ജനാധിപത്യത്തിന്​ ആശ്വാസം പകരുന്ന വിധി

ബാലിശമായ ന്യായങ്ങളുണ്ടാക്കി പൗരാവകാശങ്ങളെ വരിയുടക്കുന്ന ഭരണകൂടസംവിധാനങ്ങൾക്കുള്ള കനത്ത പ്രഹരമാണ്​ രാജ്യദ്രോഹം ചുമത്തി തടവിലിട്ട ദിശ രവി എന്ന ഇരുപത്തിരണ്ടുകാരി ആക്​ടിവിസ്​റ്റിന്​ ജാമ്യമനുവദിച്ച ഡൽഹി പാട്യാല ഹൗസ്​ ​അഡീഷനൽ സെഷൻസ്​ കോടതിയുടെ വിധിപ്രസ്​താവം. ഡൽഹിയിലെ കർഷകസമരത്തി​നു പിന്തുണ നൽകുന്ന ടൂൾകിറ്റ്​ രൂപകൽപന ചെയ്​തതിനാണ്​ ഡൽഹി പൊലീസ്​ ഫെബ്രുവരി 13ന്​ ബംഗളൂരുവിലെ വീട്ടിലെത്തി നാടകീയരംഗങ്ങൾ സൃഷ്​ടിച്ച്​ ദിശയെ അറസ്​റ്റ്​ ചെയ്​തത്​. സംസ്​ഥാനം മാറി ഒരാളെ പിടിച്ചുകൊണ്ടുപോകു​േമ്പാൾ പാലിക്കേണ്ട പ്രാഥമികമര്യാദകൾപോലും നഗ്​നമായ ഇൗ പൗരാവകാശലംഘനത്തിലുണ്ടായില്ലെന്ന്​ അന്നുതന്നെ ചൂണ്ടിക്കാണിക്കപ്പെട്ടതാണ്​. സാമൂഹിക ഇടപെടലിൽ സജീവമായ കൗമാര, യൗവനവസന്തങ്ങളുടെ പേരിൽ ഇതര രാജ്യങ്ങൾ അഭിമാനംകൊള്ളു​േമ്പാൾ പൗരാവകാശപ്രവർത്തനത്തിനിറങ്ങുന്ന വിദ്യാർഥികളെയും യുവജനങ്ങളെയും രാജ്യദ്രോഹത്തി​െൻറയും ക്രിമിനൽ ഗൂഢാലോചനയുടെയും കള്ളക്കേസുകൾ മെനഞ്ഞ്​ മുളയിലേ നുള്ളുന്ന ഫാഷിസ്​റ്റ്​ പ്രവണതയാണ് നമ്മുടെ നാട്ടിൽ കണ്ടുവരുന്നത്​.

കഴിഞ്ഞ വർഷം ഡൽഹിയിൽ നടന്ന പൗരത്വനിയമഭേദഗതിക്കെതിരായ സമരത്തെ ഭരണകൂടവും പാർട്ടിക്കാരും കൈകാര്യംചെയ്​തതും ഇതേ മട്ടിലായിരുന്നു. സമരം പൊളിക്കാനുള്ള പ്രകോപനപരമായ നീക്കങ്ങളൊക്കെ പരാജയപ്പെട്ടപ്പോൾ, സംഘ്​പരിവാർ സംഘടനകൾ കലാപംകൂട്ടി. കലാപം അടങ്ങിയതിൽ പിന്നീട്​ പൗരത്വസമരത്തി​െൻറ മുൻനിരയിൽ നിന്ന വിദ്യാർഥിയുവജനങ്ങളെ ​േവട്ടയാടുകയായിരുന്നു. ഗർഭിണിയായ സഫൂറ സർഗാറി​െൻറ കാര്യത്തിൽപോലും ഒരുവിധ ദയാദാക്ഷിണ്യവും ഡൽഹി പൊലീസ്​ കാണിച്ചില്ല (അവരുടെ കേസ്​ പരിഗണനക്കു വന്നപ്പോൾ പൊലീസിനുണ്ടായിരുന്നത്​ സമാന കാരണങ്ങൾതന്നെയായിരുന്നുവെന്നും അന്ന്​ അത്​ പരിഗണിച്ച്​ ജാമ്യം നിഷേധിച്ചത്​ ഇതേ ന്യായാധിപൻ റാണ തന്നെയായിരുന്നുവെന്നതും മറ്റൊരു കൗതുകം). ഇപ്പോൾ ജീവിതത്തി​െൻറ കുഴിതോണ്ടുന്ന മാരകനിയമങ്ങൾക്കെതിരെ ജീവന്മരണപോരാട്ടത്തിനിറങ്ങിത്തിരിച്ച കർഷകർ വഴങ്ങില്ലെന്നുറപ്പായപ്പോൾ കിരാതനിയമങ്ങൾ ചുമത്തി അവരെയും പിന്തുണക്കുന്നവരെയും പിടികൂടാനുള്ള നീക്കമാണ്​ നടത്തുന്നത്​. അതി​െൻറ പരിഹാസ്യത അനാവരണം ചെയ്യുന്നതുകൂടിയായിരുന്നു അഡീഷനൽ സെഷൻസ്​ ജഡ്​ജി ധർമേന്ദർ റാണയുടെ വിധിപ്രസ്​താവം.

