സൂര്യന്റെ വലിയ ഭാഗം അകന്ന് ചുഴിയായി മാറി; അമ്പരന്ന് ശാസ്ത്രജ്ഞർ

ശാസ്ത്രജ്ഞരെ എന്നും ഭ്രമിപ്പിക്കുന്ന ഒന്നാണ് സൂര്യൻ. ഇപ്പോൾ സൂര്യനിലുണ്ടായിരിക്കുന്ന മാറ്റം ശാസ്ത്രജ്ഞരെ അമ്പരപ്പിച്ചിരിക്കുകയാണ്. സൂര്യന്റെ ഒരു വലിയ ഭാഗം അതിന്റെ ഉപരിതലത്തിൽ നിന്ന് വിഘടിച്ച് പോയിരിക്കുകയാണ്. അത് ഉത്തരധ്രുവത്തിന് ചുറ്റും വലിയ ചുഴലിക്കാറ്റ് സൃഷ്ടിച്ചിരിക്കുകയാണ്. ഈ പ്രതിഭാസം എങ്ങനെ സംഭവിച്ചു എന്നറിയാനുള്ള ശ്രമത്തിലാണ് ശാസ്ത്രജ്ഞർ.

നാസയുടെ സോളാർ ഡൈനാമിക് ഒബ്സർവേറ്ററി ആണ് ഇതിന്റെ വിഡിയോ പകർത്തിയത്. ബഹിരാകാശ വിദഗ്ധയായ ഡോ. തമിത സ്കോവ് വിഡിയോ ട്വിറ്ററിൽ പങ്കുവെച്ചു.

സൂര്യന്റെ ഉപരിതലത്തിൽ നിന്ന് പുറത്തേക്ക് വ്യാപിച്ചുകിടക്കുന്ന ഭാ​ഗമാണ് വേർപെട്ടതെന്നും ഇത്തരം പ്രതിഭാസങ്ങൾ മുമ്പും ഉണ്ടായിട്ടുണ്ടെന്നാണ് നാസ പറയുന്നത്. എങ്കിലും പുതിയ പ്രതിഭാസത്തിൽ ശാസ്ത്രലോകത്തിന് ആശങ്കയുണ്ട്.

സൗരജ്വാലകൾ പുറപ്പെടുവിക്കുന്നത് ചില സമയങ്ങളിൽ ഭൂമിയിലെ ആശയവിനിമയത്തെ ബാധിക്കുമെന്നും ശാസ്ത്രലോകം പറയുന്നു.

സൂര്യന്റെ വടക്കൻ പ്രൊമിനൻസിൽ നിന്നാണ് ഒരുഭാ​ഗം പ്രധാന ഫിലമെന്റിൽ നിന്ന് വേർപെട്ടത്. ശേഷം സൂര്യന്റെ ഉത്തരധ്രുവത്തിന് ചുറ്റും ചുഴി രൂപത്തിൽ വേർപ്പെട്ട ഭാ​ഗം കറങ്ങുകയാണെന്നും ഡോ. സ്കോവ് ട്വീറ്റ് ചെയ്തു. വേർപെട്ട ഭാ​ഗത്തിന് ഏകദേശം 60 ഡിഗ്രി അക്ഷാംശത്തിൽ ധ്രുവത്തെ ചുറ്റാൻ ഏകദേശം എട്ടുമണിക്കൂർ സമയമെടുക്കുന്നുണ്ടെന്ന് നിരീക്ഷണത്തിൽ നിന്ന് വ്യക്തമായതായി സ്കോവ് പറഞ്ഞു.