യോഗി ആദിത്യനാഥ് എന്ന 'സായുധ സന്യാസി'

ആരാണ്​ ആദിത്യനാഥ്​?

സ്വന്തം സംസ്​ഥാനത്തെ നിയമസഭാ തെരഞ്ഞെടുപ്പ്​ വേളയിൽ ഇന്ത്യയിലെ മറ്റു സംസ്​ഥാനങ്ങളെ അവഹേളിക്കുവാനും അവമതിക്കുവാനും ഒരു മുഖ്യമന്ത്രി തയ്യാറാവുന്നത്​ പുതിയ കാര്യമാണ്​. ദൗർഭാഗ്യവശാൽ യു.പി തെരഞ്ഞെടുപ്പ്​ പ്രചാരണവേളയിൽ അവിടുത്തെ മുഖ്യമന്ത്രി യോഗി ആദിത്യനാഥ്​ ​ഒന്നിലേറെ തവണ കേരളത്തെക്കുറിച്ച്​ തീർത്തും മോശമായ പരാമർശങ്ങൾ നടത്തി. സാമൂഹിക വികസന സൂചികകളിലെല്ലാം ഏറെ പിന്നിൽ നിൽക്കുന്ന യു.പിയിലെ മുഖ്യമന്ത്രി ഇത്തരത്തിലെല്ലാം സംസാരിക്കുന്നത്​ എന്തു കൊണ്ടാണ്​. പ്രമുഖ മാധ്യമ പ്രവർത്തക നേഹ ദീക്ഷിത്​ എഴുതിയ ആദിത്യനാഥിന്‍റെ രാഷ്​ട്രീയ രേഖാചിത്രം അതിനുള്ള ഉത്തരം നൽകും.

1998ലാണ്​ വലതുപക്ഷ ഹിന്ദുത്വ ദേശീയവാദ സംഘടനയായ ഭാരതീയ ജനതാ പാർട്ടി ഇന്ത്യയിൽ ആദ്യമായി അധികാരത്തിലെത്തുന്നത്​. അയോധ്യയിലെ ബാബറി മസ്​ജിദ്​ തകർത്ത്​ ക്ഷേത്രം നിർമിക്കാൻ രൂപവത്​കരിച്ച മുന്നേറ്റമാണ്​ രണ്ട്​ പാർലമെന്‍റംഗങ്ങൾ മാത്രമുണ്ടായിരുന്ന പാർട്ടിയെ രാജ്യഭരണം കൈയാളാനുതകുന്നത്ര വലുതാക്കിയത്​. അതിനിടയിൽ രാജ്യമൊട്ടാകെയുണ്ടായ വർഗീയ കലാപങ്ങളിൽ ആയിരങ്ങൾക്ക്​ ജീവൻ നഷ്​ടപ്പെട്ടു, ദശലക്ഷക്കണക്കിനാളുകൾക്ക്​ കിടപ്പാടവും സ്വത്തുക്കളുമെല്ലാം പോയി. അതിനെല്ലാമുപരിയായി മതേതര ഇന്ത്യൻ റിപബ്ലിക്കി​ൽ ഹിന്ദു മേൽകോയ്​മാവാദ, വർഗീയ രാഷ്​ട്രീയം പിടിമുറുക്കി. ബി.ജെ.പിക്ക്​ ഭരണത്തിലേറിയ ആ പൊതു തെരഞ്ഞെടുപ്പിൽ ഏറ്റവം പ്രായം കുറഞ്ഞ അംഗം ഉത്തർ പ്രദേശിലെ (യു.പി) ഗോരഖ്​പൂർ ​ലോക്​സഭാ മണ്ഡലത്തിൽ നിന്ന്​ തെരഞ്ഞെടുക്കപ്പെട്ട 26കാരനായിരുന്നു. പേര്​- യോഗി ആദിത്യനാഥ്​. ഇതേ മനുഷ്യൻ 19 വർഷങ്ങൾക്ക്​ ശേഷം 2017ൽ രാമജന്മഭൂമി തർക്കം നടക്കുന്ന യു.പിയുടെ മുഖ്യമന്ത്രിയായി.

അജയ്​ സിങ്​ ഭിഷ്​ട്​ യോഗിയാവുന്നു

ഉത്തരാഖണ്ഡിൽ ജനിച്ച അജയ്​ സിങ്​ ഭിഷ്​ട്​ ഗോരഖ്​പൂരിലെ ഗോരഖ്​നാഥ്​ മഠത്തിൽ ചേർന്ന ശേഷമാണ്​ പേരു മാറ്റിയത്​. 22-ാം വയസിൽ ഗണിതശാസ്​ത്ര ബിരുദം നേടിയ ശേഷമാണ്​​ മഠത്തിലെത്തിയത്​. 11-ാം നൂറ്റാണ്ടിൽ ജീവിച്ച വിശുദ്ധനാണ്​ ഗോരഖ്​നാഥ്​. വിഗ്രഹാരാധനയിൽ വിശ്വസിക്കാത്ത, ഏകദൈവത്വം പ്രഘോഷിക്കുന്ന നാഥ്​ അധ്യപനങ്ങൾ നാനാ ജാതി മതസ്​ഥരെ ആകർഷിച്ചു പോന്നു. ഹിന്ദു വർണാശ്രമ വ്യവസ്​ഥയിൽ നിന്ന്​ ഭിന്നമായി മഠത്തിൽ അബ്രാഹ്​മണ പൂജാരിമാരാണുണ്ടാവാറ്​. മഠത്തി​ന്‍റെ ആഭിമുഖ്യത്തിൽ സ്​കൂളുകൾ, ആശുപത്രികൾ, ഗോശാല എന്നിവയെല്ലാമുണ്ട്​.

അജയ്​ സന്യാസം സ്വീകരിച്ച ശേഷം അച്​ഛ​ന്‍റെ പേരിന്‍റെ സ്​ഥാനത്ത്​ ആത്​മീയ ഗുരുവും മഠാധിപതിയുമായ മഹർഷി അവൈദ്യനാഥിന്‍റെ പേര്​ ചേർത്തു. മഠത്തിന്‍റെ ആദ്യകാല പാരമ്പര്യത്തിൽ നിന്ന്​ വിഭിന്നമായി പിൽകാല മഠാധിപതിമാർ ഗോരഖ്​പൂരിനെ ഹിന്ദുത്വ രാഷ്​ട്രീയത്തി​ന്‍റെ മുഖ്യകേന്ദ്രമാക്കി മാറ്റുന്നതിൽ വലിയ പങ്കുവഹിച്ചു. വിഗ്രഹാരാധന ഇല്ലാതിരുന്ന മഠത്തിലിപ്പോൾ നിരവധി ദേവന്മാരെ പൂജിക്കുന്നു. മേധാവിമാർ സജീവ രാഷ്​ട്രീയത്തി​ന്‍റെ ഭാഗമായി പ്രവർത്തിക്കുന്നു. നാലുതവണ ഗോരഖ്​പൂരിൽ നിന്ന്​ തെരഞ്ഞെടുക്കപ്പെട്ട അവൈദ്യനാഥ്​ രാമജന്മഭുമി പ്രസ്​ഥാനത്തിലെ ഒരു മുഖ്യകഥാപാത്രമാണ്​. മുൻഗാമിയായ ദിഗ്​വിജയാനന്ദ്​ ഗാന്ധി കൊലപാതകത്തിൽ ​പങ്കുവഹിച്ച ഹിന്ദു മഹാസഭ അംഗമായിരുന്നു. 1948 ജനുവരി 27ന്​ ഹിന്ദുക്കളോട്​ ഗാന്ധിജിയെ കൊല്ലാൻ പൊതുവേദിയിൽ ആഹ്വാനം ചെയ്​തതിന്​ ഒമ്പതുമാസം ജയിലിൽ കിടന്നു. ഗാന്ധി ഹത്യയുടെ രണ്ടാം വർഷം സംഘടനയുടെ ജനറൽ സെക്രട്ടറി പദവിയിലെത്തിയ ഇയാളുടെ കുപ്രസിദ്ധമായ ഒരു പറച്ചിലുണ്ട്​- ''ഞങ്ങൾ അധികാരത്തിൽ വന്നാൽ മുസ്​ലിംകളുടെ വോട്ടവകാശം അഞ്ച്​-പത്തു കൊല്ലത്തേക്ക്​ എടുത്തുകളയും, അവരുടെ ദേശീയവാദികളാണോ എന്ന്​ ഭരണകൂടത്തിന്​ ഉറപ്പുവരുത്താൻ വേണ്ടിയാണത്​''.

വടക്കേ ഇന്ത്യയിലെ ഏറ്റവും വലിയ റെയിൽവേ ഹബ്ബായ ഗോരഖ്​പൂരിൽ ഏറെ കാലമായി സംഘടിത കുറ്റകൃത്യങ്ങൾ തുടർക്കഥയാണെന്ന്​ ഇന്നാട്ടുകാരനായ എഴുത്തുകാരൻ ഉമൈർ അഹ്​മദ്​ ഓർമിക്കുന്നു. വൻതുകക്കുള്ള റെയിൽവേ കരാറുകൾ സംഘടിപ്പിച്ചെടുക്കുന്നതിനു വേണ്ടിയാണ്​ ഏറെ പോരാട്ടങ്ങളും. തൊഴിലില്ലായ്​മയും കുറഞ്ഞ സാമൂഹിക-സാമ്പത്തിക സൂചകങ്ങളുമാണ്​ ഈ പ്രദേശത്തിന്‍റെ ക്രിമിനൽവത്​കരണത്തിന്​ നിമിത്തമായത്​. കിഴക്കി​ന്‍റെ ചികാഗോ, സ്ലൈസ്​ ഓഫ്​ സിസിലി എന്നൊക്കെയാണ്​ വിളിപ്പേരുകൾ. ക്രിമിനൽ ഗുണ്ടാസംഘങ്ങളുടെ പോരാട്ടത്തെ 'വർചസ്​വാ കി ലഡായി' എന്നാണ്​ പറയാറ്​​; അതായത്​ പരമാധികാരത്തിനായുള്ള പോരാട്ടം. ആദ്യകാലങ്ങളിൽ​ പൊലീസ്​ വെടിവെച്ചു കൊന്ന ഗുണ്ടാനായകരിൽ അധികപേരും ബ്രാഹ്​മണരോ മറ്റു പിന്നാക്ക ജാതി (ഒ.ബി.സി) കളിൽ നിന്നുള്ളവരോ ആയിരുന്നു. ''ആദിത്യനാഥ്​ ത​ന്‍റെ മേൽജാതി ഠാക്കൂർ സ്വത്വം ഉയർത്തിപ്പിടിച്ചു. തന്‍റെ മുൻഗാമികളിൽ നിന്ന്​ ഭിന്നമായി പൊതുവേദികളിൽ പ്രത്യക്ഷപ്പെടുകയും യുവാക്കളിലുള്ള നിരാശ മുതലെടുത്ത്​ ഉയരുകയും ചെയ്യുകയായിരുന്നു'' ഉ​മൈർ കൂട്ടിച്ചേർക്കുന്നു.

