മരുന്നുവില: സർക്കാർ ആരുടെ പക്ഷത്ത്​?

പെട്രോൾ, ഡീസൽ, പാചകവാതക വില വർധിപ്പിച്ച്​ ജനങ്ങളെ വലച്ച സർക്കാർ ഇപ്പോൾ നിത്യോപയോഗ മരുന്നുകളുടെ വില കൂടി പത്തു ശതമാനത്തിലേറെ വർധിപ്പിച്ച്​ ചികിത്സയും ദുരിതത്തിലാക്കിയിരിക്കുന്നു. അടുത്തമാസം ഒന്നു മുതൽ 800 അവശ്യമരുന്നുകളുടെ വിലയാണ്​ ഒറ്റയടിക്കു കൂട്ട​ുന്നത്​. അവശ്യമരുന്നുകളുടെ ദേശീയപട്ടിക (എൻ.എൽ.ഇ.എം)യിൽപെടുത്തി വില നിയന്ത്രണാധികാരം സർക്കാറിൽ നിക്ഷിപ്​തമാക്കിയ മരുന്നുകൾക്കാണ്​ ദേശീയ മരുന്നുവില നിർണയ അതോറിറ്റി (എൻ.പി.പി.എ) 10.76 ശതമാനത്തോളം വില കൂട്ടിയിരിക്കുന്നത്​. പാരാസെറ്റമോൾ, അസിത്രോമൈസിൻ പോലുള്ള ആന്‍റിബയോട്ടിക്കുകൾ, വേദനസംഹാരികൾ, അണുസംക്രമണവിരോധികൾ, ഹൃദ്രോഗ, ഇ.എൻ.ടി മരുന്നുകൾ, ആന്‍റിസെപ്​റ്റിക്കുകൾ തുടങ്ങി സർവസാധാരണമായി ഉപയോഗത്തിലുള്ള ഏതാണ്ടെല്ലാ മരുന്നുകളും ഈ പട്ടികയിൽ വരുന്നുണ്ട്​. കേന്ദ്ര വാണിജ്യ വ്യവസായ മന്ത്രാലയത്തിനു കീഴിലെ വ്യവസായ, ആഭ്യന്തരവ്യാപാര പ്രചാരണവകുപ്പിന്‍റെ സാമ്പത്തികകാര്യ ഉപദേഷ്ടാവിന്‍റെ ഓഫിസാണ്​ മൊത്തവില സൂചിക വിവരത്തിന്‍റെ അടിസ്ഥാനത്തിൽ അടുത്ത സാമ്പത്തികവർഷം മരുന്നുകളുടെ വില വർധിപ്പിക്കാൻ തീരുമാനിച്ചത്​. 2013ൽ ഭേദഗതി ചെയ്ത മരുന്നുവില നിയന്ത്രണ ഉത്തരവിന്‍റെ അടിസ്ഥാനത്തിൽ അവശ്യമരുന്നുകളുടെ പട്ടികയിൽപെടുത്തിയവയുടെ വില വർധിപ്പിക്കുന്നതിനുള്ള അധികാരം എൻ.പി.പി.എക്കാണ്​.

