പരിഹാരം ഓൺലൈൻ സാക്ഷരത

കോവിഡ് 19 വിളയാടിയപ്പോൾ ലാഭം കൊയ്തത്​ കൂടുതലും ഓൺലൈൻ ഗെയിമുകളാണ്. കോവിഡ്​കാലത്ത്​ വിദ്യാഭ്യാസസ്ഥാപനങ്ങൾ അടഞ്ഞുകിടന്നതും പല സ്ഥാപനങ്ങളിലും ഉദ്യോഗാർഥികളെ പകുതിയായി കുറച്ചതും ഐ.ടി മേഖലകളിലുൾ​െപ്പടെ വീടുകളിലിരുന്നു​ തന്നെ ജോലിചെയ്യാൻ അവസരം ഉണ്ടായതുമെല്ലാം കുട്ടികളിലേക്കും യുവാക്കളിലേക്കും എന്തിന്​ മൊബൈൽ പോലുള്ള ഗാഡ്ജറ്റുകൾ കൂടുതലായി ഉപയോഗിക്കാനറിയാത്തവർക്കിടയിലേക്കുപോലും കരുത്തോടെ കടന്നുചെല്ലാൻ ഓൺലൈൻ ഗെയിമുകൾക്ക്​ അവസരമായി.

കുറച്ച്കാലം മുമ്പ്​ പത്ര-ദൃശ്യമാധ്യമങ്ങളിൽവന്ന വാർത്തകൾ മലയാളികൾ മറന്നിട്ടുണ്ടാകില്ല. തിരുവനന്തപുരം വഞ്ചിയൂർ സബ്ട്രഷറിയിലെ സീനിയർ അക്കൗണ്ടൻറായ ബിജുലാലും ദമ്പതി കൊലക്കേസിലെ പ്രതിയായ ബിലാലും. അത്​ വലിയ കേസായതിനാൽ ജനങ്ങൾ ഇവരുടെ കഥകളറിഞ്ഞു. എന്നാൽ, അറിയാതെപോകുന്ന കഥകൾ അതിലുമെത്രയോ ഇരട്ടിയാണ്. പണം നഷ്​ടപ്പെട്ടത്​ പുറത്തറിഞ്ഞാലുണ്ടാകുന്ന നാണക്കേട്​ ഭയന്ന്​ പുറത്തു പറയാതിരിക്കുന്ന അനേകം ഇരകൾ ഇന്നും കേരളത്തിലെ ഓരോ ജില്ലയിലും നിരവധിയാണ്. ഓൺലൈൻ റമ്മികളിയുടെ അടിമയായ യുവാവായ ബിലാൽ പണം കണ്ടെത്തുന്നതിന്​ മോഷണം നടത്താൻ തെരഞ്ഞെടുത്തത്​ പരിചയക്കാരനായ മുഹമ്മദ്​ സാലിയുടെ വീടായിരുന്നു. മോഷണശ്രമം അവസാനം മുഹമ്മദ്​ സാലിയുടെയും ഭാര്യ ഷീബയുടെയും കൊലപാതകത്തിൽ ചെന്നെത്തി. ബിലാലി​െൻറ വയസ്സോ വെറും 23.

ചെറുപ്പക്കാരാണ്​ കൂടുതലായും ഇത്തരം ഗെയിമിൽ ചെന്നു പെടുന്നത്. ബാങ്ക്​ ബാലൻസും എ.ടി.എം കാർഡും കൈയിലുള്ളവരാണ്​ ഏറെ യുവാക്കളും. വീട്ടുകാരുടെ​ െക്രഡിറ്റ്​ കാർഡ്​ ഉൾപ്പെടെ ഉപയോഗിക്കുന്ന ധാരാളം കുട്ടികളുണ്ട്. അവസാനം ബാങ്ക്​ ബാലൻസും സ്വർണംപോലെ വിലപിടിപ്പുള്ള പലതും നഷ്​ടമാകുമ്പോഴാണ്​ പലരും ചതികൾ തിരിച്ചറിയുന്നതുതന്നെ. ഒരു കൗതുകത്തിന്​ തുടങ്ങുന്ന ഇത്തരം ഗെയിമുകൾ പണനഷ്​ടത്തിൽ മാത്രമല്ല, മാനസികവിഭ്രാന്തിയിലും വിഷാദരോഗത്തിലും ഒടുവിൽ ആത്മഹത്യയിലും വരെഎത്തിക്കുന്നു.