ആദിത്യനാഥ്​ മഠത്തിലെത്തി​ അഞ്ചു വർഷമായപ്പോഴേക്ക്​ അവൈദ്യനാഥ്​ സജീവരാഷ്​ട്രീയത്തിൽ നിന്ന്​ വിരമിച്ചു, ആദിത്യനാഥിനെ തന്‍റെ പിൻഗാമിയും 1998ലെ പൊതു തെരഞ്ഞെടുപ്പിൽ ഗോരഖ്​പൂരിൽ നിന്നുള്ള സ്​ഥാനാർഥിയുമായി പ്രഖ്യാപിച്ചു. രണ്ടായിരത്തിലേറെ മുസ്​ലിംകളുടെ ജീവനെടുത്ത 2002ലെ ഗുജറാത്ത്​ വംശഹത്യ നടന്ന്​ രണ്ടു മാസം കഴിഞ്ഞ വേളയിൽ ആദിത്യനാഥി​ന്‍റെ നേതൃത്വത്തിൽ ഹിന്ദു യുവവാഹിനി (എച്ച്​.വൈ.വി) എന്ന സായുധ ഹിന്ദുത്വ സംഘടന രംഗത്ത്​ വന്നു. സംഘടന അംഗങ്ങളിൽ ഏറിയ കൂറും തൊഴിലില്ലാതെ നടക്കുന്ന ഹിന്ദു യുവാക്കളായിരുന്നു. ഹിന്ദുരാഷ്​ട്രം എന്ന ലക്ഷ്യം മുൻനിർത്തി ബി.ജെ.പിക്കെതിരെപ്പോലും ഇടക്ക്​ സ്​ഥാനാർഥികളെ ഇറക്കിയിരുന്നു അവർ. ​ഗോ സംരക്ഷണം, ക്രൈസ്​തവരെയും മുസ്​ലിംക​ളെയും ഹിന്ദുമതത്തിലേക്ക്​ തിരിച്ചു കൊണ്ടുവരാൻ ഘർവാപ്​സി, ലൗജിഹാദിനെ ചെറുക്കൽ എന്നിവയായിരുന്നു അജണ്ടകൾ. പശുവിനെ അറുത്തുവെന്നാരോപിച്ച്​ മുസ്​ലിംകൾക്ക്​ മേൽ കടന്നുകയറ്റം നടത്തി, ഹിന്ദു-മുസ്​ലിം ദമ്പതികളെ വേർപെടുത്തി, ഹിന്ദുക്ക​ളെ മതംമാറ്റുന്നുവെന്ന്​ പ്രചരിപ്പിച്ച്​ ചർച്ചുകളിൽ കയറി ഭീകരത അഴിച്ചുവിട്ടു.

1998 മുതൽ 2017 വരെ അഞ്ചു തവണ തുടർച്ചയായി ആദിത്യനാഥ്​ ഗോരഖ്​പൂരിൽ നിന്ന്​ എം.പിയായി. അതിനിടയിൽ എങ്ങനെവേണം ഒരു സമ​ഗ്രാധിപത്യ ഹിന്ദുരാഷ്​ട്രം എന്നതുസംബന്ധിച്ച ഒരു ചട്ടക്കൂടിനും രൂപം നൽകി. ബഹുസ്വര സംസ്​കാരത്തോട്​ തരിമ്പ്​ സഹിഷ്​ണുതയില്ലാത്ത, പൗരാവകാശങ്ങളെ പേർത്തും ഉല്ലംഘിക്കുന്ന, രാഷ്​ട്രീയ എതിരാളികളെ അടിച്ചമർത്തുന്ന ഒരിടം. ഈ കാലയളവിൽ ഗോരഖ്​പൂർ നിരവധിയായ വർഗീയ ലഹളകൾക്ക്​ വേദിയായി. ഇവിടുള്ള പൊലീസ്​ സ്​റ്റേഷനുകളിലെല്ലാം ഹൈന്ദവ ക്ഷേത്രങ്ങൾ നിർമിച്ചു, ഹനുമാൻ പൂജ എല്ലാ ആഴ്​ചയും നടന്നു. ഉർദുവിലുള്ള സ്​ഥലനാമങ്ങൾ ഹിന്ദിയിലാക്കി. മിയാ ബസാർ മായാ ബസാറും ഉർദു ബസാർ ഹിന്ദി ബസാറും അലി നഗർ ആര്യ നഗറുമാക്കി മാറ്റി. 2005ൽ ഇറ്റാവയിൽ 1800 ക്രൈസ്​തവരെ ഹിന്ദുമതത്തിലേക്ക്​ പരിവർത്തിപ്പിക്കുന്ന പരിപാടിക്ക്​ നേതൃത്വം നൽകി.

മഠം ഒരു സമാന്തര അധികാര വ്യവസ്​ഥയായി മാറി. ഭരണകൂടത്തിൽ നിന്നും ബാഹ്യമായുമുള്ള എന്തു പ്രശ്​നങ്ങളും പരിഹരിക്കുന്നതിന്​ ആളുകൾക്ക്​ സഹായം നൽകാൻ തുടങ്ങി. 2017 മാർച്ചിൽ മുഖ്യമ​ന്ത്രിപദമേൽക്കു​മ്പോൾ ആദിത്യനാഥിനെതിരെ വിദ്വേഷ ഭാഷണം, കൊലപാതകശ്രമം,വർഗീയ അതിക്രമത്തിന്​ ആഹ്വാനം ചെയ്യൽ എന്നിവയുൾപ്പെടെ 15 ഗുരുതര ക്രിമിനൽ കേസുകളുണ്ടായിരുന്നു. അധികാരമേറിയ ശേഷം തനിക്കെതിയായ കേസുകളെല്ലാം സ്വയമേവ എഴുതിത്തള്ളി. അമിത ബല​പ്രയോഗത്തിന്​ ശിക്ഷിക്കപ്പെടുകയല്ല, അതിന്‍റെ പേരിൽ അദ്ദേഹം പ്രകീർത്തിക്കപ്പെടുകയാണുണ്ടായത്​. പൊതുജനാരോഗ്യം, സമ്പദ്​വ്യവസ്​ഥ, വികസനം, വിദ്യാഭ്യാസം, ​തൊഴിൽ തുടങ്ങിയ വിഷയങ്ങളിലെല്ലാം മതസ്വത്വത്തിന്​ മേൽകോയ്​മ കൈവന്നു. ആദിത്യനാഥിനെ ചുറ്റിപ്പറ്റി അത്തരമൊരു കൾട്ട്​ തന്നെ രൂപപ്പെട്ടിരിക്കുന്നു.

കാവിയും കലാപാഹ്വാനങ്ങളും

സ്വതന്ത്ര ഇന്ത്യയുടെ ചരിത്രത്തിലാദ്യമായാണ്​ ഒരു സജീവ മതനേതാവ്​ ഇത്തരമൊരു ഉന്നത സ്​ഥാനത്തേക്ക്​ എത്തിപ്പെടുന്നത്​. അധികാരത്തിൽ ഒരു വർഷം പൂർത്തിയാകു​മ്പോഴേക്ക്​ മുഖ്യമന്ത്രിയുടെ ഓഫീസ്​, സംസ്​ഥാന സെക്രട്ടറിയേറ്റ്​, പൊതു കെട്ടിടങ്ങൾ, പൊലീസ്​ സ്​​റ്റേഷനുകൾ, ബസുകൾ, റോഡ്​ ഡിവൈഡറുകൾ, ടോൾ പ്ലാസകൾ, തുടങ്ങി സർക്കാർ ഓഫീസുകളിലെ കർട്ടനുകൾ, ടവലുകൾ, സർക്കാർ സ്​കൂൾ വിദ്യാർഥികൾക്ക്​ നൽകുന്ന ബാഗുകൾ വരെ കാവി നിറമായി മാറി, എന്തിനേറെ മുസ്​ലിം തീർഥാടകർക്ക്​ മക്കയിലേക്കും മദീനയിലേക്കും തീർഥയാത്ര പോകുവാൻ സൗകര്യമൊരുക്കുന്ന സംസ്​ഥാന ഹജ്​ ഹൗസ്​ പോലും. യു.പിയിലെ പൊതു ഇടങ്ങളും സർക്കാർ സൗകര്യങ്ങളും സംവിധാനങ്ങളുമെല്ലാം കാവിമയമാക്കുക വഴി ഭരണകൂടവും മതവും തമ്മിലെ വ്യത്യാസം നേർപ്പിച്ചെടുക്കുകയായിരുന്നു.

സമ്പൂർണ ഹിന്ദുത്വം സമസ്​ത മേഖലയിലും അടിച്ചേൽപ്പിക്കുന്നതിൽ തൽപരനായ ആദിത്യനാഥ്​ ബഹുസ്വരതയുടെ കടുത്ത എതിരാളിയുമാണ്​. 2008 യു.പിയിലെ സിദ്ധാർഥനഗറിൽ ഹിന്ദു യുവ വാഹിനി സംഘടിപ്പിച്ച വിരാട്​ ഹിന്ദുചേതനാ റാലിയിൽ സംസാരിക്കവെ ഹിന്ദു- മുസ്​ലിം സംസ്​കാരങ്ങൾക്ക്​ ഒരുവിധേനയും സഹവർത്തിത്തം സാധ്യമല്ലെന്നും ഒരു മത യുദ്ധം അനിവാര്യമാണെന്നുമാണ്​ പ്രഖ്യാപിച്ചത്​. ആദിത്യനാഥിന്‍റെ ഔദ്യോഗിക വെബ്​സൈറ്റിലുള്ള 'ഹിന്ദുക്കൾ അപകടത്തിൽ', 'ഇസ്​ലാമിക ഭീകരതയെ കരുതിയിരിക്കുക' തുടങ്ങി പല ലേഖനങ്ങളും ഇസ്​ലാംഭീതി വളർത്തുന്നവയാണ്​.

രാജ്യത്ത്​ വളർന്നുവരുന്ന അസഹിഷ്​ണുതക്കെതിരെ എഴുത്തുകാരും ശാസ്​ത്രജ്​ഞരും ചരിത്രകാരുമുൾപ്പെടെ രംഗത്തുവന്ന സാംസ്​കാരിക പ്രവർത്തകർക്കൊപ്പം അണിചേർന്നതിന്‍റെ പേരിൽ​ സൂപ്പർസ്​റ്റാർ ഷാരൂഖ്​ ഖാനെ പാക്​ ഭീകരൻ ഹഫീസ്​ സെയ്​ദുമായി താരതമ്യം ചെയ്​ത ആദിത്യനാഥ്​ ഹിന്ദു ജനത ഷാരൂഖിന്‍റെ സിനിമകൾ ബഹിഷ്​കരിക്കണമെന്ന്​ ആഹ്വാനം ചെയ്​തു, ഷാരൂഖിനോട്​​ പാകിസ്​താനിലേക്ക്​ പോകുവാനും പറഞ്ഞു. ഉത്തർപ്രദേശി​ന്‍റെ സമന്വയ ഭാവത്തിന്​ കനത്ത ആഘാതം വരുത്തിയ മുഖ്യമന്ത്രി ആദിത്യനാഥ്​ മാർച്ച്​ 2018ന്​ താനൊരു അഭിമാനിയായ ഹിന്ദുവാണെന്നും മുസ്​ലിംകളുടെ ആഘോഷമായ ഈദ്​ കൊണ്ടാടില്ലെന്നും യു.പി അസംബ്ലിയിൽ പരസ്യമായി പ്രഖ്യാപിച്ചു. ഗംഗാ-ജമുനി സംസ്​കാരം എന്ന്​ പുകൾ​​പെറ്റ യു.പിയുടെ ബഹുസ്വരതാ ജീവിതത്തിൽ നിന്നുള്ള വ്യതിചലനമായിരുന്നു അത്​.