രാജ്യത്തെ മരുന്നുവിതരണകമ്പനികൾ സർക്കാർ തീരുമാനം സ്വാഗതം ചെയ്തത്​ സ്വാഭാവികം. വർധനയുടെ ശതമാനം പോരാ എന്നാണ്​ അവരുടെ പക്ഷം. കോവിഡിനെ തുടർന്ന്​ അസംസ്കൃതവസ്​തുക്കളുടെ വിലയും വിദേശത്തുനിന്നുള്ള കടത്തുകൂലിയും വളരെ കൂടിയതിനാൽ മരുന്നുവില വർധിപ്പിക്കാതെ തരമില്ലെന്ന്​ അവർ പറയുന്നു. അതേസമയം, ഭക്ഷണമെന്നപോലെ നിത്യേന ആശ്രയിക്കേണ്ടിവരുന്ന മരുന്നുകൾക്ക്​ ഇത്രയും ശതമാനം വില വർധിപ്പിക്കുന്നത്​ ജനങ്ങളെ എങ്ങനെ ബാധിക്കുമെന്ന അസ്വസ്ഥതയൊന്നും സർക്കാറിനില്ല. ജനങ്ങൾക്ക്​ ന്യായമായ നിരക്കിൽ അവശ്യമരുന്നുകൾ ലഭ്യമാക്കാനും കുത്തക മരുന്നുകമ്പനികളുടെ കൊള്ളലാഭ ദ്രോഹത്തിൽനിന്ന്​ അവരെ രക്ഷ​പ്പെടുത്താനും 1997ൽ കേന്ദ്രസർക്കാർ രൂപംകൊടുത്ത വേദിയാണ്​ നാഷനൽ ഫാർമസ്യൂട്ടിക്കൽസ്​ പ്രൈസിങ്​ അതോറിറ്റി എന്ന എൻ.പി.പി.എ. മരുന്നുകമ്പനിക്കാർ അമിത നിരക്ക്​ ഈടാക്കുന്നതിനെതിരെ നടപടികൾ സ്വീകരിക്കുന്നത്​ ഈ വേദിയാണ്​. കഴിഞ്ഞവർഷം ഫെബ്രുവരിയിൽ പാർലമെന്‍റിൽ ബന്ധപ്പെട്ട വകുപ്പുമന്ത്രി വെളിപ്പെടുത്തിയതനുസരിച്ച്​ 1997ൽ ഈ വേദി രൂപം കൊണ്ടതു മുതൽ അതുവരെ മരുന്നുകമ്പനികൾ അമിതനിരക്ക്​ ഈടാക്കിവരുന്നതുമായി ബന്ധപ്പെട്ട 2116 കേസുകളെടുത്തു. അതിൽ 881 കേസുകളും എങ്ങു​മെത്താതെ കിടക്കുകയാണ്​. 8180 കോടി രൂപയാണ്​ ഇവർ അമിതനിരക്കായി ഈടാക്കിയത്​. കോടതികളിൽ നിയമവ്യവഹാരത്തിലിരിക്കുന്ന 324 കേസുകളാകട്ടെ, 6550 കോടി രൂപയുടേതാണ്​. കോവിഡ്​ രണ്ടാം തരംഗം ആരംഭിക്കുന്ന കഴിഞ്ഞ വർഷം ഏപ്രിലിൽ രോഗികളുടെ എണ്ണം കുതിച്ചുയർന്നതോടെ മരുന്നുകമ്പനികൾ അത്യാർത്തിയോടെ രംഗത്തുവന്നു. റെംഡെസിവിർ ഇൻജക്​ഷന്​ ചോദന വർധിച്ചതോടെ വില പതിന്മടങ്ങ്​ വർധിച്ചത്​ അന്നു വാർത്തയായിരുന്നു. അന്നു എൻ.പി.പി.എയുടെ ഇട​പെടലിനെ തുടർന്ന്​ റെംഡെസിവിറിന്‍റെ വില 'സ്വമേധയാ' കുറക്കാൻ തയാറായി.

രാജ്യത്തെ പ്രമുഖ മരുന്നുകമ്പനികൾ അമിതനിരക്കുമായി ബന്ധപ്പെട്ട നിയമനടപടികളിലാണ്​. എന്നാൽ, കേസും പിഴയുമായി നിയമനടപടി​ക്കൊരുങ്ങിയാൽ ഭാവിയിൽ അമിതനിരക്ക്​ ഈടാക്കുന്നതിൽനിന്നു മരുന്നുകമ്പനി​ക​ളെ പിന്തിരിപ്പിക്കാനാകുമെന്ന എൻ.പി.പി.എയുടെ തന്ത്രവും ഫലിക്കുന്നില്ലെന്നാണ്​ അനുഭവം പറയുന്നത്​. ഒടുവിൽ കമ്പനികൾക്ക്​ വില നിയന്ത്രണമേർപ്പെടുത്താൻ വന്ന സംവിധാനംതന്നെ മരുന്നുവില ഉയർത്തുന്നതിനുള്ള ഉപകരണമായിത്തീരുന്ന വിരോധാഭാസത്തിലാണ്​ എത്തിപ്പെട്ടിരിക്കുന്നത്​. കോവിഡ്​പ്രതിസന്ധിയുടെ മറവിൽ ചൈനയിൽനിന്ന്​ ഇറക്കുമതിചെയ്യുന്ന മരുന്നു ചേരുവകളുടെയും മറ്റും വിലയിൽ വന്ന വർധനയും ഇന്ധനവില, കടത്തുകൂലി, നികുതി എന്നിവയിലുണ്ടായ വർധനയുമൊക്കെ എണ്ണിപ്പറഞ്ഞാണ്​ ഇപ്പോൾ സാധാരണക്കാരന്‍റെ കഴുത്തിനുപിടിക്കുന്ന തരത്തിൽ സാർവത്രിക ഉപയോഗത്തിലിരിക്കുന്ന മുഴുവൻ മരുന്നുകളുടെയും വില വർധിപ്പിക്കുന്നത്​.