പലരും ഓഫിസിലോ ക്ലാസുകൾക്കിടയിൽ കിട്ടുന്ന ഫ്രീ ടൈമിലോ ആണ് റമ്മികളി തുടങ്ങുക. പിന്നീട്​ ജോലി, പഠനം എന്ന രീതിയിൽ പരിസരം മറന്ന്,​ സമയം മറന്ന്​ കളിയോടു കളിയാകും. പല സൈറ്റുകളിലും മാറിമാറി കളിക്കുന്നവരുണ്ട്. ആദ്യമെല്ലാം ചെറിയ തുകകൾ കിട്ടിയും പോയുമിരിക്കും. പിന്നീട്​ സൈറ്റുകളുടെ എണ്ണം കൂട്ടുകയും കിട്ടുന്ന തുക ഇരട്ടികളായി മാറുകയും ചെയ്യും. പിന്നീട്​ കുറച്ച്​ കിട്ടുകയും കൂടുതൽ നഷ്​ടപ്പെടുകയും ചെയ്യും. അതോടെ അടുത്ത കളിക്ക്​ കൂടുതൽ നേടാൻ കഴിയുമെന്ന മിഥ്യാധാരണയിൽ കളിയിൽ പൂർണമായും വ്യാപൃതനാകും. നഷ്​ടങ്ങളുടെ കണക്കു വരുമ്പോൾ ഇല്ലാത്ത പണം കണ്ടെത്തി അടുത്തത്​ വെട്ടിപ്പിടിക്കാൻ ഒരുങ്ങും.

ഇരകളുടെ വാക്കുകളിൽനിന്നും മനസ്സിലാകുന്നത്​ തുടക്കത്തിൽ കുറച്ച്​ കുറച്ചായി പലതവണ പണം കൈയിൽവന്നെന്നും പിന്നീട്​ പലതവണകളായി നേട്ടത്തിനേക്കാൾ ഇരട്ടിയിലധികം നഷ്​ടങ്ങൾ വരുന്നുവെന്നുമാണ്​. അടുത്ത കളിക്ക്​ കൂടുതൽ നേടാം എന്ന വ്യാമോഹത്താൽ കളി തുടർന്നുപോകുകയാണ്​. വീട്ടുജോലി ചെയ്​തു സമ്പാദിച്ച മൂന്നു ലക്ഷത്തോളം രൂപ ഭർത്താവ്​ റമ്മി കളിച്ച്​ നഷ്​ടമായ കോഴിക്കോട്ടുകാരിയും നഷ്​ടപ്പെട്ട പണം തിരികെ ലഭിക്കാൻ പണമുണ്ടാക്കാനായി കഞ്ചാവും മയക്കുമരുന്നും കച്ചവടങ്ങളിലേക്കു തിരിയുന്ന യുവാക്കളും എണ്ണത്തിൽ പെരുകികൊണ്ടിരിക്കുന്നു. പലരും പണം നഷ്​ടപ്പെട്ട മാനസിക വിഭ്രാന്തിമൂലം കഞ്ചാവിലും മയക്കുമരുന്നിലും അഭയം കണ്ടെത്തുന്നു. ചോദ്യം ചെയ്യുന്ന വീട്ടുകാർക്കു നേരെ ക്രൂരമായ അക്രമവാസന പ്രകടിപ്പിക്കുന്നു.

ആൻഡ്രോയിഡ്, ഐ.ഒ.എസ്​ ആപ്, വെബ്സൈറ്റ്​ എന്നിങ്ങനെയെല്ലാം റമ്മി നിലവിലുണ്ട്. ആകർഷകമായ ബോണസുകളുമായാണ്​ ഈ ഓൺലൈൻ റമ്മി നമുക്കായി വലവിരിക്കുന്നത്. മയക്കുമരുന്ന്​ ചെറിയ ഡോസിൽ കൊടുത്ത്​ അടിമയാക്കുന്നതുപോലെ ചെറിയ ചെറിയ ബോണസ്​ തുകകൾ നൽകി ഈ വലയിലേക്ക്​ മുഴുവനായി വീഴ്ത്തി വരിഞ്ഞുമുറുക്കുകയാണ്​ ചെയ്യുന്നത്. 95 ശതമാനം ഈ കുരുക്കിൽ വീണവർക്ക്​ രക്ഷപ്പെടാനുള്ള അവസരമില്ല. അഡിക്​ഷനായാൽ ഇവരെ തിരിച്ചെടുക്കാൻ ഏറെ ബുദ്ധിമുട്ടാണ്​.

