ലോകത്ത് ആദ്യമായി 3D പ്രിന്റഡ് റോക്കറ്റ് വിക്ഷേപിച്ചു; ഭ്രമണപഥത്തിൽ പ്രവേശിക്കുന്നതിൽ പരാജയപ്പെട്ടു

​ഫ്ലോറിഡ: ലോകത്താദ്യത്തെ 3D പ്രിന്റഡ് റോക്കറ്റ് ടെറാൻ-1 വിജയകരമായി വിക്ഷേപിച്ചു. മൂന്നാം പരിശ്രമത്തിലാണ് റോക്കറ്റ് വിക്ഷേപണം വിജയകരമായത്. എന്നാൽ, റോക്കറ്റ് അതിന്റെ ഭ്രമണ പഥത്തിൽ പ്രവേശിക്കുന്നതിൽ പരാജയപ്പെട്ടു. വിക്ഷേപണ വാഹനത്തിൽ നിന്ന് വേർപ്പെടുന്നതിന്റെ രണ്ടാം ഘട്ടമാണ് പരാജയമായതെന്ന് എ.എഫ്.പി റി​പ്പോർട്ട് ചെയ്തു.

റോക്കറ്റ് ഭ്രമണ പഥത്തിൽ എത്തുന്നതിൽ പരാജയപ്പെട്ടെങ്കിലും വിക്ഷേപണം വൻ വിജയമായിരുന്നുവെന്ന് ഇതിനു പിന്നിൽ പ്രവർത്തിച്ച ബഹിരാകാശ കമ്പനി റിലേറ്റിവിറ്റി സ്​പേസ് അറിയിച്ചു. 3D പ്രിന്റഡ് റോക്കറ്റ് വിക്ഷേപണം സംബന്ധിച്ച് ഗവേഷണാർഥമാണ് ടെറാൻ -1 വിക്ഷേപിച്ചത്.

‘ഇന്നത്തെ വിക്ഷേപണം റിലേറ്റിവിറ്റിയുടെ 3D-പ്രിന്റഡ് റോക്കറ്റ് സാങ്കേതികവിദ്യകൾ റോക്കറ്റ് വിക്ഷേപണത്തിന് പര്യാപ്തമാ​ണെന്ന് തെളിയിച്ചു. ഇത് അടുത്ത റോക്കറ്റ് ടെറാൻ ആറിൽ നന്നായി പ്രയോഗിക്കും. പ്രിന്റഡ് രൂപങ്ങളിൽ പ്രയോഗിക്കാവുന്ന ഏറ്റവും ഉയർന്ന മർദമായ മാക്സ് ക്യുവിലൂടെയാണ് ടെറാൻ 1 കടന്നുപോയത്. അത് വിജയകരമായിരുന്നു. ഇത് ഞങ്ങളുടെ പുതിയ നിർമാണ രീതി മികച്ചതാണെന്നതിന്റെ ഏറ്റവും നല്ല തെളിവാണ്. - റിലേറ്റിവിറ്റി സ്പേസ് ട്വീറ്റ് ചെയ്തു.

‘ഫ്ലൈറ്റ് ഡാറ്റ വിലയിരുത്തുകയും വരും ദിവസങ്ങളിൽ അതിന്റെ വിവരങ്ങൾ പൊതുജനങ്ങളെ അറിയിക്കുകയും ചെയ്യും’ -കമ്പനി പറഞ്ഞു.

33 മീറ്റർ നീളമുള്ള ടെറാൻ 1 ന്റെ ഒമ്പത് എഞ്ചിനുകളടക്കം 85 ശതമാനം ഭാഗവും 3D പ്രിന്റഡ് ആണ്. ഇത് റോക്കറ്റ് നിർമാണ ചെലവ് ഗണ്യമായി കുറക്കുമെന്നാണ് കരുതുന്നത്. ടെറാൻ ആറിൽ 95 ശതമാനവും 3D പ്രിന്റഡായി ഇറക്കാനാണ് റിലേറ്റിവിറ്റി സ്​പേസിന്റെ തീരുമാനം.