എഴു​േന്നറ്റുനിൽക്കൂ വിനേഷ്​, തലയുയർത്തിപ്പിടിച്ചുതന്നെ

സമീപകാല കായിക ചരിത്രത്തിൽ ഇന്ത്യക്ക്​ ഏറ്റവും വലിയ നടുക്കവും നിരാശയും സമ്മാനിച്ച ഒളിമ്പിക്​സ്​ മഹാമേളയാണ്​ പാരിസിൽ നാളെ കൊടിയിറങ്ങുന്നത്​. അമിത നേട്ടങ്ങളൊന്നും പ്രതീക്ഷിച്ചിരുന്നില്ലെങ്കിലും ചില ചെറുസ്വപ്​നങ്ങൾ നമ്മളും കണ്ടിരുന്നു. ടോക്യോ ഒളിമ്പിക്​സിൽ സ്വർണം എറിഞ്ഞുവീഴ്​ത്തിയ ജാവലിൻ ലോക ചാമ്പ്യൻ നീരജ്​ ചോപ്ര ഇക്കുറിയും സ്വർണവുമായി വരുമെന്ന്​ മോഹിച്ചു, ദശകങ്ങൾ മുമ്പ്​ ആറ്​ ഒളിമ്പിക്​സുകളിൽ തുടർച്ചയായി സ്വർണം കൊണ്ടുവന്ന, ദേശീയ കായിക വിനോദമെന്നുപോലും തെറ്റിദ്ധരിക്കപ്പെടുന്ന ഹോക്കിയിൽ ഒരു മെഡലിനായി കൊതിച്ചു. 2008ലെ ബെയ്ജിങ്​ ഒളിമ്പിക്​സിൽ അഭിനവ്​ ബിന്ദ്ര സൃഷ്​ടിച്ചതു പോലുള്ള അപ്രതീക്ഷിത അത്ഭുതങ്ങളിലും പ്രതീക്ഷ വെച്ചു. യുവ ഷൂട്ടിങ്​ താരം മനു ഭാകർ നേടിത്തന്ന വെങ്കലത്തിലൂടെ നമ്മൾ മെഡൽ പട്ടികയിൽ സ്ഥാനം പിടിച്ചു, മനുവും സറബ്​ ജോത്​ സിങ്ങും ചേർന്ന ടീമും സ്വപ്​നിൽ കുസാലെയും ഷൂട്ടിങ്ങിലെ വെങ്കലമെഡലുകളുടെ എണ്ണം പെരുപ്പിച്ചു. ഹർമൻപ്രീത്​ സിങ്​ നയിച്ച മലയാളി താരം പി.ആർ. ശ്രീജേഷ്​ ഉൾക്കൊള്ളുന്ന ഇന്ത്യൻ പുരുഷ ഹോക്കി ടീം ഇക്കുറിയും വെങ്കലം നേടി. സ്വർണം നിലനിർത്താനായില്ലെങ്കിലും നീരജ്​ നിരാശപ്പെടുത്തിയില്ല. എന്നാൽ, വനിതാ ഗുസ്​തിയിൽ നിലവിലെ ലോകചാമ്പ്യനെ തറപറ്റിച്ച്​ ഫൈനലിൽ പ്രവേശിച്ച്​ മെഡൽ നേട്ടത്തി​ന്റെ വാതിൽക്കൽ നിൽക്കെ, വിനേഷ്​ ഫോഗട്ടിന്​ മത്സരത്തിൽ നിന്ന്​ അയോഗ്യത കൽപിക്കപ്പെട്ടത്​ ഇന്ത്യയെയൊന്നാകെ ഉലച്ചുകളഞ്ഞു.

