ആശങ്ക ഉയർത്തി വീണ്ടും പി.എഫ്​. പെൻഷൻ കോടതിയിൽ

ശമ്പളത്തിന്​ ആനുപാതികമായ പെൻഷൻ അർഹതയെകുറിച്ച്​ തൊഴിലാളികൾക്ക്​ അനുകൂലമായി വലിയ പ്രതീക്ഷ നൽകിയ കേരള ഹൈകോടതിയു​​ടെ ഇക്കഴിഞ്ഞ ഒക്​ടോബർ 12​ന്‍റെ വിധി ദുർബലപ്പെടുത്തണമെന്നാവശ്യപ്പെട്ട്​ എംപ്ലോയിമെന്‍റ്​ പ്രൊവിഡന്‍റ്​ ഫണ്ട്​ ഒാർഗനൈസേഷൻ സുപ്രീംകോടതിയിൽ സ്​പെഷ്യൽ ലീവ്​ പെറ്റീഷൻ നൽകിയതോടെ വീണ്ടും ലക്ഷക്കണക്കിന്​ തൊഴിലാളികളിൽ ആശങ്കപരന്നു. സുപ്രീംകോടതി ഒരിക്കൽ തീർപ്പ്​ കൽപിക്കുകയും അതനുസരിച്ച്​ കേന്ദ്രസർക്കാർ രാജ്യ​ത്തെ വിരമിച്ച മുഴുവൻ തൊഴിലാളികളിൽ നിന്ന്​ ഉയർന്ന പെൻഷന്​ വേണ്ടി അപേക്ഷിക്കാമെന്ന്​ ഉത്തരവിറക്കുകയും ചെയ്​ത ഒരു വിഷയത്തിലാണ്​ അനാവശ്യമായ തടസവാദങ്ങൾ ഉന്നയിച്ച്​ ലക്ഷക്കണക്കിന്​ തൊഴിലാളികളുടെ നിക്ഷേപം കൊണ്ട്​ തടിച്ചു കൊഴുക്കുന്ന ഒരു സർക്കാർ സ്​ഥാപനം ആശയക്കുഴപ്പമുണ്ടാക്കുന്ന വാദങ്ങളുമായി കോടതി കയറുന്നത്​. രാഷ്​ട്രീയ നേതൃത്വത്തി​ന്‍റെ ഇച്ഛാശക്​തിയില്ലായ്​മയാണ്​ ഇൗ അവസ്​ഥക്ക്​ കാരണം.

എംപ്ലോയീസ്​ പെൻഷൻ പദ്ധതി പ്രകാരം ചുരുങ്ങിയത്​ 10 വർഷമെങ്കിലും സേവനം പൂർത്തീകരിച്ച്​ 58 വയസിൽ വിരമിച്ച ജീവനക്കാർക്ക്​ മൊത്തം ശമ്പളത്തിന്​ ആനുപാതികമായി കൂടിയ പെൻഷന്​ അവകാശം നിർണയിക്കുന്ന​ EPS Section 11 (3) വകുപ്പി​ന്‍റെ ആനുകൂല്യം പതിറ്റാണ്ടുകളായി തടഞ്ഞു വെച്ചതിനെതിരായ നിയമയുദ്ധമാണ്​ എങ്ങുമെത്താതെ നീണ്ടുപോകുന്നത്​. അവസാനത്തെ 12 മാസത്തെ ശരാശരി ശമ്പളത്തെ ജോലി ചെയ്​ത വർഷത്തെ കൊണ്ട്​ ഗുണിച്ച്​​ 70 കൊണ്ട്​ ഹരിച്ചാൽ കിട്ടുന്ന വിഹിതമാണ്​ പി.എഫ്​ പെൻഷൻ ആയികണക്കാക്കേണ്ടത്​. എന്നാൽ, 2014 സെപ്​റ്റംബറിന്​ ശേഷം വിരമിച്ചവരുടെ കാര്യത്തിൽ 60 മാസത്തെ ശരാശരി മാസശമ്പളമാണ്​ ആക്​ട്​ പ്രകാരം പരിഗണിക്കുന്നതെന്ന്​ ഒാർഗനൈസേഷൻ ഭേദഗതി ചെയ്​തു. ഇൗ ഭേദഗതിയുൾപ്പെടെ റദ്ദ്​ ചെയ്യുന്നതായിരുന്നു കേരള ​ഹൈകോടതി വിധി. നിയമഭേദഗതി സാധൂകരിച്ചു കിട്ടണമെന്നും ഇ.പി.എഫ്​.ഒവി​ന്‍റെ നടത്തിപ്പ്​ ഭദ്രമാക്കുന്നതിന്​ ആക്​ട്​ നൽകുന്ന ഭേദഗതി അവകാശം നിഷേധിക്കപ്പെട്ടാൽ മറ്റ്​ തൊഴിലാളികളുടെ ക്ഷേമപദ്ധതികൾ ഉൾപ്പെടെ നടപ്പിലാക്കാനുള്ള സാമ്പത്തിക ബാധ്യത വരുമെന്ന പുതിയ വാദമാണ്​ അപ്പീൽ ഹരജിയിൽ മുന്നോട്ട്​ നീക്കാൻ ശ്രമിക്കുന്നതെന്നാണ്​ വിവരം.

ഒരിക്കൽ കോടതി വിധിക്കുകയും അതേ വിഷയം വീണ്ടും ഹൈകോടതി മുതൽ സുപ്രീംകോടതിവരെ തിരിച്ചു വരികയും ചെയ്യുക എന്ന അത്യപൂർവമായ ‘നട്ടംതിരിയലിൽ’ ആണ്​ തങ്ങൾ അകപ്പെട്ടിരിക്കുന്നതെന്ന്​ വിരമിച്ചവർ പറയുന്നു.​ കേരള സ്​റ്റേറ്റ്​ മിൽമ പെൻഷനേഴ്​സ്​ വെൽഫെയർ അസോസിയേഷൻ പ്രസിഡന്‍റ്​ വി.പി. അബ്​ദുൽഖാദറും 85 പേരും ചേർന്ന്​ നൽകിയ ഹരജിയിൽ ശമ്പളത്തി​ന്‍റെ ആനുപാതിക പെൻഷൻ നൽകാൻ ​​ഹൈകോടതി 2014ലാണ് ആദ്യം വിധിച്ചത്​. ഇതിനെതിരെ ഇ.പി.എഫ്​ ബോർഡ്​ സുപ്രീംകോടതിയെ സമീപിച്ചു. രാജ്യവ്യാപകമായി പല സ്​ഥാപനങ്ങളിലെ ജീവനക്കാരും തൊഴിലാളികളും സുപ്രീംകോടതിയിലെ കേസിൽ കക്ഷിചേർന്നു. രാജ്യത്തെ പെൻഷൻ സ്വീകരിക്കുന്ന 55 ലക്ഷം തൊഴിലാളികൾക്കും പിരിയു​േമ്പാഴുള്ള ശമ്പളത്തി​ന്‍റെ ആനുപാതിക പെൻഷൻ നൽകിയാൽ ബോർഡ്​ സാമ്പത്തികമായി തകർന്ന്​ പോകുമെന്ന്​ അന്നും വാദമുയർന്നു. പക്ഷെ, എതിർവാദത്തിനിടയിൽ ഉപയോഗിക്കാതെ കിടക്കുന്ന ആയിരക്കണക്കിന്​ കോടി നിക്ഷേപത്തി​ന്‍റെ കണക്ക്​ പിന്നീട്​ ​ഇ.പി.എഫ്​.ഒവിന്​ കോടതിയിൽ ബോധിപ്പിക്കേണ്ടി വന്നു. ഇതി​ന്‍റെ നാനാവശങ്ങളും പരിശോധിച്ചാണ്​ 2016 ഒക്​ടോബറിൽ സുപ്രീംകോടതി തൊഴിലാളികൾക്ക്​ അനുകൂലമായി വിധിച്ചത്​.

