നന്ന്​, ഈ തെരഞ്ഞെടുപ്പ്​ വിലക്കിഴിവ്​

അഞ്ചു സംസ്ഥാന നിയമസഭകളിലേക്കുള്ള തെരഞ്ഞെടുപ്പ്​ മുട്ടിവിളിക്കെ, പാചകവാതക സിലിണ്ടറിന് 200 രൂപ വില കുറക്കാനുള്ള കേന്ദ്രസർക്കാർ തീരുമാനം സാധാരണക്കാർക്കു വലിയൊരു ആശ്വാസം തന്നെയാണ്​. നിലവിൽ 200 രൂപയുടെ സബ്​സിഡി ലഭിക്കുന്ന പ്രധാനമന്ത്രി ഉജ്വലപദ്ധതി ഗുണഭോക്താക്കൾക്ക്​ 400 രൂപയുടെ ഇളവ്​ ലഭിക്കും. ആഗസ്​റ്റ്​ 30ന്​ നിലവിൽ വന്ന വിലക്കിഴിവ്​ 33 കോടി ഗാർഹിക ഉപഭോക്താക്കൾക്ക്​ പ്രയോജനം ചെയ്യും. 75 ലക്ഷം പുതിയ പാചകവാതക കണക്​ഷൻ കൂടി നൽകി ഉജ്വല ഗുണഭോക്താക്കളുടെ എണ്ണം 10.35 ലക്ഷത്തിലെത്തിക്കുമെന്നും മന്ത്രിസഭ തീരുമാനം വിശദീകരിച്ച കേന്ദ്ര വിവരവിനിമയ, പ്രക്ഷേപണമന്ത്രി അനുരാഗ്​ ഠാകുർ വ്യക്തമാക്കിയിട്ടുണ്ട്.

രക്ഷാബന്ധൻ-ഓണം ആഘോഷം പ്രമാണിച്ച് ജനത്തിനു നൽകുന്ന സമ്മാനമായാണ്​ പ്രധാനമന്ത്രി നരേന്ദ്ര മോദിയും ​കേന്ദ്രമന്ത്രിമാരും തീരുമാനത്തെ വിശേഷിപ്പിച്ചിരിക്കുന്നത്​. ദരിദ്രരും ഇടത്തരക്കാരുമായ ആളു​കളുടെ ജീവിതനിലവാരം മെച്ചപ്പെടുത്താൻ സാധ്യമായതെല്ലാം ചെയ്യുന്നതിന്‍റെ ഭാഗമാണിതെന്ന് അവർ വിശദീകരിക്കുന്നു. എന്നാൽ ​തെരഞ്ഞെടുപ്പിലേക്ക് കാലൂന്നാൻ തുടങ്ങിയ ഭരണകൂടത്തിനു വിലക്കയറ്റത്തിൽ പൊരിയുന്ന ജനങ്ങളുടെ വികാരം കണക്കിലെടുക്കാൻ വയ്യാത്ത സാഹചര്യത്തിലാണ്​ തിരക്കിട്ട ഈ ജനോപകാര നടപടിയെന്നു കാണാൻ പ്രയാസമില്ല.

ദേശീയ സാമ്പ്ൾ സർവേ ഓഫിസ്​ (എൻ.എസ്​.എസ്.ഒ)യുടെ ഏറ്റവും പുതിയ റിപ്പോർട്ട്​ അനുസരിച്ച്​ ഗ്രാമീണമേഖലയിലെ 50 ശതമാനം കുടുംബങ്ങളും നഗരങ്ങളിലെ 90 ശതമാനവും പ്രാഥമിക ഊർജസ്രോതസ്സായി എൽ.പി.ജിയെ ആശ്രയിക്കുന്നവരാണ്​. കഴിഞ്ഞ രണ്ടു വർഷത്തിനിടെ 13 തവണയാണ്​ ​പൊതുമേഖലയിലെ റിഫൈനറികൾ പാചകവാതക വിലയുയർത്തിയത്​. റഷ്യയുടെ യുക്രെയ്​ൻ അധിനിവേശത്തെത്തുടർന്ന്​ ബാര​ൽ ഒന്നിന്​ 100 ഡോളറിലേറെ ഉണ്ടായിരുന്ന എണ്ണവില 80 ലേക്ക് താഴ്ന്നിട്ടും അതിന്‍റെ ഫലം അനുഭവിക്കാൻ സാധാരണ ഉപഭോക്താക്കൾക്കു കഴിഞ്ഞിരുന്നില്ല.

