ബി.ജെ.പിയുടെ എൻ.സി.പി പ്രീണനം; ശിവസേന വിമതർക്ക് അതൃപ്തി, ഉദ്ധവിലേക്ക് മടങ്ങുമെന്ന് അഭ്യൂഹം

മുംബൈ: എൻ.സി.പിയെ പിളർത്തി അജിത് പവാറിന്‍റെ നേതൃത്വത്തിൽ ഒരു വിഭാഗത്തെ ഒപ്പം കൂട്ടിയതിന് പിന്നാലെ മഹാരാഷ്ട്രയിലെ ബി.ജെ.പി-ശിവസേന (ഷിൻഡെ) സഖ്യ സർക്കാറിൽ അതൃപ്തി പുകയുന്നതായി റിപ്പോർട്ട്. എൻ.സി.പിയെ പിളർത്തിയെത്തിയ വിമത നേതാവ് അജിത് പവാറിന് ഉപമുഖ്യമന്ത്രി സ്ഥാനവും എട്ട് എം.എൽ.എമാർക്ക് മന്ത്രി പദവിയും ബി.ജെ.പി നൽകിയിരുന്നു. എൻ.സി.പിയോട് ബി.ജെ.പി കാട്ടുന്ന പ്രീണന നിലപാടിൽ ശിവസേന ഏക്നാഥ് ഷിൻഡെ വിഭാഗത്തിന് അതൃപ്തിയുള്ളതായാണ് റിപ്പോർട്ട്.

എൻ.സി.പി വിമതർക്ക് ശക്തിതെളിയിക്കാൻ സാധിച്ചാൽ ബി.ജെ.പിക്ക് തങ്ങളെ വേണ്ടാതെയാകും എന്ന ഭീതി ഷിൻഡെ വിഭാഗക്കാർക്കുണ്ട്. ശിവസേനയെ പിളർത്തി ഷി​ൻ​ഡെ​യോ​ടൊ​പ്പം പോ​യ എം.​എ​ൽ.​എ​മാ​ർ അ​യോ​ഗ്യ​ത ഭീ​ഷ​ണി​യു​ടെ നി​ഴ​ലി​ലാണിപ്പോൾ. തങ്ങൾ അയോഗ്യരാക്കപ്പെടുകയാണെങ്കിൽ രാഷ്ട്രീയ ഭാവി തന്നെ അനിശ്ചിതത്വത്തിലാകുമെന്ന ആശങ്കയും ഷിൻഡെ പക്ഷത്തിനുണ്ട്. ഷി​ൻ​ഡെ പ​ക്ഷ​ക്കാ​ർ​ക്ക് അയോഗ്യതയിലൂടെ നി​യ​മ​സ​ഭാം​ഗ​ത്വം ന​ഷ്ട​മാ​യാ​ലും തങ്ങൾക്ക് മേ​ൽ​ക്കൈ​യു​ള്ള സ​ർ​ക്കാ​റി​ന് അ​ധി​കാ​രം നി​ല​നി​ർ​ത്താ​നുള്ള നീക്കമാണ് ബി.​ജെ.​പി​ ഇപ്പോൾ നടത്തുന്നതെന്ന് ചൂണ്ടിക്കാട്ടപ്പെടുന്നുണ്ട്.

മുഖ്യമന്ത്രി ഏക്നാഥ് ഷിൻഡെയുടെ നേതൃത്വത്തിൽ ശിവസേന വിമതർ ഉദ്ധവ് താക്കറെയുടെ കക്ഷിയിലേക്ക് തന്നെ തിരിച്ചുപോകുമെന്ന് ബി.ജെ.പി നേതാവ് സുബ്രമണ്യൻ സ്വാമി പറയുന്നു. താൻ മുംബൈയിലാണുള്ളതെന്നും, തങ്ങളെ ഉപയോഗിച്ച ശേഷം എൻ.സി.പിയെ പ്രീണിപ്പിക്കുന്ന ബി.ജെ.പിയുടെയും മോദിയുടെയും നയത്തിൽ ശിവസേന വിമതർക്ക് അതൃപ്തിയുണ്ടെന്നും സുബ്രമണ്യൻ സ്വാമി ട്വീറ്റിൽ പറഞ്ഞു.

ഉദ്ധവ് താക്കറെ മുഖ്യമന്ത്രിയായ മ​ഹാ​വി​കാ​സ് അ​ഗാ​ഡി മ​ന്ത്രി​സ​ഭ​യി​ൽ അം​ഗ​മാ​യി​രു​ന്ന ഏക്​നാ​ഥ് ഷി​ൻ​ഡെ 39 എം.​എ​ൽ.​എ​മാ​ർ​ക്കൊ​പ്പം 2022 ജൂ​ൺ 29നാണ് ​ശി​വ​സേ​ന​യെ പി​ള​ർ​ത്തി ബി.ജെ.പിക്കൊപ്പം ചേർന്നത്. വി​ശ്വാ​സ വോ​ട്ടെ​ടു​പ്പ് തേ​ട​ണ​മെ​ന്ന അ​ന്ന​ത്തെ ഗ​വ​ർ​ണറുടെ നി​ർ​ദേ​ശം സ്റ്റേ​ചെ​യ്യാ​ൻ സു​പ്രീം​കോ​ട​തി കൂ​ട്ടാ​ക്കാ​തിരുന്ന​തോ​ടെ ഉ​ദ്ധ​വിന് രാ​ജി​വെ​ക്കേണ്ടിവന്നിരുന്നു. തുടർന്ന് ബി.ജെ.പിയുമായി വിലപേശിയാണ് ഏ​ക്​നാ​ഥ് ഷി​ൻ​ഡെ മു​ഖ്യ​മ​ന്ത്രി​യാ​യത്. വി​ശ്വാ​സവോ​ട്ടി​ന് നി​ർ​ദേ​ശം ന​ൽ​കി​യ ഗ​വ​ർ​ണ​റു​ടെ ന​ട​പ​ടി ഭ​ര​ണ​ഘ​ട​നാ വി​രു​ദ്ധ​മാ​ണെ​ന്ന് 11 മാ​സ​ങ്ങ​ൾ​ക്ക് ശേ​ഷം സു​പ്രീം​കോ​ട​തി വ്യ​ക്ത​മാ​ക്കിയിരുന്നു. വിമത ശിവസേനക്കാർ അയോഗ്യതാ ഭീതിയിൽ നിൽക്കെയാണ് സമാന നീക്കത്തിലൂടെ എൻ.സി.പിയെ പിളർത്തി ഒരു പക്ഷത്തെ ബി.ജെ.പി ഒപ്പം കൂട്ടിയിരിക്കുന്നത്.