വെങ്കയ്യ നായിഡു: ദക്ഷിണേന്ത്യയിലെ ബി.ജെ.പിയുടെ വിശ്വസ്​തൻ

ന്യൂഡൽഹി: മുപ്പവരപ്പ്​ വെങ്കയ്യ നായിഡു എന്ന എം.വെങ്കയ്യ നായിഡു ബി.ജെ.പിയുടെ ദക്ഷിണേന്ത്യൻ മുഖമാണ്​. ഉ​ത്തരേന്ത്യൻ പാർട്ടിയായ ബി.ജെ.പിക്ക്​ ദക്ഷിണേന്ത്യയിൽ സ്വാധീനം ഉണ്ടാക്കുന്നതിൽ വെങ്കയ്യ നായിഡു നിർണായക പങ്ക്​ വഹിച്ചിട്ടുണ്ട്​. സാധാരണ കുടുംബത്തിൽ ജനിച്ച്​ ഉപരാഷ്​ട്രപതി പദം വരെയെത്താൻ വെങ്കയ്യ നായിഡുവിനെ സഹായിച്ചത്​  ആർ.എസ്​.എസുമായുള്ള ബന്ധമാണ്​​.

ആർ.എസ്​.എസിലൂടെയാണ്​ വെങ്കയ്യ നായിഡു പൊതുപ്രവർത്തനം ആരംഭിക്കുന്നത്​​. തുടർന്ന്​ എ.ബി.വി.പിയിലൂടെ വിദ്യാർഥി നേതാവായി. 1972ലെ ജയ്​ ആന്ധ്ര പ്രസ്ഥാനത്തിലൂടെയായിരുന്നു മുൻനിര രാഷ്​ട്രീയ​ത്തിലേക്കുള്ള വെങ്കയ്യയുടെ ചുവടുവെപ്പ്​. ജയപ്രകാശ്​ നാരായണ​​​​െൻറ അഴിമതിവിരുദ്ധ സമരങ്ങൾക്ക്​ ആന്ധ്രയിൽ നേതൃത്വം നൽകി നൽകിക്കൊണ്ട്​ അടിയന്തരാവസ്ഥക്കാലത്ത്​ ജയിലടയ്​ക്കപ്പെട്ടു. 1978-ലും 1983-ലും ആന്ധ്ര നിയമസഭാംഗമായി തെരഞ്ഞെടുക്കപ്പെട്ടു.

1998-ൽ കർണാടകയിൽ നിന്നുള്ള രാജ്യസഭാംഗമായതോടെയാണ്​ വെങ്കയ്യ ദേശീയരാഷ്​ട്രീയത്തി​​​​െൻറ പടവുകൾ കയറിയത്​. 2002 മുതൽ 2004 വരെ ബി.ജെ.പി ദേശീയ അധ്യക്ഷനായിരുന്നു. 1998 മുതൽ തുടർച്ചയായി രാജ്യസഭാംഗമായി പ്രവർത്തിക്കുന്നു.

1999-ൽ വാജ്​പേയി സർക്കാറിൽ കേന്ദ്ര ഗ്രാമ വികസന മന്ത്രിയായി. നരേന്ദ്രമോദി സർക്കാറിൽ നഗരവികസന മന്ത്രാലയത്തി​​​​െൻറയും വാർത്തവിനിമയ മന്ത്രാലയത്തി​​​​െൻറയും ചുമതലയാണ്​ വെങ്കയ്യ നായിഡു വഹിച്ചിരുന്നത്​.