​വെള്ള വംശീയ ഭീകരതയുടെ പൊള്ളുന്ന പാഠങ്ങൾ

2017 അവസാനം അമേരിക്കയിലെ അക്രമാസക്ത തീവ്രവാദ ചിന്തയുടെ സ്വാധീനവും അതു മറികടക്കാൻ ഭരണകൂടം സ്വീകരിക്കുന്ന സമീപന വും വിഷയമാക്കിയ ആ പഠനയാത്രയിൽ കൊളറാഡോ തലസ്​ഥാനമായ ഡെൻവറിൽ നടന്ന ചർച്ചയിൽ യു.എസ് അറ്റോണി റോബർട്ട് സി. ട്രോയറാ ണ്​ വെള്ളക്കാരിൽ പടർന്നുകയറുന്ന മതവാദം ചേർത്ത വംശീയ ഭീകരതയെക്കുറിച്ചു പറഞ്ഞത്​. 2017ൽ കൊളറാഡോയുടെ വിവിധ ഭാഗങ ്ങളിലായി 62 അനിഷ്​ടസംഭവങ്ങൾ ഇൗ സംഘങ്ങളുടേതായി റിപ്പോർട്ട്​ ചെയ്യപ്പെട്ടു. അന്യമതക്കാരുടെ സ്​ഥാപന വാതിലുകളിൽ സ്വസ്​തിക വരച്ചിടുക, വീടുകളുടെ ചുമരുകളിൽ മുദ്രാവാക്യങ്ങൾ സ്​പ്രേ പെയിൻറ്​ ചെയ്യുക, സ്​കൂളുകളിൽ ‘ജയ്​ ഹിറ്റ് ​ലർ’ മുദ്രാവാക്യം വിളിയുയർത്തുക തുടങ്ങിയ പരിപാടികളിലൂടെ കാമ്പസുകളെയും ഇരുപതുകളി​െ​ല നിറയൗവനത്തെയും പിടികൂ ടുകയാണവർ. സെമി ഒാ​േട്ടാമാറ്റിക്​ റൈഫിളുകളും മറ്റു നാസി ആയുധങ്ങളുമായി ചാൾസ്​ വിലെയിൽ വെള്ളതീവ്രവാദികൾ വംശീയാക്രമണത്തിന്​ ആഹ്വാനം മുഴക്കി ആഗസ്​റ്റ്​ 17ന്​ നടന്ന പ്രകടനവും അതേ തുടർന്നു നടന്ന ആക്രമണങ്ങളും ഒാർമയിൽനിന്നു മായും മു​േമ്പയായിരുന്നു ട്രോയറുമായുള്ള ഞങ്ങൾ മലയാളി മാധ്യമപ്രവർത്തകരുടെ കൂടിക്കാഴ്​ച. പ്രതിവർഷം കൂടിവരുന്ന ഇൗ പ്രതിഭാസത്തെ നിയന്ത്രിക്കാൻ ചർച്ച്​ മേധാവികളുടെ സഹകരണം തേടിയ കാര്യം അദ്ദേഹം ചൂണ്ടിക്കാട്ടി. ചർച്ചിന്​ ഇതിലെന്താണ്​ കാര്യമെന്നു തിരക്കിയപ്പോഴാണ്​ വെള്ള അധീശത്വവാദികളും നവനാസികളും ക്രൈസ്​തവ സുവിശേഷവൃത്തിയുമായി ഭീകരവാദ പ്രവർത്തനത്തെ ബന്ധിപ്പിക്കുന്ന കാര്യം​ ട്രോയർ പറഞ്ഞത്​