പണ്ട്​ നാട്ടിൻപുറങ്ങളിൽ കൂട്ടംകൂടി പണം​െവച്ച്​ ശീട്ട്​ കളിച്ച്​ തോൽക്കുമ്പോൾ തല്ലുണ്ടാക്കുകയും ധാരാളം അപകടങ്ങൾ, എന്തിന്​ കൊലപാതകങ്ങൾ വരെ നടക്കുന്ന അവസ്ഥയുണ്ടായിരുന്നു. ധാരാളം ആളുകൾ കൂടിനിൽക്കുകയും പലതരം അഭിപ്രായങ്ങൾ ഉണ്ടാകുകയും ചെയ്യുന്നതിനാൽ അവിടെ അപകട സാധ്യതക്ക്​ അൽപം കുറവുണ്ട്. എന്നാൽ, ഇത്​ അടച്ചിട്ട സ്വന്തം മുറിയിൽ ഇരുന്നുള്ള കളികളാകുമ്പോൾ മാനസികനിലയുടെ സമ്മർദം തിരിച്ചറിയാതെപോകുന്നു.

ടിക്ടോക്​ പോ​െല ഇത്തരം ഗെയിമുകൾ നിരോധിച്ചുകൂടേ എന്ന്​ ചോദിക്കുന്നവരോട്​ ഒന്നേ പറയാനുള്ളൂ. ഒന്നാമത്​ മറ്റു രാജ്യങ്ങളിൽനിന്ന്​ റിലീസ്​ ചെയ്യുന്ന ഇത്തരം ഗെയിമുകൾ നിരോധിക്കാൻ ഇവിടത്തെ സർക്കാറിന്​ പരിമിതികളുണ്ട്. ഇനി നിരോധനം നടന്നാൽ തന്നെ നിമിഷങ്ങൾ കൊണ്ട്​ വേറെ ഒരു രാജ്യത്തു നിന്നോ ഐ.പി അഡ്രസിൽനിന്നോ ഇത്തരം ഗെയിമുകൾ റിലീസ്​ ആകും, മാത്രമല്ല ഇത്തരം ഗെയിമുകൾ നിർമിക്കുന്ന അനേകം കമ്പനികൾ കൂണുപോലെ പൊട്ടിമുളക്കുകയും ചെയ്യും.

ഇവിടെ വേണ്ടത്​ ശക്തമായ ഡിജിറ്റൽബോധവത്​കരണമാണ്. പലർക്കും ഇൻറർനെറ്റ്, ഗാഡ്ജറ്റുകൾ എന്നിവയെക്കുറിച്ച്​ എൽ.കെ.ജി കുട്ടിയുടെ അറിവുപോലുമില്ല. സംഭവലോകത്ത്​ നടക്കുന്നതിനേക്കാൾ പതിന്മടങ്ങ്​ കുറ്റകൃത്യങ്ങൾ നിറഞ്ഞതാണ്​ സൈബർലോകം. അവിടത്തെ ചതികളും കുറ്റകൃത്യങ്ങളും ഒരു ശതമാനം പോലും ജനങ്ങൾ തിരിച്ചറിയുന്നില്ല. ഒരു പരിചയവുമില്ലാത്ത ആളുകൾക്ക്​ ലക്ഷക്കണക്കിന്​ രൂപ ഗെയിമിലൂടെ കിട്ടുമെന്ന്​ ഒരു സൈറ്റിൽ പരസ്യം കാണുമ്പോൾ ചാടിവീഴുന്ന പ്രവണത മാറ്റി ഒരു നിമിഷം ചിന്തിച്ച്​ പ്രവർത്തിക്കാനുള്ള ബോധവത്​കരണം തന്നെയാണ്​ വേണ്ടത്. പ്രശസ്തരായവരും സിനിമക്കാരും അഭിനയിക്കുന്ന പെയ്ഡ്പരസ്യങ്ങളിൽ ആകൃഷ്​ടരായി ചതിയിൽപെടുന്നവരാണ്​ ഏറെ. ഞങ്ങൾക്ക്​ ഓരോ ദിവസവും ആയിരങ്ങളും ലക്ഷങ്ങളും കിട്ടുന്നു എന്നൊക്കെയുള്ള അവരുടെ വാക്കുകൾ കേൾക്കുമ്പോൾ അത്യാവശ്യം ഈ കളിയെ കുറിച്ച്​ അറിയുന്നവർ ചാടിവീഴും. ചെറിയ തുകകൾ കിട്ടുന്നതിന്​ അവർ പബ്ലിസിറ്റി കൊടുക്കും.

