മ​ണി​പ്പൂ​രി​ൽ ശൈ​ഥി​ല്യം അ​നു​വ​ദി​ക്ക​രു​ത്​

ഒ​രു മാ​സ​​ത്തോ​ട​ടു​ത്തി​ട്ടും വ​ട​ക്കു​കി​ഴ​ക്ക​ൻ അ​തി​ർ​ത്തി സം​സ്ഥാ​ന​മാ​യ മ​ണി​പ്പൂ​രി​ലെ തീ​യ​ണ​ക്കാ​ൻ സം​സ്ഥാ​ന​ഭ​ര​ണ​കൂ​ട​ത്തി​നോ വി​ഷ​യ​ത്തി​ൽ ഫ​ല​പ്ര​ദ​മാ​യ ഇ​ട​പെ​ട​ൽ ന​ട​ത്താ​ൻ കേ​ന്ദ്ര​സ​ർ​ക്കാ​റി​നോ ക​ഴി​ഞ്ഞി​ട്ടി​ല്ല. നാല് ദിന സ​ന്ദ​ർ​ശ​ന​ത്തി​ന് തിങ്കളാഴ്ച ഇം​ഫാ​ലി​ലെ​ത്തി​യ കേ​ന്ദ്ര ആ​ഭ്യ​ന്ത​ര ​മ​ന്ത്രി അ​മി​ത്​ ഷാ ​ വി​വി​ധ വി​ഭാ​ഗ​ങ്ങ​ളു​മാ​യി ആ​ശ​യ​വി​നി​മ​യം ന​ട​ത്തു​മെ​ന്ന്​ പ്ര​ഖ്യാ​പി​ച്ചി​ട്ടു​ണ്ടെ​ങ്കി​ലും മാ​സ​ത്തോ​ള​മാ​യി ക​ത്തി​പ്പ​ട​രു​ന്ന വം​ശീ​യ​ക​ലാ​പ​ത്തി​ന്​ അ​തു​കൊ​ണ്ട്​ അ​റു​തി​യാകു​മെന്നു തീ​ർ​ത്തുപ​റ​യാ​ൻ വ​യ്യ. താ​ഴ്വ​ര കേ​ന്ദ്രീ​ക​രി​ച്ച ഹി​ന്ദു ഭൂ​രി​പ​ക്ഷ​വി​ഭാ​ഗ​മു​ൾ​ക്കൊ​ള്ളു​ന്ന മേ​യ്തി​ക​ളും കു​ന്നി​ൻ​പു​റ​ങ്ങ​ളി​ലെ ക്രൈ​സ്ത​വ ഭൂ​രി​പ​ക്ഷ ഗോ​ത്ര​വി​ഭാ​ഗ​മാ​യ കു​ക്കി​ക​ളും ത​മ്മി​ലെ സാ​യു​ധ​സം​ഘ​ർ​ഷം നി​യ​​ന്ത്ര​ണാ​ധീ​ന​മാ​ക്കാ​ൻ ബി​രെ​ൻ​സി​ങ്ങി​ന്‍റെ നേ​തൃ​ത്വ​ത്തി​ലെ ബി.​ജെ.​പി സ​ർ​ക്കാ​റി​നു ക​ഴി​ഞ്ഞി​ല്ല. ക​ഴി​ഞ്ഞ ദി​വ​സം കു​ക്കി തീ​വ്ര​വാ​ദി​ക​ളാ​യ നാ​ൽ​പ​തു​പേ​രെ ക്ര​മ​സ​മാ​ധാ​ന ചു​മ​ത​ല​യു​ള്ള പൊ​ലീ​സ്​ വ​ധി​ച്ച​താ​യി അ​റി​യി​ച്ച മു​ഖ്യ​മ​ന്ത്രി, കു​ക്കി​ക​ളു​ടെ സാ​യു​ധ​തീ​വ്ര​വാ​ദ​ത്തി​നുനേ​രെ ഒ​രു ദാ​ക്ഷി​ണ്യ​വും കാ​ണി​ക്കി​ല്ലെ​ന്നു വ്യ​ക്ത​മാ​ക്കി​യി​രു​ന്നു. അ​തി​നുശേ​ഷ​മാ​ണ്​ ​അ​ഞ്ചുപേ​രു​ടെ ജീ​വ​നെ​ടു​ത്ത പു​തി​യ സം​ഘ​ർ​ഷമുണ്ടായത്. അ​തോ​ടൊ​പ്പം ഗോ​ത്ര​ഭൂ​രി​പ​ക്ഷ​ത്തി​ന്‍റെ അ​ധി​വാ​സ​മേ​ഖ​ല​യാ​യ കു​ന്നി​ൻ​പു​റ​ങ്ങ​ളി​ൽ പ​രി​മി​ത​മെങ്കിലും സ്വ​യം​ഭ​ര​ണം എ​ന്ന ആ​വ​ശ്യം കൂ​ടു​ത​ൽ ശ​ക്തി​പ്രാ​പി​ച്ചി​രി​ക്കു​ന്നു. സം​സ്ഥാ​ന​ത്തി​ന്‍റെ അ​ഖ​ണ്ഡ​ത ഭേ​ദി​ക്കാ​ൻ അ​നു​വ​ദി​ക്കി​ല്ലെ​ന്ന്​ മു​ഖ്യ​മ​ന്ത്രി​യും ഉ​റ​ച്ച നി​ല​പാ​ടി​ലാ​ണ്.