കേസിൽ കക്ഷി ചേരാത്ത മുഴുവൻ തൊഴിലാളികൾക്കും വിധിയുടെ ആനുകൂല്യം ലഭിക്കുന്ന ഉത്തരവ്​ 2017 മാർച്ച്​ 23ന്​ സർക്കാർ പുറത്തിറക്കുകയും ചെയ്​തു. കേരളത്തിൽ നിന്നുള്ള പാർലി​മെന്‍റംഗം എൻ.കെ.​ പ്രേമചന്ദ്രൻ പാർലമെന്‍റിൽ ഇത്​ സംബന്​ധിച്ച്​ നടത്തിയ നിർണായക നീക്കമാണ്​ ഉത്തരവിലെത്തിച്ചത്​. ഇതനുസരിച്ച്​ ഹയർഒാപ്​ഷൻ സമർപ്പിക്കാൻ അവസരവും സോഫ്​റ്റ്​വെയർ പരിഷ്​കരണവും നടത്തി. സ്​ഥാപന ഉടമ തൊഴിലാളിയുടെ പെൻഷൻ വിഹിതത്തി​ന്‍റെ ആനുപാതികം അനുസിച്ച്​ നിക്ഷേപിച്ചിട്ടില്ലാത്തവർ കുടിശികയായി തുക അടച്ചാൽ പെൻഷൻ നടപ്പിലാവുമെന്ന ഘട്ടം വന്നപ്പോഴാണ്​ 2017 മെയ്​ 31 ഭേദഗതി ഉത്തരവ്​ പുറത്തിറങ്ങിയത്​. ഇതോടെ എല്ലാ നടപടികളും സ്​തംഭിക്കുകയായിരുന്നു.

ഇതുവരെയായി നടന്ന എല്ലാ കേസുകളിലും ഉണ്ടായ വിധിയുടെ ആനുകൂല്യം കേസിൽ കക്ഷി ചേർന്നവർക്ക്​ ലഭിച്ചിട്ടുണ്ട്​. രാജ്യ​ത്താകെ 3570 പേർ ഇങ്ങനെ ഉയർന്ന പെൻഷൻ വാങ്ങുന്നു. കേരളത്തിൽ കണ്ണൂർ, കൊച്ചി, കൊല്ലം, കോട്ടയം, കോഴിക്കോട്​, തിരുവനന്തപുരം മേഖല ഒാഫീസുകളിലെല്ലാം ഉയർന്ന ​പെൻഷൻ സ്വീകരിക്കുന്നവരുണ്ട്​. ഇന്ത്യയിൽ ഉയർന്ന പെൻഷൻ സ്വീകരിക്കുന്ന 3570 പേരിൽ 2902ഉം കേരളത്തിലാണ്​. ഇവരെല്ലാം കോടതി വിധിക്ക്​ ശേഷം പെൻഷന്​ അർഹത നേടിയവരാണ്​. കേരളത്തിലെ 19800 സ്​ഥാപനങ്ങളിലായി പത്ത്​ ലക്ഷത്തിലധികം പി.എഫ്​ അംഗങ്ങളിൽ മൂന്നര ലക്ഷം പി.എഫ്​ പെൻഷൻകാരാണുള്ളത്. പതിനയ്യായിരത്തോളം പേര്‍ കക്ഷി ചേര്‍ന്നിട്ടുള്ള 507 കേസുകളിലാണ് ഇക്കഴിഞ്ഞ ഒക്​ടോബർ 12ന്​ ഹൈകോടതി ചരിത്രവിധി ​പ്രസ്​താവിച്ചത്​. ശമ്പളത്തിന് ആനുപാതികമായി പെന്‍ഷന്‍ വിഹിതം നല്‍കാനുള്ള ഓപ്ഷന് കട്ട് ഓഫ് തീയതി നിശ്ചയിക്കുകയും പെന്‍ഷന്‍ പരിഗണിക്കുന്ന ശമ്പളം 15,000 രൂപയാക്കി നിജപ്പെടുത്തിയതും 60 മാസത്തെ ശരാശരി മാസവേതനം പെന്‍ഷന് അടിസ്ഥാനമാക്കി നിശ്ചയിച്ചതുമടക്കമുള്ള തൊഴിലാളി ദ്രോഹകരമായ ഭേദഗതികളായിരുന്നു നടത്തിയിരുന്നത്​.

