ഗവർണറോ സംസ്ഥാന സർക്കാറോ?

സംസ്ഥാന മന്ത്രിസഭയുടെ തീരുമാനം അംഗീകരിക്കാൻ ഗവർണർ ഭരണഘടനപരമായി ബാധ്യസ്ഥനാണെന്ന മദ്രാസ്​ ഹൈകോടതി വിധി, ഗവർണർമാരും സംസ്ഥാനഭരണകൂടങ്ങളും തമ്മിലുള്ള മൂപ്പിളമത്തർക്കത്തിൽ വ്യക്തവും കൃത്യവുമായ തീർപ്പാണ്​. ശിക്ഷ വിധിക്കാനും ഇളവും മാപ്പും നൽകാനും ഗവർണർക്ക്​ അധികാരം നൽകുന്ന ഇന്ത്യൻ ഭരണഘടനയുടെ 161ാം വകുപ്പ്​ പ്രയോഗിക്കുമ്പോൾ സംസ്ഥാന മന്ത്രിസഭയുടെ തീരുമാനം അംഗീകരിക്കുകയാണ്​ ഗവർണർ ചെയ്യേണ്ടതെന്നും ഇക്കാര്യം അനവധി വിധികളിലൂടെ സുപ്രീംകോടതി പ്രസ്താവിച്ചതാ​ണെന്നും ജസ്റ്റിസുമാരായ എസ്​.എം. സുബ്രമണ്യം, വി. ശിവജ്ഞാനം എന്നിവരുടെ രണ്ടംഗ ബെഞ്ച്​ ഒക്ടോബർ 17ന്​​ വിധി പറഞ്ഞു. ഭരണഘടനയുടെ 161ാം വകുപ്പ്​ ഗവർണർ സ്വന്തം നിലക്കല്ല, സംസ്ഥാന ഭരണകൂടങ്ങളുടെ ഹിതമനുസരിച്ചാണ് പ്രയോഗിക്കേണ്ടത്​. ബന്ധപ്പെട്ട സർക്കാറുകളുടെ ഉപദേശം സംസ്ഥാനത്തിന്‍റെ തലവനായ ഗവർണർ മാനിക്കണം. ഈ വിഷയത്തിൽ വ്യക്തിഗതമായ ഓരോ കേസിനും വെവ്വേറെ വിധി അനിവാര്യമല്ല. തടവുശിക്ഷ നേരിടുന്നവർക്ക്​ കുറ്റമുക്തി നൽകാൻ 161ാം വകുപ്പ്​ നൽകുന്ന അധികാരം സംബന്ധിച്ച്​ കോടതികൾ നേരത്തേ തീർപ്പു കൽപിച്ചതാണ്​ എന്ന് ഹൈകോടതി ചൂണ്ടിക്കാട്ടി.

1999ൽ ഒരു 16കാരി​യെ ബലാത്സംഗം ചെയ്തു കൊന്ന കേസിൽ ജീവപര്യന്തം തടവിനു ശിക്ഷിക്കപ്പെട്ട പി. വീര ഭാരതി എന്നയാളെ 20 വർഷത്തെ തടവിനു ശേഷം വിട്ടയക്കാനുള്ള തമിഴ്​നാട്​ സർക്കാറിന്‍റെ തീരുമാനം ഗവർണർ ആർ.എൻ. രവി റദ്ദാക്കിയതിനെതിരെ സമർപ്പിച്ച ഹരജിയിലാണ്​ കോടതി വിധി പറഞ്ഞത്​. കേസിലെ മറ്റു രണ്ടു പ്രതികൾക്കൊപ്പം 1999ൽ വീരഭാരതിക്കും വധശിക്ഷ വിധിച്ചിരുന്നു. അതിനെതിരെ പ്രതികളുടെ അപ്പീൽ കേട്ട ഹൈകോടതി ശിക്ഷ ജീവപര്യന്തമായി ഇളവ്​ ചെയ്തു. പ്രതികളിലൊരാളായ ഇളങ്കോ എന്ന പി. മുരുകനെ 2024 മാർച്ച്​ ആറിന്​ വിട്ടയച്ചിരുന്നു. പതിനാലോ അതിലധി​കമോ​ കൊല്ലക്കാലം ശിക്ഷയനുഭവിച്ച ജീവപര്യന്ത തടവുകാർക്ക്​ നിശ്ചിത മാനദണ്ഡങ്ങൾ പൂർത്തീകരിച്ചവരാണെങ്കിൽ കാലാവധി പൂർത്തിയാകുന്നതിനു മുമ്പേ മോചനം നൽകാമെന്ന്​ 2023 ആഗസ്റ്റിൽ എം.