വെള്ളക്കാര​​െൻറ വംശീയ ഭീകരവാദം ന്യൂസിലൻഡിൽ വെള്ളിയാഴ്​ച പൊട്ടിവീണ പ്രതിഭാസമല്ല. 2001 സെപ്​റ്റംബർ 11ന്​ ലോക വ്യാപാരകേന്ദ്രത്തിലുണ്ടായ ഭീകരാക്രമണത്തെ തുടർന്ന്​ പടിഞ്ഞാറ് വൻതോതിൽ വിതച്ചുകൊയ്യുന്ന ഇസ്​ലാംപേടിയുടെ പ്രതിഫലനവുമല്ല. എന്നല്ല, ഇൗ ഇസ്​ലാംപേടി തന്നെ വെള്ള അധീശത്വബോധത്തി​​െൻറ സൃഷ്​ടിയാണെന്നു ച​രിത്രം പറയുന്നു​. 1878 ൽ അമേരിക്കൻ സെനറ്റിലെ അംഗം എ.എ സാർജൻറ്​ ചൈനക്കാരുടെ അമേരിക്കൻ കുടിയേറ്റം തടയണമെന്ന്​ ആവശ്യപ്പെട്ട്​ ​പ്രമേയം അവതരിപ്പിച്ചു. വാസ്​തവത്തിൽ കുടിയേറ്റക്കാരാണ്​ ഇന്നു കാണുന്ന ​അമേരിക്ക സൃഷ്​ടിച്ചെടുത്തത്​. എന്നാൽ, ചൈനക്കാരുടെ ആചാരങ്ങൾ, ജീവിതശൈലി, മതം ഇതെല്ലാം കൂടിച്ചേർന്ന് ‘വെള്ള ​ക്രൈസ്​തവരാജ്യ’വുമായി ഇഴുകിച്ചേരാൻ അവർക്കായിട്ടില്ലെന്നായിരുന്നു സാർജൻറി​​െൻറ പരിഭവം. അതിന്​ ഒരു പരിഹാരവും അദ്ദേഹം നിർദേശിച്ചു: ‘‘ക്രൈസ്​തവ മിഷനറിമാർ ചൈനയിൽ ചെന്ന്​ അവരുടെ ഇൗ വേഷപ്പകർച്ചയൊക്കെ കഴുകി വെടിപ്പാക്കി, അവരെ സ്​നാപക യോഹന്നാൻ പറഞ്ഞപോലെ കർത്താവി​​െൻറ രക്​തത്തിലുള്ള വെള്ളക്കാരാക്കി മാറ്റണം’’. വെള്ള വംശീയതയെ ക്രൈസ്​തവവിശ്വാസവുമായി ചേർത്തുകെട്ടിയുള്ള ഇൗ പ്രചാരണത്തിന്​ മതേതര മുഖമുദ്രയുള്ള അമേരിക്കയിൽ വൻപിന്തുണ കിട്ടി.

​1882ൽ ചൈന, ഏഷ്യാറ്റിക്​ സോൺ എന്നിവിടങ്ങളിലെ കുടിയേറ്റക്കാർക്ക്​ നിരോധനമേർപ്പെടുത്തുന്ന നിയമനിർമാണം അമേരിക്കയിൽ പാസായി. ഒന്നാം ലോകയുദ്ധത്തിൽ അമേരി​ക്കയെ സേവിച്ച, എഴുത്തുകാരനും ഗവേഷകനുമായ ഇന്ത്യൻ വംശജൻ ഭഗത്​ സിങ്​ തിൻഡ്​​, ത​​െൻറ സേവനപാരമ്പര്യമൊക്കെ ഉയർത്തിക്കാട്ടി പൗരത്വത്തിന്​ അപേക്ഷിച്ചപ്പോൾ, അദ്ദേഹത്തിലെ ‘ഹിന്ദു’വിന്​ വെള്ളക്കാര​​െൻറ സംസ്​കാരത്തിൽ ലയിച്ചു​ ചേരാനാവില്ലെന്ന ന്യായം പറഞ്ഞ്​ കീഴ്​ക്കോടതികൾ തള്ളിക്കളഞ്ഞു. സുപ്രീംകോടതിയിലേക്കു നീണ്ട നിയമയുദ്ധത്തിനൊടുവിൽ, വെളുത്ത സിഖുകാരനായ തിൻഡ്​, ആര്യനും വംശ, ഭാഷാ പാരമ്പര്യത്തിൽ കൊക്കേഷ്യനുമായി ഗണിക്കപ്പെടാമെന്ന ന്യായത്തിലാണ്​ പൗരത്വം അനുവദിച്ചുകിട്ടിയത്​. ഇൗ മത-വംശപാരമ്പര്യ നിയന്ത്രണങ്ങളൊക്കെ നീങ്ങിക്കിട്ടാൻ 1965െല കുടിയേറ്റ നിയമ പരിഷ്​കരണത്തിന്​ കാത്തിരിക്കേണ്ടിവന്നു. പത്തൊമ്പതാം നൂറ്റാണ്ടി​​െൻറ ഒടുവിലും അമേരിക്കയിലെ കുടിയേറ്റ ചർച്ചകളിൽ വെള്ളവംശീയതയും ​​ക്രൈസ്​തവതയും ഒന്നുചേർന്നുനിന്നതിനെപ്പറ്റി ന്യൂയോർക്​​ ഫോർദാം സർവകലാശാലയിലെ തിയോളജി വിഭാഗം പ്രഫസർ ജനീൻ ഹിൽ ഫ്ലഷർ എഴുതിയ ‘ദ സിൻ ഒാഫ്​ വൈറ്റ്​ സുപ്രിമസി: ക്രിസ്​റ്റ്യാനിറ്റി, റേസിസം ആൻഡ്​ റിലീജിയസ്​ ഡൈവേഴ്​സിറ്റി ഇൻ അമേരിക്ക’ എന്ന ഗ്രന്ഥം വിശദീകരിക്കുന്നുണ്ട്​. അമേരിക്കയുടെ ‘മത-വംശീയ’ പദ്ധതികളെക്കുറിച്ച്​ ഇതിനകം നിരവധി പഠനങ്ങൾ വന്നുകഴിഞ്ഞിരിക്കുന്നു​. വേദപ്രവചനത്തെ പിന്തുടർന്ന്​ പുതിയ ദേശങ്ങളും സമ്പത്തും തേടിപ്പോയ ക്രിസ്​റ്റഫർ കൊളംബസി​​െൻറ യാത്രകളും പോപ്​ അലക്​സാണ്ടർ ആറാമ​​െൻറ പ്രോത്സാഹനവും മുതൽ, യൂറോപ്യൻ അധിനിവേശക്കാർ ഫ്ലോറിഡയിലെ ആദിമവാസികളെ ‘ചുവന്ന’ അപരിഷ്​കൃതരായി കണ്ടതുമുതൽ, പുതിയ കാലത്ത്​ അമേരിക്കയിലും യൂറോപ്പിലും മുസ്​ലിം കുടിയേറ്റക്കാർക്കു​നേരെയുള്ള വെറി വരെ ഉദാഹരിച്ച്​ കാര്യങ്ങൾ ഇപ്പോഴും പഴയ മട്ടിൽത​ന്നെ തുടരുകയാണെന്ന്​ അവർ സമർഥിക്കുന്നു. 2016ലെ തെരഞ്ഞെടുപ്പിൽ ശുദ്ധ വംശവെറി വാദക്കാരനായ ഡോണൾഡ്​ ട്രംപിനെ അമേരിക്ക വിജയിപ്പിച്ചപ്പോൾ സുവിശേഷക വൃത്തിക്കാരായ ഇവാഞ്ചലിക്കൻ ക്രൈസ്​തവരിൽ 81 ശതമാനത്തി​​െൻറയും വെള്ള കത്തോലിക്കരിൽ 60 ശതമാനത്തി​​െൻറയും പിന്തുണയുണ്ടായിരുന്നു എന്നത്​ വംശവെറിയും ​ക്രൈസ്​തവതയും തമ്മിലെ ഉടയാബന്ധമാണ്​ തെളിയിക്കുന്നതെന്ന്​ ന്യൂയോർക്​ തിയോളജിക്കൽ സെമിനാരിയിലെ ഗവേഷകയായ പ്രഫ. മരിയൻ റോണൻ ചൂണ്ടിക്കാട്ടുന്നു.