ഇത്​ റദ്ദ്​ ചെയ്​തത്​ പുന:പരി​ശോധിക്കണമെന്നാണ്​ പുതിയ ഹരജിയിൽ ഇ.പി.എഫ്​.ഒ. ആവശ്യപ്പെട്ടിരിക്കുന്നത്​. പെൻഷൻ നൽകു​​േമ്പാഴുള്ള തൊഴിലാളികളുടെ വർഗീകരണം (പ്രതിമാസം 15,000 രൂപയിൽ കുറവുള്ളതും 15,000 രൂപയിൽ കൂടുതൽ വരുമാനമുള്ളവരും) എംപ്ലോയീസ്​ പ്രോവിഡന്‍റ്​ ഫണ്ട്​ ആന്‍റ്​ മിസ​ലേനിയസ്​ പ്രോവിഷൻ ആക്​ട്​ 1952 (EPF & MP). കീഴിലുള്ള നിയമാനുസൃത ​േഭദഗതി നടപടിയാണെന്നും അത്​ ഒരു സ്​ഥാപനത്തിന്​ അവകാശപ്പെട്ടതാണെന്നുമാണ്​ അപ്പീൽ ഹരജിയിൽ പറയുന്നത്​. പ്രൊവിഷൻസ്​ ഫണ്ട്​ ആക്ടിന്​ വിരുദ്ധമായതൊന്നും ചെയ്​തില്ലെന്നും ഇത്​ കണ്ടെത്താൻ ​ൈ​ഹകോടതിക്ക്​ കഴിഞ്ഞില്ലെന്നുമാണ്​ വാദം. കേരള ​ഹൈകോടതി വിധിയുടെ തീർപ്പിനനുസരിച്ച്​ തീരുമാനമാകാൻ വെറെയും ഹരജികൾ വിവിധ സംസ്​ഥാനങ്ങളിൽ നിലനിൽക്കെയുള്ള പുതിയ അപ്പീൽ ഹരജി സമാനമായ എല്ലാ കേസ്​ നടത്തിപ്പുകളെയും അനിശ്​ചിതത്വത്തിലാക്കുമെന്ന്​ ചൂണ്ടികാണിക്കപ്പെടുന്നു.

സ്ഥാപനങ്ങൾ സ്വന്തമായി പി.എഫ്. ട്രസ്റ്റ് നടത്തുന്നവര്‍ക്ക് ഉയർന്ന പെൻഷൻ ഒാപ്​ഷൻ നൽകാനാവില്ലെന്ന വിചിത്രമായ സര്‍ക്കുലറുൾപ്പെടെയുള്ളവ വിവാദമായതോടെ ഇതേക്കുറിച്ച്​ പഠിക്കാൻ പാർലമെന്‍റ്​ നിയോഗിച്ച കമീഷനുകളുടെ റിപ്പോർട്ടും ഇനിയും വെളിച്ചം കണ്ടിട്ടില്ല. തൊഴിലാളികളെ അഭിമുഖീകരിക്കുന്ന ട്രേഡ്​ യൂനിയനുകളും രാഷ്​ട്രീയ നേതൃത്വങ്ങളും വിരമിച്ച തൊഴിലാളികളുടെ വിഷയത്തിൽ പാലിക്കുന്ന നിസംഗതയാണ്​ വിഷയം ഇത്രത്തോളം നീട്ടിവലിച്ചു കൊണ്ട​ു പോകാൻ ഇടയായതെന്നാണ്​ പരക്കെ അഭിപ്രായമുയർന്നിരിക്കുന്നത്​.