ഹിന്ദു-മുസ്​ലിം സാംസ്​കാരിക ഘടകങ്ങളുടെ സമന്വയത്തിന്​ പേരുകേട്ട നാടായ യു.പിയിൽ 2011ലെ സെൻസസ്​ പ്രകാരം 19 ശതമാനം ജനങ്ങൾ മുസ്​ലിംകളാണ്​. നൂറ്റാണ്ടുകൾ പഴക്കമുള്ള മതാന്തര കൊടുക്കവാങ്ങലുകളുടെ ഫലമായി പാചകം, സാഹിത്യം, വസ്​ത്രരീതികൾ, ഉത്സവങ്ങൾ, കഥക്​ പോലുള്ള കലാരൂപങ്ങൾ തുടങ്ങി ജീവിതരീതിയിൽ തന്നെ ഇരു സമുദായങ്ങളുടെയും സമ്മിശ്രപൈതൃകം പ്രതിഫലിച്ചിരുന്നു.

ഹോളി ആഘോഷവേളയിൽ ബാരാബങ്കിയിലെ സൂഫിവിശുദ്ധൻ ഹാജി വാരിസ്​ അലി ഷായുടെ ദേവാ ശരീഫ്​ എന്നറിയപ്പെടുന്ന വെള്ള നിറത്തിലെ കുടീരം ചുമപ്പും മഞ്ഞയും പിങ്കും പർപ്പിളുമെല്ലാമായി നിറമേളമണിയും. 19-ാം നൂറ്റാണ്ടിൽ ജീവിച്ച വാരിസ്​ അലി വാർസി സൂഫി ചിന്താധാരയുടെ തുടക്കക്കാരനാണ്​.എല്ലാ മതങ്ങളും സ്​നേഹത്തിലും കരുണയിലും അധിഷ്​ഠിതമാണെന്ന്​ വിശ്വസിക്കുകയും പ്രഘോഷിക്കുകയും ചെയ്​ത അദ്ദേഹത്തിന്‍റെ അനുയായികളിൽ ഹിന്ദുക്കളും മുസ്​ലിംകളും സിഖുകാരും ക്രൈസ്തവരുമെല്ലാമുണ്ട്​, സ്വന്തം മതത്തിനുള്ളിൽ നിലകൊണ്ട്​ തന്നെയാണ്​ അവർ വാരിസ്​ അലിയെ പിൻപറ്റിയിരുന്നത്​. സഹിഷ്​ണുതാ സന്ദേശം ഉയർത്തിപ്പിടിക്കുന്നതിന്‍റെ ഭാഗായി നൂറ്റാണ്ടിലേറെയായി എല്ലാ വർഷവും ഈ കുടീരത്തിൽ വിപുലമായ ഹോളി ആഘോഷവും നടന്നുവരുന്നു.

2017 നവംബർ 26ന്​ തദ്ദേശസ്വയംഭരണ സ്​ഥാപനങ്ങളിലേക്ക്​ തെരഞ്ഞെടുപ്പ്​ പ്രചാരണം നടത്തവെ മുഖ്യമന്ത്രി ആദിത്യനാഥ്​ ദേവാ ശരീഫിലെ വൈദ്യുതി വിതരണ​ത്തിന്​ വർഗീയ നിറം നൽകി അതും ഒരു തെരഞ്ഞെടുപ്പ്​ വിഷയമാക്കി. 'ദേവയിൽ ആഴ്​ചയിൽ ഏഴുദിവസവും 24 മണിക്കൂറും വൈദ്യൂതി ലഭിക്കു​മ്പോൾ മഹാദേവന്​ ഇതൊന്നും കിട്ടുന്നില്ല, നമ്മളിതിന്​ മാറ്റം വരുത്തും'- എന്നായിരുന്നു പരാമർശം. അതേ ജില്ലയിൽ ഒരു മണിക്കൂർ വഴിദൂരം മാത്രമുള്ള ലോധേശ്വർ മഹാദേവ ക്ഷേത്രവും ദേവാ ശരീഫിനെപ്പോലെ സമന്വയ സംസ്​കാരത്തിന്‍റെ പ്രതീകമായിരുന്നു. നൂറ്റാണ്ടുകളായി ക്ഷേത്രവളപ്പിന്​ പുറത്ത്​ പൂജാസാമ​ഗ്രികളും കരകൗശല വസ്​തുക്കളും പാത്രങ്ങളും കളിപ്പാട്ടങ്ങളുമെല്ലാം വിൽക്കുന്ന കടകൾ നടത്തുന്നവരിൽ ഹിന്ദുക്കളും മുസ്​ലിംകളുമുണ്ട്​. നാടി​ന്‍റെ സമ്പദ്​വ്യവസ്​ഥയെ തുണക്കുന്ന മുഖ്യഘടകമായ ക്ഷേത്രത്തിലെ രണ്ട്​ വാർഷിക പരിപാടികൾ - മാർച്ച്​-ഏപ്രിൽ മാസങ്ങളിലായി ശിവരാത്രി ഉത്സവത്തിലും ഒക്​ടോബർ-നവംബർ മാസങ്ങളിലായി നടക്കുന്ന കന്നുകാലി മേളയിലും ഇരു മതക്കാരും ആഹ്ലാദാവേശപൂർവമാണ്​ എത്തിക്കൊണ്ടിരുന്നത്​. മതസൗഹാർദം കാത്തുസൂക്ഷിക്കുന്നതിൽ മുൻകാലങ്ങളിൽ ക്ഷേത്രത്തിലെ പുരോഹിതർ വലിയ പങ്കുവഹിച്ചിരുന്നു. ദേവയെയും മഹാദേവയെയും മതേതര പാരമ്പര്യങ്ങളെല്ലാം റദ്ദ്​ ചെയ്​ത്​ രണ്ട്​ മതങ്ങളുടെ അടയാളങ്ങളാക്കി ചിത്രീകരിച്ചു കളഞ്ഞു മുഖ്യമന്ത്രി.

യോഗി ആദിത്യനാഥിനെ അതേപടി അനുകരിച്ച്​ ഛോട്ടാ യോഗി എന്ന പേരുനേടിയ മഹന്ത്​ ആദിത്യനാഥ്​ തിവാരി 2017ൽ മഠത്തിലെ മുഖ്യപൂജാരിയായി. ആദിത്യനാഥി​ന്‍റെ പാതപിൻതുടരുന്ന ഇയാൾ ഹിന്ദു യുവവാഹിനിയുടെ പിന്തുണയോടെ ക്ഷേത്രത്തിനരികിൽ സ്​ഥിതി ചെയ്യുന്ന 200 വർഷം പഴക്കമുള്ള മസ്​ജിദിൽ ഉച്ചഭാഷണി ഉപയോഗിക്കുന്നതിൽ വിലക്കേർ​പ്പെടുത്താനും ക്ഷേത്രവളപ്പിനടുത്ത്​ കച്ചവടം നടത്തുന്ന മുസ്​ലിംകളെ ഒഴിപ്പിക്കാനുമായി പ്രചാരണങ്ങൾ നടത്തി. മുസ്​ലിം കച്ചവടക്കാരെ കഠോരമായ ദേശസുരക്ഷാ നിയമം (എൻ.എസ്​.എ)ചുമത്തി അറസ്​റ്റ്​ ചെയ്​തതിനെച്ചൊല്ലി നിരവധി വർഗീയ കലാപങ്ങളും ഈ മേഖലയിൽ റിപ്പോർട്ട്​ ചെയ്യപ്പെട്ടു.

''ഒരു മുസ്​ലിം തയ്യൽക്കാരൻ അയോധ്യയിലെ രാംലല്ലയെ വർഷങ്ങളോളം എങ്ങനെയാണ്​ പരിപാലിച്ചതെന്ന്​ ഇവർ മറന്നുപോയോ എന്നാണ്​ എനിക്ക്​ ചോദിക്കാനുള്ളത്​. ഓരോ വർഷവും മഹാദേവനെ കണ്ടുവണങ്ങാൻ എത്തുന്ന ഭക്​തജനങ്ങളെയും ഞങ്ങൾ ഞങ്ങൾ എത്ര നന്നായാണ്​ പരിചരിച്ചത്​''- ജയിലിലടക്കപ്പെട്ട റിസ്​വാൻ എന്ന യുവാവി​ന്‍റെ ഉമ്മ ഷക്കീലയുടെ വാക്കുകൾ.

അവരുടെ മകനെപ്പോലെ കുടുംബത്തി​ന്‍റെ ഏക അത്താണിയായി കാര്യങ്ങൾ നോക്കി നടത്തിയിരുന്നവരെ ഇത്തരത്തിൽ അറസ്​റ്റു ചെയ്​തു കൊണ്ടുപോകുന്നതോടെ രാജ്യത്തെ ഏറ്റവും സാമൂഹിക-സാമ്പത്തിക അവസ്​ഥയിൽ കഴിയുന്ന മുസ്​ലിം സമുദായാംഗങ്ങൾ കൂടുതൽ ദുർബലരാകുന്നു. സച്ചാർ സമിതിയുടെ റിപ്പോർട്ട്​ പ്രകാരം 31 ശതമാനം പേർ, അതായത്​ ഇന്ത്യൻ മുസ്​ലിം ജനസംഖ്യയുടെ ഏകദേശം മൂന്നിലൊന്നുപേരുടെ ജീവീതം ദാരിദ്യരേഖക്ക്​ കീഴിലാണ്​. ആദിത്യനാഥ്​ സർക്കാർ 18 മാസം അധികാരം പൂർത്തിയാക്കിയപ്പോഴേക്ക്​ 160 പേർക്കെതിരെയാണ്​ ദേശസുരക്ഷാ നിയമം ചുമത്തിയത്​. ഏറെയും ഇഷ്​ടികക്കളത്തിൽ ജോലി ചെയ്യുന്നവരും, റിക്ഷാവലിക്കാരും വഴിക്കച്ചവടക്കാരും, വിദ്യാർഥികളുമുൾപ്പെടെയുള്ള മുസ്​ലിംകൾ.

2018ജനുവരി മുതൽ 2020 ഡിസംബർ വരെ ഉത്തർപ്രദേശ്​ അധികൃതർ ചുമത്തിയ 120 കേസുകളിൽ മൂന്നിലൊന്നിലേറെയും മുസ്​ലിംകൾക്കെതിരെ ഗോവധം ആരോപിച്ചുള്ളതാണ്​. ഹിന്ദു സമൂഹത്തിലെ ചില വിഭാഗങ്ങൾക്കിടയിൽ വിശുദ്ധമൃഗമായി ഗണിക്കപ്പെടുന്ന പശു വലതുപക്ഷ രാഷ്​ട്രീയത്തെ ത്വരിതപ്പെടുത്തുന്നതിലെ പ്രധാന ഘടകമാണ്​. ഗോശാലകൾ സന്ദർശിച്ച്​ പശുക്കളെ പരിപാലിക്കുകയും പൂജിക്കുകയും ചെയ്യുന്ന ആദിത്യനാഥി​ന്‍റെ ദൃശ്യങ്ങൾ മാധ്യമങ്ങൾ ഇടക്കിടെ പ്രദർശിപ്പിക്കാറുണ്ട്​. കഴിഞ്ഞ വർഷം മഹാമാരി കൊടുമ്പിരി കൊണ്ടുനിൽക്കേ ആധുനിക ആരോഗ്യ ഉപകരണങ്ങൾ സഹിതം സർക്കാർ പശു സഹായതാ കേന്ദ്രങ്ങൾ തുറക്കുമെന്ന്​ റിപ്പോർട്ടുണ്ടായിരുന്നു.