എണ്ണ, പാചകവാതക വിലയുടെ വർധന പണപ്പെരുപ്പം കുത്തനെ കൂട്ടാനിടയാക്കി, ജൂലൈയിൽ അത്​ 7.44 ശതമാനം എന്ന കഴിഞ്ഞ 15 മാസത്തെ ഏറ്റവും ഉയർന്ന നിലയിലാണുള്ളത്​. ഇതോടെ അവശ്യസാധനവില ക്രമാതീതമായി കുതിച്ചുയർന്നിരിക്കുകയാണ്​. ജനജീവിതം ദുസ്സഹമായ വിവരം ​തെരഞ്ഞെടുപ്പി​ന്​ ഒരുങ്ങുമ്പോൾ കേന്ദ്രം ഭരിക്കുന്ന ബി.ജെ.പി തിരിച്ചറിയുന്നു എന്നതിന്‍റെ ​തെളിവുകൂടിയാണ്​ വില കുറക്കാനുള്ള തീരുമാനം. അതോടൊപ്പം പ്രതിപക്ഷത്തിന്‍റെ ചില സന്ദർഭോചിത തന്ത്രങ്ങളും കേന്ദ്രത്തെ സമ്മർദത്തിലാക്കിയെന്നു പറയാം. മധ്യപ്രദേശിൽ അധികാരത്തിലെത്തിച്ചാൽ പാചകവാതകവില സിലിണ്ടർ ഒന്നിന്​ 500 രൂപയിലേക്ക് കുറക്കുമെന്ന് കോൺഗ്രസ്​ പ്രഖ്യാപിച്ചിരുന്നു. രാജസ്ഥാനിൽ പാവപ്പെട്ടവർക്ക്​ 500 രൂപക്ക്​ സിലിണ്ടർ ലഭ്യമാക്കിത്തുടങ്ങുകയും ചെയ്തു.

ഈ രണ്ടെണ്ണത്തിനു പുറമെ ഛത്തിസ്​ഗഢ്​, ​തെലങ്കാന, മിസോറം സംസ്ഥാനങ്ങൾ കൂടി ഈ വർഷാന്ത്യം നിയമസഭ ​തെരഞ്ഞെടുപ്പിലേക്ക് നീങ്ങുകയാണ്​. ആ ഫലപ്രഖ്യാപനം അടുത്ത പൊതു​തെരഞ്ഞെടുപ്പിലേക്കുള്ള കേളികൊട്ടു കൂടിയാകുമെന്നറിയുന്നത് കൊണ്ടുതന്നെയാണ്​ കേന്ദ്രം ഇപ്പോൾ ഉണർന്നെണീറ്റിരിക്കുന്നത്​. മധ്യപ്രദേശിൽ 450 രൂപക്ക്​ പാചകവാതകം, ആദായനികുതി പരിധിയിലില്ലാത്ത പാവപ്പെട്ട സ്ത്രീകളുടെ അക്കൗണ്ടിലേക്ക്​ 1000 രൂപ വീതം, രാഖി സമ്മാനമായി മറ്റൊരു 250 രൂപ ഇങ്ങനെ സ്വന്തം നിലക്ക്​ വാഗ്ദാനപ്പെരുമഴയുമായി മുഖ്യമന്ത്രി ശിവരാജ് സിങ്​ ചൗഹാനും മുന്നിട്ടിറങ്ങിയിട്ടുണ്ട്​. മുസ്​ലിം വിദ്വേഷത്തിന്‍റെ ബുൾഡോസറുകൾ കൊണ്ടുമാത്രം പിടിച്ചുനിൽക്കാനാവില്ലെന്നും താഴെത്തട്ടിൽ നിത്യജീവിതത്തിന് ദുരിതപ്പെടുന്ന ​സ്ത്രീകൾ കലിപ്പിലാണെന്നുമുള്ള വസ്തുസ്ഥിതി റിപ്പോർട്ട്​ പാർട്ടിയോഗങ്ങളിൽ ലഭിക്കാൻ തുടങ്ങി​യതോടെയാണ്​ ജനകീയ പ്രശ്നങ്ങളിലേക്ക്​ ശ്രദ്ധതിരിക്കാനുള്ള പുതിയ തീരുമാനം.