ന്യൂസിലൻഡിൽ മസ്​ജിദുകളിൽ കയറി 50 പേരെ വെടിവെച്ചുകൊല്ലുകയും 48 പേരെ മാരകമായി പരിക്കേൽപിക്കുകയും ചെയ്​ത 28കാരനായ ബ്ര​െൻറൺ ഹാരിസൺ ടാറൻറ്​ എന്ന ആക്രമി തയാറാക്കിയ 74 പേജ്​ മാനി​െഫസ്​റ്റോയിലും വെള്ളവിശുദ്ധിയ​ുടെ തീവ്രവാദം തന്നെയാണുള്ളത്​. സംഘ്​പരിവാർ ആൾക്കൂട്ടക്കൊലകൾ വിഡിയോയിൽ പകർത്തി സോഷ്യൽ മീഡിയ വഴി പ്രചരിപ്പിക്കുന്നതുപോലെ, സ്വന്തം ചെയ്​തികളുടെ ന്യായാന്യായങ്ങൾ വിവരിക്കുന്ന പ്രമാണരേഖ വംശീയാതിക്രമികളെല്ലാം തയാറാക്കിവെക്കാറുണ്ട്​. കൂടുതൽ അനുകർത്താക്കളെ ഉണ്ടാക്കിയെടുക്കുകയാണ്​ ലക്ഷ്യം. മാധ്യമപ്രവർത്തകരെയും ഇടതുവാദികളെയും വകവരുത്താൻ ലക്ഷ്യമിട്ട്​ ​അമേരിക്കയിലെ മേരിലാൻഡിൽ കോസ്​റ്റ്​ ഗാർഡ്​ ലഫ്​റ്റനൻറായിരുന്ന ചെറുപ്പക്കാരൻ കഴിഞ്ഞ ഫെബ്രുവരിയിൽ ആക്രമണം നടത്തിയപ്പോഴും, 1984ൽ ഒരു ജൂത റേഡിയോ ഹോസ്​റ്റിനെ വധിച്ച ഡേവിഡ​്​ ​ലെയിൻ, 1994ൽ 168 പേരെ കൂട്ടക്കൊല ചെയ്​ത ഒക്​ലഹോമ ബോംബ്​ സ്​ഫോടനത്തി​​െൻറ സൂത്രധാരൻ തിമോത്തി മക്​വെ, 2011ൽ നോർവേയിലെ ഒാസ്​ലോയിൽ 75 പേരെ അറു​കൊല ചെയ്​ത ഭീകരാക്രമണപരമ്പരയിലെ പ്രതി ആ​ൻഡേഴ്​സ്​ ബ്രേവിക്​, 2015ൽ അമേരിക്കയിലെ സൗത്ത്​ കരോലൈനയിലെ ചാൾസ്​റ്റണിൽ എട്ടു കറുത്തവർഗക്കാരെ കൊന്നുകളഞ്ഞ വെള്ള അധീശവാദി ഡൈലാൻ റൂഫ്​ എന്നിവരൊക്കെ ഇതുപോലെയുള്ള രേഖകൾ തയാറാക്കി പ്രചരിപ്പിച്ചിരുന്നു. നോ​ർവേ, ചാൾസ്​റ്റൺ​​ കൊലയാളികളുടെ ആരാധകനാണ്​ താനെന്നു ഇപ്പോൾ ടാറൻറ്​ പറയുന്നു. വെള്ളക്ക​ാരെ വംശഹത്യ ചെയ്യുന്നതിനെതിരായ പ്രതികാരമാണ്​ ചെയ്​തത്​ എന്നാണ്​ അയാളുടെ വാദം. 1984ൽ ജൂത റേഡിയോ താരത്തെ കൊന്ന ഡേവിഡ്​ ലൈൻ തടവിലിരുന്ന്​ തയാറാക്കിയ ​‘വൈറ്റ്​ ജിനോസൈഡ്​ മാനി​ഫെസ്​റ്റോ’യും ഇതു തന്നെയാണ്​ പറയുന്നത്​.