ആദിത്യനാഥ്​ അധികാരമേറ്റതിൽ പിന്നെ മാംസഭക്ഷണം ഔദ്യോഗിക വിരുന്നുകളിൽ വിളമ്പാറില്ല. ഇന്ത്യ സസ്യാഹാരികളുടെ രാഷ്​ട്രമാണെന്ന പ്രചാരണം​ ഹിന്ദുവലതുപക്ഷം നടത്തിപ്പോരുന്നുണ്ട്​. എന്നാൽ കണക്കുകൾ കാണിക്കുന്നത്​ രാജ്യത്തെ 20 ശതമാനം പേർ മാത്രമാണ്​ സസ്യാഹാരികൾ എന്നാണ്​. ഹിന്ദു ഭൂരിപക്ഷവും മുസ്​ലിംകളും, ക്രൈസ്​തവരും സിഖുകാരും ബുദ്ധ മതസ്​ഥരുമുൾപ്പെടെ 80 ശതമാനം പേർ മാംസാഹാരം ഭക്ഷിക്കുന്നു. ഉപ​​യോഗിക്കുന്ന മാംസാഹാരത്തി​ന്‍റെ 15 ശതമാനം മാട്ടിറച്ചി​ (ബീഫ്​) ആണ്​. ഈ കാര്യകാരണങ്ങ​െളല്ലാം മറച്ചുവെച്ച്​ മുസ്​ലിംകളെ ഉന്നമിട്ട്​ പിടികൂടാനുള്ള ഒരു മറയാക്കി'പശുസംരക്ഷണം' ഹിന്ദുത്വ വാദികൾ ഉപയോഗപ്പെടുത്തുന്നു.

കശാപ്പ്​ വ്യവസായത്തെ ഉന്നമിട്ടു. 50 ലക്ഷം ഡോളർ വരുന്ന രാജ്യത്തു നിന്നുള്ള മാട്ടിറച്ചി കയറ്റുമതിയുടെ മൂന്നിൽ രണ്ട്​ ഭാഗവും നടത്തിപ്പോന്ന യു.പിയിലെ കശാപ്പ്​ വ്യവസായത്തെ യോഗി ഭരണകൂടം കാര്യമായി ഉന്നമിട്ടു. ഈ കച്ചവടമേഖലയിൽ കൂടുതലും മുസ്​ലിംകളാണ്​. കഴിഞ്ഞ നാലര വർഷത്തിനിടെ സർക്കാർ 150 അറവുശാലകൾ അനധികൃതമെന്ന്​ പറഞ്ഞ്​ അടച്ചുപൂട്ടി. 319 പേരെ കാലിക്കടത്തുകാർ എന്നാരോപിച്ച്​ അറസ്​റ്റിലാക്കുകയും ചെയ്​തു. അറസ്​റ്റു മാത്രമല്ല, പശുവിനെ അറത്തു എന്ന കിംവദന്തിയുടെ പുറത്ത്​ സംസ്​ഥാനത്ത്​ നിരവധി മുസ്​ലിംകൾ ആൾക്കൂട്ടക്കൊലക്കുമിരയായി. ''പശുവുണ്ടായിരുന്നില്ല, കത്തിയോ വെട്ടുകത്തിയോ രക്​തമോ ഇല്ലായിരുന്നു, ഞങ്ങളെ ആക്രമിച്ചത്​ മുസ്​ലിംകളാണ്​ എന്ന ഒറ്റ കാരണത്തിലാണ്''​.- 2018 ജൂണിൽ ഹാപൂർ ജില്ലയിൽ ഗോവധം ആരോപിച്ച്​ ഹിന്ദുത്വ സംഘം തല്ലിച്ചതച്ച സമിഉദ്ദീൻ പറയുന്നു.അദ്ദേഹത്തി​ന്‍റെ സുഹൃത്ത്​ ഖാസിമിനെ അവർ മർദിച്ചു കൊലപ്പെടുത്തുകയും ചെയ്​തു.

2017ലെ തെരഞ്ഞെടുപ്പ്​ പ്രചാരണവേളയിൽ ക്രമസമാധാന തകർച്ചയുടെ കാരണക്കാരെന്ന മട്ടിൽ യു.പിയിലെ കുറ്റകൃത്യനിരക്കിനെ മുസ്​ലിംകളുമായി ബന്ധിപ്പിച്ച്​ സംസാരിച്ചിരുന്നു ആദിത്യനാഥ്​​. ആദിത്യനാഥ്​ സർക്കാറിന്​ കീഴിൽ ഒക്​ടോബർ 2021 വരെയുള്ള കണക്ക്​ പ്രകാരം യു.പി പൊലീസ്​ 151 പേരെ 'ഏറ്റുമുട്ടൽ' എന്നറിയപ്പെടുന്ന പൊലീസ്​ വെടിവെപ്പിൽ കൊല്ലപ്പെട്ടു. 3,196 പേർക്ക്​ പരിക്കേറ്റു. ഭൂരിഭാഗം പേരും വിചാരണ നേരിടുന്നവരായിരുന്നു. 40 ശതമാനത്തിനടുത്ത്​ പേർ മുസ്​ലിംകളും ബാക്കി പട്ടികജാതി, മറ്റുപിന്നാക്ക വിഭാഗങ്ങളിൽ നിന്നുള്ളവരും. കൊല്ലപ്പെടുന്നവർ 17-45 പ്രായവിഭാഗത്തിൽപെടുന്നവരാണ്​. അവരുടെ അധ്വാനമായിരുന്നു കുടുംബങ്ങളിലെ ഏക വരുമാനമാർഗം. മിക്കവരും നിസ്സാര തുകയോ, ഭക്ഷണമോ അല്ലെങ്കിൽ ചെറിയ സ്വർണാഭരണങ്ങളോ മോഷ്​ടിച്ചെന്ന പെറ്റികേസുകളിൽ ആരോപണവിധേയരായി പിടിക്കപ്പെട്ടവരാണ്​. ഏറ്റമുട്ടൽ കൊലയുടെ എണ്ണപ്പെരുക്കവും ആദിത്യനാഥ്​ സർക്കാർ തങ്ങളുടെ വാർഷിക റിപ്പോർട്ടിൽ നേട്ടമായി എണ്ണിപ്പറയുന്നുണ്ട്​. സുപ്രിംകോടതി നി​ർ​ദേശങ്ങളെ ലംഘിച്ചുകൊണ്ട്​ പൊലീസുകാരെ പുരസ്​കരിക്കുകയും ​കൊണ്ടാടുകയും ചെയ്യപ്പെടുന്നു. സംഭവങ്ങളിൽ അന്വേഷണം ആവശ്യപ്പെടുന്ന ഇരകളുടെ ബന്ധുക്കളെ ഭീഷണിപ്പെടുത്തുകയും അവരുടെ വീടുകൾ അക്രമിക്കപ്പെടുകയും ചെയ്യുന്നു.

''ഇത്രമാത്രം ഭീകര ക്രിമിനലുകൾ നിറഞ്ഞ കുടുംബമാണ്​ ഞങ്ങളുടേതെങ്കിൽ രണ്ടുനേരം ഭക്ഷണം കഴിക്കാനുള്ള വകപോലും ഞങ്ങൾക്കില്ലാത്തതെന്താണ്​? ഇപ്പോഴും ഞങ്ങളീ കൂരപോലുള്ള വീട്ടിൽ പാർ​ക്കേണ്ടി വരുമായിരുന്നോ? 2017 ഒക്​ടോബറിൽ കൊല്ലപ്പെട്ട ഫുർഖാ​ന്‍റെ വിധവ നസ്​റീൻ ചോദിക്കുന്നു. ദേശീയ മനുഷ്യാവകാശ കമീഷൻ ആദിത്യനാഥ സർക്കാറിന്​ 12ലേറെ നോട്ടീസുകളയച്ചിട്ടുണ്ട്​. ഭരണകൂട അനുമതിയോടെ മുൻകൂർ ആസൂത്രണം ചെയ്​ത്​ നടപ്പാക്കുന്ന ഇത്തരം കൊലപാതകങ്ങളിൽ ആശങ്കയറിയിച്ച്​ ഐക്യരാഷ്​ട്രസഭയുടെ മനുഷ്യാവകാശ പ്രതിനിധി 2019 ജനുവരിയിൽ ഇന്ത്യൻ സർക്കാറിന്​ കത്തയച്ചിരുന്നു. സർക്കാർ അറിഞ്ഞ മട്ടുപോലും കാണിച്ചില്ല.

2016നും 2019നും ഇടയിൽ ന്യുനപക്ഷങ്ങൾക്കും ദലിതുകൾക്കുമെതിരെ നടന്ന കുറ്റകൃത്യങ്ങളുടെ പേരിൽ ദേശീയ മനുഷ്യാവകാശ കമീഷൻ രജിസ്​റ്റർ ​ചെയ്​ത 2,008 കേസുകളിൽ 43 ശതമാനം വിദ്വേഷ കൃത്യങ്ങളും യു.പിയിൽ നിന്നായിരുന്നു. ന്യൂനപക്ഷങ്ങളും ദലിതുകളും ആദിവാസികളും രാജ്യത്ത്​ ഏറ്റവും അരക്ഷിതമായ ദേശമാവുന്നു ഉത്തർ പ്രദേശ്​.

എതിർശബ്​ദത്തിന്​ ഇടമില്ലാത്ത ഇടം

'എതിരഭിപ്രായത്തിന്​ തരിമ്പ്​ ഇടമനുവദിക്കാൻ തയ്യാറല്ല ആദിത്യനാഥ്​, വിശിഷ്യാ ദലിത്​ സമുദായത്തിൽ നിന്നുള്ളവയെ'​- മീറത്തിലെ ജാതിവിരുദ്ധ കൂട്ടായ്​മയായ ബ്യൂ പാന്തേഴ്​സി​ന്‍റെ പ്രസിഡന്‍റ്​ സുശീൽ ഗൗതം പറയുന്നു. സംസ്​ഥാനത്തെ ജനസംഖ്യയുടെ 20 ശതമാനം വരുന്ന ദലിതുകൾക്ക്​ യു.പിയുടെ തെരഞ്ഞെടുപ്പ്​ രാഷ്​ട്രീയത്തിൽ നിർണായക പങ്കുവഹിക്കാനുണ്ട്​. ജാതിവ്യവസ്​ഥയുടെ അടിസ്​ഥാനത്തിനുള്ള സാമൂഹിക-സാമ്പത്തിക പാർശ്വവത്​കരണം, അയിത്തം, വിവേചനം എന്നിവയെല്ലാം നേരിടുന്നു ദലിതുകൾ.