ത​ല​സ്ഥാ​ന​മാ​യ ഇം​ഫാ​ൽ കേ​ന്ദ്രീ​ക​രി​ച്ച്​ സ​മ​ത​ല​ങ്ങ​ളി​ൽ കൂ​ടു​കെ​ട്ടി​യ സം​സ്ഥാ​ന​ജ​ന​സം​ഖ്യ​യി​ലെ 53 ശ​ത​മാ​നം വ​രു​ന്ന മേ​യ്തി​ക​ളും മ​ണി​പ്പൂ​രി​ലെ ഭൂ​മിയുടെ 90 ശ​ത​മാ​ന​വും കൈ​വശമുള്ള ജ​ന​സം​ഖ്യ​യി​ൽ 25 ശ​ത​മാ​നം വ​രു​ന്ന കു​ക്കി​ക​ളും ത​മ്മി​ൽ പ​ര​സ്പ​ര സം​ശ​യ​ത്തി​ന്‍റെ​യും അ​സ​ഹി​ഷ്ണു​ത​യു​ടെ​യും അ​ന്ത​രീ​ക്ഷം നേ​ര​ത്തേയുണ്ട്. മേ​യ്തി നി​യ​ന്ത്ര​ണ​ത്തി​ലു​ള്ള ഭ​ര​ണ​കൂ​ട​ങ്ങ​ളു​ടെ പി​ൻ​ബ​ല​ത്തി​ൽ സ​മ​ത​ല​വാ​സി​ക​ൾ എ​ല്ലാ ആ​നു​കൂ​ല്യ​ങ്ങ​ളും കൊ​ണ്ടു​പോ​കു​ന്നു​വെ​ന്നു കു​ക്കി​ക​ളും ഭൂ​മി​യു​ടെ ഭൂ​രി​ഭാ​ഗ​വും കൈ​വ​ശ​പ്പെ​ടു​ത്തി​യ കു​ക്കി​ക​ൾ ന​ഗ​ര​വാ​സ​ത്തി​നി​റ​ങ്ങി ത​​ങ്ങ​ളെ ഞെ​രു​ക്കു​ക​യാ​ണെ​ന്നും കു​ന്നി​ൻ​പു​റ​ത്തെ ഭൂ​മി വി​ല​ക്കെ​ടു​ക്കാ​ൻപോ​ലും പു​റം​വാ​സി​ക​ൾ​ക്ക്​ അ​നു​മ​തി ത​ട​യു​ന്ന ആ​നു​കൂ​ല്യം പ​ട്ടി​ക​വ​ർ​ഗ മേ​ൽ​വി​ലാ​സം വ​ഴി അ​വ​ർ നേ​ടി​യെ​ടു​ക്കു​ക​യാ​ണെ​ന്നു​മു​ള്ള ക​ണ്ണു​ക​ടി​യി​ൽ മേ​യ്തി​ക​ളും പ​ര​സ്പ​രം ക​ണ്ടു​കൂ​ടാ​ത്ത നി​ല​യി​ലാ​ണ്​ നേ​ര​ത്തേ. അ​തി​ലേ​ക്കാ​ണ്​ സ്വ​ത്വാ​ഭി​മാ​ന​ത്തി​ൽ കൈ​വെ​ച്ച്​ ഹി​ന്ദു​ത്വ​ക്കു സ​മാ​ന​മാ​യി മേ​യ്തി ദേ​ശീ​യ​ത ഊ​തി​പ്പെ​രു​പ്പി​ച്ച്​ ബി​രെ​ൻ​സി​ങ്ങി​ന്‍റെ നേ​തൃ​ത്വ​ത്തി​ൽ ബി.​ജെ.​പി ഭ​ര​ണം പി​ടി​ക്കു​ന്ന​ത്. കോ​ള​നി​വാ​ഴ്ച​ക്കു മു​മ്പേ മ​ണി​പ്പൂ​രി​ന്‍റെ മ​ല​മ​ട​ക്കു​ക​ളി​ൽ വാ​സ​മു​റ​പ്പി​ച്ച കു​ക്കി ജ​ന​ത​യെ നു​ഴ​ഞ്ഞു​ക​യ​റ്റ​ക്കാ​രും അ​ഭ​യാ​ർ​ഥി​ക​ളു​മൊ​ക്കെ​യാ​യി മു​ദ്ര​കു​ത്തു​ക​യും അ​വി​​ടെ പൗ​ര​ത്വ ര​ജി​സ്റ്റ​ർ ന​ട​പ്പി​ലാ​ക്കാ​നു​ള്ള തീ​രു​മാ​നം പ്ര​ഖ്യാ​പി​ക്കു​ക​യും ചെ​യ്തു ബി.