മനുഷ്യർ അവരുടെ നേട്ടത്തിനായി തയാറാക്കി​െവച്ചതാണ്​ ഇൗ ​ഗെയിം സോഫ്റ്റു വെയറുകൾ. ഗെയിമുകളുടെ ഓരോ ചലനവും പ്രോഗ്രാം ചെയ്​ത്​ തയാറാക്കിയിട്ടുള്ള പോലെയേ നടക്കൂ. ഫ്രീയായിട്ട്​ ഒന്നും നമുക്ക്​ കിട്ടി​െല്ലന്നത്​ സത്യം. നമ്മുടെ വിലയേറിയ സമയത്തെ മാത്രമല്ല, അതിലൂടെ നമ്മുടെ സ്വകാര്യതയും നമ്മൾ അവർക്ക്​​ പണയം വെക്കുകയാണ്. ഓരോ ഗെയിമും ഡൗൺലോഡ്​ ചെയ്യുമ്പോൾ അവർ ചോദിക്കുന്ന ചോദ്യങ്ങൾക്ക്​ നമ്മൾ കൃത്യമായ ഉത്തരം നൽകുന്നുണ്ട്. കാമറ, ബാങ്ക്​ അക്കൗണ്ട്, ഒ.ടി.പി, ഇ-മെയിൽ ഐ.ഡി, ഫോൺ നമ്പർ, ആധാർ അങ്ങനെ അങ്ങനെ എല്ലാം അവർക്ക്​ മുന്നിൽ തുറന്നുകൊടുക്കുന്നു. അതിലൂടെ വിലയേറിയ പലതും ഫോൺ മുഖേന നഷ്​ടമാകുന്നു.

അധികംവൈകാതെ തന്നെ ഇതിനെതിരെ നിയമനടപടികൾ നിലവിൽ വരുമെന്ന്​ പ്രതീക്ഷിക്കുന്നു. നിലവിലെ സംവിധാനത്തിൽ മൊബൈൽ കമ്പനികളും ബാങ്കുകളും ഒ.ടി.പി നൽകരുത്, ബാങ്ക്​ ഡീറ്റെയിൽസ്​ നൽകരുത്​ എന്നൊക്കെ അപകടങ്ങളെകുറിച്ച്​ മുൻവിധിയായി മെസേജുകൾ അയക്കുന്നുണ്ട്. പക്ഷേ, അതൊന്നും ഇതിന്​ പ്രതിവിധിയല്ല. കേരളത്തിൽ സൈബർ പൊലീസ്​ സ്​റ്റേഷനിലും സൈബർ സെല്ലുകളിലും നേരിട്ട്​ ആർ.ബി.ഐയുടെസൈറ്റിലും പൊലീസി​െൻറ വെബ്സൈറ്റിലും പരാതി കൊടുക്കാം. എങ്കിലും ഏറ്റവും അത്യാവശ്യം ഓൺലൈൻ വിദ്യാഭ്യാസം തന്നെ. സ്കൂൾ തലത്തിൽതന്നെ ഒരു പാഠ്യവിഷയമായി സൈബർ വിദ്യാഭ്യാസം ഉൾപ്പെടുത്തേണ്ടതുണ്ട്. അതിനായി സർക്കാർ മുൻകൈയെടുക്കണം.

(എഴുത്ത്​: ഡോ.പാട്ടത്തിൽ ധന്യ മേനോൻ. സൈബർ ക്രൈം അന്വേഷകയായ ലേഖിക തൃശൂരിലെ അവാൻസോ സൈബർസെക്യൂരിറ്റീസുമായി ബന്ധപ്പെട്ട്​ പ്രവർത്തിക്കുന്നു)