വർഷങ്ങൾ നീണ്ട കഠിനാധ്വാനത്തിനും പരിശ്രമങ്ങൾക്കും പരിശീലനത്തിനുമൊടുവിലാണ്​ ഓരോ കായികതാരവും ഉരുവപ്പെടുന്നത്​. മെഡൽ നേട്ടത്തിലും സമ്പത്തിലും ആദ്യസ്ഥാനങ്ങളിൽ നിൽക്കുന്നവ മാത്രമല്ല, വികസ്വര രാജ്യങ്ങൾ പോലും അവരുടെ അഭിമാനതാരങ്ങളെ ദേശത്തി​ന്റെ സ്വത്തായാണ്​ പരിപാലിച്ചുപോരുന്നത്​. പരിശീലനം ഒരുക്കുന്നതിലും മാനസിക-ശാരീരിക ആരോഗ്യ പരിരക്ഷ ഉറപ്പാക്കുന്നതിലും ഒരു തരത്തിലുള്ള വീഴ്​ചയും അവർ അനുവദിക്കാറുമില്ല. എന്നാൽ, എന്താണ്​ ഇന്ത്യൻ കായികമേഖലയുടെ അവസ്ഥ? അഴിമതിയും രാഷ്ട്രീയാതിപ്രസരവും സ്വജനപക്ഷപാതവുമില്ലാത്ത ഫെഡറേഷൻ ഏത്​ കായിക ഇനത്തിനാണുള്ളത്​? കായിക മേഖലയുടെ പ്രോത്സാഹനത്തിനായി സംസ്ഥാനങ്ങൾക്ക്​ തുക അനുവദിക്കുന്നതിലും കടുത്ത സങ്കുചിത താൽപര്യം നിലനിൽക്കുന്നു. വിവിധ രാജ്യാന്തര കായികമേളകളിൽ രാജ്യത്തിനായി ഒ​​ട്ടേറെ മെഡലുകൾ നേടിത്തന്ന ഹരിയാന, പഞ്ചാബ്​, മഹാരാഷ്ട്ര എന്നീ സംസ്ഥാനങ്ങൾക്ക്​ അനുവദിച്ചതി​​​ന്റെ എത്രയോ ഇരട്ടി കോടികളാണ്​ കാര്യമായ കായിക നേട്ടങ്ങളൊന്നും സംഭാവന ചെയ്​തിട്ടില്ലാത്ത ഗുജറാത്തിലേക്ക്​ ​കേന്ദ്രസർക്കാർ ഒഴുക്കിവിട്ടത്​, അതിനു പിന്നിലെ താൽപര്യ​മെന്തെന്ന്​​ വിശദീകരിക്കേണ്ടതില്ലല്ലോ.

മത്സരത്തിന്​ മുമ്പുള്ള ഭാരപരിശോധനയിൽ ശരീരഭാരം നൂറുഗ്രാം കൂടുതലായി കണ്ടെത്തിയതിനെത്തുടർന്നാണ്​ സ്വർണമോ വെള്ളിയോ ഉറപ്പായിരുന്ന മത്സരത്തിൽ നിന്ന്​ വിനേഷ്​ വിലക്കപ്പെട്ടത്​. സംഭവത്തിനു​ പിന്നിൽ ഗൂഢാലോചനയുണ്ടോ എന്ന്​ വ്യക്തമല്ല. എന്നാൽ, അട്ടിമറിയുണ്ടെന്നാണ്​ ഒളിമ്പിക്​സ് ​മെഡൽ ജേതാവായ ബോക്​സിങ്​ താരം വിജേന്ദർ സിങ്​ ആരോപിക്കുന്നത്​. മറ്റേതു രാജ്യത്തായിരുന്നുവെങ്കിലും മന്ത്രിമാരുൾപ്പെടെ കായിക ​മേഖലയിലെ ഉന്നതർ ഉത്തരം പറയേണ്ടിവരുമായിരുന്ന കുറ്റകരമായ അനാസ്ഥയാണ്​ ഇതിനു വഴിവെച്ചത്​. എന്നാൽ, ഗുരുതര ലൈംഗിക പീഡനാരോപണം ​നേരിട്ട ഗുസ്​തി ഫെഡറേഷൻ മേധാവിയെ ഉത്തരവാദപ്പെട്ട സ്ഥാനങ്ങളിലിരിക്കുന്നവർ സംരക്ഷിച്ചു നിർത്തിയ ട്രാക്​ റെക്കോഡുള്ള രാജ്യത്തെ അധികാരികൾക്കാർക്കും വിനേഷി​ന്റെ മെഡൽ നഷ്​ടം അലോസരമുണ്ടാക്കില്ല. ഒളിമ്പിക്​സ്​ ഒരുക്കങ്ങളുടെ ഭാഗമായി നിർണായക പരിശീലനം നടത്തേണ്ട വേളയിൽപ്പോലും പീഡകനെതിരെ നീതിതേടി തെരുവിൽ പൊരുതുകയായിരുന്നു അവർ. പുതിയ പാർലമെൻറ്​ മന്ദിരത്തി​​ന്റെ ഉദ്​ഘാടനം നടക്കുമ്പോൾ ഏതാനും വാര അകലെ വിനേഷ്​ ഉൾപ്പെടെ രാജ്യത്തിനു​വേണ്ടി അന്താരാഷ്​ട്ര മത്സരങ്ങളിൽ മെഡലുകൾ നേടിയ താരങ്ങളെ പൊലീസ്​ വലിച്ചിഴച്ച ദൃശ്യം മറക്കാറായിട്ടില്ലല്ലോ. താരങ്ങളുടെ ശാരീരിക-മാനസികാരോഗ്യം മാത്രമല്ല, അന്തസ്സോടെ ജീവിക്കാനുള്ള അടിസ്ഥാന മനുഷ്യാവകാശങ്ങൾ പോലും വകവെച്ചുകൊടുക്കാത്ത കായിക സംസ്​കാരം ലോകത്ത്​ മറ്റെവിടെയാണുണ്ടാവുക?

