രാജികൊണ്ട്​ മായ്​ക്കാനാവില്ല ഈ കളങ്കങ്ങൾ

കേരള വനിത കമീഷൻ 25ാം വാർഷികം ആഘോഷിക്കുന്ന വേളയാണിത്. സ്ത്രീ അവകാശങ്ങൾക്കുവേണ്ടി വിപുലമായ പരിപാടികൾ നടപ്പാക്കിക്കൊണ്ടിരിക്കുന്ന സന്ദർഭം. ഈ സമയത്തുതന്നെ, ഗാർഹിക പീഡനം സംബന്ധിച്ച്​ പരാതി പറഞ്ഞ യുവതിയോട് അപമര്യാദയായി പെരുമാറിയതിന് കമീഷൻ അധ്യക്ഷ എം.സി. ജോസഫൈന് രാജിവെക്കേണ്ടിവന്നിരിക്കുന്നു. ലൈവ് ചാനൽ പരിപാടിയിൽ അവരുപയോഗിച്ച വാക്കുകളും ശരീരഭാഷയും പരാതിക്കാരിയെ അങ്ങേയറ്റം അപഹസിക്കുന്നതും നിന്ദിക്കുന്നതുമായിരുന്നു. അതിലുപരി സ്ത്രീവിരുദ്ധവും അധികാരത്തിെൻറ അഹന്തമുറ്റിയതുമായിരുന്നു ആ പ്രകടനം. തുടക്കത്തിൽ സ്വയം ന്യായീകരിക്കാൻ ശ്രമിച്ച കമീഷൻ അധ്യക്ഷ രാഷ്​ട്രീയഭേദമന്യേ വിമർശനങ്ങൾ കനത്തതോടെ ഖേദം പ്രകടിപ്പിച്ചുവെങ്കിലും പാർട്ടിയുടെയും സർക്കാറി​െൻറയും മേൽ അപ്രതീക്ഷിതമായി പതിച്ച പ്രതിച്ഛായ കളങ്കത്തെ കഴുകിക്കളയാൻ സി.പി.എം സംസ്ഥാന സെക്രട്ടേറിയറ്റ് രാജി ആവശ്യപ്പെട്ടു. അങ്ങനെ 11മാസ കാലാവധി കൂടി അവശേഷിക്കെ പദവി ഒഴിയാൻ അവർ നിർബന്ധിതയായി.

2017ൽ വനിത കമീഷൻ അധ്യക്ഷസ്ഥാനം ഏ​െറ്റടുത്ത ജോസഫൈൻ പരാതിക്കാരെ വാക്കുകൊണ്ടു മുറിവേൽപിക്കുന്നത്​ ഇതാദ്യമായല്ല. അയൽവാസി വീട്ടിൽ കയറി മർദിച്ച സംഭവത്തിൽ നീതിതേടി വനിത കമീഷനിൽ എത്തിയ പത്തനംതിട്ടയിലെ വയോധികക്കും കുടുംബത്തിനുമെതിരെ നടത്തിയ ശകാരവർഷം മുതൽ വാളയാർ പീഡന കേസിൽ ഇരകൾക്കുനേരെ ചൊരിഞ്ഞ മോശം വാക്കുകൾവരെ ഈ പദവിക്ക്​ അവർ യോഗ്യയല്ല എന്നതി​െൻറ സംസാരിക്കുന്ന തെളിവുകളായിരുന്നു. രാഷ്​ട്രീയ പ്രവർത്തനം നടത്തുന്ന സ്ത്രീകൾപോലും വിവേചനങ്ങൾ അനുഭവിക്കുന്ന സാമൂഹിക ക്രമത്തിലാണ് അതിനെതിരെ മുൻനിരയിൽ പോരാടേണ്ട വനിത കമീഷൻ അധ്യക്ഷ പരാതി പറയുന്നവർ തങ്ങളെക്കാൾ താഴ്ന്നവരാണ് എന്ന വരേണ്യബോധവും പുരുഷാധിപത്യ ഭാഷകളും നിരന്തരം പ്രസരിപ്പിക്കുന്നത്.