തീവ്ര ദേശീയതയിലൂന്നിയ വിദ്വേഷ രാഷ്ട്രീയത്തിന്‍റെ വീര്യംകൂട്ടാനുള്ള ശ്രമമാണ്​ ഇക്കാലമത്രയും ബി.ജെ.പി ഭരണകൂടം കേന്ദ്രത്തിലും സംസ്ഥാനങ്ങളിലുമൊക്കെ ചെയ്തു കൊണ്ടിരുന്നത്​. ജനത്തിലൊരു വിഭാഗത്തെ അരികുവത്​കരിച്ചും അവരെ ശാരീരികമായും സാമ്പത്തികമായും സാമൂഹികമായും നിർമൂലനം ചെയ്തുമുള്ള മണിപ്പൂർ, ഹരിയാന, യു.പി മോഡൽ ‘തകർപ്പൻ ബുൾഡോസർ ഭരണം’ രാജ്യത്തെ സമ്പദ്​ഘടനയെയും അതുവഴി സാധാരണ ജനജീവിതത്തെയും എങ്ങനെ ബാധിക്കുമെന്ന ചിന്ത പോലും ബി.ജെ.പിക്ക്​ ഇല്ലാതെ പോയി. മുമ്പു പലപ്പോഴും പല ഉച്ചകോടികൾക്ക്​ ആതിഥ്യമരുളിയ ഇന്ത്യയിൽ ജി-20 ഉച്ചകോടിയുടെ ആഘോഷം പൊലിപ്പിച്ചതു കൊണ്ടോ ചന്ദ്രയാൻ വിജയത്തിന് പേരും കുറിയും ചാർത്തിയതുകൊണ്ടോ ജനത്തിന് കഷ്ടപ്പാട്​ അകറ്റാൻ ഒന്നുമേ ആവുന്നില്ല എന്നുതന്നെയാണ്​ അടിത്തട്ടിൽനിന്ന് പാർട്ടിക്ക്​ ഇപ്പോൾ ലഭിച്ചുകൊണ്ടിരിക്കുന്ന തിരിച്ചറിവ്​.

ആ നിലക്ക്​ ഈ വിലക്കുറവ് തീരുമാനത്തെ നല്ല ലക്ഷണമായി കാണണം. കർണാടകയിൽ ചെയ്തതു പോലെ ഇന്ത്യയെ മാന്തിപ്പൊളിക്കുന്ന വിദ്വേഷത്തിന്‍റെ രാഷ്ട്രീയംവെച്ചുള്ള കിടമത്സരത്തിൽനിന്ന് ഭരിക്കുന്നവരുടെ അധികാരശേഷി അളക്കാനും തൂക്കാനുമുള്ള അവസരമായി തെരഞ്ഞെടുപ്പ്​ രാഷ്ട്രീയത്തെ മാറ്റാൻ പ്രതിപക്ഷത്തിനു കഴിഞ്ഞാൽ അത്​ രാജ്യത്തിനും ജനങ്ങൾക്കും ഗുണപ്രദമാകും. വെറുപ്പിന്‍റെ സംഘ്​പരിവാർ അജണ്ടയിൽനിന്ന് ജീവൽപ്രശ്നങ്ങളുടെ ജനകീയ അജണ്ടയിലേക്ക്​ ഇന്ത്യയിലെ രാഷ്ട്രീയ ചർച്ചയുടെ ഗതിമാറ്റാൻ ഇത്തരം ചുവടുമാറ്റങ്ങൾ ആവേശം പകരുമെന്ന്​ ആശിക്കാം.