ജാതീയത പ്രകടിപ്പിച്ചതിന്​ ആദിത്യനാഥിനെതിരെ പലവുരു വിമർശനങ്ങളുയർന്നിട്ടുണ്ട്​. 2017 മേയിൽ കിഴക്കൻ യു.പിയിലെ കുശിനഗറിൽ ദലിത്​ കുടുംബങ്ങൾക്കൊപ്പം ഒരു പൊതുയോഗം നടത്തിയിരുന്നു ആദിത്യനാഥ്​. പരിപാടിയുടെ തലേദിവസം ആ കുടുംബങ്ങൾക്ക്​ കുളിച്ച്​ വൃത്തിയായി യോഗത്തിനെത്തണമെന്ന നി​ർ​ദേശത്തോടെ സോപ്പും ഷാമ്പുവും വിതരണം ചെയ്യപ്പെട്ടു. പട്ടികജാതി-വർഗക്കാർക്കും മറ്റു പിന്നാക്ക വിഭാഗങ്ങൾക്കും സർക്കാർ ​വിദ്യാഭ്യാസ സ്​ഥാപനങ്ങളിലും ജോലികളിലും സംവരണം നൽകാൻ വ്യവസ്​ഥ ചെയ്യുന്നുണ്ട്​ ഇന്ത്യൻ ഭരണഘടന. എന്നാൽ, ആദിത്യനാഥ്​ സംവരണ നയത്തെ എതിർക്കുന്നു. അദ്ദേഹത്തി​ന്‍റെ ഭരണതലത്തിലെ ഉന്നത പൊലീസുദ്യോഗസ്​ഥരെല്ലാം ഠാക്കൂറുകളാണ്​. കൃത്യമായ മേൽജാതി മേൽക്കോയ്​മയാണ്​ സർക്കാറിൽ- സുശീൽ പറയുന്നു.

2017ൽ അധികാരമേറ്റ്​ ഒരു മാസം കഴിഞ്ഞതും സഹാറൻപൂർ ജില്ലയിലെ ഷബ്ബിർപൂർ ഗ്രാമത്തിൽ ബി.ആർ. അംബേദ്​കർ പ്രതിമ സ്​ഥാപിക്കാൻ ദലിതുകൾക്ക്​ ജില്ലാ ഭരണകൂടം അനുമതി നിഷേധിച്ചു. ഠാക്കൂർ സമുദായം എതിർപ്പ്​ ഉന്നയിച്ചുവെന്ന പേരിലാണ്​ ഇന്ത്യൻ ഭരണഘടനാ ശിൽപിയുടെ ​പ്രതിമക്ക്​ വിലക്കേർ​പ്പെടുത്തിയത്​. എന്നാൽ ഒരാഴ്​ച കഴിഞ്ഞതും അതേ ഗ്രാമത്തിൽ ഠാക്കൂർ സമുദായക്കാർക്ക്​ മഹാറാണാപ്രതാപിനെ വാഴ്​ത്തിക്കൊണ്ട്​ ഘോഷയാത്ര നടത്താൻ അനുമതി നൽകപ്പെട്ടു. ഇതിനിടയിൽ സംഘർഷം പൊട്ടിപ്പുറപ്പെടുകയും അക്രമിക്കൂട്ടം 55 ദലിത്​ വീടുകൾ തീയിട്ട്​ നശിപ്പിക്കുകയും ചെയ്​തു. നിരവധി പേർക്ക്​ പരിക്കേറ്റ സംഭവ ശേഷം അറസ്​റ്റിലായത്​ 50 ദലിതുകളും രണ്ട്​ ഠാക്കൂർമാരും.

അതേ പോലെ 2018 ആഗസ്​റ്റിൽ ഉൽദേപൂർ ഗ്രാമത്തിൽ ഠാക്കൂറുകളുടെ അക്രമത്തിൽ ദലിത്​ ബാലൻ കൊല്ലപ്പെട്ടതിനെതിരെ ദലിതുകൾ മീറത്ത്​ നഗരമധ്യത്തിലെ ചൗധരി ചരൺസിങ്​ പാർക്കിൽ നടത്താനിരുന്ന പ്രതിഷേധത്തിന്​ അനുമതി നിഷേധിക്കപ്പെട്ടു. ഇതേ സ്​ഥലത്താണ്​ കുറ്റാരോപിത​രോട്​​ ഐക്യദാർഢ്യം പ്രകടിപ്പിക്കാൻ ഠാക്കൂറുമാർ ഒരുമിച്ചു ചേർന്നത്​ എന്നു കൂടി അറിയുക. ദലിതുകൾ പ്രതിഷേധം നടത്താനൊരു​മ്പെട്ടാലുടൻ 144-ാം വകുപ്പ്​ പ്രകാരം നിരോധനാജ്​ഞ പ്രഖ്യാപിക്കപ്പെടും. മീറത്തി​ന്‍റെ ഭൂരിഭാഗം പ്രദേശങ്ങളും കഴിഞ്ഞ നാലര വർഷമായി 144ലാണെന്നും സുശീൽ ചൂണ്ടിക്കാട്ടുന്നു. വിഭവലഭ്യതയുടെ പരിമിതി ​മൂലം രാജ്യത്തെ അഞ്ച്​ ദലിത്​ വിദ്യാർഥികളിലൊരാൾ പഠിപ്പ്​ ഉപേക്ഷിക്കുന്നു എന്നാണ്​ ഈയിടെ പുറത്തുവന്ന റിപ്പോർട്ടുകൾ പറയുന്നത്​. അതിനിടയിൽ യോഗി സർക്കാർ ദലിത്​ വിദ്യാർഥികളുടെ സ്​കോളർഷിപ്പിനുള്ള മാനദണ്ഡം സാമൂഹിക-സാമ്പത്തിക സാഹചര്യങ്ങൾ എന്നത്​ മാറ്റി മാർക്ക്​ ആക്കി മാറ്റി. 60 ശതമാനം മാർക്ക്​ ലഭിച്ചവർക്ക്​ മാത്രം സ്​കോളർഷിപ്പ്​ എന്ന വ്യവസ്​ഥ വെച്ചതോടെ അതു ലഭിക്കുന്നത്​ വളരെ ചുരുക്കം വിദ്യാർഥികൾക്ക്​ മാത്രമായി.

അവസാനം നടത്തിയ മന്ത്രിസഭാ വികസനത്തിൽ പോലും ദലിതുകളെ അകറ്റി നിർത്തിയ ആദിത്യനാഥും കുറച്ച്​ ബി.ജെ.പി നേതാക്കളും തെരഞ്ഞെടുപ്പ്​ അടുത്തതി​ന്‍റെ ഭാഗമായി ഈ വർഷം ജനുവരി 22ന്​ ഗോരഖ്​പൂരിലെ ദലിത്​ ഭവനത്തിൽ ഭക്ഷണം കഴിക്കാൻ വന്നു. ദലിതുകൾക്ക്​ മിനറൽ വാട്ടർ വാങ്ങാനോ ഉപയോഗിക്കാനോ ഉള്ള അവസ്​ഥയില്ല എന്ന്​ എല്ലാവർക്കുമറിയാം, എന്നാൽ ആദിത്യനാഥിനടുത്ത്​ ബിസ്​ലേരി കുപ്പിയാണ്​ ഉണ്ടായിരുന്നത്​. അതൊന്നും മിശ്രഭോജനമായിരുന്നില്ല, ഫോ​ട്ടോ എടുത്ത്​ മാധ്യമങ്ങളെ അറിയിക്കാനുള്ള ഒരു സന്ദർഭം മാത്രം. ഞങ്ങളെ സമജനങ്ങളായി കാണുന്നുവെങ്കിൽ ഞങ്ങൾ പരമ്പരാഗതമായി ശുചീകരണ ​ജോലി ചെയ്യാൻ നിർബന്ധിതരാക്കപ്പെടുന്ന അഴുക്കുകാനയിൽ ഞങ്ങളോടൊപ്പം ഇറങ്ങാൻ തയ്യാറാകുമോ- സുശീൽ ചോദിക്കുന്നു. നൂറ്റാണ്ടുകളായി ദലിത്​ സമൂഹത്തിലെ വലിയ ഒരു വിഭാഗം ചെയ്യാൻ നിർബന്ധിതരാക്കപ്പെടുന്ന തോട്ടിപ്പണിക്ക്​ 1993 രാജ്യം നിരോധ​മേർപ്പെടുത്തിയിട്ടും ഇപ്പോഴുമത്​ നിർബാധം തുടരുന്നു.

സംസ്​ഥാന ജനസംഖ്യയുടെ ഒരു ശതമാനത്തിൽ താഴെ മാത്രമാണ്​ ആദിവാസികളുടെ എണ്ണം. എന്നാൽ 80 ശതമാനം പേരും ഭൂരഹിതരാണ്​. 2011ലെ സെൻസസ്​ പ്രകാരം സംസ്​ഥാനത്തെ പട്ടികവർഗക്കാരിൽ പകുതിപേ​രും പാർക്കുന്നത്​ വാസയോഗ്യമല്ലാത്ത വീടുകളിലാണ്​. പട്ടിക വർഗ വിഭാഗത്തിൽ പെടുത്തിയിരിക്കുന്ന സംസ്​ഥാനത്തെ നിരവധി ആദിവാസി ​ഗോത്രങ്ങൾ കുടിയിറക്ക്​ ഭീഷണിയും നേരിടുന്നു.

2019 ജൂലൈ 17ന്​ സോൻഭദ്ര ജില്ലയിൽ നടന്ന കൂട്ടക്കൊലയിൽ പത്തുപേർക്ക്​ ജീവൻ നഷ്​ടപ്പെടുകയും ​25 പേർക്ക്​ പരിക്കേൽക്കുകയും ചെയ്​തു. പ്രബലരായ ഗുജ്ജർ സമുദായക്കാരനായ ഗ്രാമമുഖ്യൻ യഗ്യാദത്ത്​ അവകാശവാദമുന്നയിച്ച ഭൂമിയിൽ നിന്ന്​ കുടിയൊഴിഞ്ഞു പോകാൻ ഗോണ്ട്​ ഗോത്രസമുദായത്തിലെ ആദിവാസികൾ വിസമ്മതിച്ചതിനെ തുടർന്നായിരുന്നു കൊല.

ആദിവാസികൾ ഈ ഭൂമിയിൽ ഏഴ്​ പതിറ്റാണ്ടായി അധ്വാനിച്ച്​ കൃഷി നടത്തി വരികയായിരുന്നു. ആദിത്യനാഥ്​ അധികാരമേറ്റതിൽ പിന്നെ പ്രാദേശിക ഭൂമാഫിയ അവരോട്​ നിലം ഉഴുവുന്നത്​ നിർത്തി ഒഴിഞ്ഞുപോകാൻ ആവശ്യപ്പെടുകയായിരുന്നുവെന്ന്​ മുൻ ഐ.പി.എസ്​ ഓഫീസറും ആൾ ഇന്ത്യ പീപ്പിൾസ്​ ഫ്രണ്ട്​ പ്രസിഡൻറുമായ എസ്​.ആർ. ദാരാപൂരി ചൂണ്ടിക്കാട്ടുന്നു. രാജ്യത്തെ ആദിവാസി സമൂഹങ്ങളെ ഹൈന്ദവവത്​കരിക്കാനുള്ള പദ്ധതിയുമായി ഹിന്ദുത്വർ മുന്നോട്ടുപോകവെ പരമ്പരാഗത ആചാരവും മതവും തനവ്​ വിശ്വാസവും പുലർത്തി വരുന്ന ആദിവാസികൾ അവരുടെ സ്വത്വത്തിൽ ഉറച്ചുനിൽക്കുന്നത്​ ആദിത്യനാഥ്​ സർക്കാറിന്​ ഇഷ്​ടമുള്ള കാര്യമല്ലെന്നും അതിനുള്ള ശിക്ഷയാണ്​ കുടിയിറക്കിലൂടെ നടപ്പാക്കുന്നതെന്നും ദാരാപുരി കൂട്ടിച്ചേർത്തു.