ഈ വിവാദപർവങ്ങൾക്കിടയിലും സ്ത്രീധനം നൽകുകയാ​െണങ്കിൽ സ്ത്രീയുടെ പേരിൽ ബാങ്ക്​ അക്കൗണ്ടിലിടുകയാണ് വേണ്ടതെന്നായിരുന്നു അവരുടെ പ്രസ്​താവന. നിയമം മൂലം നിരോധിക്കപ്പെട്ടിരിക്കുന്ന, നൂറുകണക്കിന്​ സ്​ത്രീകളുടെ ജീവനെടുത്തുകൊണ്ടിരിക്കുന്ന ഒരു ദുരാചാരത്തെ സ്​ത്രീ ശാക്തീകരണത്തി​െൻറ വ്യാജസീൽ പതിപ്പിച്ച്​ ന്യായീകരിച്ചെടുക്കലല്ലെങ്കിൽ പിന്നെന്താണിത്​​? എന്തുതന്നെ വന്നാലും സ്​ത്രീധനം അംഗീകരിക്കാനാവില്ലെന്ന നിലപാടെടുക്കണമെന്ന ഒരു ധാർമിക-മാനുഷിക ബോധം സമൂഹത്തി​െൻറ ചില കോണുകളിലെങ്കിലും ശക്തിപ്പെട്ടുകൊണ്ടിരിക്കെയാണിതെന്നോർക്കണം.

വീഴ്​ചകൾ മാധ്യമങ്ങളും സ്​ത്രീ അവകാശ പ്രവർത്തകരും പലകുറി ചൂണ്ടിക്കാണിച്ചുവെങ്കിലും തിരിച്ചറിഞ്ഞ്​ തിരുത്തുവാനോ, ഉത്തരവാദിത്തപ്പെട്ട അധികാര സ്ഥാനങ്ങളിലിരിക്കുന്നവർ നിഷ്ഠയോടെ പുലർത്തേണ്ട മര്യാദ പാലിക്കുവാനോ അവർ തൽപരയായിരുന്നില്ല. രാജ്യത്തെ ഏറ്റവും ശക്തമായ വനിത സംഘടനകളിലൊന്നായി വിശേഷിപ്പിക്കുന്ന, 'മാറണം മനോഭാവം സ്ത്രീകളോട്' എന്ന തലക്കെട്ടിൽ കാമ്പയിൻ നടത്തുന്ന ജനാധിപത്യ മഹിള അസോസിയേഷ​െൻറ അഖിലേന്ത്യാ നേതൃപദവിയും സ്​ത്രീവാദ രാഷ്​ട്രീയത്തോട്​ ചേർന്നു നിൽക്കുന്നുവെന്ന്​ അവകാശപ്പെടുന്ന സി.പി.എമ്മി​െൻറ കേന്ദ്രസമിതി അംഗത്വവും വഹിക്കുന്ന വ്യക്തിയാണ്​ ​ സ്​ത്രീനീതി വിഷയത്തിൽ ഇത്ര വലിയ പിഴവുകൾ പലവുരു വരുത്തിയതെന്നോർക്കണം. എന്നിട്ട്​ ഒരിക്കൽ പോലും അത്​ നയവ്യതിയാനവും മനുഷ്യാവകാശങ്ങളുടെ നഗ്​നമായ ലംഘനമാ​െണന്ന്​ തിരിച്ചറിയുവാനും തിരുത്തിക്കുവാനും ആ കേഡർ സംഘടനകൾ തയാറായില്ലെ​ന്നു വരു​േമ്പാൾ പ്രശ്​നം ജോസഫൈൻ എന്ന വ്യക്തിയുടെ മാത്രമല്ല മറിച്ച്​ അവർ പ്രതിനിധാനംചെയ്യുന്ന പ്രസ്​ഥാനത്തി​േൻറതു തന്നെയാണെന്ന്​ പറയേണ്ടിവരും. ജോസഫൈ​െൻറ ഖേദപ്രകടനത്തിലൂടെ വിവാദം അവസാനിച്ചുവെന്ന അപമാനകരമായ വാദവുമായി ഡി.വൈ.എഫ്.ഐ രംഗത്തു വന്നതിലും പ്രകടമാണ്​ ഈ സ്ത്രീവിരുദ്ധതയുടെ ആഴം. സ്ത്രീസൗഹൃദ കേരളം സൃഷ്​ടിക്കുമെന്ന് പ്രഖ്യാപിച്ച ഇടതുപക്ഷ സർക്കാറും അതിന് നേതൃത്വം വഹിക്കുന്ന സി.പി.എമ്മും അടിയന്തരമായി പരിശോധിക്കേണ്ടതാണ് പൊതുമണ്ഡലത്തിലും പാർട്ടി അടരുകളിലും പൂപ്പലുപിടിച്ചുകിടക്കുന്ന സ്ത്രീവിരുദ്ധ മനോഘടനകൾ.

കേരളത്തിലെ സ്ത്രീകളുടെ പദവി മെച്ചപ്പെടുത്തുന്നതിനും സ്ത്രീകളെ ബാധിക്കുന്ന നീതിരഹിതമായ നടപടികൾ അന്വേഷിക്കുന്നതിനുമായി രൂപവത്കരിക്കപ്പെട്ട വനിത കമീഷ​െൻറ പ്രവർത്തനങ്ങളുടെ സാമൂഹിക ഓഡിറ്റിങ്ങും ഈ വിവാദം അനിവാര്യമാക്കുന്നു. തത്ത്വത്തിൽ സിവിൽ കോടതിയിൽ നിക്ഷിപ്തമായിട്ടുള്ള അധികാരമുണ്ടെങ്കിലും പ്രയോഗത്തിൽ ഏതു വിഷയത്തിലും സംസ്ഥാന സർക്കാറിന് ശിപാർശ ചെയ്യാനുള്ള അധികാരമേ വനിത കമീഷനുള്ളൂ. അതുകൊണ്ടുതന്നെ ദുരിതമനുഭവിക്കുന്ന സ്ത്രീകളുടെ അവസാനത്തെ അത്താണിയെന്ന് കരുതപ്പെടുന്ന വനിത കമീഷൻ ഫലത്തിൽ നിഷ്​പ്രയോജന സംവിധാനമായി പരിണമിച്ചിരിക്കുന്നു. അധ്യക്ഷയുടെയും അംഗങ്ങളുടെയും നിയമനം രാഷ്​ട്രീയ വീതംവെപ്പായി മാറിയതോടെ മറ്റൊരു വെള്ളാനയാകുകയാണ് വനിത കമീഷനും. സ്ത്രീകളുടെ അവകാശങ്ങൾ നിവർത്തിക്കൊടുക്കാൻ കഴിയുന്ന അധികാരമുള്ള സ്ത്രീകളിലെ വൈവിധ്യത്തെ പ്രതിനിധാനംചെയ്യുന്ന രാഷ്​ട്രീയ വിധേയത്വത്തിൽനിന്ന് വിമുക്തമായ വനിത കമീഷൻ രൂപപ്പെടുത്താനുള്ള പോരാട്ടമായി ഈ സന്ദർഭത്തെ പരിവർത്തിപ്പിക്കേണ്ടതുണ്ട്. അങ്ങനെ ചെയ്യാനായാൽ സ്ത്രീസൗഹൃദ സംസ്ഥാനമെന്ന ലക്ഷ്യത്തിലേക്ക് വലിയ ഒരു ചുവടുവെപ്പായിരിക്കുമെന്ന്​ തീർച്ച.