അമേരിക്കയിലെ തീച്ചുഴലി

അമേരിക്കയിലെ ദക്ഷിണ കാലിഫോർണിയയിൽ ലോസ്​ ആഞ്ജലസ്​ കൗണ്ടിയുടെ പടിഞ്ഞാറൻ പ്രാന്തത്തിലെ പസിഫിക്​ പാലിസേഡ്​സ്​, ഈറ്റൺ പ്രദേശങ്ങളിലായി സാന്‍റാമോണിക്ക മലനിരകളിൽ ജനുവരി ഏഴിന്​ ചൊവ്വാഴ്ച പൊട്ടിപ്പുറപ്പെട്ട കാട്ടുതീ ഭീകരമായ തീച്ചുഴലിയായി കൂടുതൽ ഇടങ്ങളിലേക്ക്​ പടരുകയാണ്​. തിങ്കളാഴ്ച രാവിലെവരെയുള്ള കണക്കനുസരിച്ച്​ 23,713 ഏക്കറുകളിലേക്ക്​ വ്യാപിച്ച തീ പസിഫിക്​​ പാലിസേഡ്​സ്​, മാലിബു പ്രദേശങ്ങളെ നിലംപരിശാക്കി. 24 പേർ വെന്തുമരിച്ചു, 15,000 കെട്ടിടങ്ങൾ നാമാവശേഷമായി. ഒന്നരലക്ഷത്തോളം പേർ ഭവനരഹിതരായി. തീയണക്കാൻ അഗ്​നിശമനസേന അശ്രാന്തപരിശ്രമം നടത്തു​ന്നുണ്ടെങ്കിലും വ്യാഴാഴ്ചക്ക് മുമ്പായി കത്തിച്ചാമ്പലായ പ്രദേശങ്ങളിൽ പുനരധിവാസയജ്ഞം തുടങ്ങാനാവില്ലെന്നാണ്​ അധികൃതർ പറയുന്നത്​. ഇനിയും കെട്ടടക്കാനാവാത്ത തീ അമേരിക്കയുടെ ചരിത്രത്തിലെ ഏറ്റവും വലിയ ദുരന്തബാധയായി മാറുകയാണ്​. ഇതുവരെ 150 ബില്യൺ ​ഡോളറിന്‍റെ നഷ്ടമുണ്ടായി എന്നാണ്​ കണക്ക്​. ഈയാഴ്ച അതിശക്തമായ കാറ്റ്​ ഉണ്ടാകുമെന്ന മുന്നറിയിപ്പ്​ അമേരിക്കയെ കൂടുതൽ വിറപ്പിക്കുന്നുണ്ട്​. ഏറ്റവുമൊടുവിൽ വൈസ്​ പ്രസിഡന്‍റ്​ കമല ഹാരിസിന്‍റെ വസതിവരെ കാട്ടുതീ ഭീഷണിയിലാണ്​. മലകളും കടൽത്തീരവും ഒരുമിച്ചു ചേരുന്ന സുഖവാസകേന്ദ്രമായ ഇവിടെ ഭൂരിഭാഗവും ഹോളിവുഡിലെ പ്രമുഖ താരങ്ങളടക്കം അമേരിക്കയിലെ അതിപ്രശസ്തരും അതിസമ്പന്നരുമാണ്​ കഴിഞ്ഞുവരുന്നത്​. കഴിഞ്ഞവർഷം സ്വകാര്യ ഏജൻസി പുറത്തുവിട്ട കണക്കു പ്രകാരം​​ ലോസ്​ ആഞ്ജലസിൽ 2,12,100 കോടീശ്വരന്മാരും 43 ശതകോടീശ്വരന്മാരുമുണ്ട്​. നേർവിപരീതത്തിൽ രാജ്യത്തെ ഏറ്റവുമധികം ഭവനരഹിതർ (75,000 ​പേർ) ഉള്ളതും അവിടെതന്നെ. മധ്യവർഗക്കാരും തൊഴിലാളികളുമായവർ ഇതിനിടയിലും. വൻശക്തികളുടെ യുദ്ധത്തീ ​പോലെയല്ല, പ്രകൃതിദുരന്തമായ തീക്കാറ്റ്​. അതിന്​ അധീശ-അടിയാള ഭേദമില്ല.