ഇന്ത്യൻ ശിക്ഷാനിയമത്തിൽ ക്രിമിനൽ ഗൂഢാലോചനക്കുള്ള 120 ബി, രാജ്യദ്രോഹത്തിനുള്ള 124 എ, വിവിധ വിഭാഗങ്ങൾക്കിടയിൽ വൈരം വളർത്താനുള്ള 153 എ വകുപ്പുകളാണ്​ ദിശക്കുമേൽ ചുമത്തിയത്​. കർഷകപ്രക്ഷോഭത്തി​െൻറ​ പേരിൽ വിദേശത്ത്​ ഇന്ത്യയെ അപകീർത്തിപ്പെടുത്തി, പ്രക്ഷോഭത്തിനു പിന്തുണയായി കലാപമുയർത്താൻ ടൂൾകിറ്റ്​ തയാറാക്കി, ജനുവരി 26ന്​ റിപ്പബ്ലിക്​ദിനത്തിൽ ഡൽഹിയിൽ നടന്ന അനിഷ്​ടസംഭവങ്ങൾക്കു നിമിത്തമായി തുടങ്ങിയ ആരോപണങ്ങൾ ​പൊലീസ്​ ഉന്നയിച്ചു​. ഇതിലൊന്നിനുപോലും തെളിവ്​ പൊലീസിന്​ ഹാജരാക്കാനായില്ലെന്നു ചൂണ്ടിക്കാട്ടിയാണ്​ കോടതി ജാമ്യം അനുവദിച്ചത്​. ജനുവരി 26 സംഭവവുമായി ബന്ധപ്പെട്ട്​ പിടിയിലാവുകയോ അന്വേഷണത്തിലിരിക്കുകയോ ചെയ്യുന്ന ആരുമായും ദിശക്കോ കൂട്ടുകാർക്കോ ബന്ധമുണ്ടെന്നു ​തെളിയിക്കാനാവാതെ വന്നപ്പോൾ​ വിദേശത്തുള്ളവരുമായി ഒാൺലൈനിൽ ബന്ധപ്പെടുകയും ആശയവിനിമയം നടത്തുകയും ചെയ്​തു എന്നായി 'കുറ്റം'​. ഇവർ ബന്ധം പുലർത്തിയെന്നുപറയുന്ന ഗ്രേറ്റ തുൻബർഗോ 'പോയറ്റിക്​ ജസ്​റ്റിസ്​ ഫൗണ്ടേഷൻ' എന്ന സംഘടനയോ ഒന്നും നിരോധിത സംഘടനയല്ല. ലോകത്ത്​ നടക്കുന്ന സംഭവവികാസങ്ങളിൽ അഭിപ്രായപ്രകടനം നടത്തുന്നതാണ്​ ഭരണകൂടം കണ്ട മറ്റൊരു മഹാപാതകം. യു.എ.പി.എ ചുമത്തുമെന്ന്​ ഭയന്ന്​ അഭിഭാഷകരുമായി ബന്ധപ്പെട്ട്​ കേസുകാര്യങ്ങൾ സംസാരിച്ചതുപോലും പൊലീസ്​ തെളിവായി ഉന്നയിച്ചെന്നു വരു​േമ്പാൾ എത്രമേൽ ഭീകരമാണ്​ ഭരണകൂടത്തി​െൻറ പൗരന്മാർക്കുമേലുള്ള പിടിത്തം എന്നാലോചിക്കുക.