കെ. സ്റ്റാലിന്‍റെ നേതൃത്വത്തിലുള്ള ഡി.എം.കെ സർക്കാർ തീരുമാനിച്ചിരുന്നു. അനുയോജ്യരെ കണ്ടെത്താൻ ഗവൺമെന്‍റ്​ സമിതി രൂപവത്​കരിച്ചു. അവരുടെ ശിപാർശ പ്രകാരമാണ്​ മേൽ കേസിൽ മുരുകൻ ​മോചനം നേടിയത്​. അതോടെ, ഇതേ വിധി തനിക്കും ബാധകമാക്കണമെന്ന്​ ആവശ്യപ്പെട്ട്​​ വീരഭാരതി സർക്കാറിന്​ അപേക്ഷ നൽകി. സംസ്ഥാന സർക്കാർ അനുമതി ​നൽകിയെങ്കിലും ഗവർണർ നിഷേധിക്കുകയായിരുന്നു. പ്രായപൂർത്തിയാകാത്ത പെൺകുട്ടിയെ ബലാത്സംഗം ചെയ്തു കൊന്ന പ്രതി ഒരു പരിഗണനയുമർഹിക്കുന്നില്ലെന്നായിരുന്നു ഗവർണറുടെ നിരീക്ഷണം. തുടർന്നാണ്​ വീരമുത്തു ഹൈകോടതിയെ സമീപിച്ചത്​.

ഇതാദ്യമായല്ല, ഗവർണറുടെ ഭരണഘടനപരമായ അധികാരാവകാശവും ചുമതലകളും സംബന്ധിച്ച്​ നീതിപീഠം തമിഴ്​നാട്​ ഗവർണറെ ‘പഠിപ്പിക്കുന്നത്​’. കഴിഞ്ഞ മാർച്ചിൽ സംസ്ഥാന മന്ത്രിസഭയിൽ ഒരംഗത്തെ ഉൾപ്പെടുത്താനുള്ള മുഖ്യമന്ത്രിയുടെ ശിപാർശ തിരസ്കരിച്ച രവിയെ സുപ്രീംകോടതി രൂക്ഷമായി വിമർശിച്ചിരുന്നു. ഭരണഘടനക്ക്​ അതീതമായ അധികാരപ്രയോഗമാണ്​ ഗവർണർ നടത്തുന്നതെന്ന്​ കുറ്റപ്പെടുത്തിയ പ​രമോന്നത നീതിപീഠം ഒറ്റനാൾകൊണ്ട്​ മുൻ മന്ത്രി പൊൻമുടിയെ തിരികെ മന്ത്രിസഭയി​ലെടുത്ത്​ സത്യപ്രതിജ്ഞ ചെയ്തുകൊടുക്കണമെന്ന്​ ഉത്തരവിടുകയായിരുന്നു. ഇപ്പോഴെന്നപോലെ അന്നും കേസിന്‍റെ മെറിറ്റിലേക്ക്​ കടന്ന ഗവർണർ അഴിമതിയാരോപണത്തിൽ കളങ്കിതനായയാളെ മന്ത്രിസഭയിൽ തിരിച്ചെടുക്കുന്നത്​ ഭരണഘടന ധാർമികതക്ക്​ വിരുദ്ധമാണ്​ എന്നായിരുന്നു വാദിച്ചത്. മന്ത്രിക്കു​ മേൽ അഴിമതിക്കുറ്റം കണ്ടെത്തിയ മദ്രാസ്​ ഹൈകോടതിയുടെ വിധി സുപ്രീംകോടതി സ്റ്റേ ചെയ്ത ശേഷമാണ്​ മുഖ്യമന്ത്രി അദ്ദേഹത്തിന്‍റെ മന്ത്രിസഭ പുനഃപ്രവേശനത്തിന്​ ശിപാർശ ചെയ്തത്​. എന്നിരിക്കെ, ഒരേസമയം സർക്കാറിനെയും സുപ്രീംകോടതിയെയും മറികടന്നുള്ള അമിതാധികാര പ്രയോഗമാണ്​ ഗവർണർ രവി നടത്തിയത്​.

