സ്പെ​യ്ഡെ​ക്സ് ഡോക്കിങ്ങിൽ കൃത്യത പ്രധാനം; പരീക്ഷണം ആവർത്തിക്കുമെന്ന് ഐ.എസ്.ആർ.ഒ

ബംഗളൂരു: സ്പെ​യ്ഡെ​ക്സ് ഉ​പ​ഗ്ര​ഹ​ങ്ങ​ൾ കൂ​ട്ടി​യോ​ജി​പ്പി​ക്കുന്ന ഡോ​ക്കി​ങ് പ്രക്രിയ വീണ്ടും ആവർത്തിക്കാൻ ഐ.എസ്.ആർ.ഒ തയാറെടുക്കുന്നതായി റിപ്പോർട്ട്. ഡോക്കിങ്ങിന്‍റെ കൃത്യത ഉറപ്പാക്കുന്നതിന്‍റെ ഭാഗമായാണ് കൂ​ട്ടി​യോ​ജി​പ്പി​ക്കൽ പരീക്ഷണം നടത്താനുള്ള ഐ.എസ്.ആർ.ഒയുടെ നീക്കം.

സ്‌പേസ് ഡോക്കിങ് എക്‌സ്‌പെരിമെന്‍റിന് (സ്പെ​യ്ഡെ​ക്സ്) മേൽനോട്ടം വഹിക്കുന്ന യു.ആർ റാവു സാറ്റലൈറ്റ് സെന്‍റർ (യു.ആർ.എസ്‌.സി) ഡയറക്‌ടർ എം. ശങ്കരൻ ആണ് ഇക്കാര്യം അറിയിച്ചത്. സ്പെ​യ്ഡെ​ക്സിൽ തുടർ പരീക്ഷണം നടത്തുന്നതിന് മുമ്പ് കൂടുതൽ ഡോക്കിങ് പരീക്ഷണത്തിലൂടെ പൂർണതയും കൃത്യതയും കൈവരിക്കാനാണ് ശാസ്ത്രജ്ഞരുടെ ശ്രമം.

'100 മീറ്ററിൽ കൂടാത്ത/കുറയാത്ത ദൂരത്തിൽ ഉപഗ്രഹങ്ങളെ വേർതിരിക്കാനാണ് ഐ.എസ്.ആർ.ഒ പദ്ധതി തയാറാക്കുന്നത്. തുടർന്ന് വീണ്ടും ഉപഗ്രഹങ്ങളുടെ കൂട്ടിയോജിപ്പിക്കൽ നടത്തും. ഡോക്കിങ്ങിലെ കൃത്യത ഉറപ്പാക്കേണ്ടത് പ്രധാനമാണ്. എത്രമാത്രം കൃത്യതയോടെ ഡോക്കിങ് നടത്താമെന്നും ഈ പ്രക്രിയ എത്രമാത്രം മെച്ചപ്പെടുത്താൻ സാധിക്കുമെന്നും വിലയിരുത്തും. പരീക്ഷണങ്ങൾക്ക് ഇന്ധന ഉപഭോഗം തടസമാകില്ല' -എം. ശങ്കരൻ വ്യക്തമാക്കി.

ഡിസംബർ 30ന് ആ​ന്ധ്ര​പ്ര​ദേ​ശി​ലെ ശ്രീ​ഹ​രി​ക്കോ​ട്ട​യി​ൽ നി​ന്ന് പി.​എ​സ്.​എ​ല്‍.​വി സി60 ​റോ​ക്ക​റ്റിൽ വിക്ഷേപിച്ച സ്പെ​യ്ഡെ​ക്സ് ഉപഗ്രഹങ്ങളുടെ ഡോ​ക്കി​ങ് (കൂട്ടിയോജിപ്പിക്കൽ) ജനുവരി 16നാണ് വിജയകരമായി പൂർത്തിയാക്കിയത്. 220 കി​ലോ​ഗ്രാം വീ​തം ഭാ​ര​മു​ള്ള ചേ​സ​ര്‍ (എ​സ്.​ഡി.​എ​ക്‌​സ്. 01), ടാ​ര്‍ഗ​റ്റ് (എ​സ്.​ഡി.​എ​ക്‌​സ്. 02) ഉ​പ​ഗ്ര​ഹ​ങ്ങ​ളെ ഡോ​ക്കി​ങ്ങിലൂടെയാണ് കൂട്ടിയോജിപ്പിച്ചത്.