ബാലിശമായ കാര്യങ്ങളെല്ലാം നിരത്തിയശേഷം പൊലീസ്​ തന്നെ വ്യക്തമാക്കിയത്​, ജനുവരി 26 അതിക്രമങ്ങളുമായി ഇവരെ ബന്ധപ്പെടുത്താൻ പ്രത്യക്ഷതെളിവുകളൊന്നുമില്ലെങ്കിലും സാഹചര്യത്തെളിവുകൾ വിഘടിതശക്തികളുടെ അക്രമത്തിനുള്ള 'വിശാല ഗൂഢാലോചന'യിൽ അവർ ഭാഗഭാക്കാണെന്നു തെളിയിക്കുന്നു'വെന്നാണ്​. എന്നാൽ, ആശയപ്രകടന​സ്വാതന്ത്ര്യം എന്ന ഭരണഘടന പ്രദാനംചെയ്യുന്ന മൗലികാവകാശത്തിൽ ആഗോള അനുവാചകരുമായി ആശയം പങ്കുവെക്കുന്നതുകൂടി ഉൾപ്പെടുമെന്നു കോടതി ചൂണ്ടിക്കാട്ടി. ഭരണകൂടത്തോടു വിയോജിക്കുന്നതു ജയിലിലടക്കാവുന്ന രാജ്യ​ദ്രോഹക്കുറ്റമാവില്ലെന്നു വ്യക്തമാക്കിയ കോടതി 1967ലെ കേദാർനാഥ്​ സിങ്ങും ബിഹാർ സർക്കാറും തമ്മിലുള്ള കേസിൽ സുപ്രീംകോടതി വിധിച്ചത്​ ഒാർമിപ്പിച്ചു. സമൂഹത്തിൽ അക്രമവും അരാജകത്വവും സൃഷ്​ടിക്കാനുദ്ദേശിച്ച്​ കരുതിക്കൂട്ടിയുള്ള പ്രവർത്തനങ്ങളാണ്​ രാജ്യദ്രോഹത്തി​െൻറ പരിധിയിൽ പെടുകയെന്ന്​ പരമോന്നത നീതിപീഠം അന്നേ പറഞ്ഞുവെച്ചിട്ടുണ്ട്​.

ദേശീയ ക്രൈം റെക്കോഡ്​സ്​ ബ്യൂറോയുടെതന്നെ കണക്കനുസരിച്ച്​ 2016-19 കാലയളവിൽ 5922 പേരെയാണ്​​ യു.എ.പി.എ പ്രകാരം വേട്ടയാടിപ്പിടിച്ചത്​. അതിൽ 132 പേർക്കെതിരെ മാത്രമേ കുറ്റം ചുമത്താനായുള്ളൂ. ഭരണകൂടത്തിനെതിരായ പ്രതിശബ്​ദങ്ങളുടെ വായമൂടിക്കെട്ടാൻ രാജ്യദ്രോഹം ആയുധമായി ഉപയോഗിക്കപ്പെടുന്ന പ്രവണത കൂടിവരുന്ന കാലത്ത്​ അപൂർവമായെങ്കിലും നീതിപീഠങ്ങളുടെ ഭാഗത്തുനിന്നുണ്ടാകുന്ന ന്യായവും മാനവികവുമായ ഇടപെടൽ ജനാധിപത്യത്തിലും നീതിബോധത്തിലുമുള്ള വിശ്വാസം കെടാതെ സൂക്ഷിക്കാൻ സഹായിക്കും-പൗരസമൂഹത്തിനിടയി​ലെ നിഴലനക്കങ്ങളെ വരെ പേടിച്ച്​ മനുഷ്യാവകാശങ്ങളെ സ്വേച്ഛാധിപത്യത്തിൽ ചവിട്ടിയൊതുക്കുന്നവരെ അത്​ ഇളക്കുമെന്ന്​ ഉറപ്പില്ലെങ്കിലും.