​ജെ.​പി സ​ർ​ക്കാ​ർ. ​അ​റം​ബാ​യ്​ തെ​ൻ​ഗോ​ൾ, മേ​യ്തി ലീ​പു​ൻ തു​ട​ങ്ങി​യ യു​വ തീ​വ്ര​വാ​ദി​സം​ഘ​ങ്ങ​ൾ ​പി​റ​വി​യെ​ടു​ക്കു​ക​യും അ​വ​ർ വി​ദ്വേ​ഷ​രാ​ഷ്ട്രീ​യ​ത്തി​ന്‍റെ വ​ക്താ​ക്ക​ളാ​യി മാ​റു​ക​യും ചെ​യ്തു. മു​​​മ്പൊ​ന്നു​മി​ല്ലാ​ത്ത വി​ധം ​250 ച​ർ​ച്ചു​ക​ള​ട​ക്കം ദേ​വാ​ല​യ​ങ്ങ​ളും മ​ത​പ​ഠ​ന​സ്ഥാ​പ​ന​ങ്ങ​ളും പ്ര​ത്യേ​കം ഉ​ന്നം​വെ​ക്കു​ന്ന വം​ശീ​യ​ക​ലാ​പ​മാ​യി സം​ഘ​ർ​ഷം പ​രി​ണ​മി​ച്ച​ത്​ ഇ​ങ്ങ​നെ​യൊ​ക്കെ​യാ​ണ്.

ഗോ​ത്ര​വി​ഭാ​ഗ​ങ്ങ​ളു​ടെ കു​ന്നി​ൻ​പ്ര​ദേ​ശ​ങ്ങ​ൾ ഭ​ര​ണ​കൂ​ട​ത്തി​ന്‍റെ ദൃ​ഷ്ടി​യി​ൽ നി​ന്നൊ​ഴി​വാ​ണെ​ന്നു സ്ഥാ​പി​ക്കു​ന്ന​താ​ണ്​ സംസ്ഥാന ബ​ജ​റ്റു​ക​ളി​ൽ വ​ക​യി​രു​ത്തു​ന്ന വി​ഹി​ത​ത്തി​ന്‍റെ ക​ണ​ക്ക്. ഇം​ഫാ​ൽ കേ​ന്ദ്രീ​ക​രി​ച്ച്​ താ​ഴ്​​വാ​ര​ങ്ങ​ളി​ലേ​ക്ക്​ ഭ​ര​ണ​കൂ​ടം സ​ഹ​സ്ര​കോ​ടി​ക​ൾ ഒ​ഴു​ക്കു​മ്പോ​ൾ ഏ​താ​നും ശ​ത​കോ​ടി​ക​ൾ മാ​ത്ര​മാ​ണ്​​ ഗോ​ത്ര​മേഖ​ല​ക്ക്​ ല​ഭി​ക്കു​ന്ന​ത്. സം​സ്ഥാ​ന​ത്തെ 60 നി​യ​മ​സ​ഭ സീ​റ്റു​ക​ളി​ൽ നാ​ൽ​പ​തും മേ​യ്തി​ മേ​ഖ​ല​യി​ലാ​ണ്. കു​ന്നി​ൻ​പു​റ​ങ്ങ​ളി​ൽ 20 സീ​റ്റു​ക​ളേ​യു​ള്ളൂ. 2020-21 വ​ർ​ഷ​ത്തെ ബ​ജ​റ്റി​ൽ താ​ഴ്വാ​ര​ങ്ങ​ൾ​ക്ക്​ 6951 കോ​ടി രൂ​പ വ​ക​യി​രു​ത്തി​യ​പ്പോ​ൾ ഹി​ൽ ഏ​രി​യ​ക്ക്​ അ​നു​വ​ദി​ച്ച​ത്​ വെ​റും 41 കോ​ടിയാ​ണ്. ഈ ​വി​വേ​ച​ന​ത്തി​ന്‍റെ ഫ​ലം തൊ​ഴി​ൽ, അ​ടി​സ്ഥാ​ന​വി​ക​സ​നം, ആ​രോ​ഗ്യ​ചി​കി​ത്സ സൗ​ക​ര്യ​ങ്ങ​ൾ എ​ന്നി​വ​യി​ലെ​ല്ലാം തി​ക​ഞ്ഞ ദ​രി​ദ്രാ​വ​സ്​​ഥ​യാ​ണ്​ കു​ക്കി​ക​ൾ​ക്ക്​ സ​മ്മാ​നി​ക്കു​ന്ന​ത്. എ​ല്ലാ നി​ല​ക്കും ഗോ​ത്ര​വി​ഭാ​ഗ​ങ്ങ​ൾ​ക്ക്​ ആ​നു​കൂ​ല്യ​ങ്ങ​ൾ നി​ഷേ​ധി​ച്ചുകൊ​ണ്ടി​രി​ക്കു​ന്ന​തി​നി​ട​യി​ലാ​ണ് മേയ്തി വി​ഭാ​ഗ​ത്തി​ന്​​ ഗോ​ത്ര​വ​ർ​ഗ നി​ല ന​ൽ​കാ​നു​ള്ള ബി.​ജെ.​പി സ​ർ​ക്കാ​റി​ന്‍റെ നീ​ക്കം. മേയ്തി​ക​ൾ​ക്കു പ​ട്ടി​ക​വ​ർ​ഗ സ്റ്റാ​റ്റ​സ്​ ന​ൽ​കാ​ൻ പ​തി​റ്റാ​ണ്ടു മു​മ്പെ​ടു​ത്ത തീ​രു​മാ​ന​​ത്തി​ൽ മു​ട​ന്തി​നി​ൽ​ക്കു​ന്ന​തി​നെ​തി​രെ കോ​ട​തി സ​ർ​ക്കാ​റി​ന്‍റെ നി​ല​പാ​ടു ചോ​ദി​ക്കു​ക​യാ​യി​രു​ന്നു. കോ​ൾ​ഡ്​ സ്​​റ്റോ​റേ​ജി​ലാ​യി​രു​ന്ന ആ ​തീ​രു​മാ​നം ന​ട​പ്പി​ലാ​ക്കാ​നു​ള്ള ശി​പാ​ർ​ശ കേ​ന്ദ്ര​ത്തി​നു സ​മ​ർ​പ്പി​ക്കാ​ൻ ബി.​ജെ.​പി ഭ​ര​ണ​കൂ​ടം മു​ന്നോ​ട്ടു​വ​ന്നു. അ​തോ​ടെ കു​ക്കി​ക​ൾ അ​സ്വ​സ്ഥ​രാ​യി. അ​വ​രു​ടെ ഭൂ​വി​ഭാ​ഗ​ത്തി​ൽ ഇ​തോ​ടെ മേ​യ്തി​ക​ൾ​ക്കു വി​നി​മ​യാ​വ​കാ​ശം ല​ഭി​ക്കും. നി​ല​വി​ലെ സം​വ​ര​ണ​വി​ഹി​ത​ത്തി​ൽ, അ​ധി​കാ​ര​ത്തി​ന്‍റെ എ​ല്ലാ ആ​നു​കൂ​ല്യ​ങ്ങ​ളും അ​നു​ഭ​വി​ച്ചു​പോ​രു​ന്ന വ​രേ​ണ്യ​രാ​യ മേ​യ്തി​ക​ൾ കൂ​ടി കൈ​യി​ടു​ന്ന​തോ​ടെ ത​ങ്ങ​ൾ കൂ​ടു​ത​ൽ അ​രി​കു​വ​ത്​​ക​രി​ക്ക​പ്പെ​ടു​മെ​ന്നും അ​വ​ർ ക​ണ്ടു. അ​തി​നെ​തി​രെ ​മേ​യ്​ മൂ​ന്നി​ന്​ കുക്കികൾ ന​ട​ത്തി​യ പ്ര​ക്ഷോ​ഭ​ത്തി​നെ​തി​രെ മേ​യ്തി​ക​ൾ മ​റു​സ​മ​ര​വു​മാ​യി ഇ​റ​ങ്ങി​യ​തോ​ടെ​യാ​ണ്​ ഇ​പ്പോ​ഴ​ത്തെ ചോ​ര​ക്ക​ളി​ക്കു തു​ട​ക്ക​മാ​കു​ന്ന​ത്.