ഇൗ വംശവെറിയാണ്​ വെള്ളിയാഴ്​ച ജുമുഅ നമസ്​കാരത്തിന്​ എത്തിച്ചേർന്ന നിരായുധരുടെ നേർക്ക്​, ‘എ​​െൻറ സോദരാ’ എന്നു വിളിച്ച്​ അഭിവാദ്യം ചെയ്​ത 71 കാരൻ ഹാജി ദാവൂദ്​ നബി എന്ന അഫ്​ഗാൻ വൃദ്ധൻ മുതൽ മലയാളി യുവതി ആൻസിയും ജീവനുവേണ്ടി പിടയുന്ന ഉപ്പയുടെ മേൽ ചാടിവീണ ആഫ്രിക്കക്കാരൻ കുഞ്ഞുമടക്കം, വിവേചനരഹിതമായി വെടിയുതിർക്കാൻ ടാറൻറിനെ പ്രേരിപ്പിച്ചത്​. 2017ൽ ക്യുബെക്കിലെ മസ്​ജിദിലും പിറ്റ്​സ്​ബർഗ്​ ജൂതപ്പള്ളിയിലും നടന്ന കശാപ്പുകളും ഇതി​​െൻറ ഭാഗമായിരുന്നു​. ആൻഡേഴ്​സ്​ ബ്രെവിക്​ ‘യൂറോപ്പിനെ മാർക്​സിസത്തിൽനിന്നും മുസ്​ലിംവത്​കരണത്തിൽനിന്നും രക്ഷപ്പെടുത്താനുള്ള അനിവാര്യ ബാധ്യത’യായാണ്​ നോർവേയിലെ ത​​െൻറ കൂട്ടക്കൊലയെ വിശേഷിപ്പിച്ചത്​.

മതത്തി​​െൻറ അധ്യാപനങ്ങളെ ദുരുപയോഗം ചെയ്​തുള്ള വംശവെറിയുടെ കെടുതിയാണ്​ ലോകം കണ്ടുകൊണ്ടിരിക്കുന്നത്​. വംശീയത തുടങ്ങുന്നത്​ സിദ്ധാന്തങ്ങളിലാണെങ്കിലും ഒടുക്കം അക്രമത്തിലായിരിക്കും. ന്യൂസിലൻഡിൽ കൂട്ടക്കൊല നടന്ന അതേ ദിവസം നമ്മുടെ സുപ്രീംകോടതിയിൽ ഇന്ത്യൻ മുസ്​ലിംകളെ പാകിസ്​താനിലയക്കണമെന്ന്​ ആവശ്യപ്പെട്ടുള്ള പെറ്റീഷൻ പരിഗണനക്കു വന്ന കാര്യം ശ്രദ്ധിക്കുക. പരമോന്നത കോടതി നിശിതവിമർശനത്തോടെ അത്​ തള്ളി. അതേസമയം, പാകിസ്​താൻ മുസ്​ലിംരാഷ്​ട്രമായി പ്രഖ്യാപിച്ചതിനാൽ ഇന്ത്യ ഹിന്ദുരാഷ്​ട്രമായി പ്രഖ്യാപിക്കണമെന്ന് മേഘാലയ ഹൈകോടതി ഒരു വിധിയിൽ പരാമർശിച്ചിരുന്നു. രാജ്യത്തിനകത്തുള്ളവരെ അന്യവത്​കരിച്ച്​ ശത്രുക്കളായി പ്രഖ്യാപിച്ച ‘വിചാരധാര’ അടിസ്​ഥാനപ്പെടുത്തി ഭരണം നടത്തുന്ന ‘ഹിന്ദുത്വ’ വംശീയതയുടെ ആധിപത്യം, സാക്ഷി മഹാരാജ്​ പറഞ്ഞപോലെ പാർലമ​െൻറും തെരഞ്ഞെടുപ്പ​ും അപ്രസക്​തമാക്കി, രാജ്യത്തെ കീഴ്​മേൽ മറിക്കാൻ കച്ചമുറുക്കിയിരിക്കെ ന്യൂസിലൻഡ്​ വംശഹത്യ പൊള്ളിക്കുന്ന പാഠങ്ങളാണ്​ ഇന്ത്യക്കു നൽകുന്നത്​. ഒപ്പം, അവിടത്തെ​ പ്രധാനമന്ത്രി ജസിന്ത ആർഡനും സിഖുകാരടക്കമുള്ള പ്രവാസിസമൂഹവും മനുഷ്യത്വം മരിച്ചിട്ടില്ലാത്തവരും കാഴ്​ചവെക്കുന്ന പ്രതിരോധത്തി​​െൻറ പാഠങ്ങളുമുണ്ട്​. ഏതുവഴിയെ നീങ്ങണമെന്ന്​ നമ്മൾ തീരുമാനിച്ചുറച്ചാൽ മതി.
l