നഃ സ്​ത്രീ സ്വാതന്ത്ര്യമർഹതീ

''നമ്മുടെ ശാസ്​ത്രങ്ങളിൽ സ്​ത്രീകളുടെ മഹത്വം വാഴ്​ത്തിപ്പറയുന്നുണ്ട്​, അതേ സമയം അവരുടെ പ്രാധാന്യവും മാന്യതയും കുലീനതയുമെല്ലാം പരിഗണിച്ച്​ അവർക്ക്​ നൽകേണ്ട സംരക്ഷണത്തെക്കുറിച്ചും പ്രതിപാദിക്കുന്നുണ്ട്​. ഊർജത്തെ നിയന്ത്രണമില്ലാതെ സ്വതന്ത്രമായി വിട്ടയച്ചാൽ അത്​ പ്രയോജനരഹിതവും നാശകാരിയുമാവുന്നതു പോയെ ശക്​തിശക്​തി സ്വരൂപ സ്​ത്രീ- ശക്​തിയുടെ ആൾരൂപമായ സ്​ത്രീക്ക്​ സ്വാതന്ത്ര്യമല്ല, മറിച്ച്​ സംരക്ഷണവും മാർഗവും നൽകി അർഥസമ്പൂഷ്​ടമായ ഒരു കർതവ്യമാണ്​ നൽകേണ്ടത്​.

അത്തരത്തിൽ നിയന്ത്രിതവും സംരക്ഷിതവുമായ സ്​ത്രീശക്​തിക്ക്​ മാത്രമേ മഹാന്മാരായ മനുഷ്യർക്ക്​ ജന്മം നൽകാനും അവശ്യഘട്ടത്തിൽ പടക്കളത്തിലിറങ്ങി ദുഷ്​ടശക്​തികളെ നിഗ്രഹിക്കാനും കഴിയൂ. അതേ സമയം, ബോധമില്ലാത്ത പടിഞ്ഞാറൻ സ്​ത്രീസ്വാതന്ത്ര്യവാദം അവരെ കൂടുതൽ വിനാശകരമായ അവസ്​ഥകളിലേക്ക്​ തള്ളിവിടുകയും സൃഷ്​ടിയേയും വീടി​ന്‍റെയും കുടുംബത്തി​ന്‍റെയും സുസ്​ഥിരതയെ തകിടംമറിക്കുയും ചെയ്യും, അതു വഴി രാഷ്​ട്രത്തി​ന്‍റെയും മാതൃഭൂമിയുടെയും തിളക്കമാർന്ന പുനനിർമാണവും തടസ്സപ്പെടും- യോഗി ആദിത്യനാഥ്​ എഴുതി ഔദ്യോഗിക വെബ്​സൈറ്റിൽ പ്രസിദ്ധീകരിച്ച​ മാതൃശക്​തി- ഭാരതീയ ശക്​തി കേ സന്ദർഭ്​ ​മേ എന്ന ലേഖനത്തിലെ വരികളാണിത്​. പുരുഷന്മാർ സ്​ത്രീകളെ സംരക്ഷിക്കുകയും നിയന്ത്രിക്കുകയും സാമൂഹിക വ്യവസ്​ഥക്ക്​ ഭീഷണിയാവുന്ന പടിഞ്ഞാറൻ ​സ്​ത്രീവാദ ചിന്തകളിൽ നിന്ന്​ അവരെ കാത്തുരക്ഷിക്കുകയും വേണ​മെന്ന വിശ്വാസക്കാരനാണ്​.

സ്​ത്രീകളെക്കുറിച്ചുള്ള ആദിത്യനാഥി​ന്‍റെ ലോക വീക്ഷണം ഹിന്ദുത്വ പ്രത്യയശാസ്​ത്രത്തിൽ രൂഢമൂലമായതാണ്​. വീടിനു പുറത്ത്​ അവർക്ക്​ ​ചെയ്യാനൊന്നുമില്ലെന്ന നാസി കാല ജർമനിയിലെ സങ്കൽപത്തിന്​ സമാനമാണീ ചിന്തകൾ. സ്​ത്രീയുടെ പരമപ്രധാനമായ ദൗത്യം നല്ല ഭാര്യയായി, ആര്യൻ വംശവർധന​ക്ക്​ മുതൽക്കൂ​ട്ടേകി പിതൃഭൂമിക്ക്​ വേണ്ടി പൊരുതാൻ കരുത്തുള്ള ആൺമക്കളെ വളർത്തിയെടുക്കലാണെന്നായിരുന്നല്ലോ അവർ പറഞ്ഞിരുന്നത്​. പാർലമന്‍റെിൽ സ്​​ത്രീകൾക്ക്​ 33ശതമാനം സംവരണം ഏർപ്പെടുത്താനുള്ള ബില്ലിനെയും ആദിത്യനാഥ്​ എതിർത്തു. കുടുംബ വ്യവസ്​ഥയിൽ സ്​ത്രീകളുടെ പങ്കിനെ ഇത്​ ബാധിക്കും എന്നായിരുന്നു യോഗിയുടെ പക്ഷം. സജീവ രാഷ്​ട്രീയത്തിലും പൊതുജീവിതത്തിലും പുരുഷന്മാരെപ്പോലെ ഇറങ്ങി പ്രവർത്തിക്കുന്ന സ്​ത്രീകൾക്ക്​ അമ്മ, മകൾ, സഹോദരി തുടങ്ങിയ സുപ്രധാന റോളുകൾ വേണ്ടവിധം നിറവേറ്റാൻ കഴിയുന്നുണ്ടോ എന്ന്​ വിശകലനം ചെയ്​ത്​ തീരുമാനിക്കണമെന്നും അദ്ദേഹം എഴുതിയിരുന്നു. എന്നാൽ, വിവിധ തെരഞ്ഞെടുപ്പുകളിൽ സ്​ത്രീകൾ സുപ്രധാനമായ ഭാഗദേയം നിർണയിക്കുന്നുവെന്നതിനാൽ പിന്നീട്​ ഈ ലേഖനം വെബ്​സൈറ്റിൽ നിന്ന്​ ഒഴിവാക്കുകയായിരുന്നു.

നാഷനൽ ക്രൈം റെകോഡ്​സ്​ ബ്യൂറോയുടെ കണക്ക്​ പ്രകാരം രാജ്യത്തെ സ്​ത്രീകൾക്കെതിരായ കുറ്റകൃത്യങ്ങളിൽ മുന്നിൽ നിന്നിരുന്ന യു.പി ആദിത്യനാഥി​ന്‍റെ ഭരണകാലത്ത്​ ഇക്കാര്യത്തിൽ വൻവർധന രേഖപ്പെടുത്തി. ജാതി-മത ഭേദമന്യേ സ്​ത്രീകൾ ഹീനമായ കുറ്റകൃത്യങ്ങളെ നേരിടേണ്ടി വന്നു. അധികാരമേറ്റ്​ മൂന്ന്​ മാസംതികയു​മ്ഴേക്ക്​ ബി.ജെ.പി എം.എൽ.എ കുൽദീപ്​ സെൻഗറും കൂട്ടാളികളും ചേർന്ന്​ 17 വയസുള്ള ഒരു പെൺകുട്ടിയെ കൂട്ടബലാത്സംഗത്തിനിരയാക്കി. പെൺകുട്ടിയുടെ കുടുംബം നിരന്തര ഭീഷണികളിൽ കഴിയവെ ആരോപിതനായ എം.എൽ.എയെ രണ്ടു വർഷക്കാലം മുഖ്യമന്ത്രി സംരക്ഷിച്ചു നിർത്തി.

പീഡനത്തെ അതിജീവിച്ച പെൺകുട്ടി നീതിക്കായുള്ള പോരാട്ടത്തി​ന്‍റെ ഭാഗമായി മുഖ്യമന്ത്രിയു​ടെ വസതിക്ക്​ മുന്നിൽ സ്വയം തീകൊളുത്തിയിട്ടും യോഗി ഗൗനിച്ചതേയില്ല. പകരം അവളുടെ അച്​ഛനെ അറസ്​റ്റു ചെയ്​തു കൊണ്ടുപോയി, കസ്​റ്റഡിയിൽ അദ്ദേഹത്തി​ന്‍റെ ജീവനും അവസാനിച്ചു. കുടുംബത്തെ വേട്ടയാടിക്കൊണ്ടേയിരുന്നു. അവളുടെ ചെറിയച്ഛനെ അറസ്​റ്റു ചെയ്​തു, ദുരൂഹ സാഹചര്യത്തിൽ വാഹനങ്ങൾ വന്നിടിച്ച്​ രണ്ട്​ അമ്മായിമാ​ർ മരണപ്പെട്ടു. പീഡനമേറ്റ പെൺകുട്ടിക്കും വക്കീലിനും ഈ അപകടത്തിൽ ഗുരുതര പരിക്കേറ്റിരുന്നു. ഒടുവിൽ സുപ്രിം കോടതി ഇടപെടുകയും പ്രതിപക്ഷ പാർട്ടികൾ പാർലമന്‍റെിൽ വിഷയം ഉന്നയിക്കുകയും ചെയ്​ത ശേഷമാണ്​ എം.എൽ.എയെ അറസ്​റ്റ്​ ചെയ്യുകയും 2019 ഡിസംബറിൽ കുറ്റക്കാരനെന്ന്​ കണ്ടെത്തുകയും ചെയ്​തത്​.

2020 സെപ്​റ്റംബറിൽ ലഖ്​നൗവിൽ നിന്ന്​ 380 കിലോമീറ്റർ അകലെയുള്ള ഹാഥ്​റസിൽ 19 വയസുള്ള ഒരു ദലിത്​ യുവതി നാല്​ മേൽജാതി യുവാക്കളാൽ ബലാത്സംഗത്തിനിരയായി. സംഭവം നടന്ന്​ 10 ദിവസത്തേക്ക്​ അറസ്റ്റുകളൊന്നുമുണ്ടായില്ല. അതിക്രമത്തിൽ അവളുടെ സ്​പൈനൽകോഡ്​ തകർന്ന്​ ഇടതുഭാഗം തളർന്നു പോയിരുന്നു, നാവ്​ മുറിച്ചെടുക്കപ്പെട്ടിരുന്നു. രണ്ടാഴ്​ച ഈ മുറിവുകളോടും വേദന​കളോടും മല്ലിട്ട്​ ഡൽഹിയിലെ ആശുപത്രിയിൽ അവൾ ജീവൻ വെടിഞ്ഞു. കുടുംബത്തി​ന്‍റെ സമ്മതം പോലും തേടാതെ രായ്​ക്ക്​ രാമാനം മൃതദേഹം സംസ്​ഥാന സർക്കാർ ബലാൽക്കാരമായി ദഹിപ്പിച്ചു കളഞ്ഞു. സംഭവം വ്യാപക മാധ്യമ ശ്രദ്ധ നേടുകയും രാജ്യമൊട്ടുക്ക്​ പ്രതിഷേധങ്ങളുയരുകയും ചെയ്​തു.