സേ​ന​യെ വി​ളി​ക്കണമെന്ന് ആ​വ​ശ്യ​മുയർന്നപ്പോൾ സം​സ്ഥാ​ന​പൊ​ലീ​സ്​ ത​ന്നെ എ​ല്ലാം ചെ​യ്തു​കൊ​ള്ളു​മെ​ന്നാ​യി​രു​ന്നു മു​ഖ്യ​മ​ന്ത്രി​യു​ടെ നി​ല​പാ​ട്. ഒ​ടു​വി​ൽ കേ​ന്ദ്ര​സേ​ന ഇ​റ​ങ്ങി​യി​ട്ടും ക​ലാ​പം അ​മ​ർ​ച്ച​ചെ​യ്യാ​നാ​വാ​ത്ത നി​ല​യായി. മാ​ത്ര​മ​ല്ല,സ​ർ​ക്കാ​റി​ൽ വി​ശ്വാ​സം ന​ഷ്ട​പ്പെ​ട്ട കു​ക്കി​ക​ൾ ഇ​പ്പോ​ൾ ത​ങ്ങ​ൾ​ക്കു പ​രി​മി​ത സ്വ​യം​ഭ​ര​ണാ​വ​കാ​ശ​മു​ള്ള ഹി​ൽ ഏ​രി​യ​ക്കു​വേ​ണ്ടി പ്ര​ക്ഷോ​ഭ​മു​ഖം മാ​റ്റി​യി​രി​ക്കു​ന്നു. ബി.​ജെ.​പി​യോ​ടൊ​പ്പ​മു​ള്ള​വ​ര​ട​ക്കം പ​ത്തോ​ളം എം.​എ​ൽ.​എ​മാ​രാ​ണ്​ ഇ​പ്പോ​ൾ ഈ ​ആ​വ​ശ്യം ഉ​ന്ന​യി​ച്ചി​രി​ക്കു​ന്ന​ത്. സ​മ​യ​ത്തി​ന്​ പ​രി​ഹാ​രം ക​ണ്ടി​രു​ന്നെ​ങ്കി​ൽ അ​മ​ർ​ച്ചചെ​യ്യാ​നാ​വു​മാ​യി​രു​ന്ന വി​ഷ​യ​ത്തെ കൂ​ടു​ത​ൽ വ​ഷ​ളാ​യ നി​ല​യി​ലേ​ക്ക്​ ത​ള്ളി​വി​ട്ടി​രി​ക്കു​ക​യാ​ണ്​ ബി.​ജെ.​പി സ​ർ​ക്കാ​ർ. ഇ​തു​വ​രെ നി​ശ്ശ​ബ്​​ദ​മാ​യി​രു​ന്ന ശേ​ഷം ഇ​പ്പോ​ൾ ഇ​ള​കാ​ൻ തീ​രു​മാ​നി​ച്ച കേ​ന്ദ്ര​ത്തി​ൽനി​ന്ന് ആ​ഭ്യ​ന്ത​ര​മ​ന്ത്രി എ​ത്തി​യ​തു​കൊ​ണ്ടുമാ​ത്രം നി​ല​വി​ലെ തീ​ക്ക​ളി ശ​മി​പ്പി​ക്കാ​നോ പു​തി​യ പു​ക ഉ​യ​രുന്നത് തടയാനോ ക​ഴി​യി​ല്ല എ​ന്നു സം​ഘ​ർ​ഷ​ത്തി​ൽ ക​ക്ഷി​ക​ളാ​യ ഇ​രു​വി​ഭാ​ഗ​വും പ​റ​യു​ന്നു​ണ്ട്. പ്ര​തി​സ​ന്ധി​ക്ക്​ അ​ന്ത​ർ​ധാ​ര​യാ​യി വ​ർ​ത്തി​ക്കു​ന്ന പ്ര​ശ്ന​ങ്ങ​ളു​ടെ പ​രി​ഹാ​ര​മാ​ണ്​ അവരുടെ ആ​വ​ശ്യം. അ​തു സം​സ്ഥാ​ന​ത്തെ​യും കേ​ന്ദ്ര​ത്തി​ലെ​യും ബി.​ജെ.​പി ഭ​ര​ണ​കൂ​ട​ങ്ങ​ൾ അം​ഗീ​ക​രി​ക്കു​ന്നു​ണ്ടോ എ​ന്ന​തി​നെ ആ​ശ്ര​യി​ച്ചി​രി​ക്കു​ന്നു മ​ണി​പ്പൂ​രി​ലെ ചോ​ര​ക്ക​ളി​യു​ടെ തീ​ർ​പ്പ്.