ജോസിനെതിരെ രൂക്ഷവിമർശനം;​ വഞ്ചിച്ചുവെന്ന്​ ഉമ്മൻ ചാണ്ടി

കോട്ടയം: കോൺഗ്രസ് ജില്ല നേതൃയോഗത്തിൽ ജോസ്​ കെ.മാണിക്കെതിരെ രൂക്ഷവിമർശനം. കോൺഗ്രസിന്​ അർഹതപ്പെട്ട രാജ്യസഭ സീറ്റ്​ നൽകി മടക്കിക്കൊണ്ടുവന്ന ജോസ്​ കെ.മാണി മുന്നണിയോട്​ നീതികാട്ടിയില്ല. കെ.എം. മാണിയുടെ ആത്മാവിന്​ മുറിവേറ്റു. അദ്ദേഹത്തെ വിശ്വസിച്ച്​ ഒപ്പംനിന്ന ജനവിഭാഗത്തെ ജോസ്​ കെ.മാണി വഞ്ചിച്ചതായും യോഗം കുറ്റപ്പെടുത്തി.

ജോസ്​ കെ.മാണി പുറത്തുപോയത്​ തെരഞ്ഞെടുപ്പിൽ ​ബാധിക്കില്ലെന്ന്​ വിലയിരുത്തിയ യോഗം, ജോസ്​ പക്ഷം വിട്ടുവരുന്നവരെ മാന്യമായി ഉൾക്കൊള്ളാനും തീരുമാനിച്ചു. അടുത്തദിവസങ്ങളിൽ കൂടുതൽപേർ യു.ഡി.എഫ്​ പക്ഷത്തേക്ക്​ എത്തും. സീറ്റിലടക്കം ഇവർക്ക്​ പരിഗണന നൽകാനും ധാരണയായി.

കോൺഗ്രസിനെതിരെ ആരോപണങ്ങൾ ഉയർത്തിയാൽ ജോസി​െൻറ അഴിമതിക്കഥകൾ ഒരോന്നായി പുറത്തുവിടുമെന്നും യോഗത്തിൽ സംസാരിച്ച ചില നേതാക്കൾ പറഞ്ഞു. കോട്ടയത്തി​െൻറ മനസ്സ്​ യു.ഡി.എഫിനൊപ്പമാണ്​. ജോസ്​ കെ.മാണിക്കൊപ്പം വോട്ടുകൾ എൽ.ഡി.എഫ്​ പക്ഷ​േത്തക്ക്​​ പോകില്ലെന്നും യോഗത്തിൽ അഭിപ്രായം ഉയർന്ന​ു.

യു.ഡി.എഫ് വോട്ടുനേടി വിജയിച്ചശേഷം എൽ.ഡി.എഫിലേക്ക്​ കൂറുമാറിയ തോമസ് ചാഴിക്കാടൻ എം.പിയും എൻ. ജയരാജ്​ എം.എൽ.എയും രാജിവെക്കണമെന്നാവശ്യപ്പെട്ട്​ ജില്ലയിൽ 5000 കേന്ദ്രങ്ങളിൽ ചൊവ്വാഴ്​ച രാവിലെ 11ന്​ 'ജനകീയ വിചാരണ' സമരം നടത്താനും ജില്ല കോൺഗ്രസ് കമ്മിറ്റി യോഗം തീരുമാനിച്ചു.

വാർഡ് കോൺഗ്രസ് കമ്മിറ്റികളുടെ നേതൃത്വത്തിൽ ഓരോ വാർഡിലും അഞ്ചുവീതം കേന്ദ്രങ്ങളിലാണ് സമരം. നിയമസഭ തെരഞ്ഞെടുപ്പിൽ ഏറ്റുമാനൂരിൽ പരാജയപ്പെട്ട തോമസ് ചാഴിക്കാടൻ, കോൺഗ്രസ്​ പ്രവർത്തകരുടെ ആത്മാർത്ഥ ശ്രമഫലമായാണ്​ കോട്ടയം ലോക്​സഭ മണ്ഡലത്തിൽ വിജയിക്കാനായത്​​. ഇത്​ ചാഴികാടൻ മറക്കരുതെന്നും യോഗം ചൂണ്ടിക്കാട്ടി.

കെ.പി.സി.സിയുടെ നിർദേശത്തിനനുസരിച്ച്​ പഞ്ചായത്ത്​ തലങ്ങളിൽ തെരഞ്ഞെടുപ്പുമായി ബന്ധപ്പെട്ട്​ ഒമ്പതംഗ കമ്മിറ്റികൾ രൂപവത്​കരിക്കാനും തീരുമാനിച്ചു.

ജോസ്​ കെ.മാണി കോൺഗ്രസിനെ വഞ്ചിച്ചതായി യോഗം ഉദ്​ഘാടനം ചെയ്​ത ഉമ്മൻ ചാണ്ടി പറഞ്ഞു. കേരള കോൺഗ്രസിന്​ അർഹിക്കുന്നതിൽ കൂടുതൽ നൽകി. കോൺഗ്രസിന്​ അർഹതപ്പെട്ട രാജ്യസഭ സീറ്റാണ്​ ജോസ്​കെ.മാണിക്ക്​ നൽകിയത്​. ഇത്​ രാജി​െവച്ച്​ യു.ഡി.എഫിനെ മാത്രമല്ല, ​ജനങ്ങളെ വഞ്ചിച്ചു.

വഞ്ചനയാണ്​ കാട്ടിയത്​. തെരഞ്ഞെടുപ്പുകളിൽ സജീവമാകണമെന്നും ഉമ്മൻ ചാണ്ടി യോഗത്തിൽ പറഞ്ഞു. ഇടത്തേക്കു​പോയ ജോസ്​ പക്ഷ ജനപ്രതിനിധികൾ രാജിവെക്കുംവരെ സമരം തുടരും.'ജനകീയ വിചാരണ'യുടെ ജില്ലതല ഉദ്ഘാടനം തിരുവഞ്ചൂർ രാധാകൃഷ്ണൻ എം.എൽ.എ കോട്ടയം ഗാന്ധിസ്ക്വയറിൽ നടത്തുമെന്ന് ഡി.സി.സി പ്രസഡൻറ്​ ജോഷി ഫിലിപ് അറിയിച്ചു.