കഴിഞ്ഞ ചൊവ്വാഴ്ച പ്രാദേശികസമയം രാവിലെ 10.30നാണ്​ കാട്ടുതീ വിവരം പുറത്തുവരുന്നത്​. അപ്പോഴേക്കും സാന്‍റാ മോണിക്ക പർവതനിരകളിലെ സാന്‍റാ അന കാറ്റ്​ തീവ്രത പ്രാപിച്ച്​ തീ ആളിപ്പടർന്നു. അഗ്​നിബാധയുടെ തുടക്കം എവിടെ, എങ്ങനെ എന്നതുമായി ബന്ധപ്പെട്ട്​ പ്രചാരണങ്ങൾ പലതും നടക്കുന്നുണ്ടെങ്കിലും ശരിയായ നിഗമനത്തിന്​ അ​ന്വേഷണ ഉദ്യോഗസ്ഥർക്ക്​ കഴിഞ്ഞിട്ടില്ല. കാലിഫോർണിയയിൽ ഒരു തീക്കാലമാണ്​ രൂപപ്പെട്ടിരിക്കുന്നതെന്നും അത്​ എവിടെ എങ്ങനെ കലാശിക്കുമെന്ന്​ പറയാനാവില്ലെന്നും ഗവർണർ പറയുന്നു. പുകഞ്ഞു തുടങ്ങിയ വിവരം കിട്ടിയിട്ടും തീയണക്കാനുള്ള ശ്രമമുണ്ടായില്ലെന്നും ലോകത്തെവിടെയും ചുട്ടുകരിക്കാൻ ചാടിയിറങ്ങുന്ന അ​മേരിക്കക്ക്​ സ്വന്തം ജനതയുടെ സുരക്ഷക്ക്​ ഒന്നും ചെയ്യാനാവുന്നില്ലെന്നും പരാതി വ്യാപകമായി ഉയരുന്നുണ്ട്​. വർഷംതോറും ആവർത്തിക്കപ്പെടുന്ന കാട്ടുതീയിൽനിന്ന് രക്ഷനേടാനുള്ള ഭരണപരമായ നടപടികൾ സ്വീകരിക്കാൻ അമേരിക്കക്ക്​ കഴിഞ്ഞിട്ടില്ല. ഒപ്പം കാലാവസ്ഥ വ്യതിയാനമെന്ന ഗുരുതര ​പ്രതിസന്ധിയെ മറികടക്കാനുള്ള ശ്രമത്തിന് പലപ്പോഴും അള്ളുവെക്കാൻ മുതിരുന്നുവെന്ന പേരുദോഷവും അമേരിക്കക്കുണ്ട്​. യു.എസ്​ ഫോറസ്റ്റ്​ സർവിസ്​ ഇക്കോളജിസ്​റ്റ്​​ ആയ ഗാവിൻ ജോൺസ്​ 2023ൽ അഗ്​നിബാധയുടെ വരുംകാല വർധന ​പ്രവചിച്ചിട്ടുണ്ട്​. ആഗോളതാപനം നിമിത്തം വരണ്ട പ്ര​ദേശങ്ങളിലുണ്ടാകുന്ന വർധനയും ഊഷരകാലത്തിനുണ്ടാകുന്ന ദൈർഘ്യവും എവി​ടെയും എപ്പോഴും ദുരന്തം ക്ഷണിച്ചുവരുത്താമെന്നതാണ്​ നില. ഈ വിഷയത്തിൽ യു.എസ്​ ​പരിസ്ഥിതി സംരക്ഷണ ഏജൻസിയും (ഇ.പി.എ) കൃത്യമായ മുന്നറിയിപ്പ്​ നൽകിയിരുന്നു. എന്നാൽ, ഇതു മുൻകൂട്ടി കണ്ടുള്ള ​പ്രതിരോധങ്ങൾക്ക്​ ഭരണകൂടം ഇനിയും തുനിഞ്ഞിറങ്ങിയിട്ടില്ല.

