ഗുജറാത്തിൽ ബാലറ്റ്​ പേപ്പർ ഉപയോഗിക്കണമെന്ന്​ അഖിലേഷ്​

അഹ്​മദാബാദ്​: ഗുജറാത്ത്​ നിയമസഭ തെരഞ്ഞെടുപ്പിൽ ഇലക്​ട്രോണിക്​ വോട്ടിങ്​ മെഷീനിൽ (ഇ.വി.എം) കൃത്രിമത്തിന്​ സാധ്യതയുള്ളതിനാൽ  ബാലറ്റ്​ പേപ്പർ ഉപയോഗിക്കണമെന്ന്​ സമാജ്​വാദി പാർട്ടി നേതാവും മുൻ യു.പി മുഖ്യമന്ത്രിയുമായ അഖിലേഷ്​ യാദവ്​ ആവശ്യ​െപ്പട്ടു. ഉത്തർപ്രദേശിലെ തദ്ദേശ തെരഞ്ഞെടുപ്പിൽ ഇലക്​ട്രോണിക്​ വോട്ടിങ്​ യന്ത്രം ഉപയോഗിച്ച സ്​ഥലങ്ങളിൽ ബി.ജെ.പി ജയിക്കുകയും ബാലറ്റ്​ പേപ്പറിൽ വോട്ടു ചെയ്​ത സ്​ഥലങ്ങളിൽ അവർക്ക്​ കനത്ത തിരിച്ചടി നേരിട്ടതായും അദ്ദേഹം മാധ്യമപ്രവർത്തകരോട്​ പറഞ്ഞു.
 

യന്ത്രത്തിൽ പോരായ്​മയുണ്ടായേക്കാമെന്ന്​ തെരഞ്ഞെടുപ്പ്​ കമീഷൻ തന്നെ വ്യക്​തമാക്കിയിരുന്നു​. യു.പിയിലെ കാൺപുർ ഉൾപ്പെടെ പലസ്​ഥലങ്ങളിലും മറ്റ്​ പാർട്ടികൾക്ക്​ വോട്ടുചെയ്​തവരുടെ വോട്ടുകൾ ബി.ജെ.പിക്കാണ്​ ലഭിച്ചത്​. ചിലയിടത്ത്​ സ്വതന്ത്ര സ്​ഥാനാർഥികൾക്ക്​ ഒറ്റ വോട്ടും ലഭിച്ചില്ല. സ്​ഥാനാർഥികളുടെയും കുടുംബാംഗങ്ങളുടെയ​ും വോട്ട്​ എവിടെ പോയെന്ന്​ അദ്ദേഹം​ ചോദിച്ചു. യന്ത്രത്തിലെ ക്രമക്കേടാണ്​ ഇത്​ സൂചിപ്പിക്കുന്നത്​. നീതിപൂർവവും സുതാര്യവുമായ തെരഞ്ഞെടുപ്പിന്​ ബാലറ്റ്​ പേപ്പർ ഉപയോഗിക്കണമെന്ന്​ അഖിലേഷ്​ ആവശ്യപ്പെട്ടു