ത​ന്‍റെ സർക്കാർ കൈവരിച്ച നേട്ടങ്ങളിൽ അസ്വസ്​ഥത പൂണ്ടയാളുകൾ ഹാഥ്​റസ്​ സംഭവം ചൂഷണം ചെയ്യുകയാണെന്നും ജാതീക്കലാപം സൃഷ്​ടിക്കാനാണ്​ അവർ ശ്രമിക്കുന്നതെന്നും ആദിത്യനാഥ്​ പ്രതികരിച്ചു. സംഭവത്തിലേക്ക്​ ശ്രദ്ധക്ഷണിച്ചവർക്കെതിരെ സമാധാനത്തിന്​ ഭംഗം വരുത്തൽ, രാജ്യദ്രോഹം, ഗൂഢാലോചന, മത വിഭാഗങ്ങൾക്കിടയിൽ വൈരം പടർത്തൽ തുടങ്ങിയ വകുപ്പുകളിൽ 19 കേസുകളാണ്​ ഒരാഴ്​ചക്കുള്ളിൽ ചുമത്തിയത്​. സംഭവം റിപ്പോർട്ട്​ ചെയ്യാൻ പോയ മാധ്യമ പ്രവർത്തകൻ സിദ്ദീഖ്​ കാപ്പനെ അറസ്​റ്റ്​ ചെയ്​ത്​ കഠോര നിയമമായ യു.എ.പി.എ ചുമത്തി ഒന്നര വർഷത്തോളമായി ജയിലിലടച്ചിട്ടിരിക്കുന്നു. ഹാഥ്​റസ്​ പെൺകുട്ടി ബലാത്സംഗത്തിനിരയായിട്ടില്ല എന്ന്​ അന്താരാഷ്​ട്ര മാധ്യമങ്ങളിൽ പ്രചരിപ്പിക്കുന്നതിനായി മുംബൈയിൽ നിന്നുള്ള പി.ആർ കമ്പനിയെ ചുമതലയേൽപ്പിക്കുകയും ചെയ്​തു.

''ആദിത്യനാഥിന്​ സ്​ത്രീകളുടെ വളർച്ചയിലോ ശാക്​തീകരണത്തിലോ താൽപര്യമില്ല, ഹിന്ദു സ്​ത്രീകൾ മുസ്​ലിംപുരുഷന്മാർ​ക്കൊപ്പം നിൽക്കുന്നുണ്ടോ എന്നതിൽ മാത്രമാണ്​ ശ്രദ്ധ''- സി.പി.എം പോളിറ്റ്​ ബ്യൂറോ അംഗവും മുൻ പാർലമന്‍റെംഗവുമായ സുഭാഷിണി അലി പറയുന്നു. 2009ലെ പൊതുതെരഞ്ഞെടുപ്പു കാലത്ത്​ ആദിത്യനാഥ്​ നടത്തിയ പ്രസംഗത്തിൽ പറഞ്ഞത്​ 'അവർ ഒരു ഹിന്ദു പെൺകുട്ടിയെ പിടിച്ചുകൊണ്ടുപോയാൽ, നമ്മൾ നൂറ്​ മുസ്​ലിം പെൺകുട്ടികളെ പിടിച്ചുകൊണ്ടു വരണമെന്നാണ്​. ഹിന്ദു സ്​ത്രീകളും മുസ്​ലിം പുരുഷന്മാരും തമ്മിലെ ബന്ധത്തെ ലൗജിഹാദ്​ എന്ന്​ വിളിച്ച്​ ശക്​തമായി എതിർക്കുന്നു യോഗി.

ലൗജിഹാദ്​ എന്ന ആരോപണത്തിൻമേൽ നിരവധി ഭരണകൂട ഏജൻസികൾ അന്വേഷണം നടത്തിയെങ്കിലും സംഘടിതമായി അത്തരമെന്തെങ്കിലും നടക്കുന്നതു സംബന്ധിച്ച്​ യാതൊരു തെളിവും കിട്ടിയിട്ടില്ല. വർഗീയമായ പ്രചാരണമാണിതെന്നതിന്​ പുറമെ ഹിന്ദു സ്​ത്രീകളുടെ ബുദ്ധിയേയും ചിന്താശേഷിയേയും സ്വയംനിർണയ അവകാശത്തെയും സമ്മതത്തെയും തീരുമാനങ്ങളെയുമെല്ലാം വിലകുറച്ച്​ കാണുക കൂടി ചെയ്യുന്നുണ്ട്​ ഈ സിദ്ധാന്തക്കാർ.

2017ൽ അധികാരമേറ്റതിന്​ പിന്നാലെ ആൻറി റോമിയോ സ്​ക്വാഡ്​ എന്ന പേരിൽ ഒരു സദാചാര പൊലീസിങ്​ ഏർപ്പാടിനും ഇദ്ദേഹം തുടക്കമിട്ടിരുന്നു. സ്​ത്രീകളെ പീഡനങ്ങളിൽ നിന്ന്​ സംരക്ഷിക്കാൻ എന്ന പേരിൽ പൊതുസ്​ഥലങ്ങളിൽ ഒരുമിച്ചിരിക്കുന്ന യുവതിയുവാക്കളിൽ നിന്ന്​ ബലമായി തിരിച്ചറിയൽ രേഖകൾ വാങ്ങിയെടുക്കും. ഹിന്ദു യുവതികൾ മുസ്​ലിം ചെറുപ്പക്കാർ​ക്കൊപ്പം ഒരുമിച്ചിരിക്കുകയാണോ എന്ന്​ പരിശോധിക്കാനാണിത്​. 2017 മാർച്ച്​ 22നും 2020 നവംബർ 30നുമിടയിൽ 14,454 പേരെയാണ്​ ആൻറി റോമിയോ സ്ക്വാഡ്​ അറസ്​റ്റ്​ ചെയ്​തത്​.

2020 നവംബറിൽ ഉത്തർ പ്രദേശ്​ നിയമവിരുദ്ധ മതംമാറ്റം നി​രോധന ഓഡിനൻസ്​ (The Uttar Pradesh Prohibition of Unlawful Religious Conversion Ordinance) നടപ്പാക്കി. തെറ്റിദ്ധരിപ്പിച്ചോ, പ്രലോഭിപ്പിച്ചോ നടത്തുന്ന മതംമാറ്റത്തെ പത്തു വർഷം വരെ തടവ്​ ശിക്ഷ ലഭിച്ചേക്കാവുന്ന, ജാമ്യം ലഭിക്കാത്ത കുറ്റമാക്കി പ്രഖ്യാപിച്ച നിയമം അറിയപ്പെടുന്നത്​ ലൗജിഹാദ്​ നിയമം എന്ന പേരിലാണ്​. വിവാഹ ആവശ്യത്തിന്​ മതം മാറുന്നതിന്​ ജില്ലാ മജിസ്​ട്രേറ്റി​ന്‍റെ അനുമതി വേണമെന്നും യു.പിയിൽ വ്യവസ്​ഥയുണ്ടിപ്പോൾ. ഡിസംബർ 2021ൽ കാൺപൂരിൽ നിന്നുള്ള മുസ്​ലിം യുവാവിന്​ ഈ നിയമ പ്രകാരം പത്തുവർഷ തടവും 30000 രൂപ പിഴയും വിധിച്ചു. ഈ നിയമം മുസ്​ലിം യുവാക്കളെ അറസ്​റ്റ്​ ചെയ്യാനും ഹിന്ദു സ്​ത്രീകളെ തങ്ങളുടെ വരുതിയിൽ നിർത്തുവാനും ലക്ഷ്യമിട്ടുള്ളതാണ്​. സമുദായത്തി​ന്‍റെ സ്വത്താണ്​ സ​ത്രീകളെന്നും അവർക്ക്​ പങ്കാളിയെ സ്വയം തീരുമാനിക്കാൻ അവകാശമില്ല എന്നുമാണ്​ അവർ പറഞ്ഞുവെക്കുന്നത്​- സുഭാഷിണി അലി ചൂണ്ടിക്കാട്ടുന്നു.

തളരുന്ന നാട്​, പിഴുതെടുക്കപ്പെടുന്ന നാവ്​

കോവിഡ്​ മഹാമാരിയുടെ രണ്ടാം തരംഗ വേളയിൽ നിരവധി മനുഷ്യർക്കാണ്​ യു.പിയിൽ ജീവനറ്റുപോയത്​. സർക്കാർ പറഞ്ഞതിലും എത്രയോ അധികമായിരുന്നു മരണസംഖ്യ. ഗംഗാ നദീ തീരത്ത്​ കാണപ്പെട്ട എണ്ണമറ്റ കോവിഡ്​ ജഡങ്ങളെക്കുറിച്ച്​ 2021 മേയ്​ മാസം ഹിന്ദി ദിനപത്രമായ ദൈനിക്​ ഭാസ്​കർ റി​പ്പോർട്ട്​ ചെയ്​തു. രണ്ടു മാസങ്ങൾക്ക്​ ശേഷം ഈ പത്രത്തി​ന്‍റെ രാജ്യമൊട്ടുക്കുമുള്ള ബ്യൂറോകളിൽ ആദായ നികുതി വകുപ്പ്​ റെയ്​ഡ്​ നടത്തി. മാധ്യമങ്ങളെ ഭയപ്പെടുത്തി നിശബ്​ദമാക്കാനുള്ള ശ്രമമായിരുന്നു ഇതെന്ന്​ പ്രതിപക്ഷ പാർട്ടികൾ ആരോപിച്ചിരുന്നു.

വളർന്നു വരുന്ന ഒരു ഏകാധിപതിയെപ്പോലെ വിവരങ്ങളുടെ ഒഴുക്കിനെ അയാൾ നിയന്ത്രിക്കുന്നു, അഭിപ്രായ-ആവിഷ്​കാര സ്വാതന്ത്ര്യത്തെ ഇല്ലാതാക്കിക്കൊണ്ട്​ വിമർശനം കടന്നുവരാൻ സാധ്യതയുള്ള ജാലകങ്ങൾ അടച്ചിടുന്നു. സമൂഹമാധ്യമങ്ങളിൽ യോഗിയേയോ സർക്കാറിനേയോ വിമർശിച്ചതിന്​ 200 ലേറെ പേരാണ്​ അറസ്​റ്റിലായിരിക്കുന്നത്​.

ഗോരഖ്​പൂരിലെ ബാബാ രാഘവ്​ ദാസ്​ മെഡിക്കൽ കോളജിൽ ശിശുചികിത്സാ വിഭാഗം ലക്​ചറർ ആയിരുന്നു ഡോ. കഫീൽ ഖാൻ. ആശുപത്രിയിൽ ഓക്​സിജൻ ക്ഷാമം മൂലം 63 കുഞ്ഞുങ്ങൾ മരണപ്പെട്ട സംഭവം ദേശീയ ശ്രദ്ധയിലെത്തിയിരുന്നു. സ്വന്തം കൈയിൽ നിന്ന്​ പണം ചെലവിട്ട്​ ഓക്​സിജൻ വാങ്ങി പ്രശ്​ന പരിഹാരത്തിന്​ ശ്രമിച്ച ഡോ. ഖാനെ മാധ്യമങ്ങൾ ധീരനായകനായി വിശേഷിപ്പിച്ചു. എന്നാൽ, ഓക്​സിജൻ ഇല്ലാത്തതു മൂലം മരണമൊന്നുമുണ്ടായിട്ടില്ല എന്ന്​ വാദിച്ച സർക്കാർ ദേശീയ സുരക്ഷാ നിയമം ഉൾപ്പെടെ വിവിധ വകുപ്പുകളും കുറ്റങ്ങളും ചുമത്തി കഫീൽ ഖാനെ അറസ്​റ്റ്​ ചെയ്​ത്​ 500 ദിവസത്തിലേറെ ജയിലിലിട്ടു, ജോലിയും കളഞ്ഞു.