തീപിടിത്തങ്ങളെക്കുറിച്ച്​ ആധികാരിക പഠനങ്ങൾ നടത്തിയ അമേരിക്കൻ വിദഗ്​ധൻ സ്റ്റീഫൻ പൈൻ പറയുന്നത്​ കാലിഫോർണിയയിലെ ദുരന്തം മനുഷ്യനിർമിതമാണെന്നാണ്​. കാലാവസ്ഥ വ്യതിയാനത്തിന്‍റെ ഗുരുതര പ്രശ്നങ്ങൾ കണ്ടറിയാനും രക്ഷ​നേടാനുമുള്ള ശ്രമം ബോധപൂർവം നടത്തിയില്ലെങ്കിൽ ലോസ്​ ആഞ്ജലസിന്‍റെ അനുഭവം കൂടുതൽ വ്യാപിക്കുമെന്നതിൽ സംശയമില്ല. മഴക്കമ്മി ​നേരിടുന്ന കാലിഫോർണിയയുടെ 39.1 ഭാഗം മാത്രമേ കഴിഞ്ഞ വർഷം മഴ കിട്ടിയിരുന്നുള്ളൂ. അവശിഷ്​ടപ്ര​ദേശങ്ങൾ അസാധാരണമാം വിധം വരണ്ടതാണ്​. അതിവരൾച്ച വനമേഖലയിലെ സസ്യസമ്പത്തിനെ പ്രതികൂലമായി ബാധിക്കും. വരണ്ടുണങ്ങിയ കാടും പുൽമേടുകളും ചെറിയൊരു തീപ്പൊരി വീണാൽ കത്തിപ്പടരുകയായി. താഴ്ന്നുകിടക്കുന്ന വൈദ്യുതി കേബിളുകളും മരനിർമിത ടെലഫോൺ പോസ്റ്റുകളും തീപിടിത്ത, പടർച്ച സാധ്യതകൾ വർധിപ്പിക്കുന്നുവെന്നും പഠനങ്ങൾ പറയുന്നു. ഇത്തരം വീഴ്ചകൾ തടയാൻപോലും ഭരണകൂടത്തിന്​ ജാഗ്രതയില്ല. ​കാലാവസ്ഥ വ്യതിയാനംപോലെ കൃത്യമായ നയനിലപാടുകൾ സ്വീകരിച്ച്​ ദീർഘദൂര പ്രതി​രോധത്തിന് മുതിരേണ്ട വിഷയങ്ങളിൽ അവർക്ക് താൽപര്യവുമില്ല. അങ്ങ​നെ, കാലാവസ്ഥ വ്യതിയാനവും പിഴച്ച നഗരാസൂത്രണവും താളംതെറ്റിയ പ്രതിസന്ധി/ദുരന്ത മാനേജ്​മെന്‍റും എല്ലാം ​ചേർന്ന്​ കാലിഫോർണിയയി​ലെപോലെ പൊട്ടിത്തെറിക്കു​​മ്പോൾ നിസ്സഹായരായി നിൽക്കാനേ അധികാരികളടക്കമുള്ള മനുഷ്യർക്ക് കഴിയുന്നുള്ളൂ. മനുഷ്യരുടെ സ്വയംകൃതാനർഥങ്ങൾക്ക് നൽകുന്ന പിഴയാണ്​ ഇത്തരം പ്രകൃതിദുരന്തങ്ങൾ എന്ന കാര്യത്തിൽ സംശയമില്ല. ഇപ്പോൾ ഫലസ്തീനിലും പശ്ചിമേഷ്യയുടെ വിവിധ ഭാഗങ്ങളിലും യുക്രെയിനിലുമൊക്കെ യുദ്ധത്തീ പടർത്തുകയും, തലമുറക​ളോളം ജനതതികളെ ​കെടുതിക്കിരയാക്കുന്ന കാലാവസ്ഥ വ്യതിയാനം പോലുള്ള മാനുഷികതക്കെതിരായ അതിക്രമത്തിന്​ വഴിമരുന്നിടുകയും ചെയ്യുന്ന വൻശക്തികളെ തിരിഞ്ഞുകൊത്തുന്ന ഇത്തരം ദുരന്തങ്ങൾ അവരുടെ അധികാരധാർഷ്ട്യത്തിനും അക്രമവീര്യത്തിനും തടയിടാൻ നിമിത്തമാകു​മെങ്കിൽ അത്​ അവർക്കും ലോകത്തിനും ഒരു​പോലെ രക്ഷയാകും, സംശയമില്ല.