അവശ്യമരുന്നുകളിൽ സർക്കാർ നിയന്ത്രണമുണ്ടാകണമെന്നുവെച്ചത്​ ജനക്ഷേമം മുൻനിർത്തി വിലവർധിക്കാതെ നോക്കാനാണ്​. എന്നാൽ, ഭരണകൂടം കൂടുതൽ കച്ചവടമൂല്യത്തിന്​ പ്രാമുഖ്യം നൽകിയാൽ ജനം തെണ്ടുകയേ വഴിയുള്ളൂ. മരുന്നുകമ്പനിക്കാരുടെ ദേശീയസംഘടനയായ ഇന്ത്യൻ ഡ്രഗ്​ മാനുഫാക്​ചേഴ്​സ്​ അസോസിയേഷൻ കാര്യദർശിയുടെ പ്രസ്താവന തന്നെ മരുന്നുവിലനിർണയത്തിലെ ചൂഷണം വെളിപ്പെടുത്തുന്നുണ്ട്​. 'ഉപഭോക്താവിന്​ കുറച്ചു ഭാരമൊക്കെ വരും എന്നു തീർച്ചയാണ്​. എന്നാൽ, ധാരാളം നിർമാതാക്കളും പലതരം നിർമാണരീതികളും നിലവിലിരിക്കെ, എല്ലാവരും വില വർധിപ്പിക്കണം എന്നൊന്നുമില്ല. എന്നാൽ, പത്തു ശതമാനം വർധനക്ക്​ ഗവൺമെന്‍റ്​ അംഗീകാരം നൽകിയതിനാൽ ഈ അവസരം ആരും കൈയൊഴിയുകയുമില്ല' എന്നാണ്​ അസോസിയേഷൻ ജനറൽ സെക്രട്ടറി ദാര ബി. പട്ടേൽ പറയുന്നത്​.

മരുന്നുകമ്പനികൾക്ക്​ വില കൂട്ടാതെയും കഴിക്കാം എന്ന സൂചന അദ്ദേഹം തന്നെ നൽകുന്നു. എന്നിരിക്കെ ചോദിച്ചതിലും കൂടുതൽ അവർക്ക്​ അനുവദിച്ചുകൊടുക്കുകയും അതിന്‍റെ മറവിൽ സ്വന്തം നിലക്കുള്ള ചൂഷണങ്ങൾക്കു മരുന്നുകമ്പനികൾക്ക്​ അവസരം തുറന്നുകൊടുക്കുകയുമാണ്​ പുതിയ വില വർധന. അതു പിടിച്ചുനിർത്താനുള്ള സംവിധാനം ഗവൺമെന്‍റിനില്ലതാനും. ഇന്ധനവില നിർണയം കമ്പനികൾക്കു വിട്ടുകൊടുത്തതുപോലെ മരുന്നുവില നിശ്ചയിക്കാനുള്ള അധികാരം ഒരു വേദിക്കു നൽകിയിരിക്കെ, അവർ കമ്പനികൾക്കായിരിക്കും ഒരു പണത്തൂക്കം പരിഗണന കൂടുതൽ നൽകുക എന്നുറപ്പാണ്​. അതുകൊണ്ട്​ വില നിയന്ത്രണം കൊണ്ട്​ കുത്തക മരുന്നുകമ്പനികളെയല്ല, ആന്‍റിബയോട്ടിക്കുകളും വിറ്റമിനുകളുമൊക്കെ ജീവിതത്തിന്‍റെ ഭാഗമാക്കി മാറ്റേണ്ടിവരുന്ന സാധാരണക്കാരെയാണ്​ ഭരണകൂടം 'കൈകാര്യം' ചെയ്യുന്നത്​.