ഗവർണർമാരുടെ അധികാരപ്രയോഗം വിവിധ സംസ്ഥാനങ്ങളിൽ രാഷ്ട്രീയ ഏറ്റുമുട്ടലുകൾക്കും ഭരണസംവിധാനത്തിന്‍റെ താളപ്പിഴകൾക്കും ഇടയാക്കുന്ന പതിവ്​ നരേ​ന്ദ്ര മോദിയുടെ ബി.ജെ.പി ഭരണത്തിൽ പതിവായി മാറിയിരിക്കുന്നു. ഗവർണർമാർ എന്നും കേന്ദ്രത്തിന്‍റെ ഹിതാനുസാരികളായിരിക്കുമെന്നും കേന്ദ്രം ഭരിക്കുന്ന കക്ഷിയുടെ അഭീഷ്ടങ്ങൾ നിർവഹിക്കുകയാണ്​ അവരുടെ ചുമതലയെന്നും പണ്ടത്തെ കോൺഗ്രസ്​ ഭരണം തൊട്ടേ ഉള്ള കീഴ്വഴക്കമാണ്​. നരേന്ദ്ര മോദി സർക്കാർ അതിൽ എല്ലാ കീഴ്വഴക്ക​ങ്ങളെയും കടത്തിവെട്ടിയിട്ടുമുണ്ട്​. ഒരു മന്ത്രിസഭയെ മറിച്ചിട്ട്​ വെളുപ്പാൻ കാലത്ത് മറ്റൊന്നിനെ സത്യപ്രതിജ്ഞ ചെയ്ത്​ അധികാരമേറ്റിയതടക്കമുള്ള വിടുവിദ്യകൾ കാണിച്ച മുൻ മഹാരാഷ്ട്ര ഗവർണർ ഭഗത്​ സിങ്​ കോശിയാരി മുതൽ മുഖ്യമന്ത്രിയെയും മന്ത്രിമാരെയും മന്ത്രിസഭയെയും നിരന്തരം ‘വടിയെടുത്ത്​’ ഭരണഘടന മര്യാദ പഠിപ്പിക്കാനിറങ്ങുന്ന പശ്ചിമ ബംഗാളിലെയും കേരളത്തി​ലെയും ഗവർണർമാർ വരെയുള്ളവർ ഭരണരംഗത്ത്​ സൃഷ്ടിക്കുന്ന അസ്വാരസ്യങ്ങളും അസ്വാസ്ഥ്യങ്ങളും ഇപ്പോൾ പുതുമയല്ലാതായി മാറിയിട്ടുണ്ട്​. സംസ്ഥാന ഭരണവുമായി നിരന്തരം ഉരസിയും ഉടക്കിയും സ്ഥാനവലുപ്പവും മൂപ്പിളമയും തെളിയിക്കാൻ കുതൂഹലം കൂട്ടുന്ന മത്സരാർഥിയെയല്ല, ജനങ്ങൾ തെരഞ്ഞെടുത്ത ഭരണകൂടത്തിന് ക്രിയാത്മകമായ മാർഗദർശനവും സഹകരണവും നൽകുകയും ഭരണനേട്ടം ജനങ്ങൾക്കും സംസ്ഥാനത്തിനും പ്രാപ്തമാക്കാൻ കൂട്ടുത്തരവാദിത്ത​ത്തോടെ മുന്നോട്ടുനീങ്ങുകയും ചെയ്യുന്ന സംസ്ഥാന തലവനെയാണ്​ ഗവർണറിൽനിന്ന് നാട്​ പ്രതീക്ഷിക്കുന്നത്​. ഭരണഘടനപരമായ ആ ഉത്തരവാദിത്തമാണ് നീതിപീഠങ്ങൾ നിരന്തരം ഓർമിപ്പിച്ചുകൊണ്ടിരിക്കുന്നത്​.