കോവിഡ്​ രണ്ടാം തരംഗകാലത്ത്​ ഓക്​സിജൻ ക്ഷാമത്തെക്കുറിച്ച്​ പറഞ്ഞ ആശുപത്രികൾക്കെതിരെയെല്ലാം ദേശ​സുരക്ഷാ നിയമം ചുമത്താനും വസ്​തുവകകൾ കണ്ടുകെട്ടാനും ഉത്തരവുമിട്ടു. 2020മേയിൽ സംസ്​ഥാനത്തെ തൊഴിൽ സംബന്ധിയായ നിയമങ്ങൾ മൂന്നു വർഷത്തേക്ക്​ മരവിപ്പിച്ചതായി പ്രഖ്യാപിച്ചു. നിയമനവും പിരിച്ചുവിടലും അതോടെ ഉദ്യോഗദാതാക്കൾക്ക്​ അവരുടെ ഇഷ്​ടത്തിന്​ ചെയ്യാമെന്നായി. സംഘടിക്കുകയും മെച്ചപ്പെട്ട തൊഴിൽ സൗകര്യങ്ങൾ ആവശ്യപ്പെടുകയും ചെയ്യുന്ന​തു പോലും അസാധ്യമായി.

യു.പിയിലെ നഗരങ്ങളുടെ പേരു മാറ്റം തുടർന്നു കൊണ്ടേയിരിക്കുന്നു. മുഗൾ സരായി പണ്ഡിത്​ ദീൻ ദയാൽ ഉപാധ്യായ നഗർ ആക്കി മാറ്റി, അലാഹാബാദി​െന പ്രയാഗ്​ രാജും ഫൈസാബാദിനെ അയോധ്യയുമാക്കി. പ്രതിശീർഷ വരുമാന കാര്യത്തിൽ ഇന്ത്യയിലെ സംസ്​ഥാനങ്ങളുടെയും കേന്ദ്രഭരണപ്രദേശങ്ങളുടെയും പ്രതിശീർഷ വരുമാന പട്ടികയിൽ 36 ൽ 32-ാം സ്​ഥാനമാണ്​ ആദിത്യനാഥ്​ മുഖ്യമന്ത്രിയായിരിക്കെ യു.പിയുടേത്​. മുൻസർക്കാറി​ന്‍റെ കാലത്ത്​ 6.92 ശതമാനമായിരുന്നു അഭ്യന്തര ഉൽപാദനത്തി​ന്‍റെ വാർഷിക വളർച്ചാ നിരക്കെങ്കിൽ ഇപ്പോഴത്​ 1.95 ശതമാനമായി. സംസ്​ഥാനത്തെ തൊഴിലില്ലായ്​മ രണ്ടര ഇരട്ടി വർധിച്ചു. യുവാക്കൾക്കിടയിലെ തൊഴിലില്ലായ്​മ 2012നെ അപേക്ഷിച്ച്​ അഞ്ചിരട്ടിയായി ഉയർന്നു.

2020 മാർച്ചിൽ പൗരത്വ സമരക്കാരെ അപമാനിക്കാൻ അവരുടെ വ്യക്​തിസുരക്ഷ അപകടത്തിലാക്കും വിധം ചിത്രങ്ങളും പേരും വിലാസവും സഹിതം ലഖ്​നൗ നഗരത്തിലെമ്പാടും ബോർഡുകൾ സ്​ഥാപിച്ചു. അന്ന്​ അറസ്​റ്റിലായവർക്ക്​ ഭക്ഷണവും മരുന്നും കണ്ണട പോലും നിഷേധിച്ചിരുന്നുവെന്ന്​ മൂന്നാഴ്​ച ജയിലിൽ കഴിയേണ്ടി വന്ന എസ്​.ആർ ദാരാപുരി പറയുന്നു. പൗരത്വ സമരക്കാരുടെ സ്വത്ത്​ കണ്ടുകെട്ടാനുള്ള യു.പി സർക്കാർ നടപടിക്കെതിരെ കഴിഞ്ഞ ദിവസം സുപ്രിംകോടതി തന്നെ രംഗത്തുവരേണ്ടിവന്നു.

യു.പി​യിലെ ക്രമസമാധാന തകർച്ചയെ ജംഗിൾ രാജ്​, ബുള്ളറ്റ്​ രാജ്​ എന്നൊക്കെ വിളിക്കാറുണ്ടായിരുന്നു. എന്നാൽ ഇപ്പോൾ അക്രമവും കൈയേറ്റവുമെല്ലാം കൈമുതലാക്കി നടക്കുന്ന ഭരണമാണ്​. മുഖ്യമന്ത്രിക്ക്​ ബുൾഡോസർ നാഥ്​ എന്ന വിളിപ്പേര്​ പോലും ലഭിച്ചിരിക്കുന്നു. അടിച്ചമർത്തലുകൾ നിറഞ്ഞ കഠിനകാലത്തിലൂടെയാണ്​ നാം കടന്നുപോകുന്നത്​. ഇവിടെ നിയമവാഴ്​ചയല്ല, വാഴുന്നവ​ന്‍റെ നിയമമാണ്​ പ്രാബല്യത്തിൽ- ദാരാപുരി വ്യക്​തമാക്കുന്നു.

മോദിയേക്കാൾ കേമൻ?

എം.പി എന്ന നിലയിൽ ഗോരഖ്​പൂരി​ന്‍റെ വികസനത്തിന്​ ഒന്നും ചെയ്​തിട്ടില്ല യോഗി. മുഖ്യമന്ത്രിയായ ശേഷം വാഗ്​ദാനങ്ങളും പാലിച്ചില്ല, ഉപതെരഞ്ഞെടുപ്പുകളിൽ ബി.ജെ.പിയുടെ തോൽവിക്ക്​ പോലും ഇത്​ കാരണമായി- ഒമർ പറയുന്നു. എന്നിരിക്കിലും ബി.ജെ.പിയുടെ താരപ്രചാരകൻ തന്നെയാണ്​ യോഗി. 2016ൽ ഡോണൾഡ്​ ട്രംപ്​ യു.എസ്​ പ്രസിഡന്‍റ്​ ആയി തെരഞ്ഞെടുക്കപ്പെട്ട വേള യോഗി ആഘോഷഭരിതമാക്കിയിരുന്നു- തനിക്ക്​ ഇവിടെ മാത്രമല്ല, ആഗോള രാഷ്​ട്രീയത്തിലുമുണ്ട്​ സ്വരവും സ്വാധീനവും എന്ന്​ കാണിക്കാൻ നടത്തിയ ശ്രമമായാണ്​ അത്​ വിലയിരുത്തപ്പെട്ടത്​. യോഗിയുടെ ആഗോള വീക്ഷണം അഖണ്ഡഭാരത സങ്കൽപമാണ്​. അത്​ യു.പി അസംബ്ലിയിലും ഉദ്​ഘോഷിക്കപ്പെട്ടിരുന്നു. നിലവിലെ ഇന്ത്യക്ക്​ പുറമെ പാകിസ്​താൻ, അഫ്​ഗാനിസ്​താൻ, ബംഗ്ലാദേശ്​, നേപ്പാൾ, ഭൂട്ടാൻ, ടിബറ്റ്​, ശ്രീലങ്ക, ബർമ എന്നിവ ചേർന്ന ഒരു ബ്രഹ്​മാണ്ഡ ഹിന്ദുരാഷ്​ട്രം സാധ്യമാക്കാൻ യത്​നിക്കണമെന്നാണ്​ സംഘ്​പരിവാറുകാർ അണികളോട്​ ആഹ്വാനം ചെയ്യുന്നതും.

മോദിയുടെ പിൻഗാമിയാവും ആദിത്യനാഥ്​ എന്ന്​ വിശ്വസിക്കുന്നവരുണ്ട്​. എന്നാൽ അതിലേറെ ​പേർ കരുതുന്നത്​ ഗുജറാത്തിലെ കുപ്രസിദ്ധമായ മുസ്​ലിം വിരുദ്ധ വംശഹത്യയിലൂടെ ഹിന്ദുത്വത്തി​ന്‍റെ മുഖമായി മാറിയ മോദിയേക്കാൾ മിടുക്കനും കണിശക്കാരനും സമർപ്പിതനുമാണ്​ യോഗി എന്നാണ്​. അതു സംഭവിച്ചാൽ നമ്മുടെ ഭരണഘടന തന്നെ ഇല്ലാതാക്കി ഹിന്ദു മേൽകോയ്​മ അടിച്ചേൽപ്പിക്ക​പെടും. പിന്നീട്​ ജനാധിപത്യം എന്നൊന്ന്​ അവശേഷിക്കില്ല, സ്വേച്​ഛാധിപത്യം മാത്രമാകും ബാക്കിയെന്ന്​ ദാരാപൂരി പറയുന്നു.

മനുഷ്യാവകാശ ലംഘനങ്ങളെച്ചൊല്ലി യോഗി സർക്കാറിന്​ തെല്ലും സ​ങ്കോചമില്ല, പുതിയ നയങ്ങളും നിയമങ്ങളും ശിക്ഷാരീതികളും ശക്​തിയുമുപയോഗിച്ച്​ ശിക്ഷിച്ചു നാട്​ നന്നാക്കാമെന്നാണ്​ അവർ കരുതുന്നത്​. മൂല്യങ്ങളെക്കുറിച്ചോ ജനങ്ങളെക്കുറിച്ചോ ചിന്തയില്ലാത്ത, അധികാരം മാത്രം മനസ്സിൽ കൊണ്ടുനടക്കുന്ന രാഷ്​ട്രീയമോഹികൾക്ക്​ ആദിത്യനാഥി​ന്‍റെ രാഷ്​ട്രീയ സഞ്ചാരപഥം ഒരു മാതൃകാപുസ്​തകമാണ്​- തരിമ്പ്​ വികസനം നൽകാതെ വർഗീയ വിഷം മാത്രം വിളമ്പി അനുയായികളെയും ജനക്കൂട്ടത്തെയും ഒപ്പം നിർത്താനാകുമെന്ന്​ അയാൾ തെളിയിച്ചിരിക്കുന്നു- സുഭാഷിണി അലി ചൂണ്ടിക്കാട്ടുന്നു.

ഭരണഘടനാപരമായ ഒരു നിയന്ത്രണങ്ങളും ഗൗനിക്കാതെ ​വർചസ്​വ- സമ്പൂർണ പരമാധികാരം ആസ്വദിക്കുകയാണിദ്ദേഹം. സാമൂഹിക സാമ്പത്തിക അടിയന്തരാവസ്​ഥയിലാണ്​ യു.പി. അതിന്​ കാരണഭൂതനായയാൾ ദേശീയ രാഷ്​ട്രീയത്തി​ന്‍റെ മുഖ്യപദത്തിലെത്തിയാൽ പിന്നീടുള്ള കാര്യങ്ങൾ അചിന്ത്യമാണ്​- ഒരു മതം, ഒരു രാഷ്​ട്രീയം, ഒരു ഭാഷ ഇതൊക്കെയാവും വന്നു ഭവിച്ചേക്കുക- സുശിൽ മുന്നറിയിപ്പ്​ നൽകുന്നു.

Courtesy: The Juggernaut (www.jgnt.co)