ഇ​ട​മ​ല​ക്കു​ടിയും വോട്ട്​ ചെയ്​തു; കാ​ന​ന​പാ​ത കടന്ന്​ വോട്ട്​ ചെയ്യിച്ച്​ പോളിങ്​ ഉദ്യോഗസ്​ഥർ മലയിറങ്ങി

മൂ​ന്നാ​ര്‍: വോ​ട്ടെ​ടു​പ്പ്​ ക​ഴി​ഞ്ഞും 24 മ​ണി​ക്കൂ​െ​റ​ടു​ത്താ​ണ് ശ്ര​മ​ക​ര​മാ​യ ദൗ​ത്യം പൂ​ര്‍ത്തി​യാ​ക്കി സം​സ്ഥാ​ന​ത്തെ ആ​ദ്യ ഗോ​ത്ര​വ​ര്‍ഗ പ​ഞ്ചാ​യ​ത്താ​യ ഇ​ട​മ​ല​ക്കു​ടി​യി​ല്‍നി​ന്ന്​ പോ​ളി​ങ്​ ഉ​ദ്യോ​ഗ​സ്​​ഥ​ർ​ക്ക്​ മ​ട​ങ്ങാ​നാ​യ​ത്. സം​സ്ഥാ​ന​ത്തെ ത​ന്നെ ഏ​റ്റ​വും ദു​ര്‍ഘ​ട​പ്ര​ദേ​ശ​മാ​യ ഇ​ട​മ​ല​ക്കു​ടി​യി​ലെ തെ​ര​ഞ്ഞെ​ടു​പ്പ്​ പ്ര​ക്രി​യ പൂ​ര്‍ത്തി​യാ​ക്കി മ​ട​ങ്ങി​യ​ത്​ നൂ​റു​പേ​ര​ട​ങ്ങു​ന്ന സം​ഘ​മാ​ണ്.

ത​മി​ഴ്​​നാ​ട്​ പ്ര​ദേ​ശം ചു​റ്റി​മാ​ത്രം എ​ത്താ​ൻ ക​ഴി​യു​ന്ന നൂ​റ​ടി​ക്കു​ടി​യി​ലെ വോ​ട്ടെ​ടു​പ്പ് പൂ​ര്‍ത്തി​യാ​ക്കി മ​ട​ങ്ങാ​നാ​ണ്​ ഏ​റെ ബു​ദ്ധി​മു​ട്ടി​യ​ത്. 190 കി​ലോ​മീ​റ്റ​റി​ല​ധി​കം യാ​ത്ര​ചെ​യ്താ​ണ് നൂ​റ​ടി​ക്കു​ടി​യി​ല്‍ എ​ത്തി​യ​ത്. ത​മി​ഴ്‌​നാ​ട്ടി​ലെ വാ​ല്‍പ്പാ​റ​യി​ലൂ​ടെ ചെ​ങ്കു​ത്താ​യ കാ​ന​ന​പാ​ത ന​ട​ന്നു​വേ​ണം പോ​യി​വ​രാ​ൻ. തെ​ര​ഞ്ഞെ​ടു​പ്പ്​ സാ​മ​ഗ്രി​ക​ളു​മാ​യി വേ​ണം വ​ഴി​താ​ണ്ടാ​നെ​ന്ന​ത്​ ​ക്ലേ​ശ​മാ​യി. യാ​ത്ര ചെ​യ്യു​ന്ന​തി​ന് തി​രു​പ്പൂ​ര്‍ ക​ല​ക്ട​റു​ടെ പ്ര​ത്യേ​ക അ​നു​മ​തി വാ​ങ്ങി​. 65 പോ​ളി​ങ്​ ഉ​ദ്യോ​ഗ​സ്ഥ​രും 30ൽ ​ഏ​റെ പൊ​ലീ​സ് ഉ​ദ്യോ​ഗ​സ്ഥ​രു​മ​ട​ങ്ങു​ന്ന സം​ഘം 26 വാ​ഹ​ന​ങ്ങ​ളി​ലും ന​ട​ന്നു​മാ​ണ് സ്​​ഥ​ല​ത്തെ​ത്തി​യ​ത്.

മ​ഴ പെ​യ്ത​തി​നാ​ൽ ജീ​പ്പ് ചെ​ളി​യി​ല്‍ കു​ടു​ങ്ങി. ഉ​ദ്യോ​ഗ​സ്ഥ​ര്‍ ത​ള്ളി​ക്ക​യ​റ്റി. കു​ത്ത​നെ ക​യ​റ്റ​വും ക​രി​ങ്ക​ല്ലു​ക​ളും നി​റ​ഞ്ഞ റോ​ഡി​ലൂ​ടെ വാ​ഹ​ന​ങ്ങ​ള്‍ ക​യ​റാ​തെ വ​ന്ന​തോ​ടെ ദീ​ര്‍ഘ​ദൂ​രം ഇ​റ​ങ്ങി ന​ട​ക്കേ​ണ്ടി​ വ​ന്നു. ഇ​വി​ടെ പോ​ളി​ങ്​ 77.3 ശ​ത​മാ​ന​മാ​യി​രു​ന്നു. ക​ഴി​ഞ്ഞ ത​വ​ണ​ 76 ശ​ത​മാ​ന​ം. 26 കു​ടി​ക​ളി​ലാ​യി 13 വാ​ര്‍ഡു​ക​ളാ​ണ്​ ഇ​വിടെ. ഇ​ൻ​റ​ര്‍നെ​റ്റ് ക​ണ​ക്​​ഷ​നും മൊ​ബൈ​ല്‍ ഫോ​ണ്‍ റേ​ഞ്ചും ഇ​ല്ലാ​ത്ത സാ​ഹ​ച​ര്യ​ത്തി​ല്‍ വ​യ​ര്‍ലെ​സ് സെ​റ്റു​ക​ളെ​യാ​ണ് ആ​ശ​യ​വി​നി​മ​യ​ത്തി​നാ​യി ആ​ശ്ര​യി​ച്ച​ത്.