വൃ​ത്താ​കൃ​തി​യി​ലു​ള്ള ഭ്ര​മ​ണ​പ​ഥ​ത്തിൽ ഭൂ​മി​യെ ചു​റ്റു​ന്ന​തി​നി​ടെ ഘ​ട്ടം​ഘ​ട്ട​മാ​യി അ​ക​ലം കു​റ​ച്ചു​കൊ​ണ്ടു ​വ​ന്ന​ ശേഷമാണ് ഉപഗ്രഹങ്ങൾ കൂ​ട്ടി​യോ​ജി​പ്പിച്ചത് (ഡോ​ക്കി​ങ്). ഇന്‍റർനാഷണൽ ഡോക്കിങ് സിസ്റ്റം സ്റ്റാൻഡേർഡ് (ഐ.ഡി.എസ്.എസ്) ഉൾപ്പെടെ അന്തർ ദേശീയ മാനദണ്ഡം പ്രകാരം വിന്യസിച്ച പെറ്റൽ അധിഷ്ഠിത ഡോക്കിങ് സിസ്റ്റം ആണ് ഡോക്കിങ്ങിനായി ഐ.എസ്.ആർ.ഒ ഉപയോഗിച്ചത്.

ഡോ​ക്കി​ങ് പൂ​ർ​ത്തി​യാക്കിയ ഇ​രു ഉ​പ​ഗ്ര​ഹ​ങ്ങ​ളും ത​മ്മി​ലെ ഊ​ർ​ജ കൈ​മാ​റ്റം സം​ബ​ന്ധി​ച്ച് ശാസ്ത്രജ്ഞർ നി​രീ​ക്ഷി​ക്കുകയാണ്. കൂ​ട്ടി​​ച്ചേ​ർ​ത്ത ശേ​ഷം ത​ട​സമി​ല്ലാ​തെ ഉപഗ്രഹങ്ങൾ ഒ​റ്റ പേ​ലോ​ഡാ​യി പ്ര​വ​ർ​ത്തി​ക്കു​ക​യും അ​ൺ​ഡോ​ക്കി​ങ്ങി​ന് ശേ​ഷം ഇ​വ പൂ​ർ​വസ്ഥി​തി​യി​ൽ പ്ര​വ​ർ​ത്തി​ക്കു​ക​യും ചെ​യ്യു​ക എ​ന്ന​ത് പ്ര​ധാ​ന​മാ​ണ്. അ​ൺ​ഡോ​ക്കി​ങ്ങി​ന് ശേ​ഷം ര​ണ്ടു വ്യ​ത്യ​സ്ത ഉ​പ​ഗ്ര​ഹ​ങ്ങ​ളാ​യി ഇ​വ ര​ണ്ട്​ വ​ര്‍ഷ​ത്തോ​ളം പ്ര​വ​ര്‍ത്തി​ക്കും.

2035ഓ​ടെ ബ​ഹി​രാ​കാ​ശ​ത്ത് സ്വ​ന്തം നി​ല​യം സ്ഥാ​പി​ക്കു​ക​ എ​ന്ന ച​രി​ത്ര ദൗ​ത്യ​ത്തി​ലേ​ക്ക് നി​ർ​ണാ​യ​ക ചു​വ​ടുവെപ്പാ​യാണ് ഐ.​എ​സ്.​ആ​ര്‍.​ഒ​യു​ടെ സ്പെ​യ്ഡെ​ക്സ് വി​ക്ഷേ​പണം. ചേ​സ​ര്‍, ടാ​ര്‍ഗ​റ്റ് ഉ​പ​ഗ്ര​ഹ​ങ്ങ​ളെ കൂടാതെ 24 പ​രീ​ക്ഷ​ണോ​പ​ക​ര​ണ​ങ്ങ​ളും സ്പെ​യ്ഡെ​ക്സ് ദൗ​ത്യ​ത്തി​ലുണ്ട്. റോ​ക്ക​റ്റി​ന്‍റെ മു​ക​ള്‍ഭാ​ഗ​ത്തു​ള്ള ഓ​ര്‍ബി​റ്റ​ല്‍ എ​ക്‌​സ്പെ​രി​മെ​ന്റ​ല്‍ മൊ​ഡ്യൂ​ളി​ലാ​ണ് (POEM) ഈ ​ഉ​പ​ക​ര​ണ​ങ്ങ​ള്‍ ഭൂ​മി​യെ ​ചു​റ്റു​ക.