ ബാധ്യതയുള്ളവരൊക്കെ ജനങ്ങൾക്ക്​ വിവരം നിഷേധിച്ചുകൊണ്ടു​ പറയുന്നു, ജനങ്ങൾക്കു​വേണ്ടിയാണ്​ ഇതെല്ലാം എന്ന്​. ആദ്യം പദ്ധതി നടപ്പാക്കുമെന്ന്​ പ്രഖ്യാപിക്കുകയും പിന്നീട്​ ജനങ്ങളുടെ അഭിപ്രായം തേടുമെന്ന്​ പറയുകയും ചെയ്യുന്ന ജനനേതാക്കൾ ജനാധിപത്യത്തെ തലകുത്തി നിർത്തുകയാണ്​ ചെയ്യുന്നത്​.

സംസ്ഥാനത്ത്​ പൊതുഗതാഗത സംവിധാനങ്ങൾ വികസിക്കുകയും മെച്ചപ്പെടുകയും ചെയ്യേണ്ടതു​ണ്ടെന്ന ബോധ്യം സർക്കാറിനു​ മാത്രമല്ല, സിൽവർലൈൻ പദ്ധതിയെപ്പറ്റി ആശങ്ക പ്രകടിപ്പിക്കുന്നവർക്കുമുണ്ട്​. എന്നാൽ, രഹസ്യാത്​മകതയുടെ മറപറ്റി തട്ടിക്കൂട്ടിയ ഗൂഢപദ്ധതികൾ പ്രശ്നം പരിഹരിക്കാനല്ല, കൂടുതൽ പ്രശ്നങ്ങൾ സൃഷ്ടിക്കാനാണ്​ നിമിത്തമാവുക. അതുകൊണ്ട്​, ഞങ്ങൾ മുമ്പ്​ എഴുതിയപോലെ, ആദ്യം വിശദമായ ചർച്ചകളും കൂടിയാലോചനകളും നടക്കണം. ജനങ്ങൾക്ക്​ കൃത്യമായ വിവരം നൽകിയും അവരുടെ പിന്തുണ ഉറപ്പാക്കിയും വേണം പദ്ധതി നടപ്പാക്കാനെന്ന്​ ഡി.പി.ആർ തന്നെ പറഞ്ഞുവെക്കുന്നുണ്ട്​. പരിസ്ഥിതിത്തകർച്ച, കടക്കെണി, കൂടുതൽ മെച്ചപ്പെട്ട ബദൽ രീതികൾ തുടങ്ങിയവ പരിഗണിക്കപ്പെടണം. സിൽവർലൈൻ പദ്ധതിക്ക്​ ബ്രോഡ്​ഗേജിനു പകരം സ്റ്റാൻഡേഡ്​ ഗേജ്​ തിരഞ്ഞെടുക്കുന്നതിലെ യുക്​തി ശരിക്കും വിലയിരുത്തപ്പെടണം. പൊതുറെയിൽ സംവിധാനവുമായി ചേർക്കാൻ പറ്റാത്ത ഇത്ര ബൃഹത്തായ ഗതാഗത സംവിധാനത്തിന്‍റെ ഗുണം ആർക്കാണ്​ കിട്ടുക എന്ന്​ പരിശോധിക്കണം. മുമ്പ്​ ഉന്നയിക്കപ്പെട്ട സംശയങ്ങളും ആശങ്കകളും അസ്ഥാനത്തല്ല എന്ന്​ ഇപ്പോൾ പുറത്തുവന്ന ഡി.പി.ആർ തന്നെ കാണിച്ചുതരുന്നുണ്ട്​. അതുകൊണ്ട്,​ സർക്കാർ ആദ്യം പിടിവാശി ഒഴിവാക്കണം. തുറന്ന മനസ്സോടെ ചർച്ചക്ക്​ തയാറാകണം. ഭരണകക്ഷികളുടെ തന്നെ അണികളിൽ പദ്ധതിയുടെ ദോഷങ്ങളെ കുറിച്ച്​ ബോധ്യമുള്ളവരുണ്ട്​. അവർ പാർട്ടി നേതൃത്വങ്ങളെ ജനാധിപത്യത്തി​ലേക്കും ജനങ്ങളെ കേൾക്കുന്ന ഭരണസംവിധാനത്തിലേക്കും വഴി കാട്ടണം, ഏതുനിലക്കും ഒരു വീണ്ടുവിചാരത്തിന്‍റെ ആവശ്യകതയിലേക്കാണ്​ ഡി.പി.ആർ വിരൽചൂണ്ടുന്നത്​.