വിനേഷ്​ പുറത്തായി എന്നറിഞ്ഞപ്പോൾ സന്തോഷിക്കുകയും സമൂഹമാധ്യമങ്ങളിൽ അത്​ പ്രകടിപ്പിക്കുകയും ചെയ്​തത്​ ആരൊക്കെയാണെന്ന്​ നാം കണ്ടു. പാക്​ ക്രിക്കറ്റ്​ ടീമി​ന്റെ വിജയത്തിൽ ആഹ്ലാദം പ്രകടിപ്പിച്ചെന്നാരോപിച്ച്​ വിദ്യാർഥികൾക്കെതിരെ രാജ്യദ്രോഹക്കുറ്റം ചുമത്തുന്ന, തല്ലിച്ചതക്കുന്ന കാലത്താണ്​ ഇത്​ നടക്കുന്നത്​ എന്നുകൂടിയോർക്കണം.

വിനേഷ്​ ഫോഗട്ട്​ ഗോദയിൽ നിറഞ്ഞുനിൽക്കുന്ന ഓരോ നിമിഷവും മത്സരത്തിലെ എതിരാളിയെക്കാളേറെ നെഞ്ചിടിച്ച ഒരുപാടു പേർ സ്വന്തം രാജ്യത്തുതന്നെയുണ്ടായിരുന്നുവെന്ന തിരിച്ചറിവ്​ കൂടി സമ്മാനിച്ചു പാരിസ്​ ഒളിമ്പിക്​സിലെ നിർഭാഗ്യ സംഭവവികാസങ്ങൾ. സഹതാരങ്ങളുടെ എന്നല്ല, രാജ്യത്തെ സ്​ത്രീകളുടെ തന്നെ അവകാശവും അഭിമാനവും​ സംരക്ഷിക്കാൻ പൊരുതിയതിനാലാണ്​ സ്വാധീനവും ശക്തിയുമുള്ള ഒരു സംഘം ശത്രുക്കളെ വിനേഷ്​ സമ്പാദിച്ചുകൂട്ടിയത്​. വായടച്ചുപിടിക്കാനും അധികാരപ്രലോഭനങ്ങൾക്ക്​ വഴങ്ങാനും സമ്മതിച്ചിരുന്നുവെങ്കിൽ ഇന്നീക്കാണുന്ന അനർഥങ്ങളും സൈബർ ആക്രമണങ്ങളുമൊന്നും അവർക്ക്​ നേരിടേണ്ടിവരില്ലായിരുന്നു. കായിക താരമെന്നാൽ മെഡലും പ്രശസ്​തിയും പദവിയും വാരിക്കൂട്ടാൻ പടക്കപ്പെട്ട യന്ത്രമല്ല, അന്തസ്സുറ്റ ഹൃദയമുള്ള മനുഷ്യരാണ്​ എന്ന്​ ജീവിതപ്പോരാട്ടത്താൽ ബോധ്യപ്പെടുത്താനാണ്​ വിനേഷ്​ ഒരുമ്പെട്ടത്​. അതിൽ വിജയം കണ്ടോ, അതോ രാജ്യം ​അവരെ തോൽപിച്ചുകളഞ്ഞോ എന്ന ചോദ്യത്തിന്​ ഉത്തരം വരാനിരിക്കുന്നതേയുള്ളൂ. എന്തു തന്നെയായാലും ഈ ഒളിമ്പിക്​സ്​ ഇന്ത്യയിൽ ഓർമിക്കപ്പെടുക വിനേഷ്​ ഫോഗട്ട്​ എന്ന പോരാളിയുടെ